មន្ត្រី សិទ្ធិមនុស្ស អំពាវនាវ ឲ្យរដ្ឋាភិបាល ស៊ើបអង្កេត កាស៊ីណូ ខុសច្បាប់ នៅរតនគិរី
RFA / វិទ្យុ អាស៊ី សេរី | ១៣ មករា ២០១៦
ផែនទីខេត្តរតនគិរី។ Photo: RFA
មន្ត្រីឃ្លាំមើល សិទ្ធិមនុស្ស សមាគម អាដហុក (ADHOC) ខេត្ត រតនគិរី អំពាវនាវ សុំឲ្យ រដ្ឋមន្ត្រី ក្រសួង មហាផ្ទៃ ស៊ើបអង្កេត កន្លែង បើកបនល្បែង ស៊ីសង មួយកន្លែង ដែលបើកលេង ជាង ៥ឆ្នាំ កន្លងទៅ នៅក្បែរ ច្រកទ្វារ ព្រំដែន អន្តរជាតិ ស្រុក អូរយ៉ាដាវ ដោយគ្មាន ការបង្ក្រាប។ កន្លែង លេងល្បែង ស៊ីសងនេះ ជ្រកក្រោមស្លាក ក្រុមហ៊ុន កាស៊ីណូ ក៏ប៉ុន្តែ ក្រុមហ៊ុននេះ មិន ទាន់មាន អាជ្ញាប័ណ្ណ ធ្វើអាជីវកម្ម នៅឡើយ។
ការអំពាវនាវនេះ ធ្វើឡើង បន្ទាប់ ពីមន្ត្រី អាជ្ញាធរ ខេត្ត រតនគិរី បានប្ដេជ្ញាចិត្ត បង្ក្រាប កន្លែង លេងល្បែងនេះ ច្រើនលើក ក៏ប៉ុន្តែ រហូត បច្ចុប្បន្ន កន្លែង លេងល្បែង ស៊ីសងនេះ នៅតែ បន្តបើកលេង ដោយគ្មាន ច្បាប់អនុញ្ញាត។
បនល្បែង ដែលកំពុង បើកលេងនោះ មានឈ្មោះ ថា កាស៊ីណូ ក្រុមហ៊ុន អេអេច្ឆអេស ឃីង ហ្គ្រូប (AHS King Group) ជាកម្មសិទ្ធិ របស់ ឧកញ៉ា សុខ គឹមសាន្ត។ កាស៊ីណូនេះ បានបើកលេង ចាប់ពីឆ្នាំ ២០១១ រហូតមក ដែលមាន តែ លិខិតជូនដំណឹង របស់ ទីស្ដីការ គណៈរដ្ឋមន្ត្រី កាលពី ខែ ញ្ញា ឆ្នាំ២០១០ បានយល់ព្រម ជាគោលការណ៍ លើលិខិត ស្នើសុំ របស់ ក្រុមហ៊ុន បើកមជ្ឈមណ្ឌល កម្សាន្ត ទេសចរណ៍, រួមមាន៖ សណ្ឋាគារ, ម៉ូតែល, ភោជនីយដ្ឋាន, និងក្លឹបល្បែង កម្សាន្ត កាស៊ីណូ។ ក៏ប៉ុន្តែក្រុមហ៊ុនត្រូវរៀបចំបែបបទសុំអាជ្ញាប័ណ្ណធ្វើអាជីវកម្ម ពីក្រសួងសេដ្ឋកិច្ច និងហិរញ្ញវត្ថុ។
មន្ត្រីសម្របសម្រួលអង្គការអាដហុក ខេត្តរតនគិរី លោក ឆាយ ធី ចាត់ទុកការបើកលេងល្បែងដោយគ្មានអាជ្ញាប័ណ្ណថា ជាការបំពានច្បាប់ ខណៈរាជរដ្ឋាភិបាលបានកំណត់មិនឲ្យលេងល្បែងស៊ីសងគ្រប់ប្រភេទ លើកលែងកាស៊ីណូមានច្បាប់អនុញ្ញាតដែលបង្កឲ្យកើតមានបញ្ហាអសន្តិសុខ និងអំពើហិង្សាក្នុងគ្រួសារកើតឡើង។ ជាងនេះទៅទៀត ការបើកឲ្យលេងល្បែងជ្រកក្រោមអាជីវកម្មកាស៊ីណូគ្មានច្បាប់នេះ បានធ្វើឲ្យបាត់បង់ប្រាក់ចំណូលពន្ធរាប់សិបម៉ឺនដុល្លារក្នុងមួយ ឆ្នាំ។
