លោក សម រង្ស៊ី នឹងវិល ត្រឡប់ មកដល់ កម្ពុជាវិញ នៅយប់ ថ្ងៃច័ន្ទ ទី១៦ វិច្ឆិកា
RFA / វិទ្យុ អាស៊ី សេរី | ១៥ វិច្ឆិកា ២០១៥
មេដឹកនាំគណបក្សសង្គ្រោះជាតិ លោក សម រង្ស៊ី (ឆ្វេង) និង លោក
កឹម សុខា ថ្លែងទៅកាន់ពលរដ្ឋនៅខាងមុខរដ្ឋសភា កាលពីព្រឹកថ្ងៃទី១០
ធ្នូ ២០១៤។ RFA/Tin Zakariya
មន្ត្រី ជាន់ខ្ពស់ គណបក្ស សង្គ្រោះជាតិ ឲ្យដឹងថា, ប្រធាន គណបក្ស ជំទាស់ អាច នឹងមកដល់ កម្ពុជា វិញ ដូចការ គ្រោងទុក ប្រសិនបើ ពុំមាន ការប្រែប្រួល ណាមួយ ជាចាំបាច់ ទេ។ ការវិល ត្រឡប់ មក កម្ពុជា វិញនេះ គឺ បន្ទាប់ ពីតុលាការ បានចេញ ដីកា ចាប់ខ្លួន លោក សម រង្ស៊ី តាមបណ្ដឹង របស់ លោក ហោ ណាំហុង កាល ពី៧ឆ្នាំ មុន ក្រោយ ពីលោក ហ៊ុន សែន ព្រមានថា, លោក នឹងមិន ជួយសម្រួល ដល់ការ លើកលែងទោស ដល់លោក សម រង្ស៊ី ទៀតឡើយ។ អ្នកច្បាប់ របស់ អង្គការ មិនមែន រដ្ឋាភិបាល ចាត់ទុក ថា, នេះ ជាការ អនុវត្ត ដែលផ្ទុយ ពីច្បាប់, ហើយ ថា, ដីកា ចាប់ខ្លួននេះ ជាហេតុផល នយោបាយ។
មន្ត្រី ជាន់ខ្ពស់ គណបក្ស ជំទាស់ បញ្ជាក់ថា, លោក សម រង្ស៊ី នឹងវិល ត្រឡប់ មកដល់ កម្ពុជា វិញ នៅម៉ោង ១០យប់ ថ្ងៃទី១៦ វិច្ឆិកា និងត្រូវ ចុះចត នៅអាកាសយានដ្ឋាន អន្តរជាតិ ភ្នំពេញ។
លោក អេង ឆៃអ៊ាង មន្ត្រី ជាន់ខ្ពស់ គណបក្ស សង្គ្រោះជាតិ ឲ្យដឹង នៅថ្ងៃ ទី១៥ វិច្ឆិកា ថា, រហូត មកដល់ ពេលនេះ, លោក សម រង្ស៊ី កំពុង ព្យាយាម ទំនាក់ទំនង តាមទូរស័ព្ទ ជាមួយ លោក ស ខេង ឧបនាយក រដ្ឋមន្ត្រី និងជារដ្ឋមន្ត្រី ក្រសួង មហាផ្ទៃ ដើម្បី បញ្ចៀស កុំ ឲ្យមាន អំពើហិង្សា កើតឡើង, ហើយ បើ មានការ ចាប់ខ្លួនមែន លោក នឹងប្រគល់ខ្លួន ឲ្យសមត្ថកិច្ច មិនចាំបាច់បង្ខំ នោះទេ។ ម្យ៉ាងវិញទៀត សកម្មជន គណបក្ស ជំទាស់ គឺ ខាងគណបក្ស ពុំ បានជូន ដំណឹង ដើម្បី ឲ្យរៀបចំ ចាំទទួល ណាមួយ នោះដែរ។
លោក សម រង្ស៊ី ត្រូវ បានតំណាង អយ្យការ អមសាលា ដំបូង រាជធានីភ្នំពេញ លោក ស៊ឺ វណ្ណនី ចេញដីកា ឲ្យចាប់ខ្លួន កាលពីថ្ងៃ ទី១៣ វិច្ឆិកា។ បណ្ដឹង ក្រោមបទចោទ បទបរិហារកេរ្តិ៍ ជាសាធារណៈ និងញុះញង់ ឲ្យមាន ការរើសអើង ដែលបាន បន្សល់ទុក តាំងពី៧ឆ្នាំ មុន របស់ លោក ហោ ណាំហុង នេះ គឺ បន្ទាប់ពី លោក ហ៊ុន សែន ប្រតិកម្មភ្លាមៗនៅពេលមានសារឆ្លើយឆ្លងគ្នារវាងលោកនាយក រដ្ឋមន្ត្រី និងលោក សម រង្ស៊ី តាមបណ្ដាញសង្គម (Facebook) ចាប់ពីថ្ងៃ ទី១១ វិច្ឆិកា មក។
