 |
| តំណាងរាស្ត្រសហរដ្ឋអាមេរិក ពីខាងគណបក្សប្រជាធិបតេយ្យ លោក អាឡាន់ ឡូវ៉ិនថល (Alan Lowenthal) ថ្លែងពីបញ្ហាសិទ្ធិមនុស្សកាលពីឆ្នាំ២០១៣។ Photo courtesy of lowenthal.house.gov |
តំណាងរាស្ត្រ អាមេរិក ព្រមានកម្ពុជា ឲ្យគោរព គោលការណ៍ ប្រជាធិបតេយ្យ ក្នុងការបោះឆ្នោត
RFA / វិទ្យុ អាស៊ី សេរី | ១១កញ្ញា ២០១៦
ស្ដាប់ ឬ ទាញយកសំឡេង
00:00/00:00
តំណាងរាស្ត្រ សហរដ្ឋ អាមេរិក ពីខាង គណបក្ស ប្រជាធិបតេយ្យ
ព្រមាន ថា, ប្រសិនបើ កម្ពុជា មិន គោរព គោលការណ៍ ប្រជាធិបតេយ្យ ក្នុងការ បោះឆ្នោត ដោយសេរី,
ត្រឹមត្រូវ, និងយុត្តិធម៌ទេ,
នោះ សហរដ្ឋ អាមេរិក នឹងលុប ទំនាក់ទំនង ផ្នែកសេដ្ឋកិច្ច និងនយោបាយ ជាមួយ កម្ពុជា។
លោក តាំង សារ៉ាដា៖ បាទ! សួស្តីលោក អាឡាន់ ឡូវ៉ិនថល (Alan Lowenthal) រីករាយណាស់ដែលបានជជែកជាមួយលោក។
សំណួរទីមួយរបស់ខ្ញុំគឺ
តើលោកសង្ឃឹមដែរទេថាសេចក្តីសម្រេចលេខ៧២៨
នឹងត្រូវអនុម័តនៅពេលដ៏ឆាប់ខាងមុខ?
លោក អាឡាន់ ឡូវ៉ិនថល៖ កាលពីថ្ងៃទី១៥ ខែកក្កដា សេចក្តីសម្រេចត្រូវបានអនុម័តនៅអនុគណៈកម្មការទទួលបន្ទុកកិច្ចការ
បរទេសនៃសភាសហរដ្ឋអាមេរិក រួចទៅហើយ ដោយមានការគាំទ្រយ៉ាងខ្លាំងពីតំណាងរាស្ត្រទាំងពីរគណបក្ស។
ដូច្នេះ សេចក្តីសម្រេចមានសារសំខាន់ណាស់សម្រាប់អ្នកដែលចង់បានសេរីភាព និងលទ្ធិប្រជាធិបតេយ្យ
និងការបោះឆ្នោតដោយយុត្តិធម៌នៅកម្ពុជា។ សហគមន៍ខ្មែរនៅទូទាំងសហរដ្ឋអាមេរិក
ត្រូវប្រាប់ទៅមិត្តភ័ក្ដិ ឬបងប្អូនរបស់ពួកគេ ត្រូវតែនាំគ្នាប្រាប់ទៅតំណាងរាស្ត្រប្រចាំរដ្ឋរបស់ពួកគេ
ដើម្បីឲ្យគាំទ្រសេចក្តីសម្រេចលេខ៧២៨ នេះនៅខែកញ្ញា ខាងមុខ។ លោកដឹងទេថា
សព្វថ្ងៃ តំណាងរាស្ត្រសហរដ្ឋអាមេរិក ភាគច្រើនមានការចាប់អារម្មណ៍ជាខ្លាំងអំពីស្ថានការណ៍នៅប្រទេស
កម្ពុជា។
លោក តាំង សារ៉ាដា៖ លោកតំណាងរាស្ត្រ អាឡាន់ ឡូវ៉ិនថល ប្រសិនបើសេចក្តីសម្រេចនេះត្រូវបានអនុម័តហើយ
តើវានឹងអាចមានឥទ្ធិពលបង្ខំឲ្យរដ្ឋាភិបាលលោក ហ៊ុន សែន គោរព ឬធ្វើតាមដែរទេ? ខណៈកម្ពុជា មានអធិបតេយ្យរបស់ខ្លួនដែរនោះ?
