ពីឆ្វេង) លោក កឹម សុខា និងលោក សម រង្ស៊ី កាលពីថ្ងៃទី១៩ ខែកក្កដា ឆ្នាំ២០១៣ លោក ហ៊ុន សែន និងភរិយា លោកស្រី ប៊ុន រ៉ានី កាលពីថ្ងៃទី២៧ ខែមុថិនា ឆ្នាំ២០១៣។ |
លោក ហ៊ុន សែន ប្រកាស ឲ្យមេឃុំ បក្សប្រឆាំង ចុះចូល នឹងខ្លួន បើ ចង់រក្សា ដំណែង
RFA / វិទ្យុ អាស៊ី សេរី | ២២ តុលា ២០១៧
លោក នាយករដ្ឋមន្ត្រី ហ៊ុន សែន ប្រកាស ឲ្យមេ ឃុំ-ចៅសង្កាត់ គណបក្ស សង្គ្រោះជាតិ ចុះចូល នឹងខ្លួន បើ ចង់រក្សា ដំណែង ក្រោយ គណបក្សប្រឆាំង ត្រូវ រំលាយ។ ប៉ុន្តែ មេឃុំ មួយចំនួន របស់ បក្សប្រឆាំង ឆ្លើយតប ថា, ពួកគេ នឹងមិន ចុះចូល ជាមួយ បក្សកាន់អំណាច ឡើយ ដោយពួកគេ អះអាង ថា, ទោះ បក្សនេះ ត្រូវ គេ រំលាយមែន, តែ បេះដូង សង្គ្រោះជាតិ របស់ ពួកគេ មិនរលាយ ឡើយ។ ចំណែក មន្ត្រី សង្គមស៊ីវិល យល់ថា, នេះ ជាដំណាក់កាល នៃការ សម្រេចចិត្ត របស់ បុគ្គល ម្នាក់ៗ។
លោក ហ៊ុន សែន ថ្លែងដោយមានជំនឿចិត្ត ស្ទើរ១០០ភាគរយ នៅចំពោះមុខកម្មកររោងចក្រជាច្រើនពាន់នាក់ នៅចុងសប្ដាហ៍ថ្ងៃទី២២ តុលា ថា គណបក្សសង្រ្គោះជាតិនឹងត្រូវរំលាយ ហើយនឹងរលាយមុនការវិនិច្ឆ័យទោសរបស់ប្រធានគណបក្សប្រឆាំងលោក កឹម សុខា ទៀតផង។ លោកបន្តថា កុំយកសហគមន៍អន្តរជាតិមកដាក់សម្ពាធលើរដ្ឋាភិបាលរបស់លោក រារាំងការរំលាយគណបក្សប្រឆាំង គឺមិនអាចទៅរួចនោះឡើយ។
ការថ្លែងដូចនេះរបស់លោក ហ៊ុន សែន ពុំមានផ្សាយផ្ទាល់តាមហ្វេសប៊ុក (Facebook) ដូចសព្វដងនោះទេ ប៉ុន្តែសម្ដីនេះ ត្រូវសារព័ត៌មានស្និទ្ធនឹងរដ្ឋាភិបាលស្រង់ចុះផ្សាយនៅថ្ងៃទី២២ តុលា។ សារព័ត៌មានដដែលបន្តថា លោក ហ៊ុន សែន ចាត់ទុកការទទួលយកមន្ត្រីបក្សប្រឆាំងនៅពេលនេះ ជាការអនុវត្តនយោបាយឈ្នះឈ្នះ ដែលលោកធ្លាប់ធ្វើជាមួយខ្មែរក្រហម។ ទន្ទឹមនឹងនេះ លោក ហ៊ុន សែន ទទូចឲ្យសមាជិកគណបក្សលោកកុំអន់ចិត្តឡើយ។
ឆ្លើយតបនឹងសាររបស់លោក ហ៊ុន សែន នៅពេលនេះ មេឃុំបក្សប្រឆាំងមួយចំនួន ឆ្លើយតបថា ពួកគេនឹងមិនចូលជាមួយបក្សកាន់អំណាចឡើយ ដោយពួកគេអះអាងថា ទោះបក្សនេះត្រូវគេរំលាយមែន តែបេះដូងសង្គ្រោះជាតិរបស់ពួកគេមិនរលាយឡើយ។
