ជនជាតិដើម ភាគតិច មកពី៤ខេត្ត សូម អន្តរាគមន៍ ពីលោក នាយករដ្ឋមន្ត្រី រឿងដីធ្លី
RFA / វិទ្យុ អាស៊ី សេរី | ៤ ធ្នូ ២០១៥
តំណាងជនជាតិដើមភាគតិចមកពី ៤ខេត្ត
ធ្វើសន្និសីទកាសែតរឿងក្រុមហ៊ុនរំលោភដីសហគមន៍ នារាជធានីភ្នំពេញ
កាលពីថ្ងៃទី៤ ខែធ្នូ ឆ្នាំ២០១៥។ RFA/Sochivy
តំណាង ជនជាតិដើម ភាគតិច មកពីខេត្ត ចំនួន៤ ទទូចសូម អន្តរាគមន៍ ពីលោក នាយករដ្ឋមន្ត្រី ហ៊ុន សែន ទប់ស្កាត់ ការរំលោភបំពាន ដីសហគមន៍ ដោយក្រុមហ៊ុន ដែលទទួលបាន ដី សម្បទាន ពីរដ្ឋាភិបាល។ ពួកគេ ក៏បាន រៀបរាប់ ពីការលំបាក នៅពេល ដែលបញ្ហា ដីធ្លី អូសបន្លាយ មិនអាចរក ដំណោះស្រាយ បាន។
តំណាង ជនជាតិដើម ភាគតិច ដែលមាន បញ្ហាដីធ្លី មកពីខេត្ត ចំនួន ៤, គឺ៖ មណ្ឌលគិរី, រតនគិរី, ស្ទឹងត្រែង, និងព្រះវិហារ ទាមទារ ឲ្យលោក នាយករដ្ឋមន្ត្រី ហ៊ុន សែន អន្តរាគមន៍ បញ្ឈប់ ការឈូសឆាយ ការរំលោភ ដីព្រៃអភិរក្ស, ដីចម្ការ វិលជុំ, ទីសក្ការ និងដីព្រៃ កប់សព ដែលកំពុង ធ្វើ ឲ្យប៉ះពាល់ ដល់ជីវភាព និងជំនឿ របស់ ពួកគេ។
តំណាង ជនជាតិដើម ភាគតិច មកពីខេត្ត រតនគិរី ដែលមាន ជម្លោះ ដីធ្លី ជាមួយ ក្រុមហ៊ុន វៀតណាម ប៊ិញភឿក (Binh Phuoc) អ្នកស្រី ស្រួច ថែវ មានប្រសាសន៍ ថា, ការរំលោភ យកដីធ្លី កំពុងធ្វើ ឲ្យពួកគាត់ ជួបការលំបាក ទាំងការ បង្កបង្កើនផល ដំណាំ, ការរុករក អនុផល ព្រៃឈើ និងជំនឿ៖ «ពួកខ្ញុំ ប៉ះពាល់ ខ្លាំង ជាងគេ, គឺ ដី; ទី២ ជ័រច្បោះ។ ពួកខ្ញុំ អាស្រ័យផល អស់ហ្នឹង, ហើយ ដែលពួកខ្ញុំ បានកូន រៀនសូត្រ។»
ជនជាតិដើម ភាគតិច មួយរូបទៀត មកពីខេត្តស្ទឹងត្រែង ក្នុងឃុំក្បាលរមាស ដែលរងផលប៉ះពាល់ពីគម្រោងសាងសង់ទំនប់វារីអគ្គិសនីសេសានក្រោម២ លោក ដាំ សំណាង មានប្រសាសន៍ថា អាជ្ញាធរបណ្ដេញអ្នកភូមិដែលធ្លាប់រស់នៅទីនោះ ដោយមិនយកចិត្តទុកដាក់ពីផលប៉ះពាល់។ លោកសំណូមពរអោយរដ្ឋាភិបាលបញ្ឈប់គម្រោងនេះ៖ «ក្នុងនាមខ្ញុំជា យុវជនជនជាតិដើមភាគតិចបារម្ភយ៉ាងខ្លាំងក្នុង ការបាត់បង់ជម្រក បាត់បង់ទឹកដី មរតកវប្បធម៌ ទាក់ទងគម្រោងទំនប់វារីអគ្គិសនីសេសានក្រោម២នេះ។»
