លោក សម រង្ស៊ី៖ ក្បាលម៉ាស៊ីន បក្សប្រឆាំង ត្រូវ កាត់ផ្ដាច់ ដើម្បី ផ្លាស់ប្ដូរ របៀបគ្រប់គ្រង ប្រទេស
RFA / វិទ្យុ អាស៊ី សេរី | ៥ ធ្នូ ២០១៥
ប្រធានគណបក្សសង្គ្រោះជាតិ លោក សម រង្ស៊ី
ផ្ដល់បទសម្ភាសន៍ដល់អ្នកកាសែត
នាទីស្នាក់ការកណ្ដាលបក្សរាជធានីភ្នំពេញ នៅថ្ងៃទី១១ កក្កដា
ឆ្នាំ២០១៥។ RFA/Brach Chev
មេដឹកនាំ គណបក្ស សង្គ្រោះជាតិ លោក សម រង្ស៊ី និយាយ ថា, បក្សប្រឆាំង នៅកម្ពុជា ត្រូវ បានគេ កាត់ក្បាលចេញ ដើម្បី ផ្លាស់ប្ដូរ របៀបគ្រប់គ្រង ប្រទេស ទៅ រកគណបក្ស តែមួយ។
ក្នុងសេចក្ដីប្រកាស ព័ត៌មាន ចំហ មួយ ចេញផ្សាយថ្ងៃទី៤ ខែធ្នូ, លោក សម រង្ស៊ី ឲ្យដឹង ថា, រាល់អ្នក តំណាងរាស្ត្រ ឬសមាជិក ព្រឹទ្ធសភា នៃប្រជាជាតិ ដែលមាន អធិបតេយ្យភាព នឹងសើចចំអក ចំពោះ អំពើ ដែលតំណាងរាស្ត្រ ខ្មែរ នៃបក្ស កាន់អំណាច បាន ដកហូតលោក ចេញ ពីតំណាងរាស្ត្រ កាលពីថ្ងៃ ទី១៦ ខែវិច្ឆិកា ក្នុងនាម ជាមេដឹកនាំ បក្សប្រឆាំង ក្នុងរដ្ឋសភា។
លោក សម រង្ស៊ី មានប្រសាសន៍ ថា, ទង្វើមិនយុត្តិធម៌ និងមិនប្រជាធិបតេយ្យរបស់អាជ្ញាធរកម្ពុជា នេះ គឺដើម្បីបម្រើគោលដៅនយោបាយរបស់ខ្លួន។ លោកបន្តថា ពួកគេលើកពាក្យបណ្ដឹងរបស់រដ្ឋមន្ត្រីក្រសួងការបរទេស លោក ហោ ណាំហុង ស្ដីពីបទបរិហារកេរ្តិ៍ និងញុះញង់ កាលពី ៧ឆ្នាំមុនមកសំអាងដើម្បីដាក់ទោសលោក ដោយបញ្ជាក់ថា ទោសនេះមិនបានគ្របដណ្ដប់ដោយព្រះរាជក្រឹត្យលើកលែងទោស កាលពីឆ្នាំ២០១៣។
ក្នុងលិខិតដដែលលោក សម រង្ស៊ី លើកទឡ្ហីករណ៍ជាក់ស្ដែងចំនួន៤ ដើម្បីការពារខ្លួនលោកថា ទី១ ព្រះមហាក្សត្រខ្មែរបានប្រទានការលើកលែងទោសដល់លោកនៅ ២សប្ដាហ៍ មុនការបោះឆ្នោតសភាឆ្នាំ២០១៣។ លោកថា ស្មារតី និងគោលបំណងនៃការលើកលែងទោសនោះ គឺដើម្បីធ្វើអោយលោកមាននីតិសម្បទាពេញលេញ ដើម្បីចូលរួមការបោះឆ្នោតនៅពេលនោះ។ ទី២. លោកថា លោកអាចចុះឈ្មោះក្នុងបញ្ជីបោះឆ្នោតបានដោយគ្មានបញ្ហានៅក្នុងខែ តុលា ឆ្នាំ២០១៣ ដោយគ្មានការជំទាស់អ្វីបន្តិចសោះ ពីតុលាការ ឬពីគណៈកម្មាធិការជាតិរៀបចំការបោះឆ្នោត (គ.ជ.ប) ទី៣ នៅថ្ងៃទី២៨ ខែកក្កដា ឆ្នាំ២០១៤ រដ្ឋសភាក្នុងសម័យប្រជុំពេញអង្គបានប្រកាសថា លោក សម រង្ស៊ី គឺជាតំណាងរាស្ត្រជាប់ឆ្នោតនៃមណ្ឌលកំពង់ចាម។
លោកថា នៅពេលនោះ ទាំងប្រធានរដ្ឋសភា ទាំងនាយករដ្ឋមន្ត្រី ទាំងតំណាងរាស្ត្រ ក្នុងនោះរួមមាន លោករដ្ឋមន្ត្រីការបរទេស ហោ ណាំហុង ដែលបានប្ដឹងលោកទៅតុលាការនៅឆ្នាំ២០០៨ ផង មិនបានសំដែងការជំទាស់អ្វីណាមួយចំពោះការប្រកាសងារជា តំណាងរាស្ត្ររបស់លោកសោះឡើយ។ លោកថា សូម្បីតែមន្ត្រីតុលាការ ឬ គ.ជ.ប ក៏មិនបានឆក់ឱកាសនោះ បង្ហាញការជំទាស់នូវការប្រកាសរបស់រដ្ឋសភាពេលនោះឡើយ។
ហេតុផលការពារខ្លួនទី៤ ដែលលោក សម រង្ស៊ី លើកឡើងគឺថា នៅថ្ងៃទី៥ សីហា ឆ្នាំ២០១៤ នៅមុនចូលកាន់តំណែងជាតំណាងរាស្ត្រ លោកបានប្រារព្ធពិធីស្បថស្បែនៅក្នុងបរមរាជវាំងនៅចំពោះព្រះភក្ត្រ ព្រះមហាក្សត្រនៅចំពោះមុខប្រធានព្រឹទ្ធសភានៅចំពោះមុខប្រធាន រដ្ឋសភានៅចំពោះមុខប្រធានក្រុមប្រឹក្សាធម្មនុញ្ញនៅចំពោះមុខប្រធាន តុលាការកំពូល និងនៅចំពោះមុខប្រធាន គ.ជ.ប។
លោកថា ពេលនោះឥស្សរជនជាន់ខ្ពស់នៃមេដឹកនាំស្ថាប័នជាតិកំពូលៗ ទាំងនោះ បានទទួលស្គាល់ និងយល់ព្រមផ្ដល់ឋានៈជាសមាជិករដ្ឋសភាយ៉ាងឧឡារិកក្នុងពិធីស្បថស្បែ នោះ។ នៅចុងបញ្ចប់ នៃលិខិត លោក សម រង្ស៊ី បញ្ជាក់ថា, ការបណ្ដេញលោក ចេញ ពីតំណែង តំណាងរាស្ត្រ ដោយសហការី តំណាងរាស្ត្រ របស់លោក មកពីគណបក្ស កាន់អំណាច, គឺ ជាការរំលោភ ច្បាប់ ទាំងអស់ ដែលកំពុង អនុវត្ត នៅកម្ពុជា, ក្នុងនោះ មានរដ្ឋធម្មនុញ្ញ ជាច្បាប់កំពូល នៃប្រទេស ផងដែរ៕
No comments:
Post a Comment