តំណាងរាស្ត្រសហរដ្ឋអាមេរិក ពីខាងគណបក្សប្រជាធិបតេយ្យ លោក អាឡាន់ ឡូវ៉ិនថល (Alan Lowenthal) ថ្លែងពីបញ្ហាសិទ្ធិមនុស្សកាលពីឆ្នាំ២០១៣។ Photo courtesy of lowenthal.house.gov |
សមាជិក សភា អាមេរិក បារម្ភ អំពី ភាពត្រឹមត្រូវ និងយុត្តិធម៌ នៃការ បោះឆ្នោត នៅកម្ពុជា
RFA / វិទ្យុ អាស៊ី សេរី | ២៧ ឧសភា ២០១៧
តំណាងរាស្ត្រ សហរដ្ឋអាមេរិក បីរូប ជំរុញ ឲ្យក្រសួង ការបរទេស និងស្ថានទូត អាមេរិក នៅកម្ពុជា បង្ហាញ ការគាំទ្រ ជាសាធារណៈ ដល់ការគោរព នីតិរដ្ឋ និងអំពាវនាវ ឲ្យរដ្ឋាភិបាល កម្ពុជា ឲ្យគោរព សិទ្ធិបោះឆ្នោត របស់ ពលរដ្ឋ គ្រប់រូប នៅមុន ការបោះឆ្នោត ឃុំ-សង្កាត់ នៅពេល ខាងមុខ។
តំណាងរាស្ត្រ អាមេរិក បីរូប ដែលបាន សរសេរ ទៅកាន់ លោករដ្ឋមន្ត្រី លោក រិច ធីល្លឺសុន (Rex W. Tillerson), រួមមាន លោក អេដ រ៉យ (Ed Royce), លោក អាឡាន់ ឡូវ៉ិនថល (Alan Lowenthal), និងលោក ស្ទីវ ឆាបុត (Steve Chabot)។ ពួកគេ សរសេរ ថា, ការបោះឆ្នោត ឃុំ-សង្កាត់ នៅពេល ដ៏ខ្លី ខាងមុខនេះ គឺ ជាការ បោះឆ្នោត លើកដំបូង បង្អស់ ចាប់តាំង ពីការ បោះឆ្នោត សកល កាលពីឆ្នាំ ២០១៣ ដែលរងការ រិះគន់ ពីមជ្ឈដ្ឋាន ជាតិ និងអន្តរជាតិ ថា ជាការ បោះឆ្នោត មួយ ដែលមាន ភាព មិនប្រក្រតី។
សេចក្ដីថ្លែងការណ៍រួមរបស់តំណាងរាស្ត្រអាមេរិក ទាំងបីរូបនេះបន្តទៀតថា នៅក្រោយការបោះឆ្នោតឆ្នាំ២០១៣ អតីតប្រធានគណបក្សសង្គ្រោះជាតិ លោក សម រង្ស៊ី និង លោក កឹម សុខា ប្រធានគណបក្ស បានប្រឈមមុខនឹងការចោទប្រកាន់ពីបទព្រហ្មទណ្ឌផ្សេងៗក្រោមហេតុផលនយោបាយ។
ជាងនេះទៅទៀត លោក សម រង្ស៊ី រងនូវការបណ្ដេញចេញពីប្រទេសតាមរយៈការធ្វើវិសោធនកម្មច្បាប់ស្ដីពីគណបក្សនយោបាយ ហើយច្បាប់ដែលអនុម័តដោយគណបក្សកាន់អំណាចមួយនេះក៏កំពុងគំរាមកំហែងថែមទៀតដល់ការដឹកនាំរបស់លោក កឹម សុខា ផងដែរ។
ក្រុមតំណាងរាស្ត្រអាមេរិក ទាំងបីរូបនេះអះអាងថា ពួកគេកំពុងព្រួយបារម្ភដោយសារតែការញុះញង់បង្កសង្គ្រាមពេលបក្សកាន់អំណាចចាញ់ឆ្នោតរបស់លោកនាយករដ្ឋមន្ត្រី ហ៊ុន សែន ដែលជាល្បិចកលមួយដើម្បីគំរាមកំហែងពលរដ្ឋអ្នកបោះឆ្នោត។
តំណាងរាស្ត្រទាំងនោះក៏បានស្នើឲ្យរដ្ឋាភិបាលក្រុងវ៉ាស៊ីនតុន ចេញសេចក្ដីថ្លែងការណ៍មួយដើម្បីផ្ញើសារទៅរដ្ឋាភិបាលទីក្រុងភ្នំពេញ ឲ្យគោរពសិទ្ធិពលរដ្ឋខ្មែរ៕
No comments:
Post a Comment