The Anti-Sam Rainsy Law

Sunday, April 30, 2017

Freedom House ចាត់​ចំណាត់​ថ្នាក់ ​កម្ពុជា ​ជា​ប្រទេស​ គ្មាន​ សេរីភាព​ សារព័ត៌មាន | Freedom House designates Cambodia as not free

របាយការណ៍​ដែល​មាន​ចំណង​ជើង​ថា “សេរីភាព​សារព័ត៌មាន​ឆ្នាំ​២០១៧ (FREEDOM OF THE PRESS 2017)” របស់​អង្គការ ហ្វ្រ៊ីដឹម ហៅស៍ (Freedom House) ចេញ​ផ្សាយ​នៅ​ថ្ងៃ​ទី​២៨ ខែ​មេសា ឆ្នាំ​២០១៧។ Screenshot
របាយការណ៍​ដែល​មាន​ចំណង​ជើង​ថា “សេរីភាព​សារព័ត៌មាន​ឆ្នាំ​២០១៧ (FREEDOM OF THE PRESS 2017)” របស់​អង្គការ ហ្វ្រ៊ីដឹម ហៅស៍ (Freedom House) ចេញ​ផ្សាយ​នៅ​ថ្ងៃ​ទី​២៨ ខែ​មេសា ឆ្នាំ​២០១៧។ Screenshot

Freedom House ចាត់​ចំណាត់​ថ្នាក់ ​កម្ពុជា ​ជា​ប្រទេស​ គ្មាន​ សេរីភាព​ សារព័ត៌មាន

RFA / វិទ្យុ អាស៊ី សេរី | ២៩ មេសា ២០១៧




អង្គការ ​ឃ្លាំ​មើល​ សេរីភាព​ ពិភពលោក ហ្វ្រ៊ីដឹម ហៅស៍ (Freedom House) ដែល​មាន ​មូលដ្ឋាន​ ក្នុង​សហរដ្ឋ​ អាមេរិក បាន​ឲ្យ​ ចំណាត់​ថ្នាក់​ កម្ពុជា ថា​ ជា​ប្រទេស ​គ្មាន​ សេរីភាព ​ក្នុង​ចំណោម ​ប្រទេស​ ចំនួន ៤០​ប្រទេស​ នៅ​ក្នុង​តំបន់​ អាស៊ី-ប៉ាស៊ីហ្វិក នេះ។

អង្គការ ហ្វ្រ៊ីដឹម ហៅស៍ ដាក់​ចំណាត់​ថ្នាក់​ ស្ថានភាព ​សេរីភាព​ សារព័ត៌មាន​ ជា​រួម ​នៅ​ប្រទេស​ កម្ពុជា ថា «ពុំ​មាន​ សេរីភាព»។  របាយការណ៍​ សេរីភាព​ សារព័ត៌មាន ​ឆ្នាំ​២០១៧ ចេញ​ផ្សាយ​ នៅ​ថ្ងៃ​សុក្រ ទី​២៨ មេសា បង្ហាញ​ ថា, ពិន្ទុ​ សរុប​ នៃ​សេរីភាព​ សារព័ត៌មាន ​កម្ពុជា  សម្រាប់ ​ឆ្នាំ​២០១៧ នេះ បាន​ធ្លាក់​ចុះ ​មួយ​លេខ​ទៀត ​ទៅ​ក្នុង​កម្រិត​ រឹត​តែ​ អាក្រក់​ ជាង​ឆ្នាំ​មុន គឺ ​ឆ្នាំ​២០១៦។


ពិន្ទុ​សរុប​សេរីភាព​សារព័ត៌មាន​ក្នុង​ប្រទេស​កម្ពុជា សម្រាប់​ឆ្នាំ​២០១៧ នេះ គឺ ៧០ លើ ១០០ ដែល ០ មាន​ន័យ​ថា មាន​ភាព​សេរី​បំផុត ហើយ ១០០ មាន​ន័យ​ថា ពុំ​មាន​សេរីភាព។ ពិន្ទុ​របស់​កម្ពុជា នេះ បាន​ធ្លាក់​ចុះ​មួយ​លេខ បើ​ប្រៀបធៀប​នឹង​ពិន្ទុ​នៃ​សេរីភាព​សារព័ត៌មាន​របស់​ខ្លួន​កាល​ពី​ឆ្នាំ​២០១៦ កន្លង​ទៅ ដែល​កម្ពុជា ទទួល​បាន​ពិន្ទុ​សរុប ៦៩ លើ ១០០។ ដូច​គ្នា​នេះ​ដែរ ពិន្ទុ​បរិយាកាស​ផ្លូវ​ច្បាប់​ពាក់ព័ន្ធ​នឹង​វិស័យ​សារព័ត៌មាន​នៅ​កម្ពុជា ក៏​បាន​ធ្លាក់​ចុះ​មួយ​លេខ​រឹត​តែ​អាក្រក់​ជាង​ឆ្នាំ​២០១៦ កន្លង​ទៅ​ផង​ដែរ គឺ​ពី​លេខ ២៣ លើ ៣០ ក្នុង​ឆ្នាំ​២០១៦ មក​នៅ​លេខ ២៤ លើ ៣០ ក្នុង​ឆ្នាំ​២០១៧ នេះ ដែល ០ មាន​ន័យ​ថា ប្រសើរ​បំផុត ហើយ ៣០ មាន​ន័យ​ថា​អាក្រក់​បំផុត។ ដោយឡែក​ពិន្ទុ​បរិយាកាស​នយោបាយ និង​សេដ្ឋកិច្ច​របស់​ប្រទេស​កម្ពុជា គឺ​នៅ​ដដែល។

