បក្សប្រឆាំង ចង់រួមគ្នា ជាមួយ ភាគីពាក់ព័ន្ធ ដោះស្រាយ បញ្ហានយោបាយ
វិទ្យុអាស៊ីសេរី | ២៧ ធ្នូ ២០១៣
លោក សម រង្ស៊ី ប្រធានគណបក្សសង្គ្រោះជាតិ (ស្ដាំ) និងលោក កឹម សុខា អនុប្រធានគណបក្សសង្គ្រោះជាតិ ថ្លែងក្នុងសន្និសីទកាសែតនាទីស្នាក់ការកណ្ដាលគណបក្សសង្គ្រោះជាតិ នៅព្រឹកថ្ងៃទី២៨ ខែធ្នូ ឆ្នាំ២០១៣។
RFA/Vann Vichar
មដឹកនាំគណបក្សសង្គ្រោះជាតិ ស្វែងរកដំណោះស្រាយនយោបាយតាមរយៈការជួបចរចាជាទ្រង់ទ្រាយធំជាមួយគណបក្សប្រជាជនកម្ពុជា នៅដើមឆ្នាំ២០១៤ ខាងមុខនេះ។
ក្នុងសន្និសីទកាសែតរបស់គណបក្សសង្គ្រោះជាតិ នៅព្រឹកថ្ងៃទី២៨ ខែធ្នូ ប្រធានគណបក្សសង្គ្រោះជាតិ លោក សម រង្ស៉ី បានថ្លែងសារជូនពរឆ្នាំថ្មីទៅកាន់គូបដិបក្ខនយោបាយ លោកនាយករដ្ឋមន្ត្រី ហ៊ុន សែន។
លោកបញ្ជាក់ថា គណបក្សប្រឆាំងស្នើឲ្យគ្រប់ភាគីទាំងអស់រួមមានតំណាងសហជីព អង្គការការពារសិទ្ធិមនុស្ស សង្គមស៊ីវិលឃ្លាំមើលដំណើរការបោះឆ្នោត តំណាងប្រជាពលរដ្ឋមានបញ្ហានានា រួមទាំងគណបក្សជាប់ឆ្នោតទាំងពីរ បើកកិច្ចពិភាក្សាផ្លាស់ប្ដូរយោបល់មួយឈានទៅជំរុញការអនុវត្តលទ្ធិប្រជាធិបតេយ្យឲ្យបានពេញលេញ។ ជំនួបទាំងនេះ នឹងពិភាក្សាលើបញ្ហាជាតិសំខាន់ៗ រួមមាន ដំណើរការបោះឆ្នោត បញ្ហាសិទ្ធិមនុស្ស បញ្ហាដីធ្លី បញ្ហាពុករលួយ មធ្យោបាយក្នុងការដំឡើងប្រាក់ខែជូនមន្ត្រីរាជការ និងកម្មករ។
នៅពេលដែលអ្នកកាសែតសួរថា បើសិនជាគណបក្សប្រជាជនកម្ពុជា ដែលកាន់អំណាចមិនព្រម តើបក្សប្រឆាំងនឹងធ្វើអ្វីបន្តទៀត? លោក សម រង្ស៉ី តបថា គណបក្សប្រឆាំងជឿថា លោក ហ៊ុន សែន នឹងយកបញ្ហាជាតិជាធំ ហើយក៏ប្រហែលជាមិនចង់ឲ្យប្រទេសជាតិធ្លាក់ចូលក្នុងគ្រោះមហន្តរាយនោះទេ។
«សំឡេង»
ចំណែកឯ លោក កឹម សុខា វិញព្រមានថា ប្រទេសកម្ពុជា កំពុងស្ថិតនៅមាត់ជ្រោះនៃភាពវឹកវរ ខណៈការតវ៉ារបស់ក្រុមបាតុករមកពីច្រើនវិស័យ កំពុងតែមានសន្ទុះខ្លាំងក្លានោះ។ លោកបន្តថា អាជ្ញាធរមិនអាចមើលស្រាលទឹកចិត្តពលរដ្ឋដែលចង់បានដំណោះស្រាយឡើយ ព្រោះបាតុករទាំងនោះកំពុងរងនូវអំពើអយុត្តិធម៌ ហើយទឹកចិត្តកំពុងតែពុះកញ្ជ្រោល។
«សំឡេង»
ទាក់ទិននឹងបញ្ហានេះ សមាជិកគណៈកម្មាធិការអចិន្ត្រៃយ៍របស់គណបក្សប្រជាជនកម្ពុជា និងជារដ្ឋមន្ត្រីក្រសួងមហាផ្ទៃ លោក ស ខេង នៅព្រឹកថ្ងៃទី២៨ ខែធ្នូ ថ្លែងប្រាប់អ្នកកាសែតថា គណបក្សប្រជាជនកម្ពុជា នៅតែបើកចំហសម្រាប់ការចរចាផ្នែកនយោបាយជាមួយបក្សប្រឆាំង ប៉ុន្តែបក្សប្រឆាំងទៅវិញទេ ដែលបានបិទផ្លូវចរចា។ លោកបញ្ជាក់ថា គណបក្សទាំងពីរមានយន្តការសម្រាប់ចរចារួចហើយ។ ប៉ុន្តែ លោក ស ខេង បដិសេធមិនធ្វើអត្ថាធិប្បាយចំពោះស្ថានការណ៍នយោបាយពេលសព្វថ្ងៃនេះឡើយ។
