តុលាការ លើកពេល សវនាការ សំណុំរឿង ហិង្សា លើតំណាងរាស្ត្រ បក្សប្រឆាំង
RFA / វិទ្យុ អាស៊ី សេរី | ២៨ មេសា ២០១៦
ជនជាប់ចោទវាយតំណាងរាស្ត្រគណបក្សសង្គ្រោះជាតិ ឈ្មោះ ម៉ៅ
ហឿន (ឆ្វេង) និង ចាយ សារិទ្ធ
ត្រូវបានសមត្ថកិច្ចនាំខ្លួនចេញពីបន្ទប់សវនាការសាលាដំបូងរាជធានី
ភ្នំពេញ នៅថ្ងៃទី២៨ ខែមេសា ឆ្នាំ២០១៦។
RFA/Morm Moniroth
ចៅក្រម ជំនុំជម្រះ នៃតុលាការ រាជធានី ភ្នំពេញ សម្រេច លើកពេល សវនាការ សំណុំរឿង ហិង្សា លើអ្នក តំណាងរាស្ត្រ បក្ស ប្រឆាំង ពីររូប ទៅដើម ខែឧសភា។ ការលើកពេល ជំនុំជម្រះ ទៅថ្ងៃ ទី១០ ខែឧសភា នោះ បន្ទាប់ ពីចំណាយពេល សវនាការ ស្ទើរពេញ មួយព្រឹក នៅថ្ងៃទី ២៨ ខែមេសា។
តំណាង មេធាវី ម្នាក់ ក្នុងចំណោម មេធាវី ទាំង ៣រូប របស់ បក្សប្រឆាំង ចាត់ទុក ការជំទាស់ ដោយតំណាង អយ្យការ ចំពោះ សំណួរខ្លះ នៅក្នុងអង្គ សវនាការ ថា ជាចេតនា មិន ឲ្យចង់ លោក អាចរកអ្នក ដែលសមគំនិត និងអ្នកបញ្ជា នៅពីក្រោយខ្នង នៃជនដៃដល់។
បើ ទោះបី ជាដំណើរការ ក្នុងការជំនុំជម្រះ នៃសំណុំរឿង វាយដំលើ អ្នកតំណាងរាស្ត្របក្សប្រឆាំងមិនទាន់បានចប់ចុងចប់ដើមក៏ដោយចុះ ជនជាប់ចោទម្នាក់ក្នុងចំណោមអ្នកទាំង ៣នាក់ បានសារភាពនៅក្នុងអង្គសវនាការថា ខ្លួនគេគឺជាអ្នកបង្កហិង្សាដោយចេតនា និងពុំមានអ្នកដែលបញ្ជានៅពីក្រោយខ្នងឡើយ។
សវនាការដែលប្រព្រឹត្តទៅនៅព្រឹកថ្ងៃទី២៨ ខែមេសា លើអង្គហេតុ ចាប់ផ្ដើមមិនទាន់ទាំងចប់ស្រួលបួលផង លោក ចាយ សារិទ្ធ ដែលជាអ្នកវាយតំណាងរាស្ត្របក្សប្រឆាំងម្នាក់ក្នុងចំណោម ២នាក់ផ្សេងទៀត ដែលកំពុងជាប់ឃុំ បានសារភាពថា អ្នកតំណាងរាស្ត្រដែលរងរបួសនោះ គឺរូបគេជាអ្នកវាយធ្វើបាប។
លោក ចាយ សារិទ្ធ ដែលសារភាពថា ខ្លួនគឺជាកងអង្គរក្សរបស់លោកនាយករដ្ឋមន្ត្រី ហ៊ុន សែន នៅក្រុងតាខ្មៅ ហើយពាក់ស័ក្ដិ ៤ ផងនោះ បដិសេធថា ការប្រើហិង្សាទៅលើតំណាងរាស្ត្រគឺពុំមានអ្នកបញ្ជាឡើយ។
មន្ត្រីយោធាដែលមានសម្បុរស ទាបក្រអាញបន្តិចរូបនេះ ប្រាប់អង្គសវនាការថា មូលហេតុដែលនាំឲ្យឈានទៅដល់ប្រើហិង្សានោះ ដោយសារអ្នកតំណាងរាស្ត្របើកឡានមកឈប់ក្បែរក្រុមបាតុករ ហើយជេរប្រមាថថា "អាយ៉ងយួន" ជាដើម។ ម្យ៉ាងគាប់ជួនពេលនោះ ហេវបាយ ស្រេកទឹក និងអស់កម្លាំងដោយសារឃ្លាំមើលគេធ្វើបាតុកម្មស្ទើរពេញមួយព្រឹកធំ ផង ស្របពេលឡានមកដល់ រូបលោកក៏ស្ទុះទៅបើកទ្វារឡានហើយវាយដំតែម្ដង។
