ពលរដ្ឋ ឃុំ កោះតូច ខេត្ត កំពត ចោទអាជ្ញាធរ ថា, ជាប់ពាក់ព័ន្ធ លក់ដី ពលរដ្ឋ នៅជើងភ្នំ បូកគោ
RFA / វិទ្យុ អាស៊ី សេរី | ៧ វិច្ឆិកា ២០១៥
រង្វង់មូលទីរួមខេត្តកំពត។ រូបថតថ្ងៃ២១ មិថុនា ២០១៤ / Photo: RFA
អ្នកភូមិនៅឃុំកោះតូច ស្រុកទឹកឈូ ខេត្តកំពត ជិត ៣០គ្រួសារ ចោទអាជ្ញាធរថាមានជាប់ពាក់ព័ន្ធជាមួយក្រុមឈ្មួញទិញដីនៅភ្នំពេញ មករឹបអូសយកដីពលរដ្ឋជិត ៦០ហិកតារនៅជាប់ជើងភ្នំបូកគោ ដើម្បីលក់ទៅឲ្យក្រុមហ៊ុនចិន។ ចំណែកខាងអាជ្ញាធរឃុំកោះតូច វិញ បានបដិសេធចំពោះការចោទប្រកាន់នេះ។
តំណាង ប្រជាពលរដ្ឋនៅភូមិកណ្ដាល ឃុំកោះតូច ខេត្តកំពត ជំរុញឲ្យអាជ្ញាធរស្រុក និងខេត្ត អង្កេតរឿងភាពមិនប្រក្រតីដែលអាជ្ញាធរឃុំមិនចេញប័ណ្ណកាន់កាប់ ដីធ្លីជូនពួកគាត់ទេ តែបែរជាឃុបឃិតជាមួយឈ្មួញទិញដី ធ្វើប្លង់ព័ទ្ធយកដីពួកគាត់ ដើម្បីលក់ទៅឲ្យក្រុមហ៊ុនចិន។
ការស្នើសុំនេះ បន្ទាប់ពីប្រជាពលរដ្ឋបានដាក់ពាក្យប្ដឹងទៅមន្ទីរសុរិយោដី ឲ្យចុះពិនិត្យផ្ទាល់ចំពោះសកម្មភាពវាស់វែងធ្វើប្លង់ដី សម្រាប់លក់ដូរប៉ះពាល់លើដីមានម្ចាស់។
តំណាងប្រជាពលរដ្ឋនៅភូមិកណ្ដាល ឃុំកោះតូច លោក វង្ស ឈាន់ បានឲ្យដឹងនៅថ្ងៃទី៧ វិច្ឆិកា ថា ដីជិត ៦០ហិកតារស្ថិតនៅតាមជើងភ្នំបូកគោ ស្ថិតនៅភូមិព្រែកអំពិល ជាកម្មសិទ្ធិរបស់ប្រជាពលរដ្ឋជិត ៣០គ្រួសារ នៅភូមិកណ្ដាល ដែលនៅជាប់ព្រំប្រទល់គ្នានោះ បាននាំគ្នាកាប់ឆ្ការព្រៃកាន់កាប់សម្រាប់ធ្វើចម្ការតាំងពីឆ្នាំ ២០០២ មក ប៉ុន្តែក្រោយមក ដីនោះខាងមន្ត្រីបរិស្ថាន ចេះតែហាមឃាត់មិនឲ្យដាំដំណាំធំៗ។ ចំណែកអាជ្ញាធរឃុំវិញ ក៏មិនព្រមចេញប្លង់ឲ្យដែរ ដោយសំអាងខ្លាចប៉ះពាល់លើដីតំបន់បរិស្ថានតំបន់ឧទ្យានជាតិភ្នំ បូកគោ។
លោកបន្តថា ស្រាប់តែរហូតមកដល់ឆ្នាំ២០១៥ នេះ អាជ្ញាធរឃុំត្រូវរ៉ូវគ្នាជាមួយឈ្មួយទិញដីមកពីភ្នំពេញ ឈ្មោះ ជឹម សុផល ធ្វើប្លង់ព័ទ្ធយកដីតំបន់នោះលក់ទៅឲ្យអ្នកផ្សេង ឬលក់ទៅឲ្យក្រុមហ៊ុនចិន។ ចំណែកអ្នកភូមិពេលដឹងរឿងនេះ ក៏នាំគ្នាទៅប្ដឹងអាជ្ញាធរឃុំ តែអាជ្ញាធរឃុំនោះមិនដោះស្រាយឲ្យទេ៖ «ដី ជឹម សុផល នៅជាប់នឹងបីខាងលិច នៅសល់ចន្លោះកណ្ដាលប្រហែល ៥០ហិកតារជាងហ្នឹង គេចង់ហ៊ុមព័ទ្ធយក ហើយប្រជាពលរដ្ឋគេចង់ទាមទារយកវិញ ដល់ឃុំគេឃុបឃិតជាមួយ ជឹម សុផល គេយកដីហ្នឹង គេមិនដោះស្រាយឲ្យទេ។»
