សាលាក្រុង មិនអនុញ្ញាត ឲ្យក្រុម អង្គការ សង្គមស៊ីវិល ហែក្បួន នៅទិវា សិទ្ធិមនុស្ស អន្តរជាតិ១០ធ្នូ
RFA / វិទ្យុ អាស៊ី សេរី | ៩ ធ្នូ ២០១៥
ប្រជាពលរដ្ឋបាត់បង់ដីធ្លីនៅស្រុកឱរ៉ាល់ ខេត្តកំពង់ស្ពឺ
ហែក្បួនសិទ្ធិយាត្រាដើម្បីទាមទារសិទ្ធិ និងដីធ្លី កាលពីថ្ងៃទី៧
ខែធ្នូ ឆ្នាំ២០១៥។ RFA/Tha Kitya
សាលា រាជធានី ភ្នំពេញ បានកោះហៅ តំណាង អង្គការ សង្គមស៊ីវិល និងតំណាង សហគមន៍ ទៅប្រជុំ នៅរសៀល ថ្ងៃទី៩ ធ្នូ។ នៅក្នុង កិច្ចប្រជុំ នេះ, សាលារាជធានី ភ្នំពេញ បានជូនដំណឹង ថា, នៅទិវា សិទ្ធិមនុស្ស អន្តរជាតិ ១០ ធ្នូ លើកទី៦៧ ស្អែកនេះ សាលារាជធានី ភ្នំពេញ មិនអនុញ្ញាត ឲ្យអង្គការ សង្គមស៊ីវិល និងសហគមន៍នានា ហែក្បួន នោះទេ ក្រោមហេតុផល ថា ដើម្បី រក្សាសន្តិសុខ និងកុំឲ្យ កកស្ទះ ចរាចរណ៍។
ក្រុមតំណាងសហគមន៍ ១០ ធ្នូ ពួកគាត់អាចនឹងហែក្បួននៅរាជធានីភ្នំពេញ ដើម្បីយកញត្តិទៅដាក់នៅក្រសួងយុត្តិធម៌ នៅទិវាសិទ្ធិមនុស្សអន្តរជាតិ ១០ ធ្នូ ទោះបីជាមានការហាមឃាត់ពីសាលារាជធានីភ្នំពេញក្ដី។
មន្ត្រីស៊ើបអង្កេតសិទ្ធិមនុស្សជាន់ខ្ពស់ នៃអង្គការសិទ្ធិមនុស្សលីកាដូ (LICADHO) លោក អំ សំអាត ឲ្យដឹងនៅក្រោយពីជួបតំណាងសាលារាជធានីភ្នំពេញ នៅរសៀលថ្ងៃទី៩ ធ្នូ ថា នៅថ្ងៃស្អែកមានក្រុមអង្គការសង្គមស៊ីវិល តំណាងសហគមន៍រងគ្រោះដីធ្លីមកពី ១៦ខេត្ត-ក្រុង ឬហៅថាសហគមន៍ ១០ ធ្នូ និងក្រុមសហជីព នឹងប្រារព្ធទិវាសិទ្ធិមនុស្សអន្តរជាតិ ១០ ធ្នូ៖ «គឺ ខាងសហគមន៍ និងពួកគាត់ជាអ្នកសម្រេចចិត្តក្នុងការហែក្បួននេះ ហើយយើងនឹងពាំនាំការសម្រេចនេះជូនសហគមន៍ និងប្រជាពលរដ្។ឋ»
ទិវាសិទ្ធិមនុស្សអន្តរជាតិ ១០ ធ្នូ នេះ មានក្រុមផ្សេងៗគ្នាប្រារព្ធទិវានេះ។ ខាងរដ្ឋាភិបាលរៀបចំនៅកោះពេជ្រ រីឯខាងគណបក្សប្រឆាំង រៀបចំនៅទីស្នាក់ការកណ្ដាលគណបក្សរបស់ខ្លួននៅសង្កាត់ចាក់អង្រែលើ រាជធានីភ្នំពេញ។
ដោយឡែកតាមគម្រោងរបស់សហគមន៍សិទ្ធិមនុស្ស ១០ ធ្នូ វិញ ត្រៀមនឹងហែក្បួន គឺមានហែចេញពីបីទីតាំងផ្សេងៗគ្នា រួមមាន ពីវត្តភ្នំ ពីវិទ្យាល័យវត្តកោះ និងពីមុខមន្ទីរព្រឹទ្ធសភា ទៅកាន់ទីតាំងតែមួយ គឺក្រសួងយុត្តិធម៌ ដែលមានមនុស្សគ្រោងចូលរួមសរុបប្រមាណ ៣ពាន់នាក់។
