 |
| សមត្ថកិច្ចការពារព្រំដែននៅស្រុកកោះធំ ខេត្តកណ្ដាល រារាំងតំណាងរាស្ត្រ និងពលរដ្ឋមិនឲ្យចូលទៅមើលព្រំដែន នៅព្រឹកថ្ងៃទី២០ ខែមិថុនា ឆ្នាំ២០១៥។ |
គណៈកម្មការ ព្រំដែន កម្ពុជា រងការ រិះគន់ រឿងបិទបាំង ព័ត៌មាន ពីគម្រោង ការដូរដី តាមព្រំដែន
RFA / វិទ្យុ អាស៊ី សេរី | ២៥ តុលា ២០១៦
ស្ដាប់ ឬ ទាញយកសំឡេង
00:00/00:00
គណបក្ស ប្រឆាំង និងអ្នកស្រាវជ្រាវ ការអភិវឌ្ឍ បង្ហាញ ក្ដីកង្វល់ ជុំវិញ គោលនយោបាយ ដោះដូរដី ដែលកម្ពុជា និងវៀតណាម គ្រោង នឹងចាប់ផ្ដើម នៅពេល ខាងមុខ។ ក្រសួង ការបរទេស វៀតណាម បានបង្ហោះ នៅលើ គេហទំព័រ របស់ខ្លួន ថា, រដ្ឋាភិបាល នៃប្រទេស ទាំងពីរ បានព្រមព្រៀង រួចហើយ ចំពោះ គម្រោង នៃការដោះដូរដី គ្នា ក្នុងតំបន់ មួយចំនួន តាមបណ្ដាខេត្ត ជាប់ព្រំដែន។
ដោយឡែក អ្នកជំនាញ កិច្ចការ ព្រំដែន ពីខាង រដ្ឋាភិបាលវិញ បកស្រាយ ថា, ក្នុងដំណាក់កាលនេះ គ្រាន់តែ ជាកិច្ចព្រមព្រៀង នៅឡើយទេ, ហើយ រដ្ឋាភិបាល ទាំងសង្ខាង ក៏កំពុង តែ សម្លឹងរក ភូមិសាស្ត្រ ដែលនឹងត្រូវ ដោះដូរ ជាមុនសិន ដែរ។
សំឡេង ពលរដ្ឋ៖ «ខ្លាចដូចគេថា យកភូមិខ្មែរទៅដូរយកដីខ្មែរមកវិញ វាមិនបានទៅដូរយកដីវៀតណាម មកវិញ។»
ការរិះគន់របស់អ្នកវិភាគស្ថានការណ៍នយោបាយនេះ ក្រោយពេលព័ត៌មានស្ដីពីការដោះដូរដីត្រូវបានក្រសួងការបរទេសវៀតណាម ផ្សព្វផ្សាយយ៉ាងទូលំទូលាយ នៅលើគេហទំព័ររបស់ខ្លួន ខណៈរដ្ឋាភិបាលកម្ពុជា បន្តរក្សាភាពស្ងៀមស្ងាត់ជុំវិញកិច្ចព្រមព្រៀងដែលបានឯកភាពគ្នារួចហើយនេះ ក្នុងកិច្ចប្រជុំកាលពីថ្ងៃទី១៨ ដល់ថ្ងៃទី២០ ខែតុលា នៅទីក្រុងហូជីមីញ។
លោកបណ្ឌិត មាស នី អ្នកស្រាវជ្រាវការអភិវឌ្ឍសង្គម យល់ឃើញថា រឿងនេះជាការព្រួយបារម្ភយ៉ាងធំសម្រាប់ពលរដ្ឋកម្ពុជា។ លោកបន្តថា នេះជាមន្ទិលសង្ស័យពីមូលហេតុដែលរដ្ឋាភិបាលកម្ពុជា ព្យាយាមបិទបាំងព័ត៌មាន ក្រោយលទ្ធផលនៃកិច្ចប្រជុំបានបិទបញ្ចប់។លើសពីនេះទៀត ការដោះដូរដីដែលធ្វើឡើងដោយអាថ៌កំបាំងបែបនេះ តើថាអាចនឹងធ្វើឲ្យកម្ពុជា ត្រូវខាតបង់ដីដោយរបៀបណាបន្ថែមទៀតទៅវៀតណាម ដែរ ឬទេ។
អ្នកឃ្លាំមើលផ្នែកអភិវឌ្ឍន៍សង្គម
លោកបណ្ឌិត មាស នី ក្នុងវេទិកាអ្នកស្ដាប់វិទ្យុអាស៊ីសេរី
កាលពីថ្ងៃទី១៦ ខែវិច្ឆិកា ឆ្នាំក២០១៥។ RFA
កាលពីថ្ងៃទី២០ ខែតុលា ក្រសួងការបរទេសវៀតណាម បានបញ្ចេញលទ្ធផលនៃកិច្ចប្រជុំទ្វេភាគីក្នុងទីក្រុងហូជីមិញ នៅលើគេហទំព័ររបស់ខ្លួន។ មជ្ឈដ្ឋាននានា រិះគន់ពីការលាក់លៀមព័ត៌មានដូចគ្នានេះរបស់គណៈកម្មការព្រំដែន ដែលជាសេនាធិការរបស់រដ្ឋាភិបាលចំពោះភាពយឺតយ៉ាវនៃការផ្ដល់ព័ត៌មានជាផ្លូវការជុំវិញលទ្ធផលនៃកិច្ចប្រជុំរយៈពេល ៣ថ្ងៃ នៅលើទឹកដីវៀតណាម នេះដែរ។
កាលពីថ្ងៃទី២២ ខែតុលា ប្រធានគណៈកម្មការចម្រុះបោះបង្គោលព្រំដែនគោកកម្ពុជា លោក វ៉ា គឹមហុង ទទួលស្គាល់ថា អ្វីដែលភាគីវៀតណាម បង្ហាញជាសាធារណៈនោះ ស្ដីពីកិច្ចព្រមព្រៀងថា នឹងដោះដូរដីនោះគឺជាការពិត។ លោក វ៉ា គឹមហុង បានផ្ដល់បទសម្ភាសន៍ឲ្យអាស៊ីសេរី ដឹងថា ដីភូមិមួយចំនួនដែលភាគីទាំងពីរព្រមព្រៀង ផ្ទេរផ្ទូរនោះ ស្ថិតក្នុងខេត្តរតនគិរី ស្វាយរៀង និងខេត្តមណ្ឌលគិរី ជាដើម។
ដោយឡែកកំណត់ហេតុដែលចុះផ្សាយនៅលើគេហទំព័រនៃក្រសួងការបរទេសវៀតណាម ឲ្យដឹងក្រោយកិច្ចប្រជុំបានបញ្ចប់ទៅភ្លាមៗថា ភាគីទាំងពីរសម្រេចបាន ៨៣ភាគរយហើយនៃការបែងចែកព្រំដែន និងការបោះបង្គោលនៅតាមខ្សែបន្ទាត់ព្រំដែនរវាងប្រទេសទាំងពីរ។
ក្រៅពីនេះ រដ្ឋាភិបាលទាំងពីរនឹងបន្តអនុវត្តសញ្ញាទាំងឡាយដែលបានចុះកិច្ចព្រមព្រៀងរួចហើយ ដើម្បីដោះស្រាយបញ្ហាដែលនៅសេសសល់ ជាពិសេសនោះ គឺអនុវត្តឲ្យបាននូវសន្ធិសញ្ញាឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥។
ជុំវិញរឿងនេះ តំណាងរាស្ត្រគណបក្សប្រឆាំង លោក ម៉ៅ មុនីវណ្ណ យល់ឃើញថា បញ្ហានេះវាហាក់ពុំមែនជារឿងថ្មីឡើយ ដែលរដ្ឋាភិបាលខកខានក្នុងការបញ្ចេញកិច្ចការសំខាន់ៗ ទាក់ទងអាយុជីវិតប្រទេសជាតិនេះ ជាពិសេសព័ត៌មានទាក់ទងការកំណត់នៃការបោះបង្គោលព្រំដែននេះ។ ជាងនេះទៀត ការអនុវត្តដូចនេះលោកបញ្ជាក់ថា គេគ្រាន់តែដឹងថា គឺគណៈកម្មការនេះយោងសេចក្ដីសម្រេចរបស់លោក ហ៊ុន សែន។
ទាក់ទងរឿងនេះ លោកបណ្ឌិត កែម ឡី កាលនៅមានជីវិតធ្លាប់ព្រមានថា ប្រទេសកម្ពុជា មិនយូរមិនឆាប់ទេ នឹងមានវាសនាធ្លាក់ទៅលើដៃវៀតណាម ដូចកម្ពុជាក្រោម។
លោកនាយករដ្ឋមន្ត្រី ហ៊ុន សែន ធ្លាប់បដិសេធក្នុងពេលចូលឆ្លើយនៅរដ្ឋសភាកាលពីខែសីហា ឆ្នាំ២០១២ ថា វៀតណាមមិនដែលរំកិលព្រំដែនចូលក្នុងទឹកដីកម្ពុជា ដូចការចោទប្រកាន់របស់បក្សនយោបាយមួយចំនួនឡើយ។ ប្រជាពលរដ្ឋដែលរស់នៅជាក់ស្តែង ពួកគេកំពុងកាន់កាប់ និងអាស្រ័យផលជាប្រចាំ។ លោក ហ៊ុន សែន ចំអកថា ប្រសិនបើមានការរំកិលបង្គោលព្រំដែនដូចនេះមែន ម៉្លេះព្រំដែនរវាងកម្ពុជា-វៀតណាម មិនដឹងដល់ណានោះឡើយ។
ផ្ទុយពីការបកស្រាយបែបនេះ របស់លោកនាយករដ្ឋមន្រ្តី ហ៊ុន សែន ពលរដ្ឋដែលរស់នៅតាមខ្សែបន្ទាត់ព្រំដែនក្នុងខេត្តកំពង់ចាម ស្វាយរៀង និងខេត្តត្បូងឃ្មុំ ជាដើម តែងស្រែកយំ និងត្អូញត្អែរពីការរំកិលតម្រុយបង្គោលព្រំដែនជាហូរហែ។
អនុប្រធានលេខាធិការដ្ឋានអចិន្ត្រៃយ៍នៃអាជ្ញាធរជាតិទទួលបន្ទុកកិច្ចការព្រំដែន អ្នកស្រី កុយ ពិសី បំភ្លឺថា មូលហេតុដែលរដ្ឋាភិបាលកម្ពុជា មិនបានបញ្ចេញភ្លាមៗពីលទ្ធផលនៃកិច្ចប្រជុំនៅទីក្រុងហូជីមិញ ដោយសារនេះពុំមែនជាលទ្ធផលសម្រេចឡើយ។ ម្យ៉ាងទៀត កម្ពុជាត្រូវឆ្លងកាត់សេចក្ដីសម្រេចជាច្រើនដំណាក់កាល ហេតុដូច្នេះបានជាត្រូវយឺតយ៉ាវក្នុងការលាតត្រដាងជាសាធារណៈ ហើយកិច្ចការព្រំដែននេះ ត្រូវការពេលយូរទៀតដើម្បីបញ្ចប់ ព្រោះជាដំណាក់កាលទាក់ទងប្រទេសជាតិ។
រហូតមកដល់ពេលនេះ ភាគីកម្ពុជា នៅពុំទាន់អាចបញ្ចេញទិន្នន័យជាក់លាក់ពីការដោះដូរដីដែលភាគីទាំងពីរបានព្រមព្រៀងគ្នានៅឡើយទេ។
ថ្លែងនៅក្នុងរដ្ឋសភាប្រមាណជាង ៥ម៉ោង កាលពីថ្ងៃទី១២ ខែសីហា ឆ្នាំ២០១២ ប្រធានគណបក្សប្រជាជនកម្ពុជា លោក ហ៊ុន សែន អះអាងថា បើយោងលើអនុស្សរណៈយោគយល់គ្នាឆ្នាំ២០១១ ការដោះដូរដីនៅតាមខ្សែបន្ទាត់ព្រំដែនដែលភាគីទាំងពីរបានឯកភាពគ្នាហើយនេះ គឺមានទម្រង់មិនខុសពីធ្មេញរណាឡើយ។
បច្ចុប្បន្នកម្ពុជា-វៀតណាម បានបោះបង្គោលបានជិត ៣០០បង្គោលហើយ ក្នុងចំណោម ៣៧៥បង្គោល។ លោក ហ៊ុន សែន អះអាងថា ការដោះដូរដីនៅតាមខ្សែបន្ទាត់ព្រំដែននេះមិនមែនធ្វើតែកម្ពុជា ទេ បណ្ដាប្រទេសនៅលើពិភពលោក គឺគេតែងអនុវត្តរបៀបនេះដែរ។
បញ្ហានេះ ទាំងគណបក្សប្រឆាំង និងអ្នកវិភាគសង្គមយល់ឃើញថា ការដោះដូរដីដែលធ្វើឡើងក្នុងដំណាក់កាលដែលកម្ពុជា មិនទាន់បានឯកភាពជាតិនៅឡើយផង ហើយបែរជាបក្សកាន់អំណាចសម្រេចដោយឯកច្ឆន្ទបែបនេះ វានឹងក្លាយជាបន្ទុកថ្មីមួយទៀតលើរដ្ឋាភិបាល ពោលគឺចៀសមិនផុតពីការរិះគន់ និងទទួលខុសត្រូវចំពោះមុខប្រវត្តិសាស្ត្រ ប្រសិនបើរកឃើញថា ធ្វើឲ្យទឹកដីត្រូវខាតបង់ពីការកំណត់ខណ្ឌសីមានេះ៕
No comments:
Post a Comment