រដ្ឋមន្ត្រី ក្រសួង ការបរទេស អាមេរិក នឹងជួប គណបក្ស ប្រឆាំង ពេលមក កម្ពុជា
RFA / វិទ្យុ អាស៊ី សេរី | ២១ មករា ២០១៦
លោក ចន ឃែរី (John Kerry) (ឆ្វេង)
រដ្ឋមន្ត្រីក្រសួងការបរទេសសហរដ្ឋអាមេរិក និងលោក កឹម សុខា
ប្រធានស្ដីទីគណបក្សសង្រ្គោះជាតិ។ AFP
រដ្ឋមន្ត្រី ក្រសួង ការបរទេស សហរដ្ឋ អាមេរិក លោក ចន ឃែរី (John Kerry) នឹងជួប ពិភាក្សា ជាមួយ ថ្នាក់ដឹកនាំ គណបក្ស ប្រឆាំង នៅពេល លោក មកបំពេញ ទស្សនកិច្ច នៅប្រទេស កម្ពុជា ក្នុងសប្ដាហ៍ក្រោយ។
អ្នកនាំពាក្យ គណបក្ស សង្រ្គោះជាតិ លោក យឹម សុវណ្ណ ឲ្យវិទ្យុ អាស៊ី សេរី ដឹង នៅថ្ងៃ ទី២១ ខែមករា ថា, នៅក្នុងជំនួប រវាង លោក ចន ឃើរី ជាមួយ ប្រធានស្ដីទី គណបក្ស សង្រ្គោះជាតិ លោក កឹម សុខា គណបក្ស សង្រ្គោះជាតិ នឹងលើក យកបញ្ហា នយោបាយ នៅកម្ពុជា ទៅជជែក។
ប៉ុន្តែ លោក យឹម សុវណ្ណ មិនទាន់ ឲ្យដឹង ថា, តើ ការជួបគ្នា នឹងធ្វើឡើង នៅថ្ងៃណា ឬនៅទីណា នៅឡើយទេ ព្រោះ នេះ ជាការរៀបចំ របស់ ស្ថានទូត សហរដ្ឋ អាមេរិក ប្រចាំកម្ពុជា។
សេចក្តីប្រកាសព័ត៌មានរបស់ក្រសួងការបរទេសកម្ពុជា ចុះថ្ងៃទី១៦ មករា ឲ្យដឹងថា រដ្ឋមន្ត្រីក្រសួងការបរទេសសហរដ្ឋអាមេរិក លោក ចន ឃែរី នឹងមកបំពេញទស្សនកិច្ចនៅប្រទេសកម្ពុជា នៅថ្ងៃទី២៥ ដល់ថ្ងៃទី២៦ ខែមករា។
ដំណើរទស្សនកិច្ចរបស់ លោក ចន ឃែរី មកកម្ពុជា គឺធ្វើឡើងតាមការអញ្ជើញរបស់រដ្ឋមន្ត្រីក្រសួងការបរទេសកម្ពុជា ក្នុងបំណងពង្រឹង និងពង្រីកបន្ថែមទៀតនូវទំនាក់ទំនងទ្វេភាគី រវាងប្រទេសទាំងពីរ។ ក្នុងដំណើរទស្សនកិច្ចនេះ លោក ចន ឃែរី នឹងជួបពិភាក្សាជាមួយលោកនាយករដ្ឋមន្ត្រី ហ៊ុន សែន និងរដ្ឋមន្ត្រីក្រសួងការបរទេសកម្ពុជា លោក ហោ ណាំហុង។
អ្នកនាំពាក្យគណបក្សសង្រ្គោះជាតិ លោក យឹម សុវណ្ណ រំពឹងថា ជំនួបរវាង លោក ចន ឃែរី និងគណបក្សប្រឆាំង ក្រៅពីការជជែកគ្នាពីរឿងនយោបាយ ក៏អាចនឹងមានការផ្លាស់ប្ដូរយោបល់ ទៅលើបញ្ហាសេដ្ឋកិច្ច និងបញ្ហាសង្គមផងដែរ៕
No comments:
Post a Comment