មន្ត្រីនាំពាក្យសាលារាជធានីភ្នំពេញ លោក ឡុង ឌីម៉ង់ មានប្រសាសន៍ថា ទិវាសិទ្ធិមនុស្សអន្តរជាតិនេះ ខាងរដ្ឋាភិបាលក៏រៀបចំធ្វើដែរ គឺប្រារព្ធនៅកោះពេជ្រ ក្រោមប្រធានបទ "សិទ្ធិលំនៅឋាន និងការអភិវឌ្ឍសហគមន៍ក្រីក្រ"។ លោក ឡុង ឌីម៉ង់ បញ្ជាក់ថា គ្រប់អង្គការសង្គមស៊ីវិល ឬសហគមន៍ទាំងអស់ មិនអាចរំលោភលើការសម្រេចរបស់សាលារាជធានីភ្នំពេញបានទេ ដែលមិនអនុញ្ញាតឲ្យហែក្បួននេះ៖ «សំខាន់បំផុត គឺបញ្ហាសន្តិសុខតែម្ដង ដូចយើងឃើញស្រាប់ហើយប៉ុន្មានថ្ងៃមកនេះ គឺមានកិច្ចប្រជុំសភាអាស៊ីអេ.ភី.អេ (APA)។»
ចំពោះអង្គការសង្គមស៊ីវិលដែលមានប្រមាណ ២០០អង្គការផ្សេងទៀត បានរួមគ្នារៀបចំទិវាសិទ្ធិមនុស្ស ១០ ធ្នូ នៅទីលានប្រជាធិបតេយ្យ មានអ្នកចូលរួមប្រមាណ ៤ពាន់នាក់។
ប្រធានលេខាធិការដ្ឋានគណៈកម្មាធិការប្រព្រឹត្តិកម្ម នៃអង្គការសមាគមការពារសិទ្ធិមនុស្សកម្ពុជា ហៅកាត់ថា ច្រាក់ (CHRAC) លោក សួន ប៊ុនស័ក្តិ សម្ដែងការមិនពេញចិត្តចំពោះការហាមប្រាមរបស់សាលារាជធានីភ្នំពេញ ដែលមិនអនុញ្ញាតឲ្យហែក្បួននេះ។ លោកបញ្ជាក់ថា អង្គការសង្គមស៊ីវិលនៅតែបន្តទាមទារឲ្យរដ្ឋាភិបាល គោរពគោលការណ៍សិទ្ធិមនុស្ស៖ «ខ្ញុំគិតថាចំណុចនេះ ខ្ញុំចាត់ទុកថា ជាការឹតត្បិតសិទ្ធិសេរីភាពប្រជាពលរដ្ឋដែលជាធាតុផ្សំដ៏សំខាន់នៅ ក្នុងសង្គមប្រជាធិបតេយ្យនេះ។»
ក្រុមអង្គការសង្គមស៊ីវិលរិះគន់ថា ការដែលរដ្ឋាភិបាលមិនអនុញ្ញាតឲ្យសហគមន៍ ក្រុមអង្គការសង្គមស៊ីវិលហែក្បួនក្នុងទិវាសិទ្ធិមនុស្សអន្តរជាតិ ១០ ធ្នូ នេះ ជាការរឹតត្បិតសិទ្ធិសេរីភាព។ ផ្ទុយទៅវិញ រដ្ឋាភិបាលអនុវត្តការប្រើប្រាស់សិទ្ធិនេះមាននិយាមពីរផ្សេងគ្នា ព្រោះថា បើសិនជាការហែក្បួន ឬការធ្វើបាតុកម្មរបស់ក្រុមដែលគាំទ្ររដ្ឋាភិបាលនោះ អាជ្ញាធររដ្ឋាភិបាលបើកសិទ្ធិឲ្យដោយសេរី គ្មានការរារាំងនោះឡើយ ដូចជាការធ្វើបាតុកម្មប្រឆាំង លោក កឹម សុខា កាលពីថ្ងៃទី២៦ តុលា ជាដើម។
សេចក្ដីប្រកាសជាសកលស្ដីពីសិទ្ធមនុស្ស ត្រូវបានអនុម័ត និងប្រកាសដោយសេចក្ដីសម្រេចចិត្តនៃមហាសន្និបាតអង្គការសហប្រជាជាតិ នៅថ្ងៃទី១០ ធ្នូ ឆ្នាំ១៩៤៨។ រដ្ឋទាំងអស់ដែលបានទទួលស្គាល់សេចក្ដីប្រកាសនេះ រួមទាំងកម្ពុជា ផង បានសន្យាធ្វើឲ្យមានការគោរពជាសកល និងការប្រតិបត្តិនូវសិទ្ធិ និងសេរីភាពជាមូលដ្ឋាន៕
No comments:
Post a Comment