 |
| ពលរដ្ឋ វៀតណាម នៅចំណុច ភូមិធ្លក ឃុំត្នោត ស្រុក កំពង់រោទិ៍ ក្នុងខេត្ត ស្វាយរៀង នៅថ្ងៃ ទី២៨ ខែមិថុនា ឆ្នាំ២០១៥។ Photo Provided [Vietnamese citizens in Svay Rieng province, 28 June 2015] |
លោក ហ៊ុន សែន យកការអភិវឌ្ឍ តាមតំបន់ព្រំដែន ជាយុទ្ធសាស្ត្រ ការពារព្រំដែន ល្អបំផុត
RFA / វិទ្យុ អាស៊ី សេរី | ២២ សីហា ២០១៦
ស្ដាប់ ឬ ទាញយកសំឡេង
00:00/00:00
លោកនាយករដ្ឋមន្ត្រី
ហ៊ុន សែន បានលើកឡើង ពីការ ការពារ ព្រំដែន របស់ កម្ពុជា
នៅក្នុងវេទិកា ការពារធម្មជាតិ កាលពីព្រឹក ថ្ងៃច័ន្ទ ទី២២ ខែសីហា
ឆ្នាំ២០១៦។ លោក ហ៊ុន សែន មានប្រសាសន៍ ថា, វិធី ដែលមាន ប្រសិទ្ធភាព បំផុត ក្នុងការ ការពារ ព្រំដែន គឺ ការរៀបចំ ឲ្យប្រជាជន ទៅរស់នៅ ទីនោះ ដោយសមរម្យ។ អ្នកវិភាគ សង្គម ឯកភាព លើគំនិតនេះ, ប៉ុន្តែ ពួកគេ ថា រដ្ឋាភិបាល ត្រូវ ធ្វើឲ្យបាន ដូចការនិយាយ។
លោក ហ៊ុន សែន បានឲ្យដឹងថា
លោកទើបតែចុះហត្ថលេខាអនុញ្ញាតឲ្យមានការអភិវឌ្ឍផ្លូវតាមខ្សែ
ក្រវាត់ព្រំដែនភាគខាងកើត។ លោកបន្តថា
ការរៀបចំឲ្យប្រជាពលរដ្ឋរស់នៅបានសមរម្យតាមទល់ដែន
គឺជាយុទ្ធសាស្ត្រការពារមួយដែលលោកថា តែងតែប្រាប់ដល់ថ្នាក់ដឹកនាំខេត្ត៖ «បានណែនាំ
ខេត្តតាកែវ ថ្ងៃមុន និងបណ្ដាខេត្ត
វិធីដែលល្អជាងគេគឺវិធីពង្រាយប្រជាជនទៅតាមខេត្ត។ ទាំងខាងកើត
ទាំងខាងលិច ទាំងខាងជើង។ ប៉ុន្តែមិនអាចយកប្រជាជនទៅចោលបានទេ
ត្រូវតែរៀបចំហេដ្ឋារចនាសម្ព័ន្ធឲ្យគាត់។ ជម្រើសល្អជាងគេក្នុងការការពារទល់ដែន
គឺជម្រើសដាក់ប្រជាពលរដ្ឋអភិវឌ្ឍនៅតាមទល់ដែន។»
ការលើកឡើងរបស់លោក ហ៊ុន សែន នេះ
ធ្វើឡើងបន្ទាប់ពីបុគ្គលិកអង្គការ ដាប៊លយូ.ស៊ី.អេស (WCS)
សុំឲ្យលោកបញ្ឈប់ការដាក់ដីក្នុងតំបន់ការពារទៅជាដីសម្បទានសង្គមកិច្ច។
ពលរដ្ឋខ្មែរសង់ផ្ទះ
នៅជិតខ្សែបន្ទាត់ព្រំដែនមានជម្លោះជាមួយវៀតណាម ក្នុងភូមិធ្លក
ឃុំត្នោត ស្រុកកំពង់រោទិ៍ ខេត្តស្វាយរៀង។ រូបថតថ្ងៃទី២៩ ខែតុលា
ឆ្នាំ២០១៥
ចំពោះការលើកឡើងរបស់លោក
ហ៊ុន សែន ទៅលើការពង្រាយប្រជាជន និងរៀបចំហេដ្ឋារចនាសម្ព័ន្ធនៅតាមព្រំដែន
លោកបណ្ឌិត សុខ ទូច
ប្រធានក្រុមអ្នកស្រាវជ្រាវកិច្ចការព្រំដែននៃរាជបណ្ឌិត្យសភា ឲ្យដឹងថា
នេះក៏ជាអ្វីដែលក្រុមស្រាវជ្រាវចង់បានដែរ។ លោកបន្តទៀតថា នៅតាមតំបន់ព្រំដែនក្នុងផ្នែកខ្លះនៃខេត្តស្វាយរៀង
គឺសឹងតែគ្មានមនុស្សរស់នៅ។
លោកបានហៅកង្វះប្រជាជននេះថាជាកង្វះបង្គោលព្រំដែនរស់
ដែលមានសារសំខាន់សម្រាប់ការពារព្រំដែន៖ «អត់មានប្រជាជនរស់នៅហ្នឹងហើយ