បើទោះជាបែបណា លោក នី ចរិយា អនុប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក (ADHOC) យល់ឃើញថា នេះជាការអនុវត្តដែលរំលោភទាំងស្រុងប្រឆាំងទៅនឹងច្បាប់បោះឆ្នោត ដែលបានធានារួចហើយនូវអភ័យឯកសិទ្ធិដ៏ពេញលេញរបស់មេបក្សជំទាស់។
ច្បាប់បោះឆ្នោតថ្មីមាត្រា២៤ ចែងថា ជនដែលត្រូវបានតុលាការផ្ដន្ទាទោសដាក់ពន្ធនាគារពីបទឧក្រិដ្ឋ ឬបទមជ្ឈិម ហើយដែលមិនទាន់មាននីតិសម្បទាឡើងវិញ ឬជនដែលត្រូវផ្ដន្ទាទោស ត្រូវដកសិទ្ធិបោះឆ្នោត ឬដកសិទ្ធិឈរឈ្មោះឲ្យគេបោះឆ្នោត។ ស្ថិតក្រោមហេតុផលនេះ លោក នី ចរិយា អះអាងថា ការពិតទោសទាំងអម្បាលម៉ានរបស់ លោក សម រង្ស៊ី ត្រូវបានផុតរលត់រួចទៅហើយក្រោយពី គ.ជ.ប បានផ្ដល់នីតិសម្បទាឲ្យឈរឈ្មោះជាអ្នកតំណាងរាស្ត្រឡើងវិញ នៅមុនការបោះឆ្នោតកាលពីឆ្នាំ២០១៣។
បើទោះជាបែបនេះក៏ដោយចុះ មន្ត្រីរដ្ឋាភិបាលអះអាងហើយថា គេបានត្រៀមរួចជាស្រេចក្នុងការអនុវត្តទៅតាមច្បាប់ ក្នុងការចាប់ខ្លួន លោក សម រង្ស៊ី។ ជុំវិញរឿងនេះ លោក ផៃ ស៊ីផាន មន្ត្រីនាំពាក្យទីស្ដីការគណៈរដ្ឋមន្ត្រី ត្រូវបានកាសែតក្នុងស្រុកចុះផ្សាយថា រដ្ឋាភិបាលពុំបានចេញបម្រាមដល់ក្រុមអាកាសចរណ៍ស៊ីវិល មិនឲ្យលក់សំបុត្រយន្តហោះសម្រាប់ លោក សម រង្ស៊ី វិលត្រឡប់មកកម្ពុជា វិញទេ។
តាមបណ្ដឹងបទបរិហារកេរ្តិ៍ជាសាធារណៈ និងញុះញង់ឲ្យមានការរើសអើង ដែលបានប្រព្រឹត្តកាលពីឆ្នាំ២០០៨ នោះ លោក សម រង្ស៊ី ធ្លាប់ឈ្នះក្ដី ហើយតុលាការកំពូលរបស់ប្រទេសបារាំង ក៏បានចេញសាលដីការួចហើយដែរឲ្យ លោក ហោ ណាំហុង ចាញ់ក្តី បន្ទាប់ពីបណ្ដឹងដ៏ចម្រូងចម្រាសនេះត្រូវបានតុលាការក្រុងភ្នំពេញ ជំនុំជម្រះឲ្យ លោក ហោ ណាំហុង ឈ្នះក្ដីលើ លោក សម រង្ស៊ី ជាបន្តបន្ទាប់មក។
លោក ជូង ជូងី មេធាវីការពារក្ដីឲ្យ លោក សម រង្ស៊ី និយាយថា នេះជាកំហុសបច្ចេកទេសរបស់តុលាការក្រុងភ្នំពេញ និងជាចេតនានយោបាយ ដើម្បីទុកចាត់វិធានការប្រឆាំងមេបក្សជំទាស់។ លោកបន្តថា តាមពិតផ្អែកលើគោលការណ៍ច្បាប់ កាលណាព្រះមហាក្សត្រព្រះអង្គព្រះរាជទានលើកលែងទោសហើយ គឺបណ្ដឹងក៏ត្រូវរលត់ទៅតាមនោះដែរ៕
No comments:
Post a Comment