លោក ឆាយ ធី៖ «អាជ្ញាធរកន្លងមកតែងសន្យាចាត់វិធានការ ប៉ុន្តែយើងមិនឃើញការចាត់វិធានការហ្នឹងមានប្រសិទ្ធភាពទេ។ បើសង្កេតឃើញកាស៊ីណូហ្នឹងនៅតែបន្តលេងដូចជាជល់មាន់ដោយ ប្រជាពលរដ្ឋខ្មែរនៅខេត្តរតនគិរី។»
វិទ្យុអាស៊ីសេរី មិនអាចទាក់ទងឧកញ៉ា សុខ គឹមសាន្ត សុំបំភ្លឺករណីនេះបានទេ នៅថ្ងៃទី១២ ខែមករា។ ក៏ប៉ុន្តែមេការទទួលខុសត្រូវកន្លែងលេងល្បែងស៊ីសងនោះ គឺលោកស្រី ឡូត ឌី អះអាងយ៉ាងខ្លីថា កាស៊ីណូនេះមានលិខិតអនុញ្ញាតហើយ ដូច្នេះសមត្ថកិច្ចអាចទៅត្រួតពិនិត្យករណីនេះបាន។
កាលពីខែវិច្ឆិកា សមត្ថកិច្ចស្រុកអូរយ៉ាដាវ បានប្ដេជ្ញាចិត្តថា នឹងចាត់វិធានការកន្លែងលេងល្បែងស៊ីសងនេះនៅក្រោយពិធីបុណ្យអុំទូក កន្លងទៅ បន្ទាប់ពីអភិបាលខេត្តរតនគិរី បានចេញបទបញ្ជាឲ្យសមត្ថកិច្ចស្រុកអូរយ៉ាដាវ បង្ក្រាបកន្លែងបើកលេងល្បែងស៊ីសងនេះឲ្យមានប្រសិទ្ធភាព។
អភិបាលស្រុកអូរយ៉ាដាវ លោក ម៉ា វិចិត្រ ទទួលស្គាល់ថា ការយឺតយ៉ាវបង្ក្រាបកន្លែងលេងល្បែងស៊ីសងនេះបណ្ដាលមកពីក្រុម សមត្ថកិច្ចមូលដ្ឋានមានភារកិច្ចសំខាន់ច្រើនត្រូវបំពេញ។ យ៉ាងនេះក្តី លោកអះអាងថា នឹងរៀបចំគម្រោងចុះបង្ក្រាបកន្លែងលេងល្បែងស៊ីសងនេះនៅសប្ដាហ៍ ក្រោយ។
លោកថា អាជ្ញាធរមូលដ្ឋានមិនឃើញមានលិខិតបទដ្ឋានទាក់ទិនច្បាប់ធ្វើអាជីវកម្មកន្លែងលេងល្បែងនេះទេ៖ «ប្រហែលថ្ងៃច័ន្ទ ខ្ញុំប្រជុំកងកម្លាំងទាំងបីដើម្បីចុះត្រួតពិនិត្យមើល ដឹកនាំដោយអភិបាលរងម្នាក់។ ខ្ញុំក៏ទទួលបានបណ្ដឹងពីប្រជាពលរដ្ឋនៅបានលុងផង នៅទីនេះផង ពីគ្រួសារគេ ព្រោះជល់មាន់ទៅអស់លុយ។ ច្បាស់ហើយ ហើយខ្ញុំនឹងចាត់ចែង។»
ដូចគ្នានេះដែរ អ្នកនាំពាក្យ និងជាអភិបាលរងខេត្តរតនគិរី លោក ញ៉ែម សំអឿន បញ្ជាក់ថា អាជ្ញាធរខេត្តមិនលើកទឹកចិត្តឲ្យមានកន្លែងលេងល្បែងស៊ីសងនៅ មូលដ្ឋានដែលជាហេតុធ្វើឲ្យប៉ះពាល់គោលនយោបាយភូមិឃុំមានសុវត្ថិភាព នោះឡើយ៖ «បើថាខុសហើយយើងត្រូវបញ្ឈប់ហើយ រឿងស្អីមាន។ ចាំខ្ញុំសួរអភិបាលស្រុកមើលរឿងហ្នឹង។»
ល្បែងស៊ីសងដែលបើកលេងនៅកាស៊ីណូ ក្រុមហ៊ុន អេ.អេច្ឆ.អេស ឃីង ហ្គ្រូប រួមមាន ល្បែងជល់មាន់ អាប៉ោង យូគី និងបៀរ។ ចំណែក អ្នកមកលេង ល្បែងនៅទីនោះ ភាគច្រើន គឺ ពលរដ្ឋខ្មែរ៕
No comments:
Post a Comment