ក្រសួង មហាផ្ទៃ មិនអនុញ្ញាត ឲ្យបក្សយុវជន កម្ពុជា ជួបសកម្មជន បក្សប្រឆាំង នៅគុក ព្រៃ ស
RFA / វិទ្យុ អាស៊ី សេរី | ២៥ កុម្ភៈ ២០១៦
ប្រធានគណបក្សយុវជនកម្ពុជា លោក ពេជ្រ ស្រស់ ថ្លែងនៅក្នុងទីស្នាក់ការកណ្ដាលគណបក្ស នៅថ្ងៃទី២៥ កុម្ភៈ ឆ្នាំ២០១៦។ RFA/Morm Moniroth
ក្រសួង មហាផ្ទៃ មិនអនុញ្ញាត ឲ្យគណបក្ស យុវជនកម្ពុជា បានចូលជួប សកម្មជន គណបក្ស ប្រឆាំង នៅក្នុងពន្ធនាគារ ព្រៃ ស ទេ។ ការច្រានចោលដោយពុំមានមូលហេតុនេះ បន្ទាប់ពីក្រសួងមហាផ្ទៃ បានចេញលិខិតអនុញ្ញាតម្ដងរួចមកហើយ គឺមួយថ្ងៃមុននៃការបដិសេធនេះ។ ប្រធានគណបក្សដែលទើបតែបង្កើតថ្មីនេះ បង្ហាញការសោកស្ដាយចំពោះសេចក្ដីសម្រេចនេះ និងចាត់ទុកថា អគ្គនាយកដ្ឋានពន្ធនាគារនៃក្រសួងមហាផ្ទៃ ហាក់ដូចជាមិនចេះពីរបៀបធ្វើការ។
ប្រធានគណបក្សយុវជនកម្ពុជា អះអាងថា ខ្លួននៅតែរង់ចាំការឆ្លើយតបជាថ្មីឡើងវិញពីអគ្គនាយកដ្ឋាន ពន្ធនាគារ នៃក្រសួងមហាផ្ទៃ ថ្វីបើលិខិតដែលអនុញ្ញាតលើកនេះ ត្រូវបានក្រសួងមហាផ្ទៃ ច្រានចោលចំពោះសំណើសុំជួបអ្នកជាប់ឃុំបក្សប្រឆាំងទាំង ១៥រូប នៅក្នុងគុកព្រៃស នោះ។
លោក ពេជ្រ ស្រស់ ប្រធានគណបក្សយុវជនកម្ពុជា ឲ្យដឹងនៅថ្ងៃទី២៥ ខែកុម្ភៈ ថា លោកហាក់មិនយល់ពីរបៀបធ្វើការរបស់ក្រសួងមហាផ្ទៃ ដែលគ្រប់គ្រងដោយលោក ស ខេង ទាល់តែសោះ។លោកបញ្ជាក់ថា ជាការឆ្លើយតបនឹងការសុំជួបសកម្មជនបក្សប្រឆាំងទាំង ១៥រូបនោះ ត្រូវបានក្រសួងមហាផ្ទៃ អនុញ្ញាតរួចទៅហើយ បែរជាបដិសេធវិញ ដោយពុំមានមូលហេតុសមរម្យទាល់តែសោះ។
លោក ពេជ្រ ស្រស់ យល់ឃើញថា របៀបធ្វើការដូចនេះ គឺស្មើស៊ីញេនឹងដៃ រួចលុបនឹងជើងវិញ។ស្ថិតក្រោមហេតុផលនេះហើយ លោករិះគន់ថា ទើបធ្វើឲ្យប្រទេសកម្ពុជា មិនអាចដំណើរការទៅមុខបាន ដោយសាររបៀបធ្វើការមិនច្បាស់លាស់បែបនេះ៖ «ខ្ញុំយល់ថា វាហាក់ដូចជាកូនក្មេងលេងបាយឡុកបាយឡមួយដែលខ្លួនជាអ្នកគោរព ច្បាប់ ជាអ្នកបង្គាប់បញ្ជាឲ្យគេ តែខ្លួនឯងមិនគោរពច្បាប់ ធ្វើអ្វីតាមអំពើចិត្ត ធ្វើអ្វីតាមការនឹកឃើញ ចិត្តចង់ឲ្យជួបៗ ចិត្តមិនឲ្យចង់ជួប គាត់មិនឲ្យជួបវិញ។ អាហ្នឹងវាជារឿងមួយដែលកម្ពុជា រងភាពគ្រោះខ្លាំងបំផុតនៅថ្ងៃអនាគត ដោយសារអ្នកអនុវត្តច្បាប់ និងបញ្ជាឲ្យគេគោរពច្បាប់មិនគោរពច្បាប់ទៅហើយ។»
