Paris Peace Accords 23 Oct. 1991

Tuesday, May 23, 2017

អាជ្ញាធរ​ មូលដ្ឋាន​ នៅ​ក្រចេះ​ រង​ការ​ ចោទ​ថា​ រារាំង​ ពលរដ្ឋ​ មិន ​ឲ្យ​ចូល​រួម​ ឃោសនា ​ជាមួយ​ បក្ស​ប្រឆាំង | Local authority in Kratie accused of preventing people from participating in opposition campaigns

យុទ្ធនាការ​ឃោសនា​បោះឆ្នោត​របស់​គណបក្ស​សង្គ្រោះជាតិ នៅ​ខែត្រ​ក្រចេះ កាល​ពី​ថ្ងៃ​ទី​២១ ខែ​ឧសភា ឆ្នាំ​២០១៧។ Photo provided
យុទ្ធនាការ​ឃោសនា​បោះឆ្នោត​របស់​គណបក្ស​សង្គ្រោះជាតិ នៅ​ខែត្រ​ក្រចេះ កាល​ពី​ថ្ងៃ​ទី​២១ ខែ​ឧសភា ឆ្នាំ​២០១៧។ Photo provided

អាជ្ញាធរ​ មូលដ្ឋាន​ នៅ​ក្រចេះ​ រង​ការ​ ចោទ​ថា​ រារាំង​ ពលរដ្ឋ​ មិន ​ឲ្យ​ចូល​រួម​ ឃោសនា ​ជាមួយ​ បក្ស​ប្រឆាំង

RFA / វិទ្យុ អាស៊ី សេរី | ២៣ ឧសភា ២០១៧



សកម្មជន​ បក្ស​ប្រឆាំង​ នៅ​ខែត្រ​ ក្រចេះ ចោទ​អាជ្ញាធរ​ មូលដ្ឋាន​ មក​ពី​គណបក្ស​ ប្រជាជន ​កម្ពុជា ថា រារាំង​ ពលរដ្ឋ​ មិន​ឲ្យ​ ចូល​រួម​ យុទ្ធនាការ ​ឃោសនា​ បោះឆ្នោត​ របស់​ គណបក្ស​ សង្គ្រោះ​ជាតិ។  ការ​ចោទ​ប្រកាន់​នេះ ធ្វើ​ឡើង ​នៅ​គ្រា ​ដែល​អាជ្ញាធរ​ ភូមិ​ កាប៉ូ សង្កាត់​ អូរឫស្សី ក្រុង​ ក្រចេះ បាន​ហាម​ ពលរដ្ឋ​ណា​ ដែល​ធ្លាប់​ ទទួល​ អំណោយ​ ពី​គណបក្ស ប្រជាជន​ កម្ពុជា រួច​ហើយ មិន​ ត្រូវ​ ចូលរួម​ យុទ្ធនាការ​ ឃោសនា​ បោះឆ្នោត ​ឲ្យ​បក្ស​ នយោបាយ​ ផ្សេង​ឡើយ។


បេក្ខជន​ក្រុមប្រឹក្សា​សង្កាត់​អូរឫស្សី ក្រុង​ក្រចេះ របស់​គណបក្ស​សង្គ្រោះ​ជាតិ ឲ្យ​ដឹង​នៅ​ថ្ងៃ​ទី​២២ ខែ​ឧសភា ថា អាជ្ញាធរ​ភូមិ​កាប៉ូ និង​បក្សពួក​មួយ​ចំនួន​បាន​ឃ្លាំមើល​ពលរដ្ឋ និង​រារាំង​អ្នក​ភូមិ​មួយ​ចំនួន​មិន​ឲ្យ​ចូលរួម​ស្ដាប់​សារ​នយោបាយ​របស់​គណបក្ស​សង្គ្រោះ​ជាតិ ទេ កាល​ពី​ថ្ងៃ​ទី​២១ ខែ​ឧសភា។

