 |
| លោកនាយករដ្ឋមន្ត្រី ហ៊ុន សែន ចូលរួមពិធីចែកសញ្ញាបត្រដល់និស្សិតសាកលវិទ្យាល័យជាតិគ្រប់គ្រង នាមជ្ឈមណ្ឌលពិព័រណ៍ និងសន្និបាតកោះពេជ្រ រាជធានីភ្នំពេញ នៅថ្ងៃទី៥ ខែកុម្ភៈ ឆ្នាំ២០១៦។ RFA/Brach Chev |
លោក ហ៊ុន សែន៖ បក្សប្រឆាំង ចូលសភា ឬមិនចូល ក៏ស្ថានការណ៍ នយោបាយ នៅដដែល
RFA / វិទ្យុ អាស៊ី សេរី | ៦ តុលា ២០១៦
លោក នាយករដ្ឋមន្ត្រី ហ៊ុន សែន បានប្រកាស ថា, ទោះបី គណបក្សប្រឆាំង ចូលប្រជុំ សភា ឬមិនចូល ក៏ស្ថានភាព នយោបាយ នៅដដែល។ រីឯ អ្នកវិភាគ ថា, ស្ថានភាព នយោបាយ មួយរយៈ ចុងក្រោយនេះ ហាក់ដូច ជាប្រសើរជាង ពេលកន្លងមក បន្ទាប់ ពីបក្សប្រឆាំង សម្រេច វិលចូល សភាវិញ ដើម្បី បញ្ចៀស ការប៉ះទង្គិចគ្នា រវាង កម្លាំងប្រជាជន និងកងកម្លាំង ប្រដាប់អាវុធ។
ក្រោយ ពីស្ងប់ស្ងាត់ បញ្ចេញវោហារសាស្ត្រ នយោបាយ មួយរយៈ ក្នុងអំឡុងពេល ពិធីបុណ្យភ្ជុំបិណ្ឌនោះ, លោក នាយករដ្ឋមន្ត្រី ហ៊ុន សែន នៅពេលនេះ ចាប់ផ្ដើម លូកមាត់ ចូលក្នុងរឿង នយោបាយ ឡើងវិញ។
ថ្លែងក្នុងពិធី ចែកសញ្ញាប័ត្រ ដល់និស្សិត នៅមជ្ឈមណ្ឌល ពិព័រណ៍ កោះពេជ្រ នៅព្រឹកថ្ងៃ ទី៦ ខែតុលា, លោក ហ៊ុន សែន ហាក់ដូចជា មិនភ្ញាក់ផ្អើល ចំពោះ គម្រោង វិលត្រឡប់ ចូលសភា របស់ ក្រុមតំណាងរាស្ត្រ គណបក្សប្រឆាំង ឡើយ។ លោក នាយករដ្ឋមន្ត្រី បន្ត ថា, សភាពការណ៍ នយោបាយ នៅស្រុកខ្មែរ មិនមានអ្វី ត្រូវ ព្រួយបារម្ភ នោះទេ។ ប៉ុន្តែ វា ស្ថិតទៅលើ អណ្ដាត របស់ អ្នកនិយាយ៖ «អាគេ ថា តឹង, យើង ក៏នៅតែ ប៉ុណ្ណឹង។ អាគេ ថា ធូរ, យើង ក៏នៅតែ ប៉ុណ្ណឹង។ អាគេ ចូលសភា, យើង ក៏នៅតែ ប៉ុណ្ណឹង។ អាគេ មិនចូលសភា ក៏យើង នៅតែ ប៉ុណ្ណឹង។ ស្រេចតែ តាមមាត់គេទៅ។ ឯយើង ក៏នៅ ស្រេចតែ យើង អ៊ីចឹងដែរ។ អ្នកថា គឺ អ្នកថាទៅ។ អ្នកធ្វើ គឺ អ្នកធ្វើទៅ។ រឿងតែ ប៉ុណ្ណឹងទេ។»
ការថ្លែងដូចនេះ គឺធ្វើឡើងបន្ទាប់ពីគណបក្សសង្គ្រោះជាតិ បានប្រកាសពីគម្រោងវិលចូលធ្វើការនៅក្នុងរដ្ឋសភាវិញ ដើម្បីសម្របសម្រួលស្ថានភាពនយោបាយជាមួយគណបក្សកាន់អំណាច ឲ្យវិលទៅរកប្រក្រតីភាពនៅមុនពេល និងអំឡុងពេលការបោះឆ្នោតឃុំ-សង្កាត់។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា គណបក្សសង្គ្រោះជាតិ កំពុងធ្វើដំណើរទៅរកដំណោះស្រាយនយោបាយ ដូច្នេះលោកសង្ឃឹមថា គណបក្សដែលមានអាសនៈនៅក្នុងរដ្ឋសភាទាំងពីរនឹងបានជួបចរចាគ្នា៖ «បរិយាកាសនយោបាយល្អ វាមានទាំងការចូលរួមពីថ្នាក់ដឹកនាំគណបក្សនយោបាយទាំងអស់ ទាំងក្នុងដំណើរការបោះឆ្នោត ទាំងក្នុងសកម្មភាពនយោបាយ វាមានទាំងអ្នកដែលជាប់ពន្ធនាគារទាំងអស់ គឺថាសូមឲ្យគាត់មានសេរីភាពឡើងវិញ ដើម្បីឲ្យគាត់បានជួបជុំគ្រួសារ ហើយគាត់បានបំពេញការងារប្រចាំថ្ងៃរបស់គាត់ឡើងវិញ។ នេះជាគោលបំណងរបស់យើង»។
