 |
| លោកនាយកគណៈរដ្ឋមន្ត្រី ហ៊ុន សែន (ឆ្វេង) និងប្រធានស្ដីទីគណបក្សសង្គ្រោះជាតិ លោក កឹម សុខា។ |
លោក ហ៊ុន សែន ទទួលស្គាល់ សារសំឡេង បែកធ្លាយ ជាមួយ លោក កឹម សុខា
RFA / វិទ្យុ អាស៊ី សេរី | ៤ មីនា ២០១៧
ការផ្សាយ របស់ ហ្វ្រេសញូវ (Fresh News) លោក ហ៊ុន សែន ទទួលស្គាល់ សំឡេង របស់ លោកនេះ ក្រោយពេល ដែលសារព័ត៌មាននេះ បានផ្សាយ បន្ត នូវសំឡេង កិច្ចសន្ទនា ឆ្លើយឆ្លង រវាង មេដឹកនាំ គណបក្ស ទាំងពីរ មក។ អ្នកប្រើប្រាស់ហ្វេសប៊ុក (Facebook) ដែលមានឈ្មោះថា ហ៊ុន សែន បានអធិប្បាយ ឬ comment លើទំព័រ Facebook របស់ ហ្វ្រេសញូវ (Fresh News) ថា លោកទទួលស្គាល់សំឡេង និងខ្លឹមសារនៃកិច្ចសន្ទនានោះ ប៉ុន្តែលោកបញ្ជាក់ថា ត្រង់លោក កឹម សុខា មិនទទួលស្គាល់ ឬទទួលស្គាល់ គឺជាសិទ្ធិរបស់លោក កឹម សុខា។
អ្នកប្រើប្រាស់ហ្វេសប៊ុកដែលមានឈ្មោះថា ហ៊ុន សែន នោះបន្ថែមទៀតថា លោកបាននិយាយឆ្លងឆ្លើយជាមួយលោក កឹម សុខា តាមទូរស័ព្ទជាច្រើនលើក និងឆ្លងឆ្លើយតាមបណ្ដាញ WhatsApp ជាច្រើនដង។ ទោះបីយ៉ាងណាក៏ដោយ ក៏ម្ចាស់គណនីឈ្មោះ ហ៊ុន សែន នោះ មិនបានបញ្ជាក់ថា នរណាជាអ្នកលួចថតសំឡេងឡើយ ដោយគ្រាន់តែបញ្ជាក់ថា លោកភ្ញាក់ផ្អើលចំពោះម្ចាស់ផេកឈ្មោះ សីហា ដែលមានសមត្ថភាពលួចស្ដាប់ការសន្ទនាលោក និងលោក កឹម សុខា។ លោកថា លោកធ្លាប់ដឹងថា មានតែចារកម្មអាមេរិកទេដែលបានលួចស្ដាប់មេដឹកនាំអាល្លឺម៉ង់ និងអឺរ៉ុប មួយចំនួន។
ទោះជាយ៉ាងណា ម្ចាស់ផេកឈ្មោះ ហ៊ុន សែន មិនបានមានប្រសាសន៍ថា លោកនឹងមានវិធានការយ៉ាងណាចំពោះការលេចចេញសំឡេងនៃកិច្ចសន្ទនានេះទេ។
នៅក្នុងខ្សែអាត់ថតកិច្ចសន្ទនានោះ សំឡេងរបស់លោកនាយករដ្ឋមន្ត្រីឮច្បាស់ដូចជាថតចេញពីមាត់ផ្ទាល់ ឯសំឡេងរបស់លោក កឹម សុខា មិនសូវឮច្បាស់ ហាក់ថតចេញពីទូរស័ព្ទ។
ការបញ្ចេញកិច្ចសន្ទនារវាងមេដឹកនាំគណបក្សទាំងពីរនេះ គឺកើតឡើងមួយថ្ងៃក្រោយពេលដែលមានការបែកចេញនូវសារឆ្លើយឆ្លង ដែលគេអះអាងថា ធ្វើឡើងរវាងលោក កឹម សុខា និងតំណាងរាស្ត្រគណបក្សប្រឆាំង ជាមួយនឹងមន្ត្រីជាន់ខ្ពស់លោក ហ៊ុន សែន ជុំវិញតំណែងប្រធានគណបក្សសង្គ្រោះជាតិ។ ការបញ្ចេញសំឡេងក៏បានធ្វើឡើងបន្ទាប់ពីលោក សម រង្ស៊ី បានផ្ញើសារអេឡិចត្រូនិកមួយបន្តពីអ្នកបញ្ជូនមកលោកម្នាក់ទៅឲ្យអ្នកសារព័ត៌មាន បញ្ចេញនូវកិច្ចសន្ទនាជាសារតែតាមទូរស័ព្ទរបស់កូនប្រុសលោក ហ៊ុន សែន ភរិយាលោក ហ៊ុន សែន និងមន្ត្រីជាន់ខ្ពស់មួយចំនួនទៀត។
អាស៊ីសេរី កំពុងព្យាយាមទាក់ទងភាគីពាក់ព័ន្ធដទៃទៀត ដើម្បីបញ្ជាក់ពីភាពត្រឹមត្រូវនៃសំឡេងកិច្ចសន្ទនាដែលបែកធ្លាយនេះ។ អាស៊ីសេរី នឹងស្នើសុំអត្ថាធិប្បាយពីលោក ហ៊ុន សែន និងលោក កឹម សុខា ដើម្បីបកស្រាយជុំវិញករណីនេះ៕
No comments:
Post a Comment