បេក្ខជន​ក្រុមប្រឹក្សា​សង្កាត់​អូរឫស្សី ក្រុង​ក្រចេះ លោក ហួង ចំណាប់ យល់​ថា ពលរដ្ឋ​គ្រប់រូប​មាន​សិទ្ធិ​ចូល​រួម​ស្ដាប់​សារ​នយោបាយ​គ្រប់​គណបក្ស​នយោបាយ​ទាំង​អស់​ក្នុង​អំឡុង​ឃោសនា​បោះឆ្នោត ក៏ប៉ុន្តែ​ពួកគេ​ត្រូវ​រង​ការ​រារាំង​ពី​អាជ្ញាធរ​មូលដ្ឋាន​ទៅ​វិញ។ លោក​កត់សម្គាល់​ថា អាជ្ញាធរ​ភូមិ​កាប៉ូ បាន​ហាម​ពលរដ្ឋ​ណា​ដែល​ធ្លាប់​ទទួល​អំណោយ​ពី​គណបក្ស​ប្រជាជន​កម្ពុជា មិន​ត្រូវ​ចូលរួម​យុទ្ធនាការ​ឃោសនា​បោះឆ្នោត​ឲ្យ​គណបក្ស​សង្គ្រោះ​ជាតិ បាន​ទេ។ លោក​ចាត់​ទុក​ករណី​នេះ ថា​ជា​ទម្រង់​នៃ​ការ​គំរាមកំហែង​សិទ្ធិ​ពលរដ្ឋ ផ្ទុយ​ពី​ក្របខ័ណ្ឌ​ច្បាប់។

លោក​ថា ក្រុម​ការងារ​គណបក្ស​សង្គ្រោះ​ជាតិ បាន​រាយការណ៍​បញ្ហា​នេះ​ទៅ​គណៈកម្មការ​រៀបចំ​ការ​បោះឆ្នោត​សង្កាត់​រួច​ហើយ និង​ពុំ​ទាន់​រៀបចំ​ពាក្យ​បណ្ដឹង​នៅ​ឡើយ​ទេ៖ «គ្រាន់​តែ​គេ​អត់​ឲ្យ​អ្នក​ដែល​ទទួល​អំណោយ​ចូលរួម​ខាង​គណបក្ស​ប្រឆាំង។ អា​ហ្នឹង​ជា​ការ​គំរាមកំហែង​ហើយ ព្រោះ​ប្រជាពលរដ្ឋ​អាច​ទៅ​ស្ដាប់​សារ​នយោបាយ​របស់​គណបក្ស​គ្រប់​គណបក្ស​ទាំង​អស់​ដែល​គាត់​ត្រូវ​ពិចារណា ដល់​ពេល​គាត់​អត់​ឲ្យ​ទៅ​យើង​គិត​ថា គំរាមកំហែង»

កាល​ថ្ងៃ​ទី​២១ ខែ​ឧសភា តំណាងរាស្ត្រ​គណបក្ស​សង្គ្រោះ​ជាតិ លោក សុន ឆ័យ សកម្មជន​បក្ស​ប្រឆាំង និង​ពលរដ្ឋ​ប្រមាណ​ជាង ៣០០​នាក់ បាន​ប្រារព្ធ​យុទ្ធនាការ​ឃោសនា​បោះឆ្នោត​នៅ​សង្កាត់​អូរឫស្សី ក្រុង​ក្រចេះ ដើម្បី​ផ្សព្វផ្សាយ​សារ​នយោបាយ​បក្ស​របស់​ខ្លួន​ទៅ​សកម្មជន និង​ពលរដ្ឋ​នៅ​ខែត្រ​ក្រចេះ។

អាស៊ីសេរី​មិន​អាច​ទាក់ទង​មេ​ភូមិ​កាប៉ូ លោក រស់ ឆេង ដើម្បី​សុំ​ការ​ឆ្លើយ​បំភ្លឺ​ករណី​នេះ​បាន​ទេ នៅ​ថ្ងៃ​ទី​២២ ខែ​ឧសភា ព្រោះ​ទូរស័ព្ទ​មិន​អាច​ទាក់ទង​បាន។

ចំណែក​អនុ​ប្រធាន​គណៈកម្មការ​រៀបចំ​ការ​បោះឆ្នោត​នៅ​ខែត្រ​ក្រចេះ លោក តន់ តារា ឲ្យ​ដឹង​ថា គ.ជ.ប ពុំ​ទាន់​ទទួល​ពាក្យ​បណ្ដឹង​ករណី​នេះ​នៅ​ឡើយ​ទេ។ លោក​យល់​ថា ប្រសិនបើ​អាជ្ញាធរ​ណា​រារាំង​ពលរដ្ឋ​មិន​ឲ្យ​ចូលរួម​យុទ្ធនាការ​ឃោសនា​បោះ​ឆ្នោត គឺ​ជា​ករណី​ល្មើស​ច្បាប់៖ «បើ​សិន​ជា​មាន​ករណី​ហ្នឹង​កើត​ឡើង​មែន​វា​អត់​ត្រូវ​ច្បាប់ ខុស​នីតិវិធី​ច្បាប់ គឺ​ចូល​ក្នុង​បទ​រារាំង គឺ​មាន​ទោសបញ្ញត្តិ​បើ​សិន​មាន​ករណី​ហ្នឹង​កើត​ឡើង​មែន»