រដ្ឋសភានឹងបើកកិច្ចប្រជុំសភាលើកទី៧ នីតិកាលទី៥ នៅថ្ងៃទី៧ ខែតុលា ដោយមានរបៀបវារៈមួយចំនួនដូចជា ការស្ដាប់ព្រះរាជសារព្រះមហាក្សត្រ ការបោះឆ្នោតជ្រើសរើសបេក្ខជនអគ្គសវនករចំនួនបីរូប ពិនិត្យទៅលើសេចក្ដីព្រាងច្បាប់ស្ដីពីការប្រកបមុខរបរវិជ្ជាជីវៈក្នុងវិស័យសុខាភិបាល និងសេចក្ដីព្រាងច្បាប់ពាក់ព័ន្ធអាស៊ានជាដើម។ គណបក្សសង្គ្រោះជាតិ ថា អាចនឹងចូលរួមកិច្ចប្រជុំនេះ តែមិនទាន់ប្រាកដច្បាស់មួយរយភាគរយនោះទេ។
អ្នកជំនាញផ្នែកវិទ្យាសាស្ត្រនយោបាយ លោក សូ ចន្ថា មានប្រសាសន៍ថា ស្ថានភាពនយោបាយប្រែប្រួល ឬមិនប្រែប្រួលគឺអាស្រ័យទៅលើតួអង្គអ្នកនយោបាយ។ លោកមើលឃើញថា កន្លងមកកម្លាំងអ្នកគាំទ្រគណបក្សសង្គ្រោះជាតិ បានប្រឈមមុខជាមួយកងកម្លាំងប្រដាប់អាវុធរបស់រដ្ឋាភិបាលរហូតបណ្ដាលឲ្យអ្នកវិនិយោគជាតិ និងអន្តរជាតិ បាត់បង់ទំនុកចិត្ត ហើយក៏មានប្រតិកម្មទាំងក្នុងស្រុក និងក្រៅស្រុកទៀតផង៖ «ការចូលសភារបស់បក្សប្រឆាំងនៅពេលនេះ គឺធ្វើឲ្យស្ថានការណ៍វិលទៅរកភាពប្រក្រតីវិញ គឺមិនមានភាពប្រឈមមុខដាក់គ្នា ដែលធ្វើឲ្យប្រជាពលរដ្ឋខ្មែរមានព្រួយបារម្ភ និងភ័យខ្លាចថានឹងកើតមានចលាចល ហើយសម្រាប់អ្នកវិនិយោគទុនផ្សេងៗនោះ អាចនឹងមានទំនុកចិត្តច្រើនជាងមុខផងដែរ សម្រាប់ស្ថានការណ៍នយោបាយនៅកម្ពុជា»។
លោក សូ ចន្ថា បន្ថែមថា ការលើកឡើងរបស់លោក ហ៊ុន សែន ថា ស្ថានភាពនយោបាយនៅតែធម្មតានេះ គឺជាវោហារសាស្ត្រនយោបាយមួយចង់បង្ហាញមតិសាធារណៈថា កម្ពុជាមិនមានវិបត្តិនយោបាយ។ មួយវិញទៀត ប្រហែលជាលោកចង់ប្រាប់ពលរដ្ឋខ្មែរដែរថា បក្សប្រឆាំងមិនសំខាន់ដែលនាំឲ្យសហគមន៍អន្តរជាតិចេញសេចក្ដីថ្លែងការណ៍ដាក់គំនាបរដ្ឋាភិបាលនោះឡើយ។
កាលពីថ្ងៃទី១៤ ខែកញ្ញា ប្រទេសចំនួន ៣៦ ដែលជាសមាជិកសហភាពអឺរ៉ុប និងប្រទេសប្រជាធិបតេយ្យធំៗ ដូចជា សហរដ្ឋអាមេរិក ជប៉ុន កាណាដា និងអូស្ត្រាលី រួមនឹងប្រទេសមួយចំនួនទៀត បានចេញសេចក្ដីប្រកាសរួមគ្នាមួយបង្ហាញពីកង្វល់លើស្ថានភាពសិទ្ធិមនុស្សនៅកម្ពុជា។ សេចក្ដីប្រកាសនេះលើកឡើងថា ការធ្វើទុក្ខបុកម្នេញរបស់រដ្ឋាភិបាលលើបក្សប្រឆាំង និងការរឹតត្បិតលើសិទ្ធិសេរីភាពក្នុងការសម្ដែងមតិរបស់ពលរដ្ឋ សិទ្ធិធ្វើការប្រមូលផ្តុំគ្នាដោយសន្តិភាពនៅក្នុងឆ្នាំនេះ កាន់តែមានស្ថានភាពធ្ងន់ធ្ងរ និងជាពិសេសទៅលើរឿងឃាតកម្មលោកបណ្ឌិត កែម ឡី។
សេចក្ដីប្រកាសរបស់បណ្ដាប្រទេសទាំង៣៦ ក៏បានជំរុញឲ្យរដ្ឋាភិបាលកម្ពុជា បន្តឡើងវិញនូវការសន្ទនានយោបាយ ដើម្បីបន្ថយការកើនឡើងនៃភាពតានតឹងនយោបាយ ហើយបង្កើនការទុកចិត្តគ្នាដែលធានាដល់ការគោរពយ៉ាងពេញលេញចំពោះសិទ្ធិមនុស្ស រួមទាំងសេរីភាពនៃការបញ្ចេញមតិ សេរីភាពនៃការចងក្រងគ្នាជាក្រុម ជាសមាគម និងសេរីភាពក្នុងការប្រមូលផ្តុំគ្នា៕
No comments:
Post a Comment