ឆ្លើយតបការចោទប្រកាន់នេះតំណាងរាស្ត្រមណ្ឌលស្វាយរៀង គណបក្សសង្គ្រោះជាតិ លោក គង់ សភា បញ្ជាក់ថា មូលហេតុដែលនាំឲ្យឡានលោកឈប់នោះ ដោយសារក្រុមបាតុកររត់មកពាំងខាងមុខឡាន ហើយបើកទ្វារប្រើហិង្សាភ្លាមមួយរំពេច។ លោកបន្តថា ក្នុងពេលស្ទះឡានរបស់លោកនោះ គឺលោកពុំមានឱកាសសួរនាំអ្វីឡើយ ហើយថែមទាំងពុំបានប្រើពាក្យពេចន៍ដូចការចោទប្រកាន់នេះឡើយ៖ «រឿង ភាសាដែលខ្ញុំជេរគាត់ថា អាយ៉ងហ្នឹងគឺអត់មានសោះ។ ដោយសារអ្នកបើកឡានខ្ញុំបើកឡានមកគាត់ដើរកាត់មុខឡាន ដល់ពេលឡានខ្ញុំឈប់ គឺគាត់រត់មកបើកទ្វារវាយខ្ញុំ រកតែឱកាសខ្ញុំសួរនាំគាត់មិនបានផង។»
សវនាការនៃសំណុំរឿងនេះ ត្រូវគេរំពឹងថា អាចនឹងអាចអូសបន្លាយយូរថ្ងៃបន្តទៀត ដោយសារតែមានជនជាប់ចោទសាក្សីជានគរបាលសន្តិសុខរបស់រដ្ឋសភា និងពលរដ្ឋប្រមាណ ៥នាក់ថែមទៀតផង។ មុននឹងចាប់ផ្ដើមជំនុំជម្រះ នៅព្រឹកថ្ងៃទី២៨ ខែមេសា គឺចៅក្រមលោក ហេង សុខណា តម្រូវឲ្យចាក់វីដេអូ ឯកសាររយៈពេលខ្លី ដែលបញ្ជាក់ពីសកម្មភាពវាយដំលើអ្នកតំណាងរាស្ត្រនៅមុខវិមាន រដ្ឋសភា។ នៅក្នុងរូបភាពនៃវីដេអូនោះ បញ្ជាក់ថា មានមនុស្សច្រើនទៀតដែលពាក់ព័ន្ធនឹងសំណុំរឿងនេះ។
បើទោះជាបែបណា លោក ចាយ សារិទ្ធ ដែលត្រូវបានសួរនាំមុនគេនៅក្នុងអង្គសវនាការ បដិសេធថា ពុំមានអ្នកផ្សេងទៀតជាប់ពាក់ព័ន្ធនឹងអំពើហិង្សានេះទេ ក្រៅតែពីរូបគេឡើយ។នៅចំពោះមុខចៅក្រមជំនុំជម្រះ លោក ចាយ សារិទ្ធ ព្យាយាមបដិសេធរាល់សំណួរអំពីអ្នកបញ្ជា និងអ្នកសមគំនិត។
លោក ជូង ជូងី មេធាវីម្នាក់ក្នុងចំណោមមេធាវី ២រូបផ្សេងទៀត ឲ្យដឹងក្រោយចេញពីបន្ទប់សវនាការកត់សំគាល់ថា ការចេញមកសារភាពរបស់ជនជាប់ចោទទាំង ៣នាក់នេះ គឺវាលឿនណាស់ពេកដែលជាមន្ទិលសង្ស័យ។ លោកបន្តថា វាជាការគួរឲ្យសោកស្ដាយដែលនៅអង្គសវនាការ សំណួររបស់មេធាវីការពារឲ្យដើមបណ្ដឹងរដ្ឋប្បវេណីចង់ដឹងពីអ្នក បញ្ជា ប៉ុន្តែត្រូវបានជំទាស់ដោយតំណាងអយ្យការទៅវិញ៖ «ខ្ញុំធ្វើ មេធាវីជាង ១០ឆ្នាំហើយ អត់ដែលឃើញត្រូវចោទឯណាគាត់ប្រព្រឹត្តហើយចេញមកសារភាពអីស្រួលៗ អ៊ីចឹងទេ មានតែសមត្ថកិច្ចរកចាប់ហើយគាត់បដិសេធ។ ប៉ុន្តែជនត្រូវចោទទាំង ៣រូបនេះគឺចេញសារភាពស្រួលៗពេក។»
