មន្ត្រី ការពារ ព្រៃឈើ ខេត្ត មណ្ឌលគិរី ៤រូប រងការប្ដឹង រឿងវៀតណាម ចូលកាប់ឈើ
RFA / វិទ្យុ អាស៊ី សេរី | ៦ មករា ២០១៦
តំណាងសហគមន៍ពូលុ និងលំមេះ
នាំយកវត្ថុតាងជាគោយន្តមកប្រគល់ឲ្យតុលាការ
បន្ទាប់ពីអ្នកភូមិដាក់ពាក្យប្ដឹងចោទមន្ត្រី
៤នាក់ពីបទបណ្ដែតបណ្ដោយឲ្យពលរដ្ឋវៀតណាម ចូលកាប់ឈើក្នុងដីខ្មែរ។
រូបថតថ្ងៃទី៦ មករា ឆ្នាំ២០១៦ (Photo courtesy of ADHOC)
តំណាងសហគមន៍ប៊ូស្រា បានយកវត្ថុតាងបទល្មើសព្រៃឈើដែលសហគមន៍រឹបអូសបានពីពលរដ្ឋវៀតណាម លួចកាប់ឈើក្នុងព្រៃខ្មែរប្រគល់ទៅឲ្យតុលាការសាលាដំបូងខេត្ត មណ្ឌលគិរី នៅព្រឹកថ្ងៃទី៦ ខែមករា បន្ទាប់ពីអ្នកភូមិសម្រេចចិត្តប្ដឹងករណីនេះតាមផ្លូវតុលាការ។
កាលពីវេលាអធ្រាត្រថ្ងៃទី៣១ ខែធ្នូ ក្រុមល្បាតព្រៃសហគមន៍ភូមិពូលុ និងភូមិលំមេះ ២៧នាក់ បានរឹបអូសម៉ាស៊ីនគោយន្តពីរគ្រឿង ម៉ាស៊ីនកាត់ឈើ ៤គ្រឿង និងម៉ូតូមួយគ្រឿង បន្ទាប់ពីអ្នកភូមិប្រទះឃើញជនជាតិវៀតណាម មួយក្រុមមានគ្នាប្រមាណ ១០នាក់ បានឆ្លងដែនចូលមកកាប់ឈើក្នុងព្រៃការពារខេត្តមណ្ឌលគិរី។ អ្នកភូមិអះអាងថា ជនជាតិវៀតណាម ទាំងនោះបាញ់កាំភ្លើងបីគ្រាប់ ហើយរត់គេចខ្លួនចោលវត្ថុតាងទាំងនោះទើបក្រុមល្បាតសហគមន៍រឹបអូស មករក្សាទុកនៅប៉ុស្តិ៍នគរបាលរដ្ឋបាលឃុំប៊ូស្រា នៅព្រឹកថ្ងៃទី១ ខែមករា។
តំណាងសហគមន៍លោក ឃុត ចាន់រ៉ា មានប្រសាសន៍ថា អ្នកភូមិសម្រេចចិត្តប្ដឹងមន្ត្រីប៉ូលិសគ្រប់គ្រងប៉ុស្តិ៍ការពារ ព្រំដែនចំនួនបីកន្លែង រួមទាំងនាយសង្កាត់រដ្ឋបាលព្រៃឈើនៅតំបន់នោះទៅស្ថាប័នអយ្យការដូច គ្នា ដើម្បីបើកការស៊ើបអង្កេតពីភាពមិនប្រក្រតីក្នុងការបំពេញភារកិច្ច របស់មន្ត្រីមានសមត្ថកិច្ចទាំងនោះ៖ «គឺគាត់ទទួលខុសត្រូវនៅ តំបន់ហ្នឹង អ្វីដែលពួកគាត់ធ្វើឲ្យកើតមានបទល្មើសព្រៃឈើហ្នឹង ទោះបីយ៉ាងម៉េចពួកគាត់ត្រូវទទួលខុសត្រូវ។»
មន្ត្រីខេត្តមណ្ឌលគិរី ទាំង ៤នាក់ ដែលសហគមន៍ដាក់ពាក្យប្ដឹងរួមមាន នាយនគរបាលប៉ុស្តិ៍ការពារព្រំដែនកង់រ៉ូឡង់ លោក កែវ សុភាព នាយនគរបាលប៉ុស្តិ៍ការពារព្រំដែនឡំពឹ លោក ប្រាក់ ភិរម្យ នាយនគរបាលប៉ុស្តិ៍ការពារព្រំដែនទួលស្វាយ លោក ហិន ស៊ីត្រា និងនាយសង្កាត់រដ្ឋបាលព្រៃឈើពេជ្រាដា លោក គង់ វីរៈ។
