 |
| ពីឆ្វេង៖ ប្រធានគណបក្សសង្គ្រោះជាតិ លោក កឹម សុខា អនុប្រធានបក្ស លោក ប៉ុល ហំម អ្នកស្រី មូរ សុខហួរ និងលោក អេង ឆៃអ៊ាង ក្នុងសមាជវិសាមញ្ញគណបក្សជ្រើសរើសថ្នាក់ដឹកនាំថ្មី នៅថ្ងៃទី២ ខែមីនា ឆ្នាំ២០១៧។ RFA/Sorn Chanratha |
«គណបក្ស ប្រឆាំង មិនតម្រូវ ឲ្យក្រសួង មហាផ្ទៃ ផ្ដល់សុពលភាព ម្ដងទៀត ដល់បក្ស នោះទេ»
RFA / វិទ្យុ អាស៊ី សេរី | ២៥ មិនា ២០១៧
ស្ដាប់ ឬ ទាញយកសំឡេង
មន្ត្រីជាន់ខ្ពស់ គណបក្ស សង្គ្រោះជាតិ នៅតែ អះអាង ថា, សមាជ បក្ស ធ្វើឡើង ត្រឹមត្រូវ តាមលក្ខន្តិកៈបក្ស។ មន្ត្រី សង្គមស៊ីវិល យល់ ថា, ការធ្វើ សមាជ ជារឿង ផ្ទៃក្នុង គណបក្ស សង្គ្រោះជាតិ និងគ្មាន អ្វី ខុសឆ្គង ឡើយ។
លោក អេង ឆៃអ៊ាង អនុប្រធានគណបក្សសង្គ្រោះជាតិ កាលពីថ្ងៃសុក្រ ទី២៤ ខែមីនា អះអាងថា គណបក្សសង្គ្រោះជាតិ បានជូនដំណឹងដល់ក្រសួងមហាផ្ទៃ រួចរាល់ហើយ អំពីការកែប្រែសមាសភាពក្បាលម៉ាស៊ីនដឹកនាំរបស់គណបក្សនេះ។ ប្រសិនបើក្រសួងមហាផ្ទៃ យល់ថា មានកំហុសឆ្គងដូចការអះអាងមែននោះ ចុះហេតុដូចម្តេចបានជាក្រសួងមិនជូនដំណឹងឲ្យគណបក្សសង្គ្រោះជាតិ បានដឹងតាំងពីពេលនោះ?
លោក អេង ឆៃអ៊ាង៖ «ដូចជាក្រសួងមហាផ្ទៃ កាលណាមើលឃើញថា ខុសច្បាប់យ៉ាងម៉េច ត្រូវប្រាប់មកគណបក្សសាមី ដើម្បីឲ្យយើងកែសម្រួល ឬក៏ដោះស្រាយបញ្ហាទាំងអស់ហ្នឹង។ ប៉ុន្តែលិខិតរបស់ក្រសួងមហាផ្ទៃ កាលពីថ្ងៃទី២២ ខែមីនា នេះ គឺមិនបានបញ្ជាក់ច្បាស់កំហុសដែលគេមើលឃើញថា យើងខុសនោះទេ ហើយក៏គេអត់មានប្រាប់ឲ្យយើងកែតម្រូវអ្វីនោះដែរ គ្រាន់តែស្នើសុំឲ្យយើងដកពាក្យស្លោកដែលដូរមេឃុំបម្រើបក្សដាក់មេឃុំបម្រើរាស្ត្រនេះចេញ។»
