គណបក្ស សង្គ្រោះជាតិ៖ មិនមាន ការលុបចោល គម្រោង ជួបសំណេះសំណាល ជាមួយពលរដ្ឋ ទៀតទេ
ដោយ៖ ជន ស្រីណុច / វិទ្យុ វីអូឌី | ថ្ងៃពុធ ទី22 ខែមករា ឆ្នាំ2014
លោកកឹម សុខា អនុប្រធានគណបក្សសង្គ្រោះជាតិ ថ្លែងនៅក្នុងពិធីរំលឹកខួបសពលោកជា វិជ្ជា នៅថ្ងៃទី២២ខែមករា (រូបថត តាត ឧត្តម)
ថ្នាក់ដឹកនាំគណបក្សសង្គ្រោះជាតិ អះអាងថា នឹងមិនមានការលើកពេលចុះជួបសំណេះសំណាល ជាមួយពលរដ្ឋនៅតាមមូលដ្ឋានទៀតទេ ប្រសិនបើមានដូចករណីកើតឡើងដូចនៅឃុំត្រើយស្លា កាលពីរសៀលថ្ងៃអង្គារម្សិលមិញ ខ្លួននឹងរាយការណ៍ទៅអន្តរជាតិឲ្យបានដឹង ពីទង្វើរបស់មនុស្សក្រោមឱវាទលោកហ៊ុន សែន។
គណបក្សសង្គ្រោះជាតិបានលើកពេលជួបសួរសុខទុក្ខប្រជាពលរដ្ឋ នៅឃុំត្រើយស្លា ស្រុកស្អាង ខេត្តកណ្តាល នៅល្ងាចថ្ងៃអង្គារម្សិលមិញ បន្ទាប់ពីដឹងថា សមត្ថកិច្ចរាប់រយនាក់ ត្រៀមរារាំង ការជួបសំណេះសំណាលនោះ។
អនុប្រធានគណបក្សសង្គ្រោះជាតិ លោក កឹម សុខា ប្រាប់VOD នៅព្រឹកថ្ងៃពុធ នេះថា គណបក្សរបស់លោក នៅតែបន្តជួបសំណេះសំណាល ជាមួយប្រជាពលរដ្ឋតាមបណ្តាខេត្តផ្សេងៗទៀត បើទោះបីជាមានការរារាំងបែបណាក៏ដោយ។ លោកបន្តថា ការដែលគណបក្សសង្គ្រោះជាតិ លើកពេលកាលពីម្សិលមិញ មិនមែនបង្ហាញពីភាពកំសោយរបស់គណបក្សលោកទេ ផ្ទុយទៅវិញកាន់តែបញ្ជាក់ថា រដ្ឋាភិបាលលោកហ៊ុន សែន កាន់តែខ្សោយទៅៗ។
អ្នកវិភាគនយោបាយ លោក សុខ ទូច មានប្រសាសន៍ថា នេះជារឿងមួយដែលទទួលបានប្រសិទ្ធភាព បន្ទាប់ពីលោកនាយករដ្ឋមន្ត្រី ហ៊ុន សែន បានធ្វើសេចក្តីថ្លែងការណ៍ទៅអ្នកគាំទ្រខ្លួន កាលពីពេលថ្មីៗនៅខេត្តក្រចេះ។ លោកបន្តថា ការដែលគណបក្សសង្គ្រោះជាតិ ចេះគិតមិនតបតដោយអំពើហិង្សាបែបនេះ គឺជាចំណុចល្អ ប៉ុន្តែក៏ជាកំសោយមួយរបស់បក្សប្រឆាំងដែរ នៅពេលដែលឃើញសត្រូវចូលជិតភ្លាម មិនទាន់សិក្សាឲ្យបានច្បាស់ផង ថាជាប្រជាពលរដ្ឋ ឬកងកម្លាំងជាតិ ក៏នាំគ្នារត់គេចអស់ ដោយមិនព្រមប្រឈមនឹងការពិត។ លោកបន្ថែមថាប្រសិនបើគណបក្សប្រជាជនកម្ពុជាប្រើកងកម្លាំងមកដូច្នេះមែន គឺជារឿងដែលខុសច្បាប់។
ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការ ភូមិកុមារ អេស អូ អេស ខេត្តក្រចេះ នៅព្រឹកថ្ងៃទី១៨ ខែមករានេះ ប្រមុខរដ្ឋាភិបាល លោក ហ៊ុន សែន មានប្រសាសន៍ថា ដើម្បីរក្សាប្រក្រតីភាពនៃជីវភាពរស់នៅរបស់ប្រជាពលរដ្ឋខ្មែរ ដោះស្រាយវិបត្តិសេដ្ឋកិច្ច និងសង្គម ក្នុងគោលