ពលរដ្ឋ ខេត្តស្ទឹងត្រែង ចោទអាជ្ញាធរ មូលដ្ឋាន ថា នៅ ពីក្រោយ ឈ្មួញ កាប់បំផ្លាញ ព្រៃឈើ
RFA / វិទ្យុ អាស៊ី សេរី | ១៨ កុម្ភៈ ២០១៦
២១-ធ្នូ-២០១៥៖ ទីរួមខេត្តស្ទឹងត្រែង។ RFA/Men Sothyr
ពលរដ្ឋ រស់នៅ ឃុំ អន្លង់ជ្រៃ ស្រុក ថាឡាបរិវ៉ាត់ ខេត្ត ស្ទឹងត្រែង អះអាង ថា, ឈ្មួញ មានអំណាច ជួលកម្មករ កាប់រានព្រៃ រាប់ពាន់ហិកតារ ដើម្បី ប្រើប្រាស់ ជាកម្មសិទ្ធិ ឯកជន និងធ្វើ អាជីវកម្ម ដោយមាន អាជ្ញាធរ មូលដ្ឋាន និងមន្ត្រី រដ្ឋបាល ព្រៃឈើ បើកដៃ។ ការអះអាង បែបនេះ បន្ទាប់ ពីឈ្មួញ មានអំណាច ឈ្មោះ មាស មិត្ត ជាអតីត ម្ចាស់កំពង់ចម្លង ថា, ឡាបរិវ៉ាត់ គំរាមប្ដឹង ពលរដ្ឋ ៤២គ្រួសារ បើ ពលរដ្ឋ ទាំងនោះ ទម្លាយរឿង ទន្ទ្រានដីព្រៃ របស់គាត់ កន្លងមក។
តំបន់ព្រៃស្រោង ឬព្រៃក្រាស់នៅភូមិវាលដេញ ឃុំអន្លង់ជ្រៃ ស្រុកថាឡាបរិវ៉ាត់ គឺជាផ្នែកមួយនៃព្រៃឡង់ ឋិតនៅទិសខាងជើងឆៀងលិច នៃទីរួមខេត្តស្ទឹងត្រែង ឆ្ងាយពីទីរួមខេត្តជាង ៦០គីឡូម៉ែត្រ។ ពលរដ្ឋរស់នៅទីនោះ ភាគច្រើនជាពលរដ្ឋជនជាតិដើមភាគតិចកួយ។
អ្នកភូមិអះអាងថា ព្រៃនៅតំបន់នោះកំពុងត្រូវបានក្រុមឈ្មួញកាប់ទន្ទ្រានយ៉ាង អនាធិបតេយ្យរាប់ពាន់ហិកតារ ពុំទាន់មានការទប់ស្កាត់ ដោយមានអាជ្ញាធរមូលដ្ឋាន និងមន្ត្រីរដ្ឋបាលព្រៃឈើ បើកដៃឲ្យពលរដ្ឋចំណាកស្រុក។
ពលរដ្ឋរស់នៅភូមិអន្លង់ជ្រៃ លោក ផូ ផល ចោទប្រកាន់ថា ឈ្មួញមានអំណាចឈ្មោះ មាស មិត្ត ជាអតីតម្ចាស់កំពង់ចម្លងថាឡាបរិវ៉ាត់ បានជួលកម្មករជាច្រើនក្រុម សម្រុកកាប់ទន្ទ្រានដីព្រៃនៅតំបន់ភ្នំម្លូ និងតំបន់ផ្សេងទៀត ដើម្បីធ្វើអាជីវកម្មតាំងពីឆ្នាំ២០១៣ រហូតបច្ចុប្បន្ន នៅពុំទាន់មានការទប់ស្កាត់ឡើយ។ លើសពីនេះឈ្មួញរូបនោះ បានជួលកម្មករកាប់ក្នុង ១ហិកតារតម្លៃ ៣៥ម៉ឺនរៀល រយៈពេល ៣ឆ្នាំមកនេះ ផ្ទៃដីកាប់រាននោះមានទំហំដី ៨៤០ហិកតារឋិតនៅចំណុចភ្នំម្លូ។
លោកអះអាងទៀតថា ឈ្មួញរូបនោះបន្ទាប់ពីជួលកម្មករកាប់ព្រៃឲ្យក្លាយជាវាល បានដាំដំណាំដំឡូង និងស្វាយ ជាដើម និងដាក់ឈ្មោះពលរដ្ឋជំនួសទៀត ដោយចរចាជាមួយអាជ្ញាធរមូលដ្ឋានធ្វើប័ណ្ណកម្មសិទ្ធិបណ្ដោះអាសន្ន និងលក់បន្តឲ្យពលរដ្ឋផ្សេងទៀត។ លោកបន្តថា ឈ្មួញឈ្មោះ មាស មិត្ត ធ្លាប់គំរាមចាប់ពលរដ្ឋដាក់គុក បើពលរដ្ឋណានិយាយឈ្មោះលោកជាប់ពាក់ព័ន្ធកាប់ព្រៃឈើនៅតំបន់នោះ។
ពលរដ្ឋម្នាក់ទៀតឈ្មោះ ឈឿន សុភា កត់សម្គាល់ថា ប្រសិនពលរដ្ឋកាប់រានដើម្បីធ្វើចម្ការតិចតួច ត្រូវអាជ្ញាធរ និងមន្ត្រីជំនាញឃាត់ ឬអាចចាប់ខ្លួន ប៉ុន្តែបើអ្នកមានអំណាចកាប់រានរាប់ពាន់ហិកតារ អាជ្ញាធរមិនត្រឹមតែបណ្តោយទេ ព្រមទាំងជ្រោមជ្រែងឲ្យដីព្រៃរបស់រដ្ឋមកជាដីកម្មសិទ្ធិឯកជនស្រប ច្បាប់។ លោកបារម្ភថា បើអាជ្ញាធរខេត្តនៅតែបណ្តោយឲ្យករណីនេះកើតឡើងដដែលៗ ព្រៃឈើភាគច្រើនជាប្រភេទព្រៃស្រោង នឹងក្លាយជាវាល ហើយគ្រប់គ្រងកម្មសិទ្ធិឯកជន ធ្វើឲ្យប៉ះពាល់ដល់ជីវភាពរស់នៅជនជាតិដើមភាគតិច។ លោក ឈឿន សុភា សង្កត់ធ្ងន់ថា ការហិនហោចបាត់បង់ព្រៃសហគមន៍នេះ គឺជាចេតនាមិនអើពើរបស់អាជ្ញាធរភូមិ-ឃុំ និងស្រុក រួមទាំងមន្ត្រីរដ្ឋបាលព្រៃឈើ។
លោក ឈៀន សុភាព បន្ថែមថា ព្រៃនៅតំបន់ភ្នំម្លូ និងភ្នំសេកស ឃុំអន្លង់ជ្រៃ ស្រុកថាឡាបរិវ៉ាត់ គឺជាតំបន់ព្រៃស្រោង។ កាលពី ៣ឆ្នាំមុនជាជម្រកសត្វកម្រ ដូចជាខ្ទីង និងប្រើស ជាដើម តែបច្ចុប្បន្ន សត្វព្រៃនៅតំបន់នោះបាត់បង់បន្តិចម្តងៗ បន្ទាប់ពីមានការកាប់ទន្ទ្រានព្រៃ។
កាលពីថ្ងៃទី១៥ កុម្ភៈ អាជ្ញាធរខេត្ត និងមន្ត្រីជំនាញមួយចំនួន បានចុះពិនិត្យការកាប់រានដីព្រៃឋិតនៅតំបន់ភ្នំសេកស និងភ្នំម្លូ ឃុំអន្លង់ជ្រៃ តែនៅមិនទាន់មានចំណាត់ការណាមួយឡើយ។
វិទ្យុអាស៊ីសេរី មិនអាចទាក់ទងឈ្មួញឈ្មោះ មាស មិត្ត ជាអតីតម្ចាស់កំពង់ចម្លងថាឡាបរិវ៉ាត់ ដើម្បីសុំការបំភ្លឺជុំវិញការចោទប្រកាន់នេះបានទេនៅថ្ងៃទី១៦ កុម្ភៈ។
មេឃុំអន្លង់ជ្រៃ លោក ព្រំ យ៉ា ទទួលស្គាល់ថា ឈ្មួញឈ្មោះ មាស មិត្ត ពិតជាធ្លាប់ជួលកម្មករកាប់រានដីព្រៃ ១ហិកតារក្នុងតម្លៃ ៣៥ម៉ឺនរៀលកន្លងមក ប៉ុន្តែលោកមិនអាចបញ្ជាក់បានពីទំហំដីត្រូវគេកាប់ទន្ទ្រាន ប៉ុណ្ណាទេ។ លោកអះអាងថា អាជ្ញាធរឃុំមិនបានជាប់ពាក់ព័ន្ធនឹងការកាប់រានដីព្រៃនោះទេ កន្លងមក។ លោកក៏ធ្លាប់បានរាយការណ៍ទៅមន្ត្រីជំនាញ ដើម្បីចាត់វិធានការករណីនេះដែរ។