ទោះយ៉ាងណាក៏ដោយ មន្ត្រីសាលារាជធានីភ្នំពេញ និងមន្ត្រីរបស់គណបក្សប្រជាជនកម្ពុជា បានរិះគន់គណបក្សប្រឆាំងជារឿយៗតាំងពីពេលដែលបក្សប្រឆាំងចាប់ផ្ដើមធ្វើបាតុកម្មជាលើកដំបូង។ នៅមួយសប្ដាហ៍ចុងក្រោយនេះ ក្រុមកម្មកររាប់ម៉ឺននាក់បានធ្វើកូដកម្ម ដោយទាមទារដំឡើងប្រាក់ខែគោលឲ្យបាន ១៦០ដុល្លារ ដោយក្រុមកម្មករបានបិទផ្លូវជាតិមួយចំនួន ដើម្បីបង្ហាញពីការមិនសុខចិត្ត។
ទន្ទឹមនឹងនោះ សមាគមអ្នកប្រជាធិបតេយ្យរបស់ លោក ម៉ម សុណង់ដូ និងសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធរបស់ លោក វន់ ពៅ ក៏បានប្រកាសធ្វើបាតុកម្មក្នុងបំណងផ្សេងគ្នាដែរ។ លោក ម៉ម សុណង់ដូ ទាមទារក្រសួងព័ត៌មាន ឲ្យអនុញ្ញាតបង្កើតស្ថានីយទូរទស្សន៍ឯករាជ្យ និងបង្កើតស្ថានីយវិទ្យុផ្សាយបន្តទៅតាមខេត្ត។ ក្រុមម៉ូតូឌុប និងម៉ូតូកង់បីរបស់ លោក វន់ ពៅ ធ្វើបាតុកម្មបញ្ចុះតម្លៃប្រេងសាំងឲ្យនៅត្រឹម ៤ពាន់រៀលក្នុង១លីត្រ។
និស្សិតកំពុងរៀនថ្នាក់អនុបណ្ឌិតផ្នែកទំនាក់ទំនងអន្តរជាតិ និងជាអ្នកសរសេរអត្ថបទទស្សនៈវិភាគនយោបាយលើទំព័រកាសែត លោក សូ សមយុទ្ធ មានប្រសាសន៍ថា បាតុកម្មផ្ទុះឡើងពីគ្រប់ភាគីសព្វថ្ងៃនេះ ជាលទ្ធផលដែលគណបក្សកាន់អំណាចមើលរំលងកម្លាំងមហាជន និងសន្ទុះនៃការប្រមូលកម្លាំងមហាជនរបស់បក្សសង្គ្រោះជាតិ ពីចំណោមមនុស្សបីក្រុម គឺក្រុមពលរដ្ឋរងនូវអំពើអយុត្តិធម៌ ក្រុមយុវជន និងក្រុមកម្មករ។ ហើយទៅថ្ងៃមុខ បក្សប្រឆាំងនឹងប្រមូលក្រុមអាជីវករ គ្រូបង្រៀន មន្ត្រីរាជការ និងក្រុមប្រដាប់អាវុធ ដើម្បីធ្វើបាតុកម្មទៀត។ លោកបន្ថែមថា បើសិនជាបាតុកម្មកាន់តែធំនោះ បក្សកាន់អំណាចមានជម្រើសតែពីរគត់ គឺទី១ បង្កើតដៃទី៣ ដើម្បីបន្ថយឥទ្ធិពលបាតុកម្ម និងទី២ គឺបំបែកបាតុកម្មដោយហិង្សា។ តែបើបន្ថយកម្លាំងបាតុករមិនបាននោះ មហន្តរាយនឹងមានដល់បក្សកាន់អំណាចខ្លួនឯងវិញ និងដល់ជាតិទាំងមូល។ លោកបញ្ជាក់ថា គណបក្សជាប់ឆ្នោតទាំងពីរត្រូវតែអង្គុយចុះ ចរចាគ្នាដោយភាពស្មោះត្រង់។
«សំឡេង»
បាតុកម្មរបស់គណបក្សប្រឆាំងបានអូសបន្លាយជាង ១០ថ្ងៃមកហើយ។ មេដឹកនាំបក្សប្រឆាំង បានបញ្ជាក់ថា បាតុកម្មនេះជាការត្រួសត្រាយផ្លូវសម្រាប់ពលរដ្ឋខ្មែរ ឲ្យហ៊ានតវ៉ា និងរិះគន់នូវទង្វើអយុត្តិធម៌ក្នុងសង្គម ដែលបណ្ដាលមកពីអនុវត្តការងាររបស់រដ្ឋាភិបាល និងជាការបណ្ដុះមនសិការជាតិនិយម។
កន្លងទៅ ភាគីប្រទេសមួយចំនួនដែលប្រកាន់យកលទ្ធិប្រជាធិបតេយ្យ ដូចជា ជប៉ុន អូស្ត្រាលី សហរដ្ឋអាមេរិក សហគមន៍អឺរ៉ុប មិនទាន់បានចេញសេចក្តីថ្លែងការណ៍ទទួលស្គាល់លទ្ធផលបោះឆ្នោតទេ និងថែមទាំងបានស្នើឲ្យបក្សជាប់ឆ្នោតទាំងពីរ អង្គុយតុចរចាទៀតផង។ ថ្នាក់ដឹកនាំបក្សទាំងពីរ បានចរចាគ្នាចំនួនពីរថ្ងៃជាប់ៗគ្នា កាលពីខែកញ្ញា ប៉ុន្តែនៅតែមិនត្រូវរ៉ូវគ្នា ហើយក៏មិនទាន់មានសញ្ញាពីការចរចាគ្នាជាថ្មីដែរ៕
No comments:
Post a Comment