លោក សម រង្ស៊ី ព្រមឆ្លើយបំភ្លឺ តុលាការ តាមបណ្ដឹង របស់លោក ហេង សំរិន
RFA / វិទ្យុ អាស៊ី សេរី | ១ មករា ២០១៦
ប្រធានគណបក្សសង្គ្រោះជាតិ លោក សម រង្ស៊ី (ឆ្វេង) និងប្រធានរដ្ឋសភា លោក ហេង សំរិន។
RFA
ប្រធាន គណបក្ស សង្គ្រោះជាតិ លោក សម រង្ស៊ី ដែលពេលនេះ កំពុង និរទេសខ្លួន នៅក្រៅប្រទេស បានប្រាប់ វិទ្យុ អាស៊ី សេរី តាមសារ អេឡិចត្រូនិក (Email) នៅថ្ងៃ ទី១ ខែមករា ថា, លោក ព្រម ចូលឆ្លើយ បំភ្លឺ តាមការ កោះហៅ របស់ សាលាដំបូង រាជធានីភ្នំពេញ ពាក់ព័ន្ធ បណ្ដឹង បរិហារកេរ្តិ៍ របស់លោក ហេង សំរិន ប្រធាន រដ្ឋសភា។
សាលាដំបូង រាជធានី ភ្នំពេញ កាលពីដើម ខែធ្នូ ឆ្នាំ២០១៥ បានកោះហៅ លោក សម រង្ស៊ី ឲ្យចូល ឆ្លើយបំភ្លឺ នៅតុលាការ តាមបណ្ដឹង របស់លោក ហេង សំរិន ពីរឿង ដែលលោក សម រង្ស៊ី បានសរសេរ នៅលើទំព័រ ហ្វេសប៊ុក (Facebook) កាលពីពេល ថ្មីៗ នេះថា, របប ដឹកនាំ របស់លោក ហេង សំរិន ធ្លាប់ បានកាត់ទោស ប្រហារជីវិត អតីត ព្រះមហាក្សត្រ ខ្មែរ សម្ដេចព្រះ នរោត្តម សីហនុ ពីបទក្បត់ជាតិ។ ប៉ុន្តែ លោក សម រង្ស៊ី មិនបាន ចូលបំភ្លឺ តាមដីកា កោះ របស់ តុលាការ ពេលនោះ ឡើយ។
យ៉ាងណា លោក សម រង្ស៊ី ប្រាប់វិទ្យុ អាស៊ី សេរី ពេលនេះ ថា, លោក យល់ព្រម ឆ្លើយបំភ្លឺ ជាមួយ តុលាការ នៅថ្ងៃ ទី៤ មករា, តែ ការឆ្លើយ បំភ្លឺនោះ ត្រូវ ធ្វើឡើង តាមប្រព័ន្ធ អ៊ីនធឺណិត (Internet) ដែលអាច សន្សំ ប្រាក់កាក់ និងពេល វេលា ផងដែរ។ លោក សម រង្ស៊ី បានលើកឡើង នូវមធ្យោបាយ ដែលលោក អាចឆ្លើយតប បានមួយចំនួន ដូចជាតាម ប្រព័ន្ធ ស្កែប្ភ (Skype) ជាដើម។
លោក សម រង្ស៊ី បានសរសេរហាក់ចំអកបន្តិចថា ការដែលលោកជ្រើសរើសឆ្លើយបំភ្លឺតុលាការតាមប្រព័ន្ធអ៊ីនធឺណិតនេះ ដោយសារតែលោក ហេង សំរិន ដែលប្ដឹងលោកពីបទបរិហារកេរ្តិ៍នោះ ក៏ដោយសារតែលោកបានសរសេរនៅលើអ៊ីនធឺណិតដូចគ្នាដែរ។
វិទ្យុអាស៊ីសេរី នៅមិនទាន់អាចសុំការឆ្លើយតបពីមន្ត្រីតុលាការចំពោះសំណើរបស់លោក សម រង្ស៊ី នេះបាននៅឡើយទេ នៅថ្ងៃទី១ ខែមករា៕
No comments:
Post a Comment