ដែលធ្វើឲ្យយើងមានការលំបាក ព្រោះ (ប្រជាជន) ជាបង្គោលរស់ជួយតាមដាន ព្រោះប្រទេសជាតិជាប្រទេសរបស់យើង
មិនមែនរបស់នរណាម្នាក់ទេ។ អ៊ីចឹងយើងត្រូវមើលទាំងអស់គ្នា។»
បន្ថែមពីលើនេះទៀត
លោកបណ្ឌិត សុខ ទូច
បានលើកឡើងពីការអភិវឌ្ឍហេដ្ឋារចនាសម្ព័ន្ធនៅព្រំដែនខាងលិច។ ដោយឡែក
លោកថាព្រំដែនខាងកើតនៅមានការយឺតយ៉ាវខ្លះ។
អ្នកស្រាវជ្រាវការអភិវឌ្ឍសង្គម
លោកបណ្ឌិត មាស នី បង្ហាញពីការព្រួយបារម្ភ
ជាពិសេសនៅតាមតំបន់ព្រំដែនខាងកើតដែលជាប់ជាមួយប្រទេសវៀតណាម។
លោកស្នើឲ្យរដ្ឋាភិបាលមានយុទ្ធសាស្ត្រច្បាស់លាស់ក្នុងការអភិវឌ្ឍ ព្រំដែន
គឺមិនមែនមានតែនៅលើក្រដាសនោះទេ៖ «ឧទាហរណ៍ ជាក់ស្តែងដូចយើងមើលឃើញនៅតាមព្រំដែនវៀតណាម
នៅពេលយើងអត់មានការអភិវឌ្ឍ ពលរដ្ឋយើងគឺរត់ចោលដីតែម្តង។
អ៊ីចឹងបានមានករណីជួលដីទៅឲ្យវៀតណាម
ដោយសារពលរដ្ឋខ្មែរគ្មានលទ្ធភាពធ្វើដូចម្តេចអាចរស់លើដីនោះបាន។
ដូចយើងឃើញពេលខ្លះ យើងចូលទឹកដីគេមិនទាន់បាន ១០០ម៉ែត្រផង
ឃើញថាខៀវស្រងាត់ តែចូលដល់ដីយើងវិញក្រៀមក្រោះ។ សំណួរដែលត្រូវសួរនោះ
គឺតើភាគីម្ខាងទៀតគេគិតថាយើងជាភាគីស្មើភាពគ្នាដែរអត់? កន្លង មក
យើងឃើញមានកំណត់ហេតុទូតជាច្រើនលើកច្រើនសាដែលបានផ្ញើឲ្យភាគី វៀតណាម
ឲ្យគេគោរពបូរណភាពទឹកដីយើង។ សូម្បីតែជីកស្រះ យើងសុំឲ្យគេលុបវិញ
សូម្បីតែសង់ប៉ុស្តិ៍ចូលមកតំបន់ស យើងសុំឲ្យគេបញ្ឈប់
គេធ្វើជាមិនដឹងមិនឮនឹងយើងហើយ ថែមទាំងមិនឆ្លើយតបនឹងយើងទៀតថាដូចម្តេចទៀត។»
ការអភិវឌ្ឍព្រំដែនយឺតយ៉ាវ
គឺជាបញ្ហាមួយដែលមនុស្សភាគច្រើនចាត់ទុកថាជាចំណុចខ្សោយមួយរបស់
កម្ពុជា
ក្នុងការការពារទឹកដីរបស់ខ្លួនពីការរំលោភបំពានពីប្រទេសជិតខាង។
ការមិនសូវអើពើពីសំណាក់រដ្ឋាភិបាលទៅកាន់ប្រជាជននៅតាមព្រំដែន
រឹតតែធ្វើឲ្យពលរដ្ឋនៅតាមព្រំដែនធ្វើចំណាកស្រុកចេញពីតំបន់
ព្រំដែនកាន់តែច្រើន ដើម្បីស្វែងរកការងារនៅកន្លែងផ្សេង
ដែលធ្វើឲ្យតំបន់ព្រំដែនក្លាយជាតំបន់គ្មានពលរដ្ឋខ្មែររស់នៅ ច្រើន។
ការមិនយកចិត្តទុកដាក់អភិវឌ្ឍតាមតំបន់ព្រំដែន
ដូចជាប្រព័ន្ធធារាសាស្ត្រជាដើម
កន្លងមកបានបង្ខំឲ្យពលរដ្ឋខ្មែរមួយចំនួនជួលដីស្រែរបស់ខ្លួនទៅ
ឲ្យពលរដ្ឋវៀតណាម
ដែលប្រការនេះធ្វើឲ្យមានការបារម្ភពីការបាត់បង់ទឹកដីខ្មែរនៅ
ថ្ងៃខាងមុខ៕
Traitor Hun Sen,
ReplyDeleteThe best way to protect your borders is to station your Khmer soldiers, not the unarmed villagers facing Yuon soldiers !!!