 |
| (ពីឆ្វេង) មន្ត្រីគណបក្សសង្គ្រោះជាតិ លោក ហុង សុខហួរ លោក មាជ សុវណ្ណារ៉ា និងលោក អ៊ុំ សំអាន។ |
បក្សប្រឆាំង ទទួលលិខិត លាឈប់ ពីសមាជិក គណៈកម្មាធិការ នាយក ៣រូប
RFA / វិទ្យុ អាស៊ី សេរី | ២៣ កុម្ភៈ ២០១៧
ស្ដាប់ ឬ ទាញយកសំឡេង
សមាជិក គណៈកម្មាធិការ នាយក នៃគណបក្ស ប្រឆាំង ៣រូប ដែលកំពុង ជាប់ឃុំ ក្នុងពន្ធនាគារ ព្រៃ ស បានលាឈប់ ពីតួនាទីនេះ ដោយបញ្ជាក់ ថា មានមូលហេតុ ផ្ទាល់ខ្លួន។
មេដឹកនាំ គណបក្ស សង្គ្រោះជាតិ មិនធ្វើ អត្ថាធិប្បាយ វែងឆ្ងាយ ជុំវិញ រឿងនេះទេ។ ប៉ុន្តែ អ្នកឃ្លាំមើល សង្គម និងនយោបាយ មើលឃើញ ថា, ការលាឈប់នេះ អាច ជាច្រកមួយ ដើម្បី បន្ធូរបន្ថយ ស្ថានការណ៍ តានតឹង នយោបាយ បច្ចុប្បន្ន។
ប្រធាន គណៈកម្មាធិការ នាយក គណបក្ស សង្គ្រោះជាតិ លោក ប៉ុល ហំម បានឲ្យ អាស៊ី សេរី ដឹង កាលពីយប់ ថ្ងៃព្រហស្បតិ៍ ទី២៣ ខែកុម្ភៈ ថា, គណបក្ស បានទទួល លិខិត លាឈប់ ជាផ្លូវការ ពីសាមីខ្លួន រួចហើយ។
លោក បន្ត ថា, ថ្នាក់ដឹកនាំ គណបក្ស មិនមានអ្វី ជំទាស់ ចំពោះ ការស្នើសុំ នេះទេ ព្រោះ នេះ ជាសិទ្ធិ របស់ សាមីខ្លួន ម្នាក់ៗ៖
«គណៈកម្មាធិការ នាយកអត់មានសិទ្ធិសម្រេចថាឲ្យ ឬមិនឲ្យ ព្រោះគេគ្រាន់តែជូនដំណឹងមកយើងជាសិទ្ធិរបស់គេ ហើយបន្ទាប់ទៅនេះ គណៈកម្មាធិការគ្រាន់តែប្រកាសទៅសមាជិកគណៈកម្មាធិការនាយកតែប៉ុណ្ណឹងទេ។»
តំណាងរាស្ត្រ លោក អ៊ុំ សំអាន និងមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា ព្រមទាំង លោក ហុង សុខហួរ អតីតសមាជិកព្រឹទ្ធសភាគណបក្ស សម រង្ស៊ី បានសរសេរលិខិតរៀងៗខ្លួនចេញពីពន្ធនាគារព្រៃស ផ្ញើមកគណៈកម្មាធិការនាយកតាមរយៈមេធាវីសុំលាឈប់ពីតួនាទីក្នុងគណៈកម្មាធិការនេះ។
លិខិតសុំលាលែងដោយមានផ្ដិតមេដៃផង ដែលអ្នកសារព័ត៌មានទទួលបានកាលពីយប់ថ្ងៃទី២៣ ខែកុម្ភៈ មិនបានបញ្ជាក់អ្វីវែងឆ្ងាយក្រៅពីមូលហេតុផ្ទាល់ខ្លួននោះឡើយ។
លិខិតរបស់អ្នកទាំងបីនោះ មានគំរូ និងខ្លឹមសារដូចៗគ្នា ប៉ុន្តែមិនមានឃ្លាត្រង់ណាមួយដែលបញ្ជាក់ថា ពួកគាត់ត្រូវលាឈប់ពីគណបក្សទាំងស្រុង ក្រៅតែពីរតួនាទីជាសមាជិកគណៈកម្មាធិការនាយកនោះទេ។
អ្នកឃ្លាំមើលសង្គម និងនយោបាយ លោក សូ ចន្ថា មើលឃើញថា ការលាឈប់នេះអាចជាច្រកមួយឈានដល់កាបើកផ្លូវចរចាឡើងវិញរវាងគណបក្សប្រជាជនកម្ពុជា និងគណបក្សសង្គ្រោះជាតិ ដែលកំពុងប្រឈមមុខដាក់គ្នា ដើម្បីបន្ធូរបន្ថយស្ថានការណ៍តានតឹងនយោបាយបច្ចុប្បន្ន៖ «ខ្ញុំមើលទៅការលាលែងនេះ គឺអាចស្វែងរកដំណោះស្រាយបានរួចពីការឃុំឃាំង ឬក៏ការលើកលែងទោសចំពោះការជាប់ពន្ធនាគារ អ៊ីចឹងខ្ញុំមើលទៅការលាលែងនេះជាហេតុផលនយោបាយច្រើនជាងការចង់ចាកចេញពីនយោបាយ។»
ការលាឈប់នេះ ធ្វើឡើងក្រោយពីលោក សម រង្ស៊ី ប្រធានគណបក្សសង្គ្រោះជាតិ កាលពីថ្ងៃទី១១ ខែកុម្ភៈ បានប្រកាសនូវព័ត៌មានគួរឲ្យភ្ញាក់ផ្អើលមួយថា លោកលាលែងពីតួនាទីជាប្រធាន និងសមាជិកគណបក្សសង្គ្រោះជាតិ ក្នុងគោលបំណងចង់ជួយសង្គ្រោះគណបក្សទាំងមូលដែលចាត់ទុកថា កំពុងស្ថិតនៅក្រោមការគំរាមកំហែងពីគណបក្សដែលដឹកនាំរដ្ឋាភិបាល៕
No comments:
Post a Comment