លោក អាឡាន់ ឡូវ៉ិនថល៖ សេចក្តីសម្រេចនេះមិនអាចបង្ខំ ឲ្យលោក ហ៊ុន សែន គោរពនោះទេ ប៉ុន្តែសេចក្តីសម្រេចអាចបង្កើនការយល់ដឹងដល់តំណាងរាស្ត្រសហរដ្ឋ
អាមេរិកទាំងឡាយ ឲ្យផ្ញើសារទៅរដ្ឋាភិបាលកម្ពុជា ថាទំនាក់ទំនងរបស់ខ្លួននៅអនាគតជាមួយសហរដ្ឋអាមេរិក
គឺអាស្រ័យទៅលើការសម្រេចចិត្តរបស់គេប៉ុណ្ណោះ ថាតើគេនឹងធ្វើឲ្យការបោះឆ្នោតប្រព្រឹត្តទៅដោយសេរី
និងយុត្តិធម៌ដូចដែលកម្ពុជា ធ្លាប់បានព្រមព្រៀងជាមួយសហរដ្ឋអាមេរិកដែរឬទេ? យើងនឹង ឃ្លាំមើលដំណើរការនេះ។
យើងមិនខ្វល់ទេថាគណបក្សណាឈ្នះ ឬចាញ់នោះ តែអ្វីដែលសំខាន់គឺទំនាក់ទំនងខាងផ្នែកសេដ្ឋកិច្ច
នយោបាយ និងនីតិរដ្ឋដែលកម្ពុជា ធ្លាប់បានព្រមព្រៀងជាមួយសហរដ្ឋអាមេរិក។ ហើយប្រសិនបើរដ្ឋាភិបាលកម្ពុជា
មិនគោរពកិច្ចព្រមព្រៀងនេះ នោះសភាអាមេរិកនឹងមានតួនាទីចាប់ផ្ដើមពិភាក្សា ថាតើនឹងត្រូវធ្វើអ្វីបន្តទៀតជាមួយកម្ពុជា។
លោក តាំង សារ៉ាដា៖ តើពលរដ្ឋខ្មែរនឹងទទួលបានផលប្រយោជន៍អ្វីខ្លះពីសេចក្តីសម្រេចលេខ៧២៨
នេះ?
លោក អាឡាន់ ឡូវ៉ិនថល៖ ពួកគេនឹងទទួលបានផលប្រយោជន៍ ប្រសិនបើរដ្ឋាភិបាលកម្ពុជា
ទទួលស្គាល់ថា ទំនាក់ទំនងជាមួយសហរដ្ឋអាមេរិក
គឺតម្រូវឲ្យមានការបោះឆ្នោតដោយសេរី និងយុត្តិធម៌នៅថ្ងៃខាងមុខ។
លោក តាំង សារ៉ាដា៖ អ៊ីចឹងលោកយល់ថា ការបោះឆ្នោតនៅកម្ពុជា កន្លងមកមិនធ្វើឡើងដោយសេរី
និងត្រឹមត្រូវទេ ឬយ៉ាងណា?
លោក អាឡាន់ ឡូវ៉ិនថល៖ អត់ទេ! យើងអត់ដែល ឃើញមានការបោះឆ្នោតដោយយុត្តិធម៌នោះទេ។
ភាគច្រើនយើងឃើញមានការយាយីខាងផ្នែកនយោបាយទៅលើបក្សប្រឆាំង ដូចជាការចោទប្រកាន់តាមផ្លូវតុលាការលើប្រធានបក្សប្រឆាំង
ការឃុំខ្លួនក្នុងផ្ទះអនុប្រធានបក្សប្រឆាំង ក្រុមមន្ត្រីបក្សប្រឆាំងដទៃទៀត
និងការសម្លាប់អ្នកវិភាគឯករាជ្យកាលពីពេលថ្មីៗនេះ។ យើងឃើញស្ថានការណ៍គោរពសិទ្ធិមនុស្សនៅកម្ពុជា
កំពុងធ្លាក់ចុះយ៉ាងគំហុក។ ប្រសិនសភាអាមេរិកអាចអនុម័តសេចក្តីសម្រេចនេះបាន
នោះយើងនឹងផ្ញើសារទៅកាន់រដ្ឋាភិបាលកម្ពុជា ថាឲ្យគោរពកិច្ចព្រមព្រៀងរបស់ខ្លួនជាមួយសហរដ្ឋអាមេរិក។
យើងមិនគំរាមកំហែងពួកគេទេ ហើយក៏មិនបានបញ្ជាពួកគេឲ្យធ្វើយ៉ាងណានោះដែរ។
អ្វីដែលយើងចង់បាន គឺការបោះឆ្នោតដោយសេរី និងយុត្តិធម៌ ហើយប្រសិនបើវាមិនមានយុត្តិធម៌ទេ
នោះយើងនឹងធ្វើការកំណត់អំពីទំនាក់ទំនងរបស់យើងជាមួយកម្ពុជា ទាំងបញ្ហាសេដ្ឋកិច្ច
និងបញ្ហាផ្សេងៗទៀតជាមិនខាន។ យើងបានធ្វើដូច្នេះជាមួយប្រទេសមួយចំនួនមកហើយ
ដែលពួកគេមិនគោរពសិទ្ធិមនុស្ស។
លោក តាំង សារ៉ាដា៖ តើលោកយល់យ៉ាងណាចំពោះឃាតកម្មលើអ្នកវិភាគឯករាជ្យលោកបណ្ឌិត កែម ឡី
កាលពីថ្ងៃទី១០ ខែកក្កដា កន្លងទៅនេះ?