មិនខុសគ្នានេះដែរ តំណាងជនជាតិដើមភាគតិចកួយ មកពីឃុំប្រមេ ស្រុកត្បែងមានជ័យ ខេត្តព្រះវិហារ កញ្ញា ខុម រ៉ានី ក៏ស្នើអោយបញ្ឈប់សកម្មភាពរបស់ក្រុមហ៊ុនដាំអំពៅ ឈ្មោះ ឡានហ្វេង (Lan Feng) និង រួយហ្វេង (Ruy Feng) ដែលកំពុងរំលោភឈូសឆាយយកដីចម្ការអ្នកភូមិ៖ «សព្វថ្ងៃនេះ ពួកខ្ញុំវេទនាណាស់! ស្រូវខ្ញុំស្ទូងជិតបែកគុម្ពហើយ ប៉ុន្តែក្រុមហ៊ុនទិញថ្នាំមកបាញ់សម្លាប់។ ខ្ញុំគ្មានបាយស៊ីទេ សូមសម្ដេច ហ៊ុន សែន ជួយផង។»
ចំណែកនៅខេត្តមណ្ឌលគិរី តំបន់គោរពបូជាមួយនៅទឹកជ្រោះប៊ូស្រា ត្រូវគ្រប់គ្រងដោយក្រុមហ៊ុនឯកជនដែលមិនអាចអោយអ្នកភូមិប្រតិបត្តិ ជំនឿដូចមុនបាន។
តំណាងជនជាតិដើមអះអាងថា ពួកគាត់ធ្លាប់រកអន្តរាគមន៍ពីអាជ្ញាធរ និងក្រសួងពាក់ព័ន្ធនានា ច្រើនលើករួចមកហើយ តែពុំមានប្រសិទ្ធភាពដែលធ្វើអោយជម្លោះទាំងនោះបន្តអូសបន្លាយជា ច្រើនឆ្នាំ។
វិទ្យុអាស៊ីសេរី នៅមិនទាន់អាចសុំការអធិប្បាយពីមន្ត្រីខុទ្ទកាល័យលោកនាយករដ្ឋមន្ត្រី បាននៅឡើយទេ នៅថ្ងៃទី៤ ខែធ្នូ។
យ៉ាងណាកន្លងទៅលោកនាយករដ្ឋមន្ត្រី ហ៊ុន សែន ធ្លាប់ដាក់បទបញ្ជាអោយដោះស្រាយបញ្ហាដីធ្លី និងការកាត់ឆ្វៀលដីតាមរូបមន្តស្បែកខ្លាពេលមានការប៉ះពាល់។
អ្នកសម្របសម្រួលលេខាធិការដ្ឋានសម្ព័ន្ធជនជាតិដើមភាគតិចកម្ពុជា លោក យុន ឡូរ៉ង់ មានប្រសាសន៍ថា ជនជាតិដើមភាគតិចត្រូវការជាបន្ទាន់ គឺការដោះស្រាយបញ្ហាដីធ្លីដែលត្រូវរំលោភបំពាន៖ «សម្រែកគ្រប់ កន្លែងទាំងអស់ គឺសុវត្ថិភាពដីធ្លីរបស់ពួកគាត់។ គាត់មិនត្រូវការគម្រោងអភិវឌ្ឍន៍ដែលមកបំផ្លាញនូវអ្វីដែលជាធនធាន របស់គាត់ គាត់មិនចង់បានលើសពីអ្វីដែលគាត់មានទេ។ គាត់ចង់បានសន្តិភាពនៃការរស់ដោយមានសុភមង្គល ពឹងផ្អែកលើខ្លួនឯង។»
លោក យុន រ៉ូឡង់ បញ្ជាក់ថា មកដល់ពេលនេះមានសហគមន៍ជនជាតិដើមភាគតិចមិនដល់ ១០ទេ ដែលត្រូវបានចុះបញ្ជីផ្លូវការក្នុងចំណោមសហគមន៍ទាំងអស់ ៥០០ នៅទូទាំងប្រទេស៕
No comments:
Post a Comment