គណបក្សសង្គ្រោះជាតិ បានធ្វើសមាជវិសាមញ្ញមួយ កាលពីថ្ងៃទី២ ខែមីនា បន្ទាប់ពីលោកនាយករដ្ឋមន្ត្រី ហ៊ុន សែន បានព្រមានធ្វើវិសោធនកម្មច្បាប់ស្ដីពីគណបក្សនយោបាយ ដែលអាចឈានទៅរម្លាយគណបក្សសង្គ្រោះជាតិ។ ក្រោយពីសមាជភ្លាម គណបក្សសង្គ្រោះជាតិ បានជូនដំណឹងទៅក្រសួងមហាផ្ទៃ អំពីការជ្រើសតាំងសមាសភាពថ្នាក់ដឹកនាំគណបក្សសង្គ្រោះជាតិ។ ភ្លាមៗនោះលោកនាយករដ្ឋមន្ត្រី ហ៊ុន សែន ក៏បានផ្ញើលិខិតអបអរសាទរលោក កឹម សុខា ដែលត្រូវបានបោះឆ្នោតជ្រើសតាំងជាប្រធានគណបក្សសង្គ្រោះជាតិ ជំនួសលោក សម រង្ស៊ី ដែលបានលាឈប់ពីគណបក្សសង្គ្រោះជាតិ។
ទើបតែថ្ងៃទី២២ ខែមីនា ឆ្នាំ២០១៧ ក្រសួងមហាផ្ទៃ ចេញលិខិតជូនគណបក្សសង្គ្រោះជាតិ ដោយលើកឡើងថា សមាជវិសាមញ្ញបោះឆ្នោតជ្រើសតាំងលោក កឹម សុខា ជាប្រធាន និងលោក ប៉ុល ហំម អ្នកស្រី មូរ សុខហួរ លោក អេង ឆៃអ៊ាង ជាអនុប្រធានគណបក្សសង្គ្រោះជាតិ គឺអនុវត្តផ្ទុយនឹងលក្ខន្តិកៈគណបក្ស។
ក្រសួងមហាផ្ទៃ ចេញលិខិតច្រានចោលលទ្ធផលសមាជគណបក្សសង្គ្រោះជាតិ នៅពេលនេះ គឺបន្ទាប់ពីសារព្រមានរបស់ប្រមុខរដ្ឋាភិបាលកម្ពុជា ឲ្យគណបក្សសង្គ្រោះជាតិ លុបចោលពាក្យស្លោក «ដូរ មេឃុំ បម្រើបក្ស, ដាក់ មេឃុំ បម្រើរាស្ត្រ»។
លោក ហ៊ុន សែន៖ «មិនទាន់បានអីផង បង្អាប់គេទៅហើយ! ភាសាហ្នឹងភាសាវ៉ៃគេ។ ដូរមេឃុំបម្រើបក្សដាក់មេឃុំបម្រើរាស្ត្រ អាហ្នឹងអាមេឃុំបម្រើបក្ស រាល់ថ្ងៃក្រែងមេឃុំគណបក្សប្រជាជន? អ្នកឯងចាប់ផ្ដើមវ៉ៃគេពីឥឡូវទៅហើយ មិនទាន់បានអីផង។ វាបង្កហេតុអ៊ីចឹងបានវាមិនសុខហ្នឹងណា៎! រួចទាល់តែដល់គេញោះ...! ទេ! បើត្រូវញោះ ក៏ញោះដែរវ៉ី!»