ទន្ទឹមគ្នានេះដែរ ពលរដ្ឋម្នាក់ទៀតឈ្មោះ ប៉ែត ស៊ៀប ដែលមានដីក្នុងតំបន់ជម្លោះនោះដែរ បានឲ្យដឹងពីដើមហេតុនៃជម្លោះ និងមូលហេតុដែលអាជ្ញាធរឃុំកោះតូច មិនដោះស្រាយឲ្យប្រជាពលរដ្ឋ ដោយសារមន្ត្រីឃុំមួយចំនួន មានជាប់ពាក់ព័ន្ធជាមួយឈ្មួញលក់ដីជិត ៦០ហិកតាររបស់ពលរដ្ឋនោះទៅឲ្យក្រុមហ៊ុនចិន៖ «តាំងពីឆ្នាំ២០០២ មក រហូតដល់ក្រុមនិស្សិតចូលវាស់វែង តែគេអត់ចូលវាស់ឲ្យប្រជាពលរដ្ឋទេ ក្រោយមកប្រជាពលរដ្ឋ ២៧គ្រួសារនៅតែកាន់កាប់ដីហ្នឹង តែក្រោយមកស្រាប់តែមានឈ្មោះ ជឹម សុផល ហ្នឹង ព្រមទាំងបក្ខពួកគាត់ប៉ុន្មាននាក់ថែមទៀត មកដីហ្នឹង ហើយលក់ទៅឲ្យគេដោយទទួលលុយកក់ ហើយក៏កើតជារឿងអ៊ីចឹងទៅ»។
ឆ្លើយតបនឹងការចោទប្រកាន់នេះ ក្រុមប្រឹក្សាឃុំកោះតូច មួយរូប លោក ព្រំ មុនី មានប្រសាសន៍ពន្យល់ថា ប្រជាពលរដ្ឋដែលមកប្ដឹងនោះស្ថិតនៅភូមិផ្សេងពីភូមិដីមានទំនាស់ ហើយទីតាំងដីដែលពួកគាត់អះអាងថារបស់គាត់នោះ គឺជាន់គ្នាលើដីរបស់ពលរដ្ឋដែលនៅក្នុងមូលដ្ឋាននោះផ្ទាល់ គឺភូមិព្រែកអំពិល ហើយមួយចំនួនទៀតប៉ះទៅលើដីព្រៃរបស់រដ្ឋ។ លោកបញ្ជាក់ទៀតថា ចំពោះការលក់ដូរដីធ្លីទាំងឡាយណាដែលគ្មានប្លង់កម្មសិទ្ធិ គ្មានម្ចាស់ត្រឹមត្រូវនៅតំបន់នោះ អាជ្ញាធរមិនជាប់ពាក់ព័ន្ធ និងមិនទទួលខុសត្រូវឡើយ៖ «ការលក់ទិញដីរបស់ប្រជាពលរដ្ឋជារឿង របស់គាត់ អាជ្ញាធរអត់ទទួលស្គាល់ការលក់ដូរនោះទេ បើសិនជាដីរដ្ឋ ថ្ងៃក្រោយរដ្ឋនៅតែយកវិញដែរ។»
ចំណែកប្រជាពលរដ្ឋដើមបណ្ដឹងវិញ បានលើកឡើងថា ថ្វីត្បិតតែពួកគាត់នៅភូមិផ្សេង គឺភូមិកណ្ដាល ហើយដីទំនាស់នៅភូមិព្រែកអំពិល ក៏ពិតមែន ប៉ុន្តែភូមិទាំងពីរនេះនៅជាប់គ្នា ហើយការចូលកាប់រានដីតាំងពីឆ្នាំ២០១២ មកនោះ មិនដែលមានពលរដ្ឋណានៅភូមិព្រែកអំពិល នោះមកទាមទារតវ៉ាថា ដីនោះជាកម្មសិទ្ធិរបស់ពួកគាត់ឡើយ។
ទោះយ៉ាងណា ខាងមន្ទីរសុរិយោដី បានទទួលយកពាក្យបណ្ដឹងពីប្រជាពលរដ្ឋកាលពីថ្ងៃទី៦ វិច្ឆិកា និងបានចុះពិនិត្យមើលខ្លះៗនៅទីតាំងដីទំនាស់នៅព្រឹកថ្ងៃទី៧ វិច្ឆិកា ប៉ុន្តែមិនទាន់មានចម្លើយតបមកវិញយ៉ាងណានៅឡើយទេ៕
No comments:
Post a Comment