លោក កឹម សុខា បន្តបដិសេធ មិនចូលបំភ្លឺ តាមដីកា របស់ តុលាការ ក្រុងភ្នំពេញ
RFA / វិទ្យុ អាស៊ី សេរី | ៣ មិថុនា ២០១៦
មន្ត្រីជាន់ខ្ពស់គណបក្សសង្គ្រោះជាតិ លោក យ៉ែម បុញ្ញឫទ្ធិ
(រូបកណ្ដាល)
ថ្លែងក្នុងសន្និសីទកាសែតនៅមុខទីស្នាក់ការកណ្ដាលបក្សសង្គ្រោះជាតិ
ចាក់អង្រែលើ នៅថ្ងៃទី៣ ខែមិថុនា ឆ្នាំ២០១៦។ RFA/Cheu Sideth
ប្រធានស្ដីទី បក្សប្រឆាំង លោក កឹម សុខា បន្តបដិសេធ មិនចូលបំភ្លឺ តាមការកោះហៅ របស់ ចៅក្រមស៊ើបសួរ សាលាដំបូង រាជធានីភ្នំពេញ នៅថ្ងៃ ទី១៤ មិថុនា ឡើយ។ នេះ ជាការបញ្ជាក់ របស់ មន្ត្រីជាន់ខ្ពស់ គណបក្ស សង្គ្រោះជាតិ លោក យ៉ែម បុញ្ញឫទ្ធិ។
លោក យ៉ែម បុញ្ញឫទ្ធិ ថ្លែងក្នុងសន្និសីទកាសែតនៅមុខទីស្នាក់ការកណ្ដាលចាក់អង្រែលើ នៅថ្ងៃទី៣ មិថុនា ថា ការបដិសេធរបស់លោក កឹម សុខា ដោយយោងថា លោក កឹម សុខា ជាអ្នកតំណាងរាស្ត្រមានអភ័យឯកសិទ្ធិសភា។
បន្ថែមពីនេះ លោក យ៉ែម បុញ្ញឫទ្ធិ បន្តថា គណបក្សនឹងបន្តពិភាក្សាជាមួយអ្នកច្បាប់ ដើម្បីពិនិត្យមើលថា ចំណាត់ការបន្តបន្ទាប់របស់តុលាការចំពោះប្រធានស្ដីទីរូបនេះ ត្រឹមត្រូវតាមច្បាប់ឬយ៉ាងណា។
កាលពីយប់ថ្ងៃទី២ មិថុនា ចៅក្រមស៊ើបសួរនៃសាលាដំបូងរាជធានីភ្នំពេញ បានចេញដីកាមួយ ដើម្បីកោះហៅលោក កឹម សុខា ឲ្យចូលបំភ្លឺនៅថ្ងៃទី១៤ ខែមិថុនា ក្នុងដំណើររឿងនៃការបដិសេធមិនចូលបំភ្លឺនៅតុលាការក្នុងនាមជាសាក្សីកាលពីថ្ងៃទី២៦ ខែឧសភា។
មាត្រា៨០ នៃរដ្ឋធម្មនុញ្ញ ចែងថា ការចោទប្រកាន់ ការចាប់ខ្លួន ការឃាត់ខ្លួន ឬការឃុំខ្លួនសមាជិកណាមួយនៃរដ្ឋសភា នឹងអាចធ្វើទៅកើត លុះត្រាតែមានការយល់ព្រមពីរដ្ឋសភា ឬពីគណៈកម្មាធិការអចិន្ត្រៃយ៍របស់រដ្ឋសភាក្នុងចន្លោះសម័យប្រជុំនៃ រដ្ឋសភា វៀរលែងតែក្នុងករណីបទល្មើសព្រហ្មទណ្ឌជាក់ស្ដែង។
ប៉ុន្តែ កាលពីថ្ងៃ ទី៣០ ឧសភា, សមាជិក រដ្ឋសភា គណបក្ស ប្រជាជន ៦៨រូប បានអនុម័ត ជាឯកច្ឆន្ទ ឲ្យតុលាការ បន្តនីតិវិធី លើលោក កឹម សុខា បាន នៅក្រោយ អយ្យការអម សាលាដំបូង រាជធានីភ្នំពេញ បានសម្រេច ចោទប្រកាន់ លោក កឹម សុខា ពីបទល្មើស ជាក់ស្ដែង ដែលបដិសេធ ក្នុងការចូលខ្លួន ក្នុងនាម ជាសាក្សី លើសំណុំរឿង សញ្ចារកម្ម តាមមាត្រា ៥៣៨ នៃក្រមព្រហ្មទណ្ឌ។
No comments:
Post a Comment