The Anti-Sam Rainsy Law

Thursday, June 15, 2017

[Vietnamization: Logging, Border, Military, Market] ស្នងការ​ ខេត្ត​ ត្បូងឃ្មុំ​ ថា ​មន្ត្រី​ សមត្ថកិច្ច​ ជំរិត​ យក​លុយ​ ពី​ឡាន ​ដឹក​ឈើ​ ជា​ក្រុម​ អនាធិបតេយ្យ | Tbaung Khmum authority says security officials who demand money from vehicles trasporting illegal timber are gangsters

ផែនទី​ខេត្ត​ត្បូងឃ្មុំ
ផែនទី​ខេត្ត​ត្បូងឃ្មុំ

ស្នងការ​ ខេត្ត​ ត្បូងឃ្មុំ​ ថា ​មន្ត្រី​ សមត្ថកិច្ច​ ជំរិត​ យក​លុយ​ ពី​ឡាន ​ដឹក​ឈើ​ ជា​ក្រុម​ អនាធិបតេយ្យ

RFA / វិទ្យុ អាស៊ី សេរី | ១៥ មិថុនា​ ២០១៧


ស្នងការ​ នគរបាល​ ខេត្ត​ ត្បូងឃ្មុំ ឲ្យ​ដឹង ​ថា, មន្ត្រី​ សមត្ថកិច្ច កង​រាជ​អាវុធហត្ថ និង​មន្ត្រី​ យោធា ​ដែល​បាន​ ប្រដេញ​ រថយន្ត​ ដឹក​ឈើ​ ដើម្បី​ យក​ប្រាក់​នោះ គឺ ​គ្មាន​ បញ្ជា​ ពី​អង្គភាព​ទេ, ប៉ុន្តែ​ ពួក​គេ ជា​ក្រុម​ អនាធិបតេយ្យ។  ការ​លើក​ឡើង​នេះ ក្រោយ​ពេល ​មន្ត្រី​ នគរបាល ​ម្នាក់, កង​រាជ​អាវុធហត្ថ ២​នាក់, និង​មន្ត្រី​,យោធា ៣​នាក់ ត្រូវ​,បាន​កម្លាំង ​សមត្ថកិច្ច​ ខេត្ត​ កំពង់ចាម ចាប់​ខ្លួន​ កាល​ពី​ថ្ងៃ​ ​១៤ មិថុនា ទាក់ទង​ សកម្មភាព ​ប្រដេញ​ឡាន ​ដឹក​សសរ​ផ្ទះ​ មួយ​គ្រឿង ដើម្បី​ ជំរិត​ យក​ប្រាក់ និង​បាញ់ ​កាំភ្លើង​ គំរាម​ផង។


ស្នងការ​នគរបាល​ខេត្ត​ត្បូងឃ្មុំ បញ្ជាក់​ថា សកម្មភាព​ប្រដេញ​រថយន្ត​ដឹក​សសរ​ផ្ទះ​ដើម្បី​ជំរិត​យក​ប្រាក់ គឺ​ជា​សកម្មភាព​ល្មើស​ច្បាប់ ហើយ​បណ្ដាល​ឲ្យ​ប៉ះពាល់​ដល់​មុខ​មាត់ និង​កិត្តិយស​អង្គភាព ព្រម​ទាំង​ប៉ះពាល់​ដល់​មន្ត្រី​អនុវត្តន៍​ច្បាប់​ដែល​ស្អាតស្អំ ជាដើម។

ជាង​នេះ​ទៀត សំណុំ​រឿង​ចាប់​ខ្លួន​មន្ត្រី​នគរបាល​ម្នាក់ កង​រាជ​អាវុធហត្ថ ២​នាក់ និង​មន្ត្រី​យោធា ៣​នាក់ គឺ​សមត្ថកិច្ច​ខេត្ត​កំពង់ចាម កំពុង​ស្រាវជ្រាវ និង​កសាង​សំណុំ​រឿង​បញ្ជូន​ទៅ​តុលាការ​ទៀត​ផង។

