 |
| ពីឆ្វេង៖ លោក សំ គន្ធាមី នាយកប្រតិបត្តិអង្គការនិចហ្វិក (NICFEC) លោក គឹម ឈន អ្នកសម្របសម្រួលនៃអង្គការខុមហ្រ្វែល (COMFREL) និងលោក កង សាវាង្ស អ្នកអង្កេតនៃអង្គការខុមហ្រ្វែល នៅក្នុងសន្និសីទកាសែតស្ដីពីសវនកម្មបញ្ជីឈ្មោះបោះឆ្នោតឆ្នាំ២០១៣ នៅថ្ងៃទី៥ ខែមេសា ឆ្នាំ២០១៧។ RFA/Cheu Sideth |
សង្គមស៊ីវិល៖ បញ្ជីឈ្មោះ បោះឆ្នោត ថ្មី ល្អប្រសើរ ជាងបញ្ជី បោះឆ្នោត កាលពីឆ្នាំ ២០១៣
RFA / វិទ្យុ អាស៊ី សេរី | ៥ មេសា ២០១៧
ក្រុមអង្គការ មិនមែន រដ្ឋាភិបាល ដែលធ្វើការ លើប្រព័ន្ធ បោះឆ្នោត រកឃើញ ថា, បញ្ជីឈ្មោះ បោះឆ្នោតថ្មី ដែលបម្រើ ឲ្យការ បោះឆ្នោត ជ្រើសរើស ក្រុមប្រឹក្សា ឃុំ-សង្កាត់ ឆ្នាំ២០១៧នេះ គឺ មានភាពល្អប្រសើរ បើ ធៀបនឹង បញ្ជីឈ្មោះចាស់ កាលពីឆ្នាំ ២០១៣។ គណបក្ស នយោបាយ នៅកម្ពុជា នឹងចាប់ផ្ដើម បើកយុទ្ធនាការ ស្វែងរក សំឡេងឆ្នោត សម្រាប់ ការជ្រើសរើស សមាជិក ក្រុមប្រឹក្សាឃុំ-សង្កាត់ អាណត្តិ ទី៤នេះ រយៈពេល ១៤ថ្ងៃ គិតចាប់ពីថ្ងៃ ទី២០ ខែឧសភា ដល់ថ្ងៃ ទី២ ខែមិថុនា ខាងមុខ។
អ្នកជំនាញលើកិច្ចការបោះឆ្នោតពីស្ថាប័នអង្គការមិនមែនរដ្ឋាភិបាលអះអាងថា ថ្វីបើបញ្ជីឈ្មោះបោះឆ្នោតថ្មីសម្រាប់អាណត្តិនេះ មានភាពល្អឥតខ្ចោះយ៉ាងណាក្ដី បញ្ហានេះក៏មិនទាន់ប្រាកដថា អាចនឹងបញ្ចប់ការខ្វែងគំនិតគ្នាតាមផ្លូវនយោបាយ ឬអាចឈានទៅបញ្ចប់ការតវ៉ាអំពីលទ្ធផលឆ្នោតពីគណបក្សនយោបាយបាននៅឡើយដែរ។
លោក សំ គន្ធាមី នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និចហ្វិក (NICFEC) ឲ្យដឹងថា ការបញ្ចប់ភាពស្មុគស្មាញរឿងបញ្ជីឈ្មោះមួយមុខនេះ មិនទាន់អាចសន្និដ្ឋានបានថា ដំណើរការបោះឆ្នោតឈប់ខ្វែងគំនិតគ្នាឡើយ។ ថ្លែងនៅក្នុងសន្និសីទកាសែត កាលពីព្រឹកថ្ងៃទី៥ ខែមេសា នៅការិយាល័យអង្គការខុមហ្វ្រែល (COMFREL) លោក សំ គន្ធាមី បញ្ជាក់ថា មានកត្តារួមផ្សំជាច្រើនផ្សេងទៀត ដែលជាមូលហេតុនាំឲ្យបញ្ហារឿងបោះឆ្នោតនេះ មិនទាន់អាចបញ្ចប់ការតវ៉ារឿងលទ្ធផលឆ្នោតនេះ៖ «ការវាយតម្លៃលើការបោះឆ្នោតមិនមែនស្ថិតតែនៅលើបញ្ជីមួយទេ។ យើងមើលពេលដោះស្រាយបណ្ដឹងពេលចុះឈ្មោះបេក្ខជន ពេលឃោសនាបោះឆ្នោតតិចទៀតនេះ ពេលថ្ងៃបោះឆ្នោត និងថ្ងៃរាប់សន្លឹកឆ្នោត ទាំងអស់នេះបូកសរុបទៅបានយើងធ្វើការវាយតម្លៃកើត។»
របាយការណ៍ស្ដីពីសវនកម្មបញ្ជីឈ្មោះបោះឆ្នោតឆ្នាំ២០១៦ ដែលចេញដោយអង្គការខុមហ្វ្រែល រកឃើញថា អត្រាអ្នកចុះឈ្មោះបោះឆ្នោតបម្រើឲ្យការបោះឆ្នោតជ្រើសរើសសមាជិកក្រុមប្រឹក្សាមានកំណើន ៨៩,៣%។ ទន្ទឹមនឹងនេះ បញ្ជីឈ្មោះបោះឆ្នោតថ្មីនៅក្នុងអាណត្តិនេះ ក៏មានគុណភាពល្អរហូតដល់ ៩៨% ដែរ។ តួលេខនេះ ត្រូវបានអង្គការខុមហ្រ្វែល ចាត់ទុកថា បើធៀបនឹងបញ្ជីបោះឆ្នោតចាស់កាលពីឆ្នាំ២០១៣ គឺល្អជាង និងមានគុណភាពជាង។