ចៅសង្កាត់អង្គរធំ ក្រុងសៀមរាប ខេត្តសៀមរាប ពីគណបក្សសង្គ្រោះជាតិ លោក សៀក ចំណាប់ ថ្លែងថា លោកនឹងមិនចូលរួមជាមួយបក្សកាន់អំណាចជាដាច់ខាត ទោះបក្សខ្លួនត្រូវរំលាយក្ដី។ លោកបន្តថា ដំណែងរបស់លោកសព្វថ្ងៃនេះ មិនមែនជាស្ពានចម្លងដើម្បីពុករលួយទេ។ ដូច្នេះដំណែងមិនសំខាន់សម្រាប់លោកឡើយ ហើយអ្វីដែលសំខាន់នោះ គឺដំណើរការផ្លាស់ប្ដូរសង្គម។ លោកបន្តថា ដរាបណាគេនៅកៀបសង្កត់សិទ្ធិពលរដ្ឋ លោកក៏នៅតស៊ូរហូត ដល់មានការផ្លាស់ប្ដូរ។ ចៅសង្កាត់រូបនេះបន្តថា បក្សកាន់អំណាចទៅវិញទេ ដែលកំពុងដើរលើផ្លូវខុស និងកំពុងតែដុតបំផ្លាញជីវិតនយោបាយរបស់ខ្លួន។
ក្រោយបក្សកាន់អំណាចបង្ហាញពីឆន្ទៈចង់រំលាយបក្សប្រឆាំង និងកែប្រែច្បាប់ដើម្បីដកហូតអាសនៈបក្សនេះ សហគមន៍អន្តរជាតិបានចេញសេចក្ដីថ្លែងការណ៍អំពាវនាវជាបន្តបន្ទាប់ ឲ្យបក្សកាន់អំណាចបញ្ឈប់មហិច្ឆតានេះជាបន្ទាន់។ កាលពីថ្ងៃទី១៨ តុលា សហភាពអន្តរសភា (Inter-Parliamentary Union) ដែលមានតំណាងរាស្ត្រ នៃប្រទេសចំនួន ១៧៣ លើទូទាំងពិភពលោក បានចេញសេចក្ដីសម្រេចស្នើឲ្យរដ្ឋាភិបាលកម្ពុជាដោះលែង លោក កឹម សុខា និងធានាសុវត្ថិភាពតំណាងរាស្ត្រគណបក្សប្រឆាំងទាំងអស់ដើម្បីពួកគេអាចវិលត្រឡប់មកកម្ពុជាដើម្បីធ្វើការងារ។ ចំណែក ប្រទេសស៊ុយអ៊ែត (Sweden) ក៏ព្រមានពិចារណាឡើងវិញ អំពីទំនាក់ទំនងជាមួយប្រទេសកម្ពុជា ខណៈសហភាពអឺរ៉ុបកំពុងពិចារណាដាក់ទណ្ឌកម្មដែលឈានទៅបញ្ឈប់ការអនុគ្រោះពន្ធពីកម្ពុជា ប្រសិនណាបើគណបក្សសង្គ្រោះជាតិត្រូវបានរំលាយមែននោះ។
ចៅសង្កាត់បក្សប្រឆាំងមួយរូបទៀត នៃសង្កាត់សាលាកំរើក ក្រុងសៀមរាប លោក ជិន សុខង៉េង ថ្លែងថា លោកនឹងមិនចូលរួមជាមួយបក្សកាន់អំណាចបានឡើយ។ លោកថា សារនយោបាយរបស់លោក ហ៊ុន សែន នៅពេលនេះគ្រាន់តែចង់បំបាក់ស្មារតីរបស់មន្ត្រីបក្សប្រឆាំងតែប៉ុណ្ណោះ។ ប៉ុន្តែ លោកថា ផ្ទុយទៅវិញ ថ្នាក់ដឹកនាំ និងមន្ត្រីរបស់ពួកគេរឹតតែរឹងមាំ និងបង្រួបបង្រួមគ្នាទៅវិញទេ៖ «ព្រោះថាយើងមិនគិតអ្វី ដែលគេកំពុងបង្កើតព្រឹត្តិការណ៍រាល់ថ្ងៃនឹងទេ។ រឿងដែលយើងគិត ទី១ ធ្វើម៉េចឲ្យពលរដ្ឋមានសិទ្ធិសេរីភាពគ្រប់គ្រាន់។ ទី២ ឲ្យពលរដ្ឋក្នុងមូលដ្ឋាន មានឈ្មោះបោះឆ្នោតក្នុងបញ្ជីឈ្មោះបោះឆ្នោត។ ទី១ ដោះស្រាយបញ្ហានានាជូនប្រជាពលរដ្ឋ។ យើងខ្ញុំអត់មានពេលវេលាគិតគូររឿងចែកអាសនៈ ឬចង់រត់ចូលទៅគណបក្សណាទេ។ យើងខ្ញុំចំណាយពេលវេលាមានតម្លៃជូនពលរដ្ឋនៅមូលដ្ឋាន។»