កាលពីថ្ងៃទី១៨ ខែកុម្ភៈ គណបក្សយុវជនកម្ពុជា បានដាក់សំណើទៅក្រសួងមហាផ្ទៃ ទទួលបន្ទុកពន្ធនាគារ ដើម្បីសុំចូលសួរសុខទុក្ខសកម្មជនទាំង ១៥រូប របស់គណបក្សសង្គ្រោះជាតិ។ លិខិតឲ្យដឹងទៀតថា មូលហេតុដែលបក្សយុវជនកម្ពុជា ត្រូវការជួបសកម្មជនទាំងនោះនៅគុកព្រៃស ដើម្បីស្វែងយល់ពីស្ថានភាពមួយចំនួនអំពីមូលហេតុនៃការចាប់ខ្លួន។ ម្យ៉ាង ក្នុងនាមអ្នកនយោបាយជំនាន់ថ្មី ដែលមិនប្រកាន់និន្នាការនយោបាយ គឺតែងចង់ដឹងពីសុខ និងទុក្ខរបស់ពួកគាត់នៅក្នុងគុក។
ជាការឆ្លើយតប អគ្គនាយកដ្ឋានពន្ធនាគារក្រសួងមហាផ្ទៃ បានចេញលិខិតចុះថ្ងៃទី២៤ ខែកុម្ភៈ អនុញ្ញាតឲ្យគណបក្សយុវជនកម្ពុជា បានជួបសកម្មជនទាំង ១៥នាក់ របស់បក្សប្រឆាំងនៅគុកព្រៃស ដោយមិនឲ្យហួសក្នុងអំឡុងខែកុម្ភៈ នេះទេ។ ផ្ទុយទៅវិញ ក្រោយមួយថ្ងៃនៃការអនុញ្ញាតនោះ ក្រសួងមហាផ្ទៃ បានច្រានចោលវិញភ្លាមៗ ដោយពុំបានបញ្ជាក់ពីមូលហេតុពិតប្រាកដណាមួយឡើយ។
មន្ត្រីនាំពាក្យអគ្គនាយកដ្ឋានពន្ធនាគារក្រសួងមហាផ្ទៃ លោក នុត សវនា ឆ្លើយតបយ៉ាងខ្លីថា ជាប់ប្រជុំ រួចផ្ដាច់ទូរស័ព្ទទៅវិញ នៅថ្ងៃទី២៥ ខែកុម្ភៈ។ ជុំវិញរឿងនេះ មន្ត្រីពន្ធនាគារព្រៃស ដែលយាមការពារសន្តិសុខបានបដិសេធអំពីការហាមប្រាមនេះ ដោយអះអាងថា នេះជាបទបញ្ជាពីថ្នាក់លើ។
លោក អំ សំអាត មន្ត្រីជាន់ខ្ពស់អង្គការលីកាដូ (LICADHO) ចាត់ទុកថា នេះជាការមិនទទួលខុសត្រូវ។ លោកបន្ថែមថា មានលិខិតជាច្រើនដែលអនុញ្ញាតហើយ មិនមានបញ្ហា ក៏ប៉ុន្តែនេះជាមន្ទិលសង្ស័យដែលក្រសួងមហាផ្ទៃ បានចេញលិខិតអនុញ្ញាតទៅហើយបែរជាផ្អាកវិញដូច្នេះ៖ «ខ្ញុំគិតថា ជាការងារមិនទទួលខុសត្រូវ ដោយមិនមានប្រសិទ្ធភាព ពីព្រោះលិខិតស្នាមក្នុងអនុវត្តតាមបែបបទរដ្ឋបាលមួយ ហើយក្នុងនាមរដ្ឋាភិបាល និងក្នុងនាមស្ថាប័នរបស់គាត់។យើងត្រូវតែពិនិត្យឲ្យបានល្អិតល្អន់ មុននឹងធ្វើការអនុញ្ញាត។»
គណបក្សយុវជនកម្ពុជា ត្រូវបានក្រសួងមហាផ្ទៃ ចុះបញ្ជីជាផ្លូវការក្នុងបញ្ជីឈ្មោះស្ដីពីគណបក្សនយោបាយ កាលពីថ្ងៃទី១៥ ខែកុម្ភៈ។ លោក ពេជ្រ ស្រស់ ជាប្រធានគណបក្សយុវជនកម្ពុជា យល់ឃើញថា អ្វីដែលក្រសួងមហាផ្ទៃ យល់ព្រមហើយបែរជាផ្អាកមិនសកម្មជនគណបក្សរបស់លោកបានចូលទៅ ពន្ធនាគារព្រៃសវិញនេះ អាចជាហេតុផលបារម្ភពីប្រជាប្រិយភាពរបស់គណបក្សដែលទើបបង្កើតថ្មី នេះ មានឥទ្ធិពលនៅក្នុងឆាកនយោបាយ ដែលជារលកថ្មីមួយបន្ថែមទៀតនៅពេលនេះ៕
No comments:
Post a Comment