Paris Peace Accords 23 Oct. 1991

Saturday, July 15, 2017

លោក ហ៊ុន សែន ចេញ​មុខ ​បកស្រាយ ​ខណៈ ​លេច​ឮ​ ថា​ លោក ​ទៅ​ព្យាបាល​ ជំងឺ​ នៅ​ក្រៅ​ប្រទេស | Hun Sen comes out to explain after it was heard he went for medical treatment abroad

ប្រធាន​គណបក្ស​ប្រជាជន​កម្ពុជា និង​ជា​នាយក​រដ្ឋមន្ត្រី លោក ហ៊ុន សែន ថ្លែង​ទៅ​កាន់​អ្នក​គាំទ្រ​ក្នុង​យុទ្ធនាការ​ឃោសនា​រក​សំឡេង​ឆ្នោត​នៅ​ថ្ងៃ​ទី​២ ខែ​មិថុនា ឆ្នាំ​២០១៧។
ប្រធាន​គណបក្ស​ប្រជាជន​កម្ពុជា និង​ជា​នាយក​រដ្ឋមន្ត្រី លោក ហ៊ុន សែន ថ្លែង​ទៅ​កាន់​អ្នក​គាំទ្រ​ក្នុង​យុទ្ធនាការ​ឃោសនា​រក​សំឡេង​ឆ្នោត​នៅ​ថ្ងៃ​ទី​២ ខែ​មិថុនា ឆ្នាំ​២០១៧។

លោក ហ៊ុន សែន ចេញ​មុខ ​បកស្រាយ ​ខណៈ ​លេច​ឮ​ ថា​ លោក ​ទៅ​ព្យាបាល​ ជំងឺ​ នៅ​ក្រៅ​ប្រទេស

RFA / វិទ្យុ អាស៊ី សេរី | ១៥ កក្កដា ២០១៧

លោក ​នាយករដ្ឋមន្ត្រី ហ៊ុន សែន នៅ​ព្រឹក​ ថ្ងៃ​ទី​១៥ ខែ​កក្កដា ចេញ​មុខ​ តាម​បណ្ដាញ​ សង្គម ​ហ្វេសប៊ុក (Faccebook) បកស្រាយ ​ពី​ព័ត៌មាន​ ដែល​ថា លោក​ បាន​ទៅ​ សម្រាក ​ព្យាបាល ​ជំងឺ​ នៅ​បរទេស។  លោក ហ៊ុន សែន បញ្ជាក់​ នៅ​ពេល​នេះ ​ថា, ព័ត៌មាន​ ទាំង​នេះ​ ជា​ពាក្យ​ ចចាមអារ៉ាម, ហើយ​ ថា, លោក ​កំពុង ​ឋិត​នៅ​រាជធានី​ ភ្នំពេញ។

អង្គុយ​ និយាយ​ ចេញ​ពី​ក្នុង ​រថយន្ត​ ក្នុង​ទឹក​មុខ​ ហាក់​ស្រស់ស្រាយ​ ជាង​រូបថត ​ដែល​លោក ​បាន​បង្ហោះ ​កាល​ពី​ពេល ​ថ្មីៗ​នេះ ក្នុង​ពេល​ ដែល​មាន​ ព័ត៌មាន​ លេច​ឮ​ ថា, លោក ​កំពុង ​សម្រាក​ ព្យាបាល​ ជំងឺ​ នៅ​បរទេស​នោះ, លោក ហ៊ុន សែន អះអាង ​ថា, ពេល​នេះ​ លោក​ កំពុង ជិះ​រថយន្ត​ សង្កេត​មើល​ រាជធានី​ ភ្នំពេញ។