លោក អាឡាន់ ឡូវ៉ិនថល៖ ខ្ញុំគិតឧក្រិដ្ឋកម្មនេះវាពិត ជាអាក្រក់ខ្លាំងណាស់។
យើងបានចេញសេចក្តីថ្លែងការណ៍អំពីបញ្ហានេះ ហើយបានជជែកជាមួយតំណាងរាស្ត្រសហរដ្ឋអាមេរិកដទៃទៀត
និងមន្ត្រីក្រសួងការបរទេសអាមេរិក អំពីបញ្ហាដ៏រន្ធត់នេះដែរ។ យើងគិតថាវាពិតជាឃាតកម្មដ៏អាក្រក់ជាទីបំផុត។
វាជាឧទាហរណ៍មួយទៀតសម្រាប់ការយាយី និងសម្ពាធផ្នែកនយោបាយ។ ខ្ញុំមិនដឹងថាអ្នកណាជាអ្នកបញ្ជាពីក្រោយឃាតកម្មនេះទេ
ប៉ុន្តែវាមើលទៅដូចជាមានការសង្ស័យច្រើន។
លោក តាំង សារ៉ាដា៖ តើសភាតំណាងរាស្ត្រសហរដ្ឋអាមេរិក នឹងជួយស្វែងរកយុត្តិធម៌សម្រាប់លោក
កែម ឡី ដែរទេ?
លោក អាឡាន់ ឡូវ៉ិនថល៖ អ្វីដែលចាំបាច់សម្រាប់ពេលនេះ គឺយើងត្រូវជំរុញឲ្យមានការអនុម័តសេចក្តីសម្រេចនេះជាមុនសិន។
ប្រសិនបើសេចក្តីសម្រេចអនុម័តរួចហើយ នោះយើងនឹងមានលទ្ធភាពច្រើនក្នុងការជំរុញលើបញ្ហាផ្សេងៗជាច្រើន
ទៀត។ តែបើវាមិនអាចអនុម័តចេញរួចទេ នោះវាជាការបារម្ភរបស់យើង។ ខ្ញុំនៅមិនទាន់ដឹងថាយ៉ាងម៉េចយ៉ាងណាទេចំពោះបញ្ហានេះ។
អ្វីដែលខ្ញុំដឹងនៅពេលនេះ គឺគណៈកម្មាធិការកិច្ចការបរទេសនៃសភាអាមេរិក កំពុងយកចិត្តទុកដាក់ខ្លាំងណាស់ចំពោះកិច្ចការនេះ។
យើងត្រូវតែបញ្ចុះបញ្ចូលដើម្បីឲ្យសេចក្តីសម្រេចនេះដាក់ក្នុងកិច្ច ប្រជុំពេញអង្គរបស់រដ្ឋសភាអាមេរិកទាំងមូល។
ប្រសិនបើយើងមិនអាចជជែកសេចក្តីសម្រេចនេះបានទេ នោះយើងក៏នឹងមិនអាចជជែកពីបញ្ហាអ្វីផ្សេងដែលយើងត្រូវធ្វើទៀត
ដែរ៕
No comments:
Post a Comment