បារាំង-ជប៉ុន ធ្វើសហប្រធាន នៃកិច្ចប្រជុំ អាយស៊ីស៊ី-អង្គរ លើកទី២៥ នៅខេត្ត សៀមរាប
RFA / វិទ្យុ អាស៊ី សេរី | ២ ធ្នូ ២០១៥
ទិដ្ឋភាពនៃកិច្ចប្រជុំបច្ចេកទេសរបស់គណៈកម្មាធិការ
អន្តរជាតិដើម្បីសម្របសម្រួលកិច្ចគាំពារ
និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ (ICC-Angkor) លើកទី២៥
នៅមជ្ឈមណ្ឌលអាជ្ញាធរជាតិអប្សរា នាខេត្តសៀមរាប នៅថ្ងៃទី២ ធ្នូ
ឆ្នាំ២០១៥។ RFA/Hang Savyouth
ក្រុម គណៈកម្មាធិការ អន្តរជាតិ ដើម្បី សម្របសម្រួល កិច្ចគាំពារ និងអភិវឌ្ឍន៍ រមណីយដ្ឋាន ប្រវត្តិសាស្ត្រអង្គរ ហៅកាត់ ថា អាយស៊ីស៊ីអង្គរ (ICC-Angkor) បានការគាំទ្រ ចំពោះ ការចាប់ខ្លួន ឧក្រិដ្ឋជន ដែលបានបំផ្លាញ វត្ថុ បុរាណ ទីមប៊ូទូ (Timbuktu) នៅប្រទេស ម៉ាលី ដែលជាសម្បត្តិ បេតិកភណ្ឌ របស់ ពិភពលោក បញ្ជូន ទៅកាន់តុលាការ ព្រហ្មទណ្ឌ អន្តរជាតិ នៅទីក្រុង ឡាអេ នៃប្រទេស ហុល្លង់។
ជាមួយគ្នា នេះដែរ គណៈកម្មាធិការ អន្តរជាតិ ដើម្បី សម្របសម្រួល កិច្ចគាំពារ និងអភិវឌ្ឍន៍ រមណីយដ្ឋាន ប្រវត្តិសាស្ត្រ អង្គរ កំពុងផ្ដោត ការយកចិត្ត ទុកដាក់ យ៉ាងខ្លាំង ទៅលើការ អភិរក្ស និងថែរក្សា ប្រាសាទ បុរាណ ជាច្រើន នៅក្នុងប្រទេស កម្ពុជា ដែរ។
ក្រុមអ្នកជំនាញនៃគណៈកម្មាធិការអន្តរជាតិដើម្បីសម្របសម្រួលកិច្ច គាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គររបស់អង្គការយូណេស្កូ (UNESCO) កំពុងជួបប្រជុំផ្នែកបច្ចេកទេសរយៈពេល ២ថ្ងៃនៅខេត្តសៀមរាប ចាប់ពីថ្ងៃទី២ រហូតដល់ថ្ងៃទី៣ ខែធ្នូ។
កិច្ចប្រជុំដែលមានអ្នកជំនាញបារាំង និង ជប៉ុន ធ្វើជាសហប្រធាន បានជជែកអំពីការផ្ដល់អនុសាសន៍ និងបច្ចេកទេសនានា ពាក់ព័ន្ធទៅលើកិច្ចការពារ និងជួសជុលប្រាសាទបុរាណជាច្រើនក្នុងខេត្តសៀមរាប ព្រមទាំងការអភិវឌ្ឍនានា នៅក្នុងតំបន់ឧទ្យានអង្គរឱ្យមានចិរភាព។
ប្រធាននាយកដ្ឋានផ្សព្វផ្សាយរបស់អាជ្ញាធរជាតិអប្សរា គឺលោក ឡុង កុសល។ លោកបានថ្លែងប្រាប់អ្នកសារព័ត៌មាននៅក្រៅកិច្ចប្រជុំកាលពីព្រឹក ថ្ងៃពុធ ទី២ ខែធ្នូ ថា កិច្ចគណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គររបស់អង្គការយូណេស្កូ នេះ គឺពិភាក្សាទៅលើការតាមដាននៃការផ្ដល់អនុសាសន៍នានា ដែលបានដាក់ចេញឱ្យយកទៅអនុវត្ត និងជួសជុលប្រាសាទបុរាណជាច្រើននៅក្នុងខេត្តសៀមរាប កាលពីអំឡុងខែមិថុនា ឆ្នាំ២០១៥ កន្លងទៅ។
