 |
| គំនរឈើដែលដឹកពីប្រទេសកម្ពុជា ទៅស្តុកទុកនៅប្រទេសវៀតណាម កាលពីខែមីនា ឆ្នាំ២០១៧។ Photo courtesy of EIA |
«ក្បូនរថយន្ត ដឹកឈើ តាមរថយន្ត សាំងយ៉ុង ដូចដង្ហែ កឋិន ពីស្ទឹងត្រែង ទៅក្រចេះ គ្មាន ការបង្រ្កាប»
RFA / វិទ្យុ អាស៊ី សេរី | ១៩ មិថុនា ២០១៨
ជនជាតិដើមភាគតិចកួយ រស់នៅជាប់ដងផ្លូវជាតិស្រុកថាឡាបរិវ៉ាត់ ខេត្តស្ទឹងត្រែង អះអាងនៅថ្ងៃទី ១៨ មិថុនាថា ជារៀងរាល់យប់ មានរថយន្តសាំងយ៉ុង ដឹកឈើខុសច្បាប់ដូចដង្ហែកឋិន គ្មានការបង្ក្រាប។ រីឯសមត្ថកិច្ច និងមន្ត្រីរដ្ឋបាលព្រៃឈើដែលប្រចាំការនៅតំបន់នោះ អង្គុយកាក់ចាំយកលុយពីឈ្មួញឈើជាថ្នូរមិនអនុវត្តច្បាប់។ ពលរដ្ឋរិះគន់ថា សមត្ថកិច្ចខ្លះ មិនត្រឹមតែទទួលសំណូកពីបទល្មើសព្រៃឈើទេ បែរជាយកតួនាទី កាងបទល្មើសគេចពីសំណាញ់ច្បាប់។
ជនជាតិដើមភាគតិចរស់នៅជាប់ផ្លូវជាតិ នៅស្រុកថាឡាបរិវ៉ាត់ ខេត្តស្ទឹងត្រែង ថ្លែងមិនហ៊ានបញ្ចេញឈ្មោះ ឲ្យដឹងថា ក្នុងមួយយប់ មានរថយន្តសាំងយ៉ុងដឹកឈើចាប់ពី ១០គ្រឿងឡើងទៅ ក្នុងមួយរថយន្តផ្ទុកឈើ ៧ម៉ែត្រគូបឡើងទៅ ដែលគេដឹកចេញពី ស្រុកថាឡាបរិវ៉ាត់ និង ស្រុកឆែបខេត្តព្រះវិហារ ឆ្ពោះទៅខេត្តក្រចេះ។ លោកបញ្ជាក់ថា រថយន្តសាំងយ៉ុងទាំងនោះ ដឹកជញ្ជូនឈើដែលគេប្រមូលពី តំបន់ព្រៃអភិរក្សក្នុងស្រុកថាឡាបរិវ៉ាត់ ព្រៃសហគមន៍ដែនជម្រកសត្វ តំបន់ព្រៃឡង់ និង ដឹកចេញពីស្រុកមួយចំនួន ក្នុងខេត្តព្រះវិហារ៖ «មួយយប់ដឹកឈើ បើសិនប្រៀបជាកឋិន កឋិនទានពេលយប់គេសម្រាកខ្លះ ដឹកឈើអត់មានសម្រាកទេដឹកដល់ព្រឹកហ្មង ឡានសាំងយ៉ុង។ រថយន្តសាំងដឹកកង់ពីរៗក្រោយ ដឹកទាបបំផុត ៥ម៉ែត្រគួប។ សមត្ថកិច្ចអត់បង្ក្រាបទេ សមត្ថកិច្ចមានមេព្រៃ ជំនាញគាត់បង្ក្រាបបទល្មើសព្រៃឈើ តែគាត់អង្គុយការិយាល័យគាត់ លុយចូលទៅហ្មង»។
កាលពីពេលថ្មីៗនេះ កាសែតក្នុងស្រុកចុះផ្សាយថា នគរបាល ប្រឆាំងបទល្មើសសេដ្ឋកិច្ចក្រសួងមហាផ្ទៃប្រចាំការខេត្តស្ទឹងត្រែង ឈ្មោះ ហែម សុមុនី ហៅម៉ៅ បានប្រើអំណាច ជានគរបាល កាងបទល្មើសព្រៃឈើខុសច្បាប់ បណ្ដោយឲ្យឈ្មួញដឹកជញ្ជូនឈើពេញទំហឹង។ លើសពីនេះ ក្នុងមួយយប់ៗមានរថយន្តសាំងយ៉ុង និងរថយន្តឡង់គ្រឺស័រជាដើម ដឹកឈើពីស្រុកសៀមប៉ាង ឆ្លងកាត់ក្រុងស្ទឹងត្រែង ជិត ២០គ្រឿងក្នុងមួយយប់។ មន្ត្រីនគរបាលនៃក្រសួងមហាផ្ទៃរូបនោះ ជាអ្នករត់ការសម្របសម្រួលជាមួយមន្ត្រីជំនាញ និងសមត្ថកិច្ចតាមដងផ្លូវ ដោយមានការបែងចែកផលប្រយោជន៍ ឬសូកប៉ាន់ ប្រព្រឹត្តអំពើពុករលួយជាប្រចាំក្នុងខេត្តស្ទឹងត្រែង៕
No comments:
Post a Comment