លោក ហ៊ុន សែន បញ្ជាអាជ្ញាធរ មានសមត្ថកិច្ច ឲ្យបង្កើន ការបង្ក្រាប ក្រុមចោរប្លន់ ប្រដាប់អាវុធ
RFA / វិទ្យុ អាស៊ី សេរី | ១៤ ធ្នូ ២០១៥
លោកនាយករដ្ឋមន្ត្រី ហ៊ុន សែន
ថ្លែងក្នុងកិច្ចប្រជុំសភាតំបន់អាស៊ី ហៅកាត់ថា អេ.ភី.អេ (APA)
នារាជធានីភ្នំពេញ កាលពីព្រឹកថ្ងៃទី៩ ខែធ្នូ ឆ្នាំ២០១៥។ RFA/Brach Chev
បន្ទាប់ ពីមាន សកម្មភាព ប្លន់ប្រដាប់អាវុធ កើតឡើង ជាបន្តបន្ទាប់ នាពេល ថ្មីៗ នេះ, លោក នាយករដ្ឋមន្ត្រី ហ៊ុន សែន នៅថ្ងៃ ទី១៤ ធ្នូ ដាក់បទបញ្ជា ឲ្យអាជ្ញាធរ គ្រប់ជាន់ថ្នាក់ បង្កើន ការបង្ក្រាប ក្រុមឧក្រិដ្ឋជន ទាំងនោះ ឲ្យមាន ប្រសិទ្ធភាព។ លោក ក៏ជំរុញ ឲ្យក្រសួង យុត្តិធម៌ ត្រួតពិនិត្យ ឲ្យបាន ត្រឹមត្រូវ ចំពោះ ការលើកលែងទោស ឲ្យទណ្ឌិត។
ករណីប្លន់ ប្រដាប់អាវុធ កើតឡើង ជាស៊េរី នៅមួយ រយៈពេល ចុងក្រោយនេះ ជំរុញ ឲ្យលោក នាយករដ្ឋមន្ត្រី ដាក់បទបញ្ជា ឲ្យអាជ្ញាធរ ពាក់ព័ន្ធ ចាត់វិធានការ តឹងរ៉ឹង ក្នុងការបង្ក្រាប ក្រុមចោរប្លន់ ប្រដាប់អាវុធ ដែលបានបង្ក ឲ្យមាន អសន្តិសុខ ក្នុងរាជធានី ភ្នំពេញ និងក្នុងខេត្ត មួយចំនួនទៀត នៅរយៈពេល ប៉ុន្មានថ្ងៃ ចុងក្រោយនេះ។
ការជំរុញរបស់លោកនាយករដ្ឋមន្ត្រី ធ្វើឡើងក្នុងពិធីផ្សព្វផ្សាយការបញ្ជ្រាបទស្សនទាន សីលធម៌ សាសនា ដើម្បីសុខដុមនីយកម្មនៅកម្ពុជា។ ភ្ជាប់ទៅនឹងខ្លឹមសារនៃពិធីនោះ លោក ហ៊ុន សែន ចាត់ទុកក្រុមឧក្រិដ្ឋជនប្លន់ទាំងនោះ ថាជាក្រុមគ្មានសាសនា។
ទន្ទឹមនឹងនេះ លោកក៏ជំរុញឲ្យរដ្ឋមន្ត្រីក្រសួងយុត្តិធម៌ ពិនិត្យពិច័យឲ្យបានល្អិតល្អន់ក្នុងការលើកលែងទោសឲ្យទណ្ឌិត ដែលជាប់ពន្ធនាគារដោយសារបទល្មើសលួចប្លន់។
