គណបក្ស សង្គ្រោះជាតិ ថ្កោលទោស ការចាប់ខ្លួន លោក អ៊ុំ សំអាន
RFA / វិទ្យុ អាស៊ី សេរី | ១១ មេសា ២០១៦
លោក អ៊ុំ សំអាន តំណាងរាស្ត្របក្សសង្គ្រោះជាតិ មណ្ឌលសៀមរាប
ក្នុងវេទិកាអ្នកស្ដាប់វិទ្យុអាស៊ីសេរី កាលពីថ្ងៃទី២២ ខែឧសភា
ឆ្នាំ២០១៥។ RFA
គណបក្ស សង្រ្គោះជាតិ ចេញសេចក្ដី ថ្លែងការណ៍ ភ្លាមៗ នៅថ្ងៃ ទី១១ មេសា ថ្កោលទោស យ៉ាងដាច់អហង្ការ ចំពោះ ការចាប់ខ្លួន តំណាងរាស្រ្ត របស់ខ្លួន, គឺ លោក អ៊ុំ សំអាន ទាំងកំពុងមាន អភ័យឯកសិទ្ធិ។
គណបក្សសង្គ្រោះជាតិចាត់ការទុកការចាប់ខ្លួនលោក អ៊ុំ សំអាន ថាជាទង្វើរំលោភបំពានយ៉ាងធ្ងន់ធ្ងរលើអភ័យឯកសិទ្ធិអ្នកតំណាង រាស្ត្រ ដែលត្រូវបានធានាដោយច្បាប់ និងរដ្ឋធម្មនុញ្ញនៃព្រះរាជាណាចក្រកម្ពុជា។
រដ្ឋធម្មនុញ្ញនៃព្រះរាជាណាចក្រកម្ពុជាត្រង់មាត្រា ៨០ ចែងថា តំណាងរាស្រ្តមានអភ័យឯកសិទ្ធិសភា។ តំណាងរាស្ត្ររូបណាក៏ដោយមិនអាចត្រូវបានចោទប្រកាន់ចាប់ខ្លួន ឃាត់ខ្លួន ឬឃុំខ្លួន ដោយហេតុបានសម្តែងយោបល់ ឬបញ្ចេញមតិក្នុងការបំពេញមុខងាររបស់ខ្លួនឡើយ។ ការចោទប្រកាន់ ការចាប់ខ្លួន ការឃាត់ខ្លួន ឬការឃុំខ្លួនសមាជិកណាមួយនៃរដ្ឋសភា នឹងអាចធ្វើទៅកើត លុះត្រាតែមានការយល់ព្រមពីរដ្ឋសភា ឬពីគណៈកម្មាធិការអចិន្ត្រៃយ៍របស់រដ្ឋសភា ក្នុងចន្លោះសម័យប្រជុំនៃរដ្ឋសភា វៀរលែងតែក្នុងករណីបទល្មើសព្រហ្មទណ្ឌជាក់ស្តែង។
គណបក្សសង្គ្រោះជាតិអំពាវនាវដល់អាជ្ញាធរមានសមត្ថកិច្ច ឱ្យដោះលែងលោក អ៊ុំ សំអាន ជាបន្ទាន់ និងស្នើដល់រដ្ឋាភិបាល និងអាជ្ញាធរគ្រប់លំដាប់ថ្នាក់អនុវត្តតួនាទីភារកិច្ចរបស់ខ្លួនតាម ច្បាប់ និងរដ្ឋធម្មនុញ្ញ ជៀសវាងការប្រឹព្រឹត្តអំពើរំលោភបំពានដែលផ្ទុយពីគោលការណ៍នីតិរដ្ឋ។
តំណាងស្ត្រគណបក្សសង្គ្រោះជាតិមណ្ឌលខេត្តសៀមរាប លោក អ៊ុំ សំអាន ត្រូវបានអាជ្ញាធរចាប់ខ្លូនកាលពីម៉ោងជាង១២ យប់ថ្ងៃអាទិត្យទី ១០ ឈានចូលថ្ងៃទី ១១ មេសា។ រហូតដល់នៅថ្ងៃទី១១ មេសា នេះ លោក អ៊ុំ សំអាន កំពុងត្រូវសាកសួរ ដោយនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃក្រសួងមហាផ្ទៃ មុននឹងបញ្ជូនទៅតុលាការក្រុងភ្នំពេញដើម្បីសាកសួរបន្ត។
ក្រុមការងារនៃគណបក្សសង្គ្រោះជាតិខេត្តសៀមរាបម្នាក់ ដែលឃើញហេតុការណ៍ផ្ទាល់ភ្នែកគឺលោក ឃូ ហាំងមាង។ លោកអះអាងក្រោយពីការចាប់ខ្លួននោះ ប្រហែលជា១៥នាទីថា៖ «កាលពីម៉ោង១២ និង៣០នាទី យប់ថ្ងៃអាទិត្យ រូបលោក និងអ្នកបើកឡានម្នាក់ទៀត បានជូនអ្នកតំណាងរាស្ត្រលោក អ៊ុំ សំអាន ទៅដកប្រាក់ នៅធនាគារកាណាឌីយ៉ា ម្ដុំផ្សារកណ្ដាល នៃទីក្រុងសៀមរាប។ នៅពេលដែលលោក អ៊ុំ សំអាន កំពុងនៅក្នុងទូរអេ ធី អេម(ATM) គឺមានបុរស២នាក់ស្លៀកពាក់ស៊ីវិល មកឈរចាំ ហើយនៅពេលដែលលោក អ៊ុំ សំអានចេញពីទូរ ATM ស្រាប់តែជន ទាំងពីរនាក់នោះចាប់ខ្លួន ដាក់ឡានបើកចេញទៅតែម្ដង។»
លោក ឃូ ហាំងមាង បញ្ជាក់ថាលោកមិនអាចសន្និដ្ឋានបានថាជនទាំងពីរនាក់នោះ តើជាប៉ូលិសឬក៏សមត្ថកិច្ចខាងណាទេ៖ «កម្លាំងស្លៀកពាក់ស៊ីវិលហ្នឹង ជិះឡាន កាមរី(Camry)ហើមពណ៌ស ស៊េរី៩៥ ។ នៅពេល លោក អ៊ុំ សំអាន ចេញពីដកលុយមក គេចាប់ខ្លួនទៅតែម្ដង។»
ការចាប់ខ្លួននេះធ្វើឡើង ក្រោយពីលោក អ៊ុំ សំអាន ទើបវិលត្រឡប់ពីសហរដ្ឋអាមេរិក មកដល់ខេត្តសៀមរាបតែ៣-៤ម៉ោង បន្ទាប់ពីលោកបានរិះគន់រឿងព្រំដែនខ្មែរ-វៀតណាម ហើយចាកចេញទៅស្នាក់នោះសហរដ្ឋអាមេរិក ប្រមាណ៦ខែមកហើយនោះ៕
No comments:
Post a Comment