ស្នងការ​នគរបាល​ខេត្ត​ត្បូងឃ្មុំ លោក បែន រ័ត្ន មាន​ប្រសាសន៍​នៅ​ថ្ងៃ​ទី​១៥ មិថុនា ថា ក្រុម​ជន​ល្មើស​ទាំង ៦​នាក់​នោះ គឺ​ជា​ក្រុម​អនាធិបតេយ្យ មិន​គួរ​ហៅ​ពួក​គេ​ថា​ក្រុម​សមត្ថកិច្ច​នោះ​ទេ ពីព្រោះ​គ្មាន​មេ​គ្មាន​កើយ ពោល​គឺ​ធ្វើ​សកម្មភាព​ដោយ​ចិត្ត​ឯង។ លោក​បញ្ជាក់​ថា ខាង​លោក​មិន​បាន​បញ្ជា​ឲ្យ​ពួក​គេ​ធ្វើ​សកម្មភាព​ទាំងនោះ​ឡើយ ហើយ​ក៏​គ្មាន​ប្រធាន​អង្គភាព​ណា​អនុញ្ញាត​ឲ្យ​ពួក​គាត់​ធ្វើ​សកម្មភាព​ទាំងនោះ​ដែរ៖ «នគរបាល​ដែល​ខិតខំ ខ្ញុំ​លើក​ទឹក​ចិត្ត​ពួក​គេ​ណាស់។ បើ​ខ្ញុំ​យោគយល់​ពួក​អស់​នេះ បាន​ន័យ​ថា​ខ្ញុំ​មិន​លើក​ទឹក​ចិត្ត​ដល់​មន្ត្រី​ដែល​ខិតខំ​ធ្វើ​ការ។ អ៊ីចឹង​នៅ​មេមត់ ក៏ដោយ នៅ​ទីណា​ក៏ដោយ ខ្ញុំ​អត់​គាំទ្រ​ទេ ហើយ​ពួក​នេះ​ក៏​អត់​មាន​សមត្ថកិច្ច​នៅ​លើ​ទឹក​ដី​ខេត្ត​ត្បូងឃ្មុំ ដែរ»


មន្ត្រី​នគរបាល​ម្នាក់ កង​រាជ​អាវុធហត្ថ ២​នាក់ និង​មន្ត្រី​យោធា ៣​នាក់ ត្រូវ​បាន​កម្លាំង​សមត្ថកិច្ច​ស្រុក​ព្រៃឈរ ខេត្ត​កំពង់ចាម ចាប់​ខ្លួន​កាល​ពី​ថ្ងៃ​ទី​១៤ មិថុនា នៅ​ចំណុច​ឃុំ​ផ្អាវ ស្រុក​បាធាយ ទាក់ទង​នឹង​សកម្មភាព​ប្រដេញ​ឡាន​ដឹក​សសរ​ផ្ទះ​មួយ​គ្រឿង​ដើម្បី​យក​ប្រាក់ និង​បាញ់​កាំភ្លើង​គំរាម​ផង។

ស្នងការ​នគរបាល​ខេត្ត​កំពង់ចាម លោក ឯម កុសល មិន​បាន​ធ្វើ​អត្ថាធិប្បាយ​យ៉ាង​ណា​ទេ ដោយ​លោក​ថា​ជាប់​ប្រជុំ។

យ៉ាង​នេះ​ក្តី លោក បែន រ័ត្ន បញ្ជាក់​ថា សមត្ថកិច្ច​ខេត្ត​កំពង់ចាម កំពុង​សួរ​ចម្លើយ​ជន​ទាំងនោះ​ដើម្បី​បន្ត​នីតិវិធី។ លោក​ថា នឹង​មិន​បណ្តោយ​ឲ្យ​មាន​សកម្មភាព​ល្មើស​ច្បាប់​បែប​នេះ​កើត​ឡើង​ទៀត​ឡើយ ហើយ​កន្លង​ទៅ ក៏​មិន​ធ្លាប់​មាន​ករណី​ទាំងនេះ​កើត​ឡើង​ដែរ។