ថ្លែង​ក្នុង​ វីដេអូ​ឃ្លិប ​រយៈពេល​ ជិត ២​នាទី នៅ​ថ្ងៃ ​ទី​១៥ កក្កដា, លោក ហ៊ុន សែន ថា, ប្រសិនជា​ នាយករដ្ឋមន្ត្រី​ បាត់​ខ្លួន ឬ​បាត់​បង់​តំណែង ​ជា​ស្ថាពរ​ ដូច​ដែល ​ព័ត៌មាន ឬ​ពាក្យ​លេច​ឮ​ នោះ ប្រទេស ​កម្ពុជា នឹង​ក្លាយ​ ជា​ច្របូកច្របល់​ យ៉ាង​ពិត​ប្រាកដ៖ «ដូច្នេះ​ ពាក្យ​ ចចាមអារ៉ាម ​ដ៏​អាក្រក់​នេះ គួរ​តែ​ ត្រូវ​ បាន​បំបាត់​ចោល ​តាម​រយៈ ​ឃ្លិប​វីដេអូ​ របស់​ខ្ញុំ​ ដែល​កំពុង ​តែ​ ផ្សាយ​ចេញ ​ពី​លើ​ផ្លូវ​ ខ្ញុំ​ ធ្វើ​ដំណើរ​ របៀប​ធម្មតា, ហើយ ​កំពុង​តែ ​ស្ទះ​ចរាចរណ៍​ ដូច​គេ ​ដូច​ឯង។  ដូច្នេះ ​សូម​ បង​ប្អូន ​មេត្តា​ ពិនិត្យ​មើល ​អ្នក​ដែល​បំផុស​នេះ , តើ​ គេ​ មាន​ចេតនា ​អ្វី​ ពិត​ប្រាកដ?»

​ការ​ចេញ​មុខ​ បកស្រាយ ​របស់​លោក ហ៊ុន សែន នៅ​ពេល​នេះ បន្ទាប់ ​ពី​លោក​ បាន​បាត់​មុខ​ ថ្លែង​សារ​ ជា​សំឡេង​ ចំនួន ២​សប្ដាហ៍។  ការ​បាត់​មុខ​ របស់​លោក​ ក៏​ស្រប​ពេល ​ដែល​គណៈរដ្ឋមន្ត្រី បាន​លើក​ កិច្ច​ប្រជុំ​ ពេញ​អង្គ​ ចំនួន ២​ សប្ដាហ៍ ជាប់ៗ​គ្នា គឺ​ នៅ​ថ្ងៃ​ ទី​៧ និង​ទី​១៤ ខែ​កក្កដា ទៅ​ធ្វើ​ នៅ​ពេល​ ក្រោយ​វិញ។  ក្នុង​ពេល​ ជាមួយ​គ្នា លោក ហ៊ុន សែន ក៏​បាន​ អវត្តមាន ​នៅ​ក្នុង​ កិច្ចប្រជុំ​ ពេញ​អង្គ​ រដ្ឋសភា​ កាល​ពី​ថ្ងៃ​ ទី​១០ កក្កដា ដើម្បី​ ពិភាក្សា​ អនុម័ត​ ការ​កែប្រែ​ ច្បាប់​ គណបក្ស​ នយោបាយ ​ដែល​ឈាន​ដល់​ ការ​ដក​ហូត ​សិទ្ធិ​ទណ្ឌិត​ មិន​ឲ្យ​ លូកលាន់​ ជាមួយ​ គណបក្ស​ នយោបាយ ក្រោយ​ ពី​មាន​បញ្ជា​ របស់​លោក ហ៊ុន សែន ដែល​ជា​ការ​ កែប្រែ​ ច្បាប់ ​ដែល​គេ ​មើល​ឃើញ​ ថា មាន​គោលដៅ​ ប្រឆាំង​ ទៅ​នឹង​លោក សម រង្ស៊ី អតីត​ ប្រធាន​ គណបក្ស​ សង្គ្រោះ​ជាតិ។


អវត្តមាន​របស់​លោក ហ៊ុន សែន មិន​បាន​ចេញ​មុខ​ថ្លែង​សារ​ជា​សំឡេង​ក្នុង​រយៈពេល ២​សប្ដាហ៍​នេះ ក៏​ស្រប​ពេល​ដែល​មាន​ព័ត៌មាន​លេខ​ឮ​ថា លោក​បាន​ទៅ​សម្រាក​ព្យាបាល​ជំងឺ​នៅ​បរទេស។