ទាក់ទិនទៅនឹងបណ្ដឹងចោទប្រកាន់នេះ វិទ្យុអាស៊ីសេរី មិនអាចទាក់ទងមន្ត្រីទាំងបីនាក់សុំបំភ្លឺរឿងចោទប្រកាន់នេះបាន ទេ នៅថ្ងៃទី៦ ខែមករា។ រីឯនាយខណ្ឌរដ្ឋបាលព្រៃឈើខេត្តមណ្ឌលគិរី លោក វង សុកសិរី ចាត់ទុកករណីនេះថា ជាសិទ្ធិរបស់ពលរដ្ឋ។ លោកថា នឹងស្រាវជ្រាវបន្ថែមទៅលើមន្ត្រីលោកដែលរងការចោទប្រកាន់នេះ៖ «ជាសិទ្ធិរបស់គាត់ បើមានភស្តុតាងគ្រប់គ្រាន់ត្រឹមត្រូវតាមហ្នឹងទៅអត់មានស្អីទេ។»
ចំណែកមន្ត្រីសម្របសម្រួលសមាគមអាដហុក (ADHOC) ខេត្តមណ្ឌលគិរី លោក សុក រដ្ឋា កត់សំគាល់ថា ប៉ុន្មានឆ្នាំកន្លងទៅសហគមន៍ប៊ូស្រា ចាប់បានវត្ថុតាង និងឃាត់ខ្លួនពលរដ្ឋវៀតណាម ច្រើនករណីដែលចូលមកកាប់ឈើក្នុងដីខ្មែរ ហេតុនេះអ្នកភូមិទម្លាក់ការទទួលខុសត្រូវបញ្ហានេះទៅលើមន្ត្រី ការពារព្រំដែន និងមន្ត្រីព្រៃឈើនៅតំបន់នោះ។
លោកអំពាវនាវឲ្យមន្ត្រីអយ្យការស៊ើបអង្កេតករណីនេះឲ្យហ្មត់ចត់ ដើម្បីផ្ដល់យុត្តិធម៌ និងលើកទឹកចិត្តពលរដ្ឋចូលរួមការពារព្រៃឈើដែលជាទ្រព្យសម្បត្តិ ជាតិ៖ «ដោយសារកន្លងទៅសហគមន៍បាត់បង់មានជំនឿទៅលើអាជ្ញាធរ មូលដ្ឋាន មន្ត្រីជំនាញព្រៃឈើ ទៅលើជំនាញបរិស្ថានច្រើនមកហើយ។ អ៊ីចឹងករណីហ្នឹងឲ្យគាត់មើលឃើញថា តុលាការពិតជាដោះស្រាយរឿងហ្នឹងជូនគាត់ដោយយុត្តិធម៌ពិតប្រាកដ។»
ច្បាប់ព្រៃឈើមាត្រា ១០០ និងមាត្រា ១០១ កំណត់ផ្ដន្ទាទោសជាប់ពន្ធនាគារពី ១ឆ្នាំ ដល់ ៥ឆ្នាំ និងពិន័យជាប្រាក់ពី ១០លានរៀល ទៅ ១០០លានរៀល ចំពោះមន្ត្រីអាជ្ញាធរដែនដី មន្ត្រីនគរបាល មន្ត្រីកងយោធពលខេមរភូមិន្ទ ឬមន្ត្រីផ្សេងទៀតដែលបានធ្វើអន្តរាគមន៍ ផ្ដល់ការអនុញ្ញាតដោយផ្ទាល់ ឬប្រយោល ជួយដល់អាជីវកម្មព្រៃឈើ និងធ្វើសកម្មភាពគ្រប់បែបយ៉ាងផ្ទុយទៅនឹងបញ្ញត្តិនៃច្បាប់ព្រៃ ឈើ។ លើសពីនេះទៀត នឹងត្រូវពិន័យដូចគ្នាចំពោះមន្ត្រីព្រៃឈើដែលបានប្រព្រឹត្តដូច គ្នានេះ រួមបញ្ចូលមន្ត្រីព្រៃឈើណាដែលប្រកបរបរធ្វើអាជីវកម្មពាក់ព័ន្ធ វិស័យព្រៃឈើក្នុងអំឡុងពេលកាន់តំណែង ឬក្នុងអំឡុងពេល ១ឆ្នាំក្រោយការឈប់កាន់តំណែងដោយប្រការណាក៏ដោយ។
មិនបានរាយការណ៍ ឬមិនបានដាក់ពាក្យប្ដឹងចំពោះបទល្មើសព្រៃឈើថ្នាក់ទី១ ដែលបានកើតក្នុងរង្វង់ដែនសមត្ថកិច្ចរបស់ខ្លួនទាន់ពេលវេលា និងធ្វេសប្រហែសដោយចេតនាក្នុងការបំពេញភារកិច្ច ឬផ្ដល់របាយការណ៍ព័ត៌មានក្លែងបន្លំជាលាយលក្ខណ៍អក្សរដែលជាមូលហេតុ បង្កឲ្យកើតមានបទល្មើសព្រៃឈើថ្នាក់ទី១៕
No comments:
Post a Comment