នេះ​មិន​មែន​ជា​លើក​ទី​មួយ​ទេ ករណី​មន្ត្រី​សមត្ថកិច្ច​ជិះ​រថយន្ត​ប្រដេញ​យក​លុយ​ពី​ពលរដ្ឋ​ដឹក​ឈើ​នៅ​តាម​ផ្លូវ​ជាតិ។ មាន​ករណី​ខ្លះ សមត្ថកិច្ច​ជិះ​ប្រដេញ​ឡាន​ឈើ​ប្រភេទ​សាំយ៉ុង ឬ​ក្រុម​ម៉ូតូ​ដឹក​ឈើ រហូត​ធ្វើ​ឲ្យ​អ្នក​បើកបរ​ជ្រុល​ទៅ​បុក​ដើមឈើ ឬ​ធ្លាក់​ផ្លូវ​ក្រឡាប់​ស្លាប់​ពលរដ្ឋ ជាដើម ប៉ុន្តែ​កម្រ​មាន​ការ​ទទួល​ខុស​ត្រូវ​ណាស់។

មន្ត្រី​សម្របសម្រួល​សមាគម​អាដហុក (ADHOC) ខេត្ត​ត្បូងឃ្មុំ លោក នាង សុវ៉ាត សាទរ​ចំពោះ​វិធានការ​របស់​សមត្ថកិច្ច​ខេត្ត​កំពង់ចាម និង​ការ​ប្ដេជ្ញា​ចិត្ត​របស់​អាជ្ញាធរ​ខេត្ត​ត្បូងឃ្មុំ ដើម្បី​លុប​បំបាត់​សកម្មភាព​យក​ប្រាក់​ពី​ម្ចាស់​រថយន្ត​ដឹក​ឈើ​នៅ​តាម​ដង​ផ្លូវ។ លោក​សង្កេត​ឃើញ​ថា សកម្មភាព​ទាំងនេះ គឺ​មិន​ខ្វះ​ឡើយ​នៅ​ខេត្ត​ត្បូងឃ្មុំ ដូចជា​នៅ​ក្បែរ​សាលា​ស្រុក​តំបែរ និង​តំបន់​ផ្សេង​ទៀត។ លោក​យល់​ថា ពួក​គេ​ហ៊ាន​ធ្វើ​សកម្មភាព​របស់​ខ្លួន​នៅ​តាម​ដង​ផ្លូវ​ជាតិ ដោយ​គ្មាន​ការ​ភ័យ​ខ្លាច គឺ​អាច​មាន​ស្ថាប័ន​របស់​មន្ត្រី​ទាំងនោះ​ជា​អ្នក​ផ្តល់​ភ្លើង​ខៀវ​ឲ្យ៖ «តាម​ពិត​ទៅ​មាន​រាល់​តែ​ថ្ងៃ​ហ្នឹង​ឯង ហើយ​បើ​ចង់​ដឹង​ច្បាស់ ផ្លូវ​ចេញ​ទៅ​ជាំ ចេញ​ទៅ​ចាន់មូល ហ្នឹង។ តាម​ផ្លូវ​វត្ត​មេមង វត្ត​ត្រមូង ហ្នឹង យក​ទៅ​ណា​ឡាន​ដឹក​ឈើ​ហូរហែ ហើយ​អ្នក​ចង​អង្រឹង​នៅ​ក្រោម​ដើម​កៅស៊ូ និង​អ្នក​បើក​ឡាន​នៅ​ចាំ​អែប​ផ្លូវ»

មន្ត្រី​សង្គម​ស៊ីវិល​រូប​នេះ នឹង​បន្ត​ឃ្លាំ​មើល​ពី​ប្រសិទ្ធភាព​នៃ​ការ​ប្ដេជ្ញា​ចិត្ត​របស់​ស្នងការ​ខេត្ត ជៀសវាង​ធ្វើ​បាន​តែ​មួយ​ពេលៗ។ លោក​ថា ប្រសិន​បើ​រាជ​រដ្ឋាភិបាល​មិន​អាច​លុប​បំបាត់​បញ្ហា​អសកម្ម​ទាំងនេះ​ទេ ពលរដ្ឋ​នឹង​វិនិច្ឆ័យ​នៅ​រដូវ​កាល​បោះឆ្នោត​បន្ត​ទៀត៕



No comments:

Post a Comment