ទោះជាយ៉ាងនេះក្តី គណបក្សសង្គ្រោះជាតិ នៅតែមិនព្រមលុបចោលពាក្យស្លោកនេះ ហើយនៅតែអនុញ្ញាតឲ្យសកម្មជនបក្សរបស់ខ្លួន ប្រើពាក្យស្លោកនេះ ក្នុងពេលឃោសនាបោះឆ្នោតដោយគណបក្សសង្គ្រោះជាតិ យល់ឃើញថា វាគ្រាន់តែជាពាក្យស្លោកប៉ុណ្ណោះ និងពាក្យស្លោកនេះក៏ធ្លាប់ត្រូវបានប្រើក្នុងការបោះឆ្នោតឃុំ-សង្កាត់កាលពីឆ្នាំ២០១២ ដោយគ្មានការហាមឃាត់អ្វីនោះដែរ។
នៅក្នុងលិខិតដដែលរបស់ក្រសួងមហាផ្ទៃ ក្រសួងនេះក៏បានស្នើឲ្យគណបក្សសង្គ្រោះជាតិ ដកចេញនូវពាក្យស្លោក "ដូរមេឃុំបម្រើបក្សដាក់មេឃុំបម្រើរាស្ត្រ" នេះផងដែរ។
ទោះជាយ៉ាងនេះក្តី មន្ត្រីជាន់ខ្ពស់ផ្នែកតស៊ូមតិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា លោក កន សាវាង្ស មានប្រសាសន៍ថា ការធ្វើសមាជជ្រើសរើសមេដឹកនាំរបស់គណបក្សសង្គ្រោះជាតិ គឺជារឿងផ្ទៃក្នុងរបស់គណបក្សនយោបាយ មានន័យថា គណបក្សសង្គ្រោះជាតិ អាចកែសម្រួលលក្ខន្តិកៈរបស់ខ្លួនទៅតាមស្ថានភាពជាក់ស្ដែងដែលបក្សមួយនេះជួបប្រទះ។
លោក កន សាវាង្ស៖ «លើកលែងតែក្នុងគណបក្សមានការប្ដឹងផ្ដល់ បើសិនជាគណបក្សហ្នឹងមានការប្ដឹងផ្ដល់គ្នា ឬការមិនសុខចិត្តអី ប្ដឹងទៅក្រសួងមហាផ្ទៃ ទើបក្រសួងមហាផ្ទៃថា អាចទទួលយកបាន ឬមិនបាន ប៉ុន្តែរឿងនេះជារឿងផ្ទៃក្នុងគណបក្ស វាមិនអាចក្រសួងមហាផ្ទៃ ឆ្លើយថាទទួលយកបាន ឬមិនបានទេ ព្រោះយើងមើលក្នុងរដ្ឋធម្មនុញ្ញ ឬក្នុងច្បាប់អត់មានចំណុចណាមួយដែលបង្ហាញថា ក្រសួងមហាផ្ទៃ ត្រូវតែទទួលយក ឬមិនទទួលយកលក្ខន្តិកៈផ្ទៃក្នុងរបស់គេកែនោះទេ វាអត់បង្ហាញឲ្យច្បាស់លាស់។»
ចំពោះពាក្យស្លោករបស់បក្សប្រឆាំង "ដូរមេឃុំបម្រើបក្សដាក់មេឃុំបម្រើរាស្ត្រ" វិញ លោក កន សាវាង្ស យល់ឃើញថា វាមិនមានអ្វីជាបញ្ហានោះទេ ព្រោះលោកមិនទាន់មើលឃើញថា ការប្រើពាក្យស្លោកនេះបានបង្កបញ្ហាអសន្តិសុខធ្ងន់ធ្ងរដល់សង្គមជាតិនោះឡើយ។
ទាក់ទងនឹងការយល់ខ្វែងគ្នាអំពីភាពស្របច្បាប់នៃសមាជគណបក្សសង្គ្រោះជាតិនេះ អ្នកនាំពាក្យ និងជាប្រធានគណៈកម្មាធិការគណបក្សសង្គ្រោះជាតិ លោក យឹម សុវណ្ណ បានផ្ញើលិខិតស្នើសុំជួបជាមួយលោក ស ខេង ឬតំណាងរបស់ក្រសួងមហាផ្ទៃ ដើម្បីពិភាក្សារកដំណោះស្រាយសមស្រប។ ជាការឆ្លើយតប រដ្ឋមន្ត្រីក្រសួងមហាផ្ទៃ លោក ស ខេង នៅថ្ងៃទី២៤ ខែមីនា ចាត់តាំងអគ្គនាយកនៃអគ្គនាយកដ្ឋានរដ្ឋបាលក្រសួងមហាផ្ទៃ លោក ប្រាក់ សំអឿន ដើម្បីទទួលជួបជាមួយតំណាងរបស់គណបក្សសង្គ្រោះជាតិ ដែលធ្វើឡើងនៅថ្ងៃទី២៩ ខែមីនា ខាងមុខ នាទីស្ដីការក្រសួងមហាផ្ទៃ៕
No comments:
Post a Comment