លោក ឡុង កុសល៖ «ក្នុងការតាមដានអនុសាសន៍ហ្នឹង គឺថា មាន ៥-៦ចំណុច ក្នុងនោះមាននិយាយអំពីគម្រោងនៃអភិរក្សទាំងឡាយដែលបានផ្ដល់ជូនជា អនុសាសន៍ ជាការណែនាំ ហើយជាបន្តបន្ទាប់ទៀត គឺគេនឹងពិភាក្សាអំពីការអភិរក្ស។»
ក្នុងកិច្ចប្រជុំ ICC-Angkor ដែលកំពុងប្រព្រឹត្តទៅនៅក្នុងខេត្តសៀមរាប នេះ ក្រុមអ្នកជំនាញរបស់គណៈកម្មាធិការអន្តរជាតិដើម្បីសម្របសម្រួលកិច្ច គាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គររបស់អង្គការយូណេស្កូ ក៏បានគាំទ្រឱ្យអ្នកជំនាញរបស់អាជ្ញាធរអប្សរាធ្វើការជួសជុលក្បាច់ ចម្លាក់នៃពិតានខ្លះនៅលើរោងទោងរបស់ប្រាសាទអង្គរវត្ត ដែលបានខូចខាតទៅហើយ។
ប្រធាននាយកដ្ឋានអភិរក្សក្នុងតំបន់អង្គរ និងឧទ្យានបង្ការរបស់អាជ្ញាធរអប្សរា លោក លី វណ្ណា ថ្លែងថា អាជ្ញាធរអប្សរាបានប្រើជំនាញឆ្លាក់ក្បាច់អំពីឈើយកទៅជួសជុលពិតាន នៃប្រាសាទអង្គរវត្តខ្លះនៅម្ដុំកូរសមុទ្រទឹកដោះឡើងវិញ ដោយសារតែពិតាននោះបានខូចខាត។
លោក លី វណ្ណា បញ្ជាក់ថា អាជ្ញាធរអប្សរាបានសិក្សារកស្លាកស្នាមចាស់ទីនោះជាច្រើនឆ្នាំ ទើបបានសម្រេចឆ្លាក់ផ្ទាំងចម្លាក់អំពីឈើទំហំប្រមាណពី ៥ ទៅ ៦ម៉ែត្រ ដើម្បីយកទៅជួសជុលសាកល្បង៖ «ក្បាច់សំខាន់ជាងគេគឺក្បាច់ ត្របកឈូក ផ្កាឈូក ហើយអមទៅដោយក្បាច់ស្នែងផ្សេងៗទៀត។ ពីរបីឆ្នាំហើយ ទម្រាំតែយើងសិក្សាបាននូវក្បាច់ចម្លាក់ចុងក្រោយ។»
នៅក្នុងកិច្ចប្រជុំនៃគណៈកម្មាធិការអន្តរជាតិដើម្បីសម្របសម្រួល កិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គររបស់អង្គការយូណេស្កូ លើកទី២៥នេះ មានលក្ខណៈពិសេសជាងពេលណាទាំងអស់នោះ ដោយសារតែមានក្រុមយុវជនបេតិកភណ្ឌមកពីបណ្ដាប្រទេសអាស៊ាន និងអាស៊ីប៉ាស៊ីហ្វិក បានប្រកាសគាំទ្រទៅលើកិច្ចការពារបេតិកភណ្ឌនៃតំបន់អង្គរ ព្រមទាំងកិច្ចការពារប្រាសាទបុរាណនៅកម្ពុជា ផង៕
No comments:
Post a Comment