របក​គំហើញ​សំខាន់ៗ​ជា​សកល​ដែល​របាយការណ៍​នេះ​រក​ឃើញ បញ្ជាក់​ថា សេរីភាព​សារព័ត៌មាន​ជា​សកល​ក្នុង​ឆ្នាំ​២០១៦ បាន​ធ្លាក់​ចុះ​ដល់​ចំណុច​ទាប​បំផុត​ក្នុង​រយៈពេល ១៣​ឆ្នាំ​ចុង​ក្រោយ ស្រប​ពេល​ដែល​មាន​ការ​គំរាម​កំហែង​មិន​ឈប់ឈរ​ទៅ​លើ​អ្នក​សារព័ត៌មាន និង​ប្រព័ន្ធ​ផ្សព្វផ្សាយ​ដែល​មិន​ធ្លាប់​មាន​ពី​មុន​មក។ របាយការណ៍​ឲ្យ​ដឹង​ថា ករណី​ទាំងនេះ​កើត​មាន​ឡើង​ទាំង​នៅ​ក្នុង​ប្រទេស​ប្រជាធិបតេយ្យ​ធំៗ និង​ទាំង​នៅ​ក្នុង​ប្រទេស​ផ្ដាច់ការ​និយម​នានា ក្នុង​គោលដៅ​ដើម្បី​គ្រប់គ្រង​ប្រព័ន្ធ​ផ្សព្វផ្សាយ​ទាំងមូល រាប់​ទាំង​ស្ថាប័ន​ប្រព័ន្ធ​ផ្សព្វផ្សាយ​ដែល​មិន​ស្ថិត​ក្នុង​យុត្តាធិការ​នៃ​ប្រទេស​ដែល​រដ្ឋ​គ្រប់គ្រង​ផង​ដែរ។

របាយការណ៍​រក​ឃើញ​បន្ថែម​ថា ៤៥​ភាគរយ​នៃ​ប្រជាជន​ពិភពលោក​ទាំងមូល កំពុង​រស់នៅ​ក្នុង​ប្រទេស​ដែល​ស្ថានភាព​បរិយាកាស​នៃ​ប្រព័ន្ធ​ផ្សព្វផ្សាយ​ពុំ​មាន​សេរីភាព ក្នុង​នោះ​ប្រទេស និង​ទឹកដី​ចំនួន ១០ ដែល​ត្រូវ​បាន​ចាត់​ទុក​ថា​មាន​ស្ថានភាព​សេរីភាព​សារព័ត៌មាន​អាក្រក់​បំផុត​ជាង​គេ​នៅ​លើ​ពិភពលោក​នោះ គឺ​ប្រទេស​អាហ្សែរបៃហ្សាន (Azerbaijan) តំបន់​គ្រីមៀរ (Crimea) ប្រទេស​គុយបា (Cuba) ប្រទេស​ហ្គីណេ (Equatorial Guinea) អេរីត្រេ (Eritrea) អ៊ីរ៉ង់ (Iran) កូរ៉េ​ខាង​ជើង (North Korea) ស៊ីរី (Syria) ទួរមេនីស្ថាន (Turkmenistan) និង​ប្រទេស​អ៊ូប៊ែរគីស្ថាន (Uzbekistan)។