ទោះយ៉ាងណាក៏ដោយ ក្រោយលោក ហ៊ុន សែន បញ្ចេញសារភ្លាមៗ តំណាងរាស្ត្រគណបក្សសង្គ្រោះជាតិមណ្ឌលព្រៃវែងមួយរូប បានប្រកាសចុះចូលជាមួយបក្សកាន់អំណាច។ សារព័ត៌មានស្និទ្ធនឹងរដ្ឋាភិបាលដដែល បានចុះផ្សាយនៅរសៀលនេះ ថា តំណាងរាស្ត្ររូបនោះគឺលោក ឡុង ប៊ុន្នី សុំចូលជាសមាជិកគណបក្សប្រជាជនកម្ពុជា ក្រោយលោកដឹងថា ប្រធានបក្សខ្លួនគឺលោក កឹម សុខា ក្បត់ជាតិ ដូចការចោទប្រកាន់របស់លោក ហ៊ុន សែន។
ចំណែកមន្ត្រីផ្នែកច្បាប់ និងអង្កេតនៃអង្គការខុមហ្វ្រែល (Comfrel) លោក យឿង សុធារ៉ា ឲ្យដឹងថា ការសម្រេចចុះចូលរបស់មន្ត្រីណាមួយរបស់បក្សប្រឆាំងនៅពេលនេះ ជាដំណាក់កាលនៃការសម្រេចចិត្តផ្ទាល់ខ្លួនរបស់បុគ្គលម្នាក់ៗ។ ប៉ុន្តែលោកយល់ថា បើការចុះចូលនោះ ដោយការកៀបសង្កត់តាមផ្នែកណាមួយ នឹងពុំមែនជាការប្រកួតប្រជែងដោយស្មើភាពឡើយ៖ «បើពួកគាត់ចុះចូលជាមួយបក្សកាន់អំណាច ជាសិទ្ធិសេរីភាពរបស់ពួកគាត់ ប៉ុន្តែវាធ្វើគណបក្សប្រឆាំងកាន់តែបាក់បែកសាមគ្គីផ្ទៃក្នុងរបស់គណបក្សកាន់តែខ្លាំង។»
គណបក្សប្រឆាំងកំពុងរងសម្ពាធយ៉ាងខ្លាំងពីគណបក្សកាន់អំណាច ដែលប៉ុនប៉ងរំលាយបក្សនេះ ហើយយកអាសនៈរបស់ពួកគេទៅចែកឲ្យគណបក្សដែលគ្មានអាសនៈក្នុងរដ្ឋសភា ក្រោយពីលោកនាយករដ្ឋមន្ត្រី ហ៊ុន សែន បានចោទលោក កឹម សុខា ក្នុងអំពើឃុបឃិតជាមួយបរទេស ដើម្បីផ្ដួលរំលំរដ្ឋាភិបាល។ ប៉ុន្តែ សហភាពអន្តរសភា ថា វីដេអូឃ្លីបអំពីសុន្ទរកថារបស់លោក កឹម សុខា កាលពីឆ្នាំ២០១៣ ដែលរដ្ឋាភិបាលយកមកប្រើប្រាស់ជាភស្តុតាងដាក់បន្ទុកលោក កឹម សុខា ពុំមានខ្លឹមសារណាមួយទាល់តែសោះ ដែលអាចចាត់ទុកថា លោក កឹម សុខា បានប្រព្រឹត្តិបទល្មើសឧក្រិដ្ឋ ឬចំណុចណាមួយ ដែលថាលោក កឹម សុខា បានញុះញង់ឲ្យមានការស្អប់ខ្ពើម ឬប្រើប្រាស់អំពើហិង្សា ឬពាក្យពេចន៍ប្រមាថ បង្ខូចកេរ្តិ៍ឈ្មោះឡើយ។ សហភាពអន្តរសភាបន្តថា លោក កឹម សុខា បានគូសបញ្ជាក់យ៉ាងច្បាស់ណាស់ថា លោកមានគោលបំណងក្នុងការនាំមកនូវការផ្លាស់ប្តូរផ្នែកនយោបាយតាមរយៈការឈ្នះការបោះឆ្នោតតែប៉ុណ្ណោះ៕
No comments:
Post a Comment