ការចេញបទបញ្ជារបស់ លោក ហ៊ុន សែន នៅពេលនេះ គឺបន្ទាប់ពីសកម្មភាពប្លន់ប្រដាប់អាវុធកើតឡើងបន្តបន្ទាប់គ្នា កាលពីថ្ងៃទី១១ និងថ្ងៃទី១២ ធ្នូ នៅចុងសប្ដាហ៍កន្លងទៅ។ ក្នុងនោះ មានករណីបាញ់សម្លាប់ប្លន់យកម៉ូតូនៅខណ្ឌទួលគោក រាជធានីភ្នំពេញ ករណីប្លន់អាជីវករលក់គ្រឿងអលង្ការ និងទីតាំងផ្ទេរប្រាក់វីង (Wing) ចំនួន ៣កន្លែងផ្សេងគ្នា រួមមានខេត្តពោធិ៍សាត់ បាត់ដំបង និងខេត្តកណ្ដាល ដោយឧក្រិដ្ឋជន ២នាក់ ត្រូវបានសមត្ថកិច្ចបាញ់សម្លាប់ ហើយ ៤នាក់ ត្រូវបានចាប់ខ្លួន និងត្រូវបានសមត្ថកិច្ចបង្ហាញមុខនៅព្រឹកថ្ងៃទី១៤ ខែធ្នូ នាស្នងការដ្ឋាននគរបាលរាជធានីភ្នំពេញ។
ករណីជាក់ស្ដែងថ្មីមួយទៀត គឺនៅប្រមាណ ៤ម៉ោងបន្ទាប់ពី លោក ហ៊ុន សែន ដាក់បទបញ្ជាដល់មន្ត្រីពាក់ព័ន្ធឲ្យរឹតបន្តឹងការអនុវត្តច្បាប់ សកម្មភាពប្លន់មួយទៀតបានកើតឡើងនៅសង្កាត់ទួលស្វាយព្រៃទី២ ខណ្ឌចំការមន ដោយជនប្រដាប់អាវុធ ២នាក់ ប្លន់យកកាបូបពីស្ត្រីម្នាក់ពេលចុះពីលើរថយន្ត។
ពាក់ព័ន្ធនឹងការកក្រើកនៃអំពើប្លន់ប្រដាប់អាវុធនេះ អ្នកនាំពាក្យកងរាជអាវុធហត្ថ លោក អេង ហ៊ី មានប្រសាសន៍ប្រាប់វិទ្យុអាស៊ីសេរី ថា ដើម្បីបង្ក្រាបក្រុមចោរប្លន់ទាំងនោះ កងរាជអាវុធហត្ថកំពុងរឹតបន្តឹងការអនុវត្តច្បាប់ និងបានពង្រឹងជំនាញរបស់ខ្លួនក្នុងការបង្ក្រាបបទល្មើសនៅទូទាំង ប្រទេស។
ចំពោះភាពអសន្តិសុខបង្កដោយក្រុមចោរប្លន់ប្រដាប់អាវុធនេះ អ្នកគ្រប់គ្រងបច្ចេកទេសការិយាល័យស៊ើបអង្កេត នៃអង្គការសិទ្ធិមនុស្សលីកាដូ (LICADHO) លោក អំ សំអាត យល់ថា ជាភាពឆកល្វែងរបស់អាជ្ញាធរក្នុងការអនុវត្តគោលនយោបាយភូមិ-ឃុំមាន សុវត្ថិភាព។
បន្ថែមលើនេះ លោក អំ សំអាត លើកឡើងថា ការលើកលែងទោសដល់ទណ្ឌិតដោយមិនត្រឹមត្រូវ ក៏ជាបញ្ហាចម្បងមួយរបស់ក្រសួងយុត្តិធម៌ ដែលរួមចំណែកដល់ការកើតមានបទល្មើសទាំងនេះមិនចេះចប់។
លោកស្នើឲ្យរដ្ឋាភិបាល បង្កើនការយកចិត្តទុកដាក់លើករណីដែលជាឫសគល់នៃបញ្ហា ដើម្បីធានាសន្តិសុខ សុវត្ថិភាពជូនប្រជាពលរដ្ឋទៅតាមគោលនយោបាយភូមិ-ឃុំមានសុវត្ថិភាព៕
No comments:
Post a Comment