មន្ត្រី សិទ្ធិមនុស្ស ខេត្ត ពោធិ៍សាត់ រិះគន់ អាជ្ញាធរ ដកហូត ដីពលរដ្ឋ ឲ្យសមាគម វៀតណាម កប់សព
RFA / វិទ្យុ អាស៊ី សេរី | ៧ វិច្ឆិកា ២០១៥
វាលកប់សពរបស់ជនជាតិវៀតណាម
ដែលពលរដ្ឋអះអាងថាអាជ្ញាធរយកទៅឲ្យសមាគមវៀតណាម គ្រប់គ្រង
និងធ្វើប្លង់កម្មសិទ្ធិ ដើម្បីកប់សពជនជាតិវៀតណាម ឋិតនៅភូមិតាស្ដី
ឃុំវាល ស្រុកកណ្ដៀង ខេត្តពោធិ៍សាត់។ រូបថតថ្ងៃទី៤ ខែវិច្ឆិកា
ឆ្នាំ២០១៥ / RFA/Chin Chetha
មន្ត្រី អង្គការ ក្រៅរដ្ឋាភិបាល និងប្រជាពលរដ្ឋ ខេត្ត ពោធិ៍សាត់ រិះគន់ អាជ្ញាធរ ដែលយកដី ទំហំ ប្រមាណ ១ហិកតារ របស់ ពលរដ្ឋ បីគ្រួសារ រស់នៅ ភូមិ តាស្ដី នៃឃុំ វាល ស្រុក កណ្ដៀង ទៅឲ្យ សមាគម វៀតណាម គ្រប់គ្រង និងធ្វើ ប្លង់កម្មសិទ្ធិ ដើម្បី កប់សព ជនជាតិ វៀតណាម។
អ្នកភូមិតាស្ដី ពីរគ្រួសារក្នុងចំណោមបីគ្រួសារ ដែលកំពុងមានជម្លោះដីធ្លីជាមួយសមាគមវៀតណាម បានបង្ហាញស្ថានភាពដីមានជម្លោះនៅក្រោយផ្ទះរបស់ពួកគាត់ ដល់មន្ត្រីអង្គការក្រៅរដ្ឋាភិបាល និងអ្នកសារព័ត៌មាន កាលពីថ្ងៃទី៤ ខែវិច្ឆិកា។ នៅលើផ្ទៃដីប្រមាណ ១០០ម៉ែត្រការ៉េ មានសុទ្ធតែផ្នូរខ្មោច និងកន្លែងស្នាក់នៅរបស់ជនជាតិវៀតណាម ដើម្បីរៀបចំពិធីបញ្ចុះសពតាមបែបសាសនាពួកគេ។
ភរិយាអតីតនាយការិយាល័យប្រឆាំងអាវុធជាតិផ្ទុះ នៃស្នងការដ្ឋាននគរបាលខេត្តពោធិ៍សាត់ គឺអ្នកស្រី តាន់ គឹមយូ មានប្រសាសន៍ថា តាំងពីឆ្នាំ២០១៣ ដែលអ្នកស្រី និងពលរដ្ឋពីរគ្រួសារទៀតមានជម្លោះដីធ្លីជាមួយសមាគមវៀតណាម ធ្លាប់ដាក់បណ្ដឹងទៅមន្ទីររៀបចំដែនដី និងអាជ្ញាធរគ្រប់ច្រកល្ហក ប៉ុន្តែគ្មានដំណោះស្រាយ។ អ្នកស្រីថា អាជ្ញាធរ និងសមាគមវៀតណាម បានបំផ្លាញរបងរំលោភយកដីគ្រួសារគាត់ទាំងបំពាន៖ «ដីហ្នឹងខ្ញុំ កាប់គាស់តាំងពីឆ្នាំ១៩៧៩ មក ហើយអត់ដែលមានផលរមាស់អីទេ! ដល់ពេលធ្វើប្លង់នេះ គេហៅគ្រួសារខ្ញុំទៅសាលាឃុំ គេថាឲ្យរុះរើរបងចេញ តែខ្ញុំអត់ព្រម ព្រោះបងឃើញស្រាប់ហើយដីមានស្វាយខ្ញុំប៉ុណ្ណឹង ហើយបើមកធ្វើអ៊ីចឹង ហើយកាប់របងខ្ញុំចោល បានអីក៏ប្រាប់ខ្ញុំមួយម៉ាត់។»
