Indochina = Vietnam [+ Cambodia + Laos]
...
ពលរដ្ឋ ខេត្ត ស្ទឹងត្រែង អំពាវនាវ ឲ្យអាជ្ញាធរ អន្តរាគមន៍ ករណី ទាហានឡាវ ចូលបរបាញ់ គោក្របី
RFA / វិទ្យុ អាស៊ី សេរី | ១០ មេសា ២០១៦
ផែនទីខេត្តស្ទឹងត្រែង / Photo: RFA
ជនជាតិដើមភាគតិចរស់នៅឃុំព្រែកមាស ស្រុកសៀមប៉ាង ខេត្តស្ទឹងត្រែង អះអាងថា យោធាឡាវ ប្រដាប់ដោយអាវុធ បាញ់គោក្របីរបស់អ្នកស្រុក និងបរបាញ់សត្វព្រៃក្នុងដីខ្មែរ។ ការលើកឡើងនេះ បន្ទាប់ពីទាហានឡាវ ប្រដាប់ដោយអាវុធជាច្រើនក្រុម បានឆ្លងដែនចូលដីខ្មែរនៅចំណុចអូរព្រាល អូរស្មាច់ តាំងពីថ្ងៃទី៦ មេសា នៅតែអាជ្ញាធរកម្ពុជា មិនទាន់មានចំណាត់ការនៅឡើយ បើទោះបីពលរដ្ឋធ្លាប់រាយការណ៍ករណីនេះជូនអាជ្ញាធរមូលដ្ឋាន និងយោធាការពារព្រំដែនច្រើនលើកក្តី។
ជនជាតិដើមភាគតិចខិះ រស់នៅឃុំស្រែសំបូរ និងឃុំព្រែកមាស នៅថ្ងៃទី១០ មេសា អំពាវនាវឲ្យអាជ្ញាធររដ្ឋាភិបាល អន្តរាគមន៍ករណីទាហានឡាវ ឆ្លងចូលដីខ្មែរក្នុងគោលបំណងបរបាញ់គោក្របីអ្នកភូមិ និងបរបាញ់សត្វព្រៃ ជាដើម។
ជនជាតិដើមភាគតិចខិះ រស់នៅឃុំព្រែកមាស លោក ទា សន កត់សម្គាល់ថា ការឆ្លងចូលដីខ្មែរដោយយោធាឡាវ គឺស្ទើរតែជាទម្លាប់ទៅហើយ ធ្វើឲ្យប៉ះពាល់ដល់សតិអារម្មណ៍អ្នកភូមិ បន្ទាប់ពីប្រតិបត្តិការរបស់ទាហានឡាវ ប្រដាប់ដោយកាំភ្លើង ឆ្លងចូលដីខ្មែរបាញ់គោក្របីអ្នកភូមិតាមអំពើចិត្ត។ លោកថា អ្នកភូមិពុំទាន់ដឹងពីតួលេខជាក់លាក់ស្ដីពីការបាត់គោក្របីនៅ ឡើយ។ លោកកត់សម្គាល់ថា ចាប់ពីម៉ោង ៦ល្ងាច ទាហានឡាវ ជាច្រើនក្រុមប្រដាប់ដោយអាវុធគ្រប់ដៃ បានឆ្លងចូលដីខ្មែរត្រង់ចន្លោះបង្គោលព្រំដែនលេខ៣១ លេខ៣២ និងបង្គោលលេខ៤២ ចំណុចអូរស្មាច់ នៃភូមិខិះក្រោម ឃុំព្រែកមាស ដើម្បីបរបាញ់សត្វព្រៃ និងបាញ់សត្វពាហនៈរបស់អ្នកស្រុក៖ «មានទាហានឡាវ ១២នាក់ អាវុធ ១១ដើម។ ចូលដល់ជើងរបងស្រែប្រជាយើង។»
វិទ្យុអាស៊ីសេរី មិនអាចទាក់ទងមេបញ្ជាការវរការពារព្រំដែន១០១ ដើម្បីសុំការបំភ្លឺករណីនេះបានទេនៅថ្ងៃទី១០ មេសា។
មេឃុំព្រែកមាស លោក ផួង លុន ទទួលស្គាល់ថា ពិតជាមានទាហានឡាវ បានរំលោភដែនអធិបតេយ្យភាពរបស់កម្ពុជា ដោយបរបាញ់គោក្របីអ្នកភូមិ។ លោកថា អាជ្ញាធរឃុំបានទទួលពាក្យបណ្ដឹងករណីនេះ និងធ្លាប់រៀបចំរបាយការណ៍ទៅអាជ្ញាធរស្រុក ដើម្បីអន្តរាគមន៍៖ «កន្លងមកវាបាត់ខ្លះ វាស្លាប់ខ្លះ ការងារហ្នឹងវាមិនមែនទាំងអស់ទេ។ អ្នករាយការណ៍ហ្នឹងក៏វាពិតមែនថាបាញ់ ប៉ុន្តែជួនកាលក្របីឈឺស្លាប់ក៏មាន។»
មន្ត្រីសម្របសម្រួលនៃសមាគមអាដហុក (ADHOC) ខេត្ត ស្ទឹងត្រែង លោក ហូ សំអុល ចាត់ទុកករណីនេះថាជាសញ្ញាបង្ហាញឲ្យឃើញពីចំណុចខ្សោយរបស់ទាហាន ការពារព្រំដែនរបស់កម្ពុជា។ លោកទាមទារឲ្យអាជ្ញាធរពាក់ព័ន្ធ អន្តរាគមន៍ជាបន្ទាន់ បើពន្យារពេលទៀត ករណីនេះនឹងក្លាយជាទម្លាប់ធ្វើឲ្យប៉ះពាល់ជីវភាព និងសុវត្ថិភាពពលរដ្ឋធ្ងន់ធ្ងរ។ លោកថា រដ្ឋាភិបាលគួរពង្រឹងកាតព្វកិច្ចទាហានការពារព្រំដែន ដើម្បីឆ្លើយតបការបារម្ភរបស់ពលរដ្ឋ និងដើម្បីការពារដែនអធិបតេយ្យភាពរបស់កម្ពុជា ផង។
លោក ហូ សំអុល ចាត់ទុកការឈ្លានពានដោយយោធាឡាវ ជាអំពើរំលោភច្បាប់កម្ពុជា ធ្ងន់ធ្ងរ ដូចជាប្រើប្រាស់អាវុធខុសច្បាប់ ការបរបាញ់សត្វព្រៃ និងឆ្លងដែនខុសច្បាប់។ លោកជំរុញឲ្យអាជ្ញាធរខេត្ត រៀបចំរបាយការណ៍ជុំវិញករណីនេះទៅអាជ្ញាធរឡាវ ដើម្បីបញ្ឈប់ការចូលទឹកដីខ្មែរបាញ់ក្របី និងសត្វព្រៃនោះ។
ប្រពៃណីជនជាតិដើមភាគតិច លែងគោក្របីចូលព្រៃនៅរដូវប្រាំង រហូតដល់រដូវវស្សាទើបអ្នកភូមិស្វែងរកគោក្របីមកវិញ។ នៅប៉ុន្មានឆ្នាំចុងក្រោយនេះ ប្រពៃណីនេះកំពុងគំរាមកំហែងដោយយោធាឡាវ ទោះបីជាអ្នកភូមិបានដាក់វេនចូលព្រៃឃ្លាំមើលគោក្របីក្តី៕
No comments:
Post a Comment