ក្រោយពីលោក ហ៊ុន សែន អំពាវនាវឲ្យអ្នកប្រព្រឹត្តបទល្មើសចូលសារភាពកាលពីដើមខែកុម្ភៈ ឆ្នាំ២០១៦ គេឃើញមានមនុស្ស ៣នាក់ បានចូលខ្លួនភ្លាមដែរ ក្នុងនោះមានឈ្មោះ ចាយ សារិទ្ធ ម៉ៅ ហឿន និង សុត វណ្ណនី។ បន្ទាប់ពីចូលសារភាព តុលាការសម្រេចចោទប្រកាន់មនុស្សទាំង ៣នាក់នេះ ពីបទបង្កហិង្សាដោយចេតនា មានស្ថានទម្ងន់ទោស និងធ្វើឲ្យខូចខាតទ្រព្យសម្បត្តិដោយចេតនាមានស្ថានទម្ងន់ទោស។
ក្នុងពេលអង្គសវនាការដែលចាប់ដំណើរការបានត្រឹមពាក់កណ្ដាលទី សភាពការណ៍នៅពេលនោះ ក៏ចាប់ផ្ដើមឡើងកម្ដៅភ្លាមមួយរំពេចដែរ។ មូលហេតុដែលនាំឲ្យតំណាងអយ្យការលោក ស៊ិន វីរៈ ជំទាស់នឹងការតាំងសំណួររបស់លោក សម សុគង់ ទៅលោក ចាយ សារិទ្ធ ដែលចង់ដឹងពីអ្នកបញ្ជាពីក្រោយខ្នង និងអង្គភាពនៃទីបញ្ជាការកងអង្គរក្សនោះ ត្រូវបានលោក ស៊ិន វីរៈ ដែលជាព្រះរាជអាជ្ញារងយល់ឃើញថា នឹងនាំឲ្យប៉ះពាល់ស្ថាប័នរបស់រដ្ឋ។ក្នុងពេលនោះដែរ មេធាវីការពារក្តីឲ្យជនជាប់ចោទវិញ ក៏ព្យាយាមឡើងជំទាស់ម្ដងជាពីរដងដែរ ប្រឆាំងការតាំងសំណួររបស់មេធាវីការពារក្តីឲ្យតំណាងរាស្រ្តបក្ស ប្រឆាំង។
ដើម្បីបន្ធូរបន្ថយស្ថានការណ៍ការ ចៅក្រមជំនុំជម្រះនៃតុលាការក្រុងភ្នំពេញលោក ហេង សុខណា បានឆក់ឱកាសនេះ ហើយប្ដូរស្ថានការណ៍វិញម្ដង ដូចជាថា ភារកិច្ចរបស់តំណាងអយ្យការក៏ជាផ្នែកមួយដែលបម្រើឲ្យប្រយោជន៍ សាធារណៈផងដែរ។ លោក ហេង សុខណា បានថ្លែងការពារយ៉ាងពិស្ដារពីតួនាទី និងភារកិច្ចក្នុងនាមជាចៅក្រម ក្នុងការដឹកនាំនៃការជំនុំជម្រះនេះថា ធ្វើយ៉ាងណាឲ្យទទួលបានភាពយុត្តិធម៌ស្មើៗគ្នា។ មុននឹងបិទបញ្ចប់សវនាការនៅព្រឹកថ្ងៃទី២៨ ខែមេសា ចៅក្រមជំនុំជម្រះលោក ហេង សុខណា ប្រកាសថា សវនាការនេះនឹងត្រូវលើកពេលជំនុំជម្រះទៅថ្ងៃទី១០ ខែឧសភា ពេលព្រឹកបន្តទៀត។
បាតុកម្មដែលព្យាយាមទម្លាក់លោក កឹម សុខា ពីអនុប្រធានទី១ រដ្ឋសភា កាលពីថ្ងៃទី២៦ ខែតុលា ឆ្នាំ២០១៥ កន្លងទៅនោះ ត្រូវបានអង្គការសង្គមស៊ីវិលយល់ឃើញថា គឺជាការសងសឹកផ្នែកនយោបាយ។ បាតុកម្មកាលនោះ ត្រូវគេកត់សំគាល់ឃើញថា គឺភាគច្រើនជាកម្លាំងសន្តិសុខតាមខណ្ឌ និងកងអង្គរក្ស ច្រើនជាងពលរដ្ឋ។ ការទាមទារនៅពេលនោះ កម្លាំងអ្នកតវ៉ា គឺជាបុរសដ៏ច្រើនលើសលប់ខុសពីបាតុកម្មតវ៉ារឿងដីធ្លី និងទាមទារដំឡើងប្រាក់ខែជាដើម៕
No comments:
Post a Comment