ចំណែកពលរដ្ឋម្នាក់ទៀត លោក គៀន ខៃ បញ្ជាក់ថា អាជ្ញាធរ ឬសមាគមវៀតណាម មិនបានដោះដូរអ្វីជំនួសដីរបស់គាត់ទំហំប្រហែល ៣០ម៉ែត្រការ៉េនោះទេ តែបែរជាលួចធ្វើប្លង់កម្មសិទ្ធិលើដីនោះទៅវិញ។ លោកស្នើឲ្យអាជ្ញាធរ និងសមាគមវៀតណាម ផ្ដល់សំណងជាដីវិញ ឬថវិកាសមរម្យ ដើម្បីឲ្យពលរដ្ឋស្ងប់ចិត្ត លែងតវ៉ាទាមទារដីចម្ការ ដែលបច្ចុប្បន្នមានផ្នូរខ្មោចស្ទើរសព្វដីទៅហើយនោះ។
មន្ត្រីសម្របសម្រួលនៃសមាគមអាដហុក (ADHOC) ខេត្តពោធិ៍សាត់ លោក ភួង សុធា យល់ថា សមាគមវៀតណាម មិនអាចទៅរំលោភយកដីពលរដ្ឋខ្មែរដោយឯកឯងបាននោះទេ លុះត្រាមានការឃុបឃិតគ្នាជាប្រព័ន្ធចាប់ពីអាជ្ញាធរមូលដ្ឋាន រហូតដល់មន្ត្រីជំនាញ។ លោកថា ដើម្បីដោះស្រាយលើបញ្ហានេះ ភាគីសមាគមវៀតណាម គួរផ្ដល់សំណងជាប្រាក់ ឬអាជ្ញាធរខ្លួនឯង គួររកដីដោះដូរជូនពលរដ្ឋ៖ «អ្វីដែលយើងមើលឃើញ គឺអាជ្ញាធរដូចជាអត់មានអ្វីសោះទៅលើប្រជាពលរដ្ឋហ្នឹង ទោះបីជាគាត់បានដាក់ពាក្យបណ្ដឹងទៅថ្នាក់ដឹកនាំ ឬមួយទៅមន្ទីរពាក់ព័ន្ធច្រើនលើកច្រើនសាហើយ ហើយមន្ត្រីជំនាញបានបំពេញនីតិវិធីអ្វីខ្លះដល់ពេលខកខាននីតិវិធី មួយ ធ្វើឲ្យថ្លោះសិទ្ធិអ្នកដែលពាក់ព័ន្ធ បញ្ហាខ្វះខាតទាំងនេះហើយ ដែលធ្វើឲ្យមានបញ្ហាដល់ថ្ងៃនេះ។»
វិទ្យុអាស៊ីសេរី មិនអាចទាក់ទងប្រធានមន្ទីររៀបចំដែនដី នគរូបនីយកម្ម និងសំណង់ ខេត្តពោធិ៍សាត់ លោក ចេង ឡៃ និងមេឃុំវាល លោក ស៊ិន សុផា ដើម្បីសុំការអត្ថាធិប្បាយជុំវិញបញ្ហានេះបានទេ ដោយទូរស័ព្ទមិនចូល។
ប៉ុន្តែតាមសេចក្ដីជូនដំណឹងរបស់គណៈកម្មការសម្របសម្រួលថ្នាក់ឃុំ ដែលចុះហត្ថលេខាដោយមេឃុំវាល ស្រុកកណ្ដៀង គឺលោក ស៊ិន សុផា កាលពីថ្ងៃទី៥ ខែមីនា ឆ្នាំ២០១៤ បានដាក់កំហិតឲ្យឈ្មោះ ទិត្យ សេងឌី រុះរើរបងរបស់ខ្លួនចេញពីដីដែលមានជម្លោះនោះឲ្យអស់ក្នុងរយៈពេល ១៥ថ្ងៃ បើមិនរុះរើទេ ត្រូវប្រឈមចំពោះមុខច្បាប់ស្ដីពីការរំលោភបំពានកាន់កាប់លើទ្រព្យ សម្បត្តិអ្នកដទៃ។
នៅក្នុងសេចក្ដីជូនដំណឹងរបស់អាជ្ញាធរឃុំវាល ដដែលនេះ ក៏បានបញ្ជាក់ដែរថា ដីដែលមានក្បាលដីលេខ២៥៥ ត្រូវបានសមាគមចុះបញ្ជីរួចហើយ ហើយក៏ផុតកំណត់រយៈពេលនៃការតវ៉ាទៀតដែរ៕
No comments:
Post a Comment