​ក្នុង​ពេល​ជាមួយ​គ្នា ប្រភព​ច្បាស់​ការ​គួរ​ឲ្យ​ទុក​ចិត្ត​បាន​មួយ​សុំ​មិន​បញ្ចេញ​ឈ្មោះ​បាន​ឲ្យ​អាស៊ីសេរី ដឹង​ថា លោក ហ៊ុន សែន បាន​ទៅ​សម្រាក​ព្យាបាល​របួស​នៅ​ក្រៅ​ប្រទេស។ ប្រភព​ដដែល​ឲ្យ​ដឹង​ថា ក្នុង​ពេល​លេងល្បែង​វាយ​កូនគោល កាល​ពី​ពេល​កន្លង​ទៅ​នេះ លោក ហ៊ុន សែន បាន​ដួល​របួស​ត្រង់​ឆ្អឹង​ត្រគាក រួច​បាន​ចេញ​ទៅ​សម្រាក​ព្យាបាល​របួស​នៅ​មន្ទីរពេទ្យ​នៅ​ក្រៅ​ប្រទេស។ ប្រភព​ដដែល​នេះ​បន្ត​ថា គ្រូពេទ្យ​តម្រូវ​ឲ្យ​លោក ហ៊ុន សែន នៅ​សម្រាក​ព្យាបាល​របួស​រហូត​ដល់​រយៈពេល ១​ខែ។

ហាក់​ជា​ការ​ឆ្លើយ​តប​ទៅ​នឹង​ព័ត៌មាន​ទាំង​អស់​នេះ លោក ហ៊ុន សែន កាល​ពី​ថ្ងៃ​ទី​១០ កក្កដា បាន​បង្ហោះ​រូប​ថត​មួយ​ចំនួន​ម្ដង​រួច​ហើយ​ជាមួយ​ភរិយា កូន ចៅ និង​អ្នក​ហែហម​លោក​ដែល​ហាក់​មាន​ចេតនា​បង្ហាញ​ថា មិន​មាន​រឿង​អ្វី​កើត​ឡើង​ចំពោះ​លោក​ដូច​ព័ត៌មាន​លេច​ឮ​ឡើយ។ ​អម​ជាមួយ​រូបថត​ទាំង​នោះ លោក ហ៊ុន សែន បាន​សរសេរ​សារ​ថា «នេះ​ហើយ​គឺ​ខ្ញុំ​ជា ហ៊ុន សែន ដែល​ពួក​ជនពាល​កំពុង​ស្វែង​រក»

ទោះ​ជា​យ៉ាង​ណា រូបថត​ដែល​លោក​នាយករដ្ឋមន្ត្រី​បង្ហោះ​កាល​ពី​ថ្ងៃ​ទី​១០ កក្កដា នោះ ហាក់​មិន​បង្ហាញ​ស្ថានភាព​ស្វាហាប់​របស់​លោក​ប៉ុន្មាន​ទេ។ មើល​ទៅ​លោក​ហាក់​មាន​សភាព​អស់​កម្លាំង​ខុស​ធម្មតា ហើយ​ឃើញ​ហាក់​ដូច​ជា​មាន​បង់​ព្យាបាល​ជំងឺ​រុំ​ជុំវិញ​ចង្កេះ​លោក​ថែម​ទៀត​ផង៕ ​


1 comment:

  1. Anonymous7:45 AM

    The YUON's CPP rank and file, doctors, lawyers, business communities big and small and the Cambodian youth will discreetly abandon Hun Sen on this 2018 election for the CNRP with or without Kem Sokha and Sam raingsy. And there is nothing HUN SEN can do about it. They will take HUN SEN's money to discreetly vote for the CNRP... Bravo the Khmer people [without Hun Sen]!!!

    ReplyDelete