 |
| ប្រធានគណបក្សសង្គ្រោះជាតិ លោក សម រង្ស៊ី ថ្លែងទៅកាន់អ្នកកាសែតកាលពីថ្ងៃទី១០ ខែកក្កដា ឆ្នាំ២០១៥ នារាជធានីភ្នំពេញ។ |
តុលាការ ផ្ដន្ទាទោស លោក សម រង្ស៊ី និងជំនួយការ ពីរនាក់ ដាក់ពន្ធនាគារ ៥ឆ្នាំ
RFA / វិទ្យុ អាស៊ី សេរី | ២៧ ធ្នូ ២០១៦
សាលក្រមដែលសម្រេចដោយកំបាំងមុខ ត្រូវបានប្រធានក្រុមប្រឹក្សាជំនុំជម្រះនៃតុលាការក្រុងភ្នំពេញ លោក លាង សំណាត់ សម្រេចបើកផ្លូវប្ដឹងឧទ្ធរណ៍ក្នុងរយៈពេលកំណត់នៃនីតិវិធី ប្រសិនលោក សម រង្ស៊ី និងជំនួយការ ២នាក់ទៀតរបស់លោក មិនពេញចិត្តទៅនឹងសាលក្រមដែលបានសម្រេចនៅពេលនេះ។
ក្នុងថ្ងៃប្រកាសសាលក្រមកាលពីព្រឹកថ្ងៃទី២៧ ធ្នូ ទាំងលោក សម រង្ស៊ី និងជំនួយការ ២នាក់ទៀតរួមមាន លោក អ៊ឹង ជុងលាង ហៅម៉ាប់ លោក សត្យា សម្បត្តិ រួមទាំងមេធាវីការពារក្ដីផង ពុំមានវត្តមាននៅក្នុងបន្ទប់សវនាការទេ។ អ្នកទាំង ៣នាក់ត្រូវបានតុលាការចោទប្រកាន់ ៣បទល្មើស គឺសមគំនិតក្នុងអំពើក្លែងបន្លំឯកសារសាធារណៈ ប្រើប្រាស់ឯកសារសាធារណៈក្លែង និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។ តាមរយៈបទចោទទាំងនេះ ត្រូវបានតុលាការយល់ឃើញថា មេបក្សប្រឆាំងរូបនេះបានផ្ដល់ឱកាសឲ្យលោក ហុង សុខហួរ បង្ហោះផែនទីដែលនិយាយបំភ្លៃខុសពីការពិត រឿងព្រំដែនកម្ពុជា-វៀតណាម។
លោក សំ សុគង់ មេធាវីការពារក្តីឲ្យលោក សម រង្ស៊ី ចាត់ទុកថា សាលក្រមកំបាំងមុខនៅពេលនេះ គឺជាការផ្ដល់ភាពអយុត្តិធម៌ចំពោះកូនក្តីរបស់ខ្លួន។ មិនតែប៉ុណ្ណោះ មេធាវីរូបនេះយល់ឃើញថា បទចោទដែលតុលាការចោទប្រកាន់កូនក្ដីលោក គឺផ្ទុយពីអង្គហេតុ ដោយសារថាផេកហ្វេសប៊ុក ឬគេហទំព័រដែលលោក ហុង សុខហួរ ហើយរងការចោទប្រកាន់ដែលថា បង្ហោះនិយាយពីភាពមិនត្រឹមត្រូវរឿងព្រំដែនកម្ពុជា-វៀតណាម នោះ វាពុំមែនជាការបង្គាប់បញ្ជារបស់លោក សម រង្ស៊ី ឡើយ។ លោកបន្តថា «ក្នុងរឿងនេះការកាត់ទោសឯកឧត្ដម សម រង្ស៊ី ក៏ដូចជាជំនួយការ ២នាក់ពីបទសមគំនិត។ ប៉ុន្តែបើយើងមើលទៅក្នុងសវនាការ ការជជែកសួរដេញដោលទៅមិនមានភស្តុតាងអីសបញ្ជាក់ថាមានការពាក់ព័ន្ធ ហើយឯកឧត្ដម ហុង សុខហួរ ដែលជាសាក្សីក្នុងរឿងហ្នឹង គាត់បានបញ្ជាក់ដែរហើយថា មិនមានការសុំជាយោបល់ ឬបញ្ជាពីឯកឧត្ដម សម រង្ស៊ី ទេ ក្នុងការផុស ឬបង្ហោះហ្វេសប៊ុកហ្នឹង។»
ជុំវិញសំណុំរឿងដ៏ចម្រូងចម្រាសនេះ បណ្ដាលឲ្យលោក ហុង សុខហួរ សមាជិកព្រឹទ្ធសភា ត្រូវបានតុលាការក្រុងភ្នំពេញផ្ដន្ទាទោសដាក់ពន្ធនាគារ ៧ឆ្នាំ កាលពីថ្ងៃទី៧ ខែវិច្ឆិកា ឆ្នាំ២០១៦។ សមាជិកព្រឹទ្ធសភារូបនេះ ត្រូវបានតុលាការចោទប្រកាន់ ៣បទល្មើស បទក្លែងឯកសារសាធារណៈ ការប្រើប្រាស់ឯកសារសាធារណៈក្លែងក្លាយ និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។
ដោយឡែកលោក សម រង្ស៊ី ប្រមុខដឹកនាំបក្សប្រឆាំងរូបនេះកំពុងហ៊ុមព័ទ្ធទៅដោយសំណុំរឿង ២ផ្សេងទៀត ក្នុងនោះពាក់ព័ន្ធបណ្ដឹងបរិហារកេរ្តិ៍ ដែលដើមបណ្ដឹង គឺជាអតីតប្រមុខការទូតកម្ពុជា លោក ហោ ណាំហុង។ ទន្ទឹមនឹងនេះ នៅមានបណ្ដឹងមួយផ្សេងទៀត គឺបណ្ដឹងរិះគន់ហ្វេសប៊ុកលោក ហ៊ុន សែន។
ប្រតិកម្មនឹងសាលក្រមនេះ លោក សម រង្ស៊ី ប្រធានគណបក្សសង្គ្រោះជាតិ បានហៅសេចក្ដីសម្រេចនេះថា គ្រាន់តែជាតុលាការសម្រាប់ប្រថាប់ត្រាឲ្យបក្សនយោបាយប៉ុណ្ណោះ។ លោក សម រង្ស៊ី បានសរសេរនៅលើបណ្ដាញសង្គមហ្វេសប៊ុករបស់លោកផ្ទាល់ ដោយអះអាងថា នេះគឺជារឿងនយោបាយសុទ្ធសាធ ហើយតុលាការក្រុងភ្នំពេញ អង្គុយចាំតែអនុវត្តតាមបញ្ជាអ្នកដឹកនាំនយោបាយ ដែលចង់កម្ចាត់គូប្រកួតរបស់ខ្លួន។
អង្គការមិនមែនរដ្ឋាភិបាលផ្នែកសិទ្ធិមនុស្សយល់ឃើញថា នេះជារបៀបនយោបាយ ប៉ុន្តែអ្វីដែលជាការសោកស្ដាយនោះ គឺតុលាការពុំបានបំពេញទៅតាមក្រមសីលធម៌ និងវិជ្ជាជីវៈដែលធ្វើឲ្យមានអំពើនិទ្ទណ្ឌភាពកាន់តែរីកធំទៅៗនៅក្នុងសង្គមបច្ចុប្បន្ន។
លោក អំ សំអាត ប្រធានគ្រប់គ្រងផ្នែកអង្កេតអង្គការលីកាដូ (LICADHO) យល់ឃើញថា សាលក្រមដែលចេញនៅពេលនេះ ប្រឆាំងលោក សម រង្ស៊ី និងជំនួយការរបស់គាត់ ២នាក់ទៀត ពុំមែនជារឿងដែលថ្មីឡើយ។ យ៉ាងណា មន្ត្រីការពារសិទ្ធិមនុស្សរូបនេះយល់ឃើញថា វាជារឿងដែលគួរឲ្យអាម៉ាស់ ខណៈដែលស្ថាប័នតុលាការនៅតែពុំអាចឈរលើឯករាជភាពរបស់ខ្លួនបាន ក្នុងការស្វែងរកយុត្តិធម៌សម្រាប់ជនរងគ្រោះ។ លោកបន្តថា «រឿងនេះវាជារឿងមួយដែលខ្ញុំគិតថាវាពាក់ព័ន្ធនឹងនយោបាយ ហើយបើសិនរឿងទាំងអស់នេះការចរចាផ្នែកនយោបាយណាមួយកើតឡើង វាដូចតែមុនអ៊ីចឹង នឹងមានការលើកលែងទោសដូចតែគ្នាអ៊ីចឹង។ យើងជាសង្គមស៊ីវិល យើងចង់ថាធ្វើយ៉ាងម៉េចឲ្យតុលាការហ្នឹងវាជាប្រព័ន្ធមួយឯករាជ្យ ដែលផ្តល់ទំនុកចិត្តសម្រាប់ប្រជាពលរដ្ឋទូទៅ។»
បើទោះជាបែបណា លោក សំ សុគង់ ដែលជាមេធាវីការពារក្ដីឲ្យលោក សម រង្ស៊ី បញ្ជាក់ជំហរថា ថ្វីបើសាលក្រមនៅពេលនេះមិនអាចទទួលយកបានមែន លោកនៅតែប្រកាន់គោលការណ៍ប្ដឹងឧទ្ធរណ៍បន្តទៀត ប្រឆាំងការសម្រេចចិត្តរបស់ប្រធានក្រុមប្រឹក្សាជំនុំជម្រះលោក លាង សំណាត់ នៅពេលនេះ៕
No comments:
Post a Comment