ប្រទេសកម្ពុជា នឹងចាប់ផ្ដើមបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់ នៅថ្ងៃទី៤ ខែមិថុនា ឆ្នាំ២០១៧។ ច្បាប់ស្ដីពីការបោះឆ្នោតឃុំ-សង្កាត់ មាត្រា ៦៨ ចែងថា ការឃោសនាបោះឆ្នោតគឺជាសកម្មភាពមួយចំនួនដែលធ្វើឡើងជាសាធារណៈ។ ច្បាប់នេះ បានកំណត់ការឃោសនាយ៉ាងច្រើនបាន ២ដង ក្នុងអំឡុងពេលឃោសនាស្វែងរកសំឡេងឆ្នោតរយៈពេល ១៤ថ្ងៃ។
ទាក់ទិនរឿងនេះ លោក កង សាវាង្ស មន្ត្រីជាន់ខ្ពស់ផ្នែកអង្កេតរបស់អង្គការខុមហ្វ្រែល ឲ្យដឹងថា ការធ្វើសវនកម្មបញ្ជីឈ្មោះបោះឆ្នោតថ្មីនេះ ធ្វើឡើងនៅទូទាំងប្រទេស។ ក៏ប៉ុន្តែសវនកម្មនេះពុំបានគ្រប់ដណ្ដប់ចំពោះអ្នកចំណាកស្រុកជាង ១លាននាក់ទេ។ យ៉ាងណាអ្នកជំនាញកិច្ចការបោះឆ្នោតរូបនេះ មានសុទិដ្ឋិនិយមថា បញ្ជីឈ្មោះបោះឆ្នោតថ្មីពេលនេះ គឺលែងមានឈ្មោះស្ទួន បញ្ហាបាត់ឈ្មោះ ឬមានឈ្មោះខ្មោចទៀតហើយ៖ «សម្រាប់ខុមហ្វ្រែល លទ្ធភាពក្នុងការសិក្សាគឺសិក្សាបានតែប្រជាពលរដ្ឋនៅក្នុងស្រុកទេ។ អ៊ីចឹងបើយើងដក់ប្រជាពលរដ្ឋលោកចំណាកស្រុកទៅវានឹងប្រហាក់ប្រហែលគ្នាហើយ។ វាអាចលម្អៀងគ្នានៅក្នុងកម្រិតថា កម្រិតលម្អៀង ២ភាគរយ។»
បើទោះជារបាយការណ៍នេះ បង្ហាញពីភាពសុក្រឹតបែបនេះក៏ដោយចុះ ទន្ទឹមនឹងនេះ បញ្ហាខ្លះនៅមានភាពឆកល្វែងមួយចំនួនដែរ។ ពលរដ្ឋដែលពុំបានដឹងពីព័ត៌មានស្ដីពីការបោះឆ្នោត នៅតែមានអត្រាខ្ពស់នៅឡើយ រហូតដល់ជាង ៥៥ភាគរយ។ ក្រៅពីនេះ ៦៧ភាគរយផ្សេងទៀត ម្ចាស់ឆ្នោតមិនខ្វល់ខ្វាយព្យាយាមទៅចុះឈ្មោះបោះឆ្នោតជាដើម។
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) ស្វាគមន៍របាយការណ៍របស់អង្គការមិនមែនរដ្ឋាភិបាលនៅពេលនេះ។ លោកបន្តថា ផ្អែកលើកិច្ចការបោះឆ្នោតនេះ គ.ជ.ប មានជំនឿតាំងពីមុនមកហើយថា បើទោះជាដំណើរការនៃលទ្ធផលវាមិនអាចល្អឥតខ្ចោះ ក៏ការសម្រេចបាននៅពេលនេះ គឺជាការទទួលយកបានពីគ្រប់ភាគីដែលពាក់ព័ន្ធខ្លះដែរ៖ «គ.ជ.ប. មានជំនឿចិត្តខ្លួនឯងតាំងពីមុនមកថា អ្វីដែលជាកំណែទម្រង់សមិទ្ធផលទី១ គឺបញ្ជីឈ្មោះដ៏សុក្រឹតល្អប្រសើរ បើទោះបីជាគ្មានការចុះឈ្មោះណាដែលល្អឥតខ្ចោះក៏ដោយ ប៉ុន្តែការឆ្លុះបញ្ចាំងនៃរបាយការណ៍នេះបញ្ជាក់ថា អាចទទួលយកបាន។»
ស្របពេលសវនកម្មបញ្ជីឈ្មោះបោះឆ្នោតថ្មី ត្រូវបានអង្គការសង្គមស៊ីវិលរកឃើញថា មានការវិវត្តន៍ទៅរកភាពវិជ្ជមានជាងអាណត្តិមុនៗក្ដី សម្រាប់អាណត្តិទី៤ នេះវិញ គណបក្សប្រឆាំងបានរកឃើញសំណុំរឿងជាង ៣០០បណ្ដឹង ដែលមានជនបរទេសមានសិទ្ធិចុះឈ្មោះបោះឆ្នោតដូចពលរដ្ឋកម្ពុជា ដែរ។ ប៉ុន្តែបណ្ដឹងទាំងនេះ ត្រូវបាន គ.ជ.ប និងក្រុមប្រឹក្សាធម្មនុញ្ញច្រានចោល៕
No comments:
Post a Comment