របាយការណ៍​បន្ត​ថា អ្នក​នយោបាយ​ក្នុង​ប្រទេស​ប្រជាធិបតេយ្យ​មួយ​ចំនួន ដូចជា​នៅ​ប្រទេស​ប៉ូឡូញ (Poland) និង​ហុងគ្រី (Hungary) ជាដើម ព្យាយាម​បង្កើត​ព្រឹត្តិការណ៍​ព័ត៌មាន​ក្នុង​គោលដៅ​ធ្វើ​ឲ្យ​ទន់​ខ្សោយ​ប្រព័ន្ធ​ផ្សព្វផ្សាយ​ប្រពៃណី​របស់​រដ្ឋ ហើយ​ប្រើប្រាស់​ឥទ្ធិពល​របស់​ខ្លួន​មក​លើ​អ្នក​ផ្សាយ​ព័ត៌មាន​សាធារណៈ។ ពួក​គេ​បាន​ព្យាយាម​បង្កើន​ឲ្យ​មាន​ការ​យក​ចិត្ត​ទុក​ដាក់​លើ​ប្រព័ន្ធ​ព័ត៌មាន​ឯកជន​ដែល​ស្និទ្ធ​នឹង​ខ្លួន។

ដោយឡែក​នៅ​សហរដ្ឋ​អាមេរិក របាយការណ៍​គូស​បញ្ជាក់​ថា ប្រធានាធិបតី​សហរដ្ឋ​អាមេរិក លោក ដូណាល់ ត្រាំ (Donald Trump) បាន​បន្តុះបង្អាប់​វិស័យ​សារព័ត៌មាន ដោយ​បដិសេធ​តួនាទី​របស់​ប្រព័ន្ធ​ផ្សព្វផ្សាយ​ក្នុង​ការ​ទាមទារ​ឲ្យ​រដ្ឋាភិបាល​ទទួល​ខុស​ត្រូវ​ចំពោះ​ពាក្យ​សម្ដី និង​សកម្មភាព​នានា​របស់​ខ្លួន។

ក្រៅ​ពី​របក​គំហើញ​សំខាន់ៗ​ខាង​លើ​នេះ របាយការណ៍​ក៏​បាន​រំលេច​ដែរ​ថា មន្ត្រី​នានា​ក្នុង​ប្រទេស​ដែល​មាន​លក្ខណៈ​គ្រប់គ្រង​តាម​បែប​ផ្ដាច់ការ​និយម ដូចជា​ប្រទេស​ទួរគី (Turkey) អេត្យូពី (Ethiopia) និង​វេណេហ៊្សួអេឡា (Venezuela) ជាដើម បាន​យក​ភាព​វឹកវរ​ផ្នែក​នយោបាយ និង​សង្គម​មក​ធ្វើ​ជា​លេស​ក្នុង​ការ​បង្ក្រាប​លើ​ប្រព័ន្ធ​ផ្សព្វផ្សាយ​ដែល​ឯករាជ្យ ឬ​មាន​និន្នាការ​ប្រឆាំង​នឹង​រដ្ឋាភិបាល។

ដូច​គ្នា​នេះ​ដែរ អាជ្ញាធរ​ក្នុង​ប្រទេស​ជាច្រើន​ក្នុង​តំបន់​សាហារ៉ា-អាហ្វ្រិក (Sub-Sahara Africa) មជ្ឈិមបូព៌ា (Middle East) និង​អាស៊ី បាន​ពង្រីក​វិសាលភាព​ច្បាប់ ដើម្បី​រឹតត្បិត​ការ​បញ្ចេញ​មតិ​លើ​ប្រព័ន្ធ​អ៊ីនធឺណិត (Internet) ឬ​បិទ​ចោល​ទាំងស្រុង​តែ​ម្តង​សេវា​ទូរគមនាគមន៍ ក្នុង​ពេល​ដែល​មាន​ព្រឹត្តិការណ៍​សំខាន់ៗ ដូចជា​នៅ​មុន​ពេល​បោះឆ្នោត ឬ​ក្នុង​អំឡុង​ពេល​ដែល​មាន​ការ​តវ៉ា​នានា។

ក្នុង​ចំណោម​ប្រទេស​នានា​ដែល​ទទួល​រង​នូវ​ការ​ធ្លាក់​ចុះ​ខ្លាំង​បំផុត​នៃ​សេរីភាព​សារព័ត៌មាន​សម្រាប់​ឆ្នាំ​២០១៧ នេះ រួម​មាន ប្រទេស​ប៉ូឡូញ (Poland) ទួរគី (Turkey) ប៊ូរុនឌី (Burundi) ហុងគ្រី (Hungary) បូលីវី (Bolivia) ស៊ែប (Serbia) និង​សាធារណរដ្ឋ​ប្រជាធិបតី​កុងហ្គោ (Democratic Republic of Congo)៕


No comments:

Post a Comment