​ខែត្រ​ក្រចេះ មាន​ឃុំ-​សង្កាត់​ចំនួន ៤៧ និង​មាន​គណបក្ស​នយោបាយ​ចំនួន​៨ ឈរ​ឈ្មោះ​បេក្ខជន​ក្រុមប្រឹក្សា​ឃុំ-​សង្កាត់​រួម​មាន គណបក្ស​ប្រជាជន​កម្ពុជា គណបក្ស​សង្គ្រោះ​ជាតិ គណបក្ស​សម្ព័ន្ធ​ដើម្បី​ប្រជាធិបតេយ្យ  គណបក្ស​ហ៊្វុនស៊ិនប៉ិច គណបក្ស​ខ្មែរ​រួប​រួម​ជាតិ គណបក្ស​សំបុក​ឃ្មុំ​សង្គម​ប្រជាធិបតេយ្យ គណបក្ស​ជនជាតិ​ដើម​ដើម្បី​ប្រជាធិបតេយ្យ និង​គណបក្ស​សញ្ជាតិ​កម្ពុជា។

អ្នក​សម្របសម្រួល​ផ្នែក​អង្កេត​នៃ​គណៈកម្មាធិការ​ខុមហ្វ្រែល (COMFREL) លោក កន សាវាង្ស យល់​ថា អាជ្ញាធរ​ភូមិ​មិន​ត្រូវ​យក​តួនាទី​របស់​ខ្លួន​រារាំង​ពលរដ្ឋ​មិន​ឲ្យ​ចូលរួម​យុទ្ធនាការ​ឃោសនា​បោះឆ្នោត​របស់​គណបក្ស​នយោបាយ​ណា​មួយ​នោះ​ទេ បើ​ទោះ​ជា​ការ​រារាំង​នោះ​ធ្វើ​ឡើង​ដោយ​ពាក្យ​សម្ដី​ក្ដី​វា​អាច​បង្ក​ឲ្យ​ពលរដ្ឋ​ភិតភ័យ ហើយ​បញ្ហា​នេះ​ក៏​ជា​ទម្រង់​នៃ​ការ​គំរាមកំហែង​សិទ្ធ​ពលរដ្ឋ​ដែរ។

លោក​ថា អ្នក​ដែល​មិន​សុខ​ចិត្ត​បញ្ហា​នេះ អាច​ប្ដឹង​ទៅ​គណៈកម្មការ​រៀបចំ​ការ​បោះឆ្នោត​​ឃុំ-​សង្កាត់៖ «ក្នុង​ផ្លូវ​ច្បាប់​គេ​បាន​កំណត់​ថា ការ​ចូល​រួម​របស់​ប្រជាពលរដ្ឋ មិន​ត្រូវ​បាន​ការ​រារាំង​មិន​ត្រូវ​បាន​បង្ខិតបង្ខំ​ពី​បុគ្គល ឬ​ពី​អ្នក​ណា​មួយ​នោះ​ទេ។ អា​ហ្នឹង​ជា​ករណី​មួយ​ខុស​ឆ្គង​ហើយ ហើយ​ការ​រារាំង​នេះ​បើ​នៅ​ក្នុង​ទោសបញ្ញត្តិ​វា​អាច​មាន​បញ្ហា​ច្រើន»

​កន្លង​ទៅ​ព្រះមហាក្សត្រ ព្រះបាទ នរោត្តម សីហមុនី ធ្លាប់​អំពាវនាវ​ឲ្យ​ជន​រួម​ជាតិ​អ្នក​បោះឆ្នោត​ទាំង​អស់​អញ្ជើញ​ទៅ​បោះឆ្នោត​ឲ្យ​បាន​គ្រប់ៗ​គ្នា និង​បោះឆ្នោត​ទៅ​តាម​សតិសម្បជញ្ញៈ​របស់​ខ្លួន​កុំ​ព្រួយ​បារម្ភ​ពី​ការ​គាប​សង្កត់​គំរាមកំហែង ឬ​សម្លុត​ពី​ជន​ណា​ម្នាក់ ឬ​បក្ស​ណា​មួយ​ឲ្យ​សោះ ព្រោះ​ការ​បោះឆ្នោត​នៅ​ថ្ងៃ​ទី​៤ ខែ​មិថុនា ឆ្នាំ​២០១៧ គឺ​ជា​ការ​បោះឆ្នោត​ជា​ទូទៅ​ជា​សាកល​ដោយ​សម្ងាត់​អនុលោម​តាម​របប​លទ្ធិប្រជាធិបតេយ្យ សេរី ពហុបក្ស៕


No comments:

Post a Comment