ទាក់ទិនករណីនេះ មន្ត្រីឃ្លាំមើលបញ្ហាព្រៃឈើនៃសមាគមអាដហុក (ADHOC) ខេត្ត ស្ទឹងត្រែង លោក ហូ សំអុល រកឃើញថា ភាពធូររលុងនៃការអនុវត្តច្បាប់ព្រៃឈើ និងការបណ្តែតបណ្តោយរបស់អាជ្ញាធរ និងមន្ត្រីជំនាញ គឺជាដើមចមបណ្ដាលឲ្យព្រៃរងការកាប់បំផ្លាញ ដើម្បីយកដីធ្វើជាកម្មសិទ្ធិដោយគ្មានការទទួលខុសត្រូវ។ លោកបារម្ភថា បើរដ្ឋាភិបាលនៅមិនទាន់មានវិធានការទប់ស្កាត់ឲ្យទាន់ពេលនោះទេ ការហិនហោចព្រៃឈើកាន់តែធ្ងន់ធ្ងរ។ លោកអះអាងថា អាជ្ញាធរមូលដ្ឋាន រួមទាំងមន្ត្រីពាក់ព័ន្ធ ត្រូវទទួលខុសត្រូវចំពោះមុខច្បាប់ បើរកឃើញថា នៅពីក្រោយខ្នងនៃការកាប់បំផ្លាញព្រៃសហគមន៍នោះ។
កាលពីដើមឆ្នាំ២០១៥ សមាជិកក្រុមប្រឹក្សាឃុំតាឡាត មកពីគណបក្សប្រឆាំង លោក ណ ណិត ត្រូវបានតុលាការចាប់ឃុំខ្លួនក្នុងពន្ធនាគារ ក្រោមបទចោទថា បានកាប់រានដីព្រៃឈើធ្វើចម្ការមួយហិកតារ តាមពាក្យបណ្ដឹងរបស់មេឃុំតាឡាត លោក សឿង ខង ហើយរហូតបច្ចុប្បន្ន សំណុំរឿងនោះបញ្ជូនទៅសាលាឧទ្ធរណ៍ មិនទាន់ជំនុំជម្រះនៅឡើយ។ មកទល់ពេលនេះ លោក ណ ណិត ត្រូវបានឃុំខ្លួនជិត ១ឆ្នាំហើយ។
ករណីនេះ មន្ត្រីសង្គមស៊ីវិលរិះគន់ថា ការអនុវត្តច្បាប់របស់អាជ្ញាធរមិនមានតម្លាភាព បន្ទាប់ពីឈ្មួញកាប់ព្រៃរាប់ពាន់ហិកតារ មិនត្រូវបានចាប់ខ្លួន ចំណែកមន្ត្រីគណបក្សប្រឆាំងកាប់ទន្ទ្រានព្រៃមួយហិកតារ ត្រូវជាប់ពន្ធនាគារមិនទាន់ដោះលែង។
កាលពីថ្ងៃទី២៩ ខែធ្នូ ឆ្នាំ២០១៥ រដ្ឋមន្ត្រី ក្រសួង មហាផ្ទៃ លោក ស ខេង ជំរុញ ឲ្យអភិបាលខេត្ត ស្ទឹងត្រែង ដែលទើបតែងតាំង ថ្មី លោក មុំ សារឿន ឲ្យពង្រឹង យន្តការ ទប់ស្កាត់ បទល្មើស ព្រៃឈើ ខណៈ ដែលមន្ត្រី ពាក់ព័ន្ធ ដេញដោលគ្នា ចំពោះបញ្ហានេះ។
ច្បាប់ព្រៃឈើឆ្នាំ២០០២ មាត្រា១០០ ចែងថា សកម្មភាពទាំងឡាយណាដែលធ្វើឡើងដោយអាជ្ញាធរដែនដី ឬមន្ត្រីអាជ្ញាធរផ្សេងទៀត ដើម្បីធ្វើការអន្តរាគមន៍ផ្តល់ការអនុញ្ញាតដោយផ្ទាល់ ឬដោយប្រយោល ជួយដល់អាជីវកម្មព្រៃឈើ និងធ្វើសកម្មភាពគ្រប់យ៉ាងផ្ទុយពីបទបញ្ញត្តិនៃច្បាប់ ត្រូវចាត់ទុកជាបទល្មើស ត្រូវផ្ដន្ទាទោសពី ១ឆ្នាំទៅ ២ឆ្នាំ និងពិន័យជាប្រាក់ពី ១០លានរៀលទៅ ១០០លានរៀល៕
No comments:
Post a Comment