ពីឆ្វេង៖ ប្រធានគណបក្សសង្គ្រោះជាតិ លោក កឹម សុខា អនុប្រធានបក្ស លោក ប៉ុល ហំម អ្នកស្រី មូរ សុខហួរ និងលោក អេង ឆៃអ៊ាង ក្នុងសមាជវិសាមញ្ញគណបក្សជ្រើសរើសថ្នាក់ដឹកនាំថ្មី នៅថ្ងៃទី២ ខែមីនា ឆ្នាំ២០១៧។ RFA/Sorn Chanratha |
បក្សប្រឆាំង ទទួលស្គាល់ ភាពចន្លោះ ប្រហោង លក្ខន្តិកៈ គណបក្ស តម្កល់ នៅក្រសួង មហាផ្ទៃ
RFA / វិទ្យុ អាស៊ី សេរី | ១៨ មេសា ២០១៧
ប្រធាន ស្ដីទី គណបក្ស សង្គ្រោះជាតិ ទទួលស្គាល់ ពីភាព ចន្លោះប្រហោង នៃលក្ខន្តិកៈ របស់ គណបក្ស ប្រឆាំង ដែលតម្កល់ នៅក្រសួង មហាផ្ទៃ។ គណបក្សនេះ នឹងធ្វើ សមាជវិសាមញ្ញ នៅសប្ដាហ៍ក្រោយ ដើម្បី កែសម្រួល និងបន្ថែម ភាពចន្លោះប្រហោង នេះ។
គណបក្ស សង្គ្រោះជាតិ គ្រោងធ្វើ សមាជ ជាថ្មីទៀត នៅថ្ងៃ ទី២៥ ខែមេសា ដើម្បី ជ្រើសរើស អនុប្រធាន គណបក្ស និងបន្ថែម មាត្រាខ្លះ ដើម្បី បំពេញ ភាព ចន្លោះប្រហោង នៃលក្ខន្តិកៈ របស់ គណបក្ស តាមការ ចង់បាន របស់ ក្រសួង មហាផ្ទៃ។
ប្រធាន ស្ដីទី គណបក្ស សង្គ្រោះជាតិ លោក ប៉ុល ហំម ប្រាប់អាស៊ី សេរី នៅថ្ងៃ ទី១៨ មេសា ថា, ការធ្វើ សមាជ វិសាមញ្ញ រុះរើ អនុប្រធាន គណបក្ស ដោយសារ គណបក្ស ប្រឆាំង មិន ចង់មាន ភាពរកាំរកូស ជាមួយ ក្រសួង មហាផ្ទៃ។ លោក ប៉ុល ហំម អះអាង ថា, សមាជ វិសាមញ្ញនេះ មិន ពាក់ព័ន្ធ នឹងបញ្ហា ផ្ទៃក្នុង របស់ គណបក្ស ប្រឆាំងឡើយ៖ «យើង ធ្វើនេះ ដើម្បី សម្របសម្រួល នីតិវិធី ទៅតាម មហាផ្ទៃ ទេណា ដែលគេ ថា យើង ធ្វើ មិន ត្រឹមត្រូវ តាមច្បាប់ ព្រោះ យើង មិន ចង់មាន ការប្រឈម អី ជាមួយ ក្រសួង មហាផ្ទៃ ទេ។ ដូច្នេះ យើង សម្រួល នីតិវិធីណា ដែលគេ អាចទទួល យកបាន, ហើយ ដែលគេ ទទួលស្គាល់ ថា ស្របច្បាប់។»
កាលពីថ្ងៃទី១៣ មីនា ក្នុងពិធីសម្ពោធផ្លូវជាតិលេខ៥១ ជំនួសលោក ហ៊ុន សែន នៅខេត្តកំពង់ស្ពឺ រដ្ឋមន្ត្រីក្រសួងមហាផ្ទៃ លោក ស ខេង ប្រាប់គណបក្សប្រឆាំងថា សមាជកាលពីថ្ងៃទី២ មីនា ធ្វើឡើងខុសលក្ខន្តិកៈដែលតម្កល់នៅក្រសួងមហាផ្ទៃ កាលពីឆ្នាំ២០១២។
ក្រោយមក ក្រសួងមហាផ្ទៃ ទទួលស្គាល់តែលោក កឹម សុខា ជាប្រធានគណបក្សសង្គ្រោះជាតិ ប៉ុន្តែអនុប្រធានទាំងបីរួមមាន លោក ប៉ុល ហំម លោក អេង ឆៃអ៊ាង និងអ្នកស្រី មូរ សុខហួរ មិនត្រូវបានរដ្ឋមន្ត្រីក្រសួងមហាផ្ទៃ ទទួលស្គាល់ឡើយ។ លោក ស ខេង ពន្យល់ការមិនទទួលស្គាល់ថា ការជ្រើសតាំងនេះមិនស្របតាមប្រការ៤៧ថ្មី នៃលក្ខន្តិកៈរបស់គណបក្ស ដែលហួសរយៈពេល ៣០ថ្ងៃ ក្រោយលោក សម រង្ស៊ី អតីតប្រធានគណបក្សប្រឆាំងបានលាលែងពីតំណែងពីប្រធានបក្ស។
ទាក់ទងនឹងបញ្ហានេះ លោក ប៉ុល ហំម ថាសមាជម្ដងនេះ គណបក្សប្រឆាំងនឹងកែសម្រួលមាត្រាខ្លះក្នុងលក្ខន្តិកៈ និងសរសេរឲ្យច្បាស់ មិនឲ្យមានការបកស្រាយទូលាយទៀតទេ៖ «ព្រោះម្ដងនេះ គឺយើងចែងឲ្យច្បាស់អ៊ីចឹងតែម៉ង មិនឲ្យមានការបកស្រាយលើសទៅទៀតទេណា។»
រឿងរ៉ាវស្មុគស្មាញតាមយាយីបក្សប្រឆាំងមកដល់ពេលនេះ បន្ទាប់ពីលោក សម រង្ស៊ី ដែលជាប់ពាក្យបណ្ដឹងជាច្រើននៅតុលាការ បានសម្រេចលះបង់តំណែងខ្ពស់បំផុតក្នុងបក្ស ដើម្បីការពារគណបក្សសង្គ្រោះជាតិ កុំឲ្យគេរំលាយចោល ក្រោយពីលោកនាយករដ្ឋមន្ត្រី ហ៊ុន សែន ប្រកាសធ្វើវិសោធនកម្មច្បាប់ស្ដីពីគណបក្សនយោបាយទាំងប្រញាប់ប្រញាល់ ដែលការកែប្រែច្បាប់នេះ បានផ្ដល់សិទ្ធិដ៏ធំធេងឲ្យក្រសួងមហាផ្ទៃ យកទៅរំលាយគណបក្សនយោបាយណាមួយចោលបាន ប្រសិនបើប្រធាន ឬអនុប្រធានបក្សនោះត្រូវបានតុលាការរកឃើញថា ប្រព្រឹត្តបទល្មើសណាមួយធ្វើឲ្យប៉ះពាល់ដល់សន្តិសុខជាតិ និងសណ្ដាប់ធ្នាប់ក្នុងសង្គម។
ទោះជាយ៉ាងនេះក្ដី មន្ត្រីក្រសួងមហាផ្ទៃ បញ្ជាក់ថា ការមិនទទួលស្គាល់សមាសភាពថ្នាក់ដឹកនាំអនុប្រធានបក្សប្រឆាំងទាំង ៣រូប មិនធ្វើឲ្យប៉ះពាល់ដល់សុពលភាពគណបក្សប្រឆាំងនោះទេ ក្នុងការចូលរួមប្រកួតប្រជែងការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅពេលខាងមុខ។
លោក ប៉ុល ហំម ថាសមាជថ្ងៃទី២៥ មេសា អាចនឹងជ្រើសរើសអនុប្រធានតែម្នាក់តាមការចង់បានរបស់ក្រសួងមហាផ្ទៃ។ តែក្រោយសមាជ គណៈកម្មាធិការនាយកអាចជ្រើសរើសបន្ថែមទៀតបាន៕
CNRP is incompetent, keeping making errors, mistakes left and right.
ReplyDelete7:47 AM
ReplyDeleteNot like the detrimental mistakes Dictator & Traitor Hun Sen has
sold his country to Yuon !!!