 |
| ពលរដ្ឋចុះឈ្មោះបោះឆ្នោតនៅសង្កាត់ព្រែកប្រា ខណ្ឌច្បារអំពៅ កាលពីថ្ងៃទី១ កញ្ញា ឆ្នាំ២០១៦។ RFA/Phann Yasy |
គ.ជ.ប. បញ្ជូនឈ្មោះ អ្នកបោះឆ្នោត ជិត ២,៥០០នាក់ ឲ្យក្រសួង មហាផ្ទៃ ពិនិត្យ
RFA / វិទ្យុ អាស៊ី សេរី | ២៧ មករា ២០១៧
អ្នកនាំពាក្យ គ.ជ.ប លោក ហង្ស ពុទ្ធា ប្រាប់ថា ក្នុងចំណោមឈ្មោះជិត ២.៥០០នាក់ ដែល គ.ជ.ប បញ្ជូនទៅក្រសួងមហាផ្ទៃ គឺជាឈ្មោះសរុបទាំងអស់នៅក្នុងពាក្យបណ្ដឹងដែលគណបក្សនយោបាយ និងពលរដ្ឋប្ដឹងមក គ.ជ.ប ដែលទាមទារឲ្យលុបឈ្មោះទាំងនោះចោលពីបញ្ជីបោះឆ្នោតដំបូងទាំង ១៧៣បណ្ដឹង។ លោកបន្តថា ក្រសួងមហាផ្ទៃ បានឆ្លើយតបមក គ.ជ.ប ជាបន្តបន្ទាប់ តាមរយៈលិខិតដែលករណីខ្លះរកឃើញថា ឈ្មោះទាំងនោះមាននៅក្នុងអត្តសញ្ញាណប័ណ្ណគំរូថ្មីដែលត្រឹមត្រូវ និងករណីផ្សេងទៀត តម្រូវឲ្យក្រសួងមហាផ្ទៃ ត្រូវចុះស្រាវជ្រាវដល់ទីកន្លែង។
លោក ហង្ស ពុទ្ធា ឲ្យដឹងទៀតថា ក្រសួងមហាផ្ទៃ ថែមទាំងបានផ្ដល់ឈ្មោះនៅក្នុងអត្តសញ្ញាណប័ណ្ណប្រភេទថ្មី ឬហៅថា អត្តសញ្ញាណប័ណ្ណមានស៊ីមដល់គណៈកម្មាធិការជាតិរៀបចំការបោះឆ្នោតជាង ៦លាននាក់ ដើម្បីឲ្យពិនិត្យរកមើលឈ្មោះ និងសម្រួលការបោះឆ្នោត។
ក្នុងចំណោមឈ្មោះនៅក្នុងបញ្ជីឈ្មោះបោះឆ្នោតដំបូងជាង ១៧០ករណី ដែលដើមបណ្ដឹងភាគច្រើនជាពលរដ្ឋ និងតំណាងគណបក្សសង្គ្រោះជាតិ ប្ដឹងមក គ.ជ.ប ចោទប្រកាន់ជនបរទេស ឬជាជនជាតិវៀតណាម ជិត ២.៥០០នាក់ ដែលទទួលបានអត្តសញ្ញាណប័ណ្ណ និងឯកសារពាក់ព័ន្ធមិនត្រឹមត្រូវតាមច្បាប់រហូតអាចបានទៅចុះឈ្មោះបោះឆ្នោត។ កាលពីថ្ងៃទី២៦ ខែមករា ក្រុមប្រឹក្សាជំនុំជម្រះនៃ គ.ជ.ប សម្រេចរក្សាឈ្មោះពួកគេទាំងអស់នៅក្នុងបញ្ជីឈ្មោះបោះឆ្នោតដដែល ក្រោយពេលបើកសវនាការអស់រយៈ ១០ថ្ងៃរួចមក។ ស្របពេលនោះដែរ ស្ថាប័នបោះឆ្នោតថ្មីនេះ បើកផ្លូវឲ្យដើមបណ្ដឹងប្ដឹងទាស់ការសម្រេចរបស់ គ.ជ.ប ទៅក្រុមប្រឹក្សាធម្មនុញ្ញ។
អ្នកនាំពាក្យក្រសួងមហាផ្ទៃ លោក ខៀវ សុភ័គ ឲ្យដឹងថា តាមរយៈការពិនិត្យឈ្មោះទាំងនោះរួចហើយ រកឃើញថា មានឈ្មោះខ្លះត្រឹមត្រូវតាមទិន្នន័យរបស់ក្រសួងមហាផ្ទៃ ហើយក៏មានឈ្មោះផ្សេងទៀតទាមទារឲ្យមានការស្រាវជ្រាវបន្ថែម។ លោកមានប្រសាសន៍ឲ្យដឹងទៀតថា ទន្ទឹមនឹងក្រសួងមហាផ្ទៃ ទទួលបានពាក្យបណ្ដឹងពី គ.ជ.ប ក្រុមការងារលោកកំពុងធ្វើស្រាវជ្រាវករណីមួយៗ ដែលត្រូវការពេលវេលាមួយសមរម្យដើម្បីសិក្សា និងចុះទៅដល់ទីកន្លែង។ យ៉ាងណាក៏ដោយចុះ លោក ខៀវ សុភ័គ មិនទាន់ប្រាប់ពីវេលាជាក់លាក់នៃការបង្ហាញលទ្ធផលស្រាវជ្រាវនៅឡើយទេ។
ស្រដៀងគ្នាទៅនឹងការលើកឡើងរបស់អ្នកនាំពាក្យក្រសួងមហាផ្ទៃ លិខិតរបស់រដ្ឋមន្ត្រីក្រសួងមហាផ្ទៃ លោក ស ខេង ផ្ញើជូនប្រធានគណៈកម្មាធិការជាតិរៀបចំការបោះឆ្នោត លោក ស៊ិក ប៊ុនហុក កាលពីថ្ងៃទី២០ ខែមករា ឲ្យដឹងថា ក្នុងចំណោមឈ្មោះ ១៥២ ដែលស្នើឲ្យត្រួតពិនិត្យរកឃើញថា អត្តសញ្ញាណប័ណ្ណចំនួន ២៧ តម្រូវឲ្យមន្ត្រីត្រូវចុះស្រាវជ្រាវដល់ទីតាំងផ្ទាល់។
ចំណែកប្រធាននាយកដ្ឋាននីតិកម្ម និងកិច្ចការបោះឆ្នោតគណបក្សសង្គ្រោះជាតិ អ្នកស្រី ម៉េង សុធារី ក្នុងការផ្ដល់បទសម្ភាសន៍ឲ្យអាស៊ីសេរី កាលពីថ្មីៗនេះ អ្នកស្រីទាមទារឲ្យក្រសួងមហាផ្ទៃ ចាត់វិធានការផ្លូវច្បាប់ចំពោះអ្នកផ្ដល់ និងអ្នកទទួល ប្រសិនបើរកឃើញថា ការផ្ដល់ឯកសារ ការផ្ដល់សញ្ជាតិ និងអត្តសញ្ញាណប័ណ្ណដល់ជនបរទេស ឬជនជាតិវៀតណាម មិនត្រឹមត្រូវតាមច្បាប់។
អ្នកនាំពាក្យក្រសួងមហាផ្ទៃ លោក ខៀវ សុភ័គ ថា ក្រសួងមិនលើកលែងឲ្យអ្នកណាដែលប្រព្រឹត្តខុសច្បាប់ទេ ព្រោះកម្ពុជា មានច្បាប់អន្តោប្រវេសន៍ និងច្បាប់សញ្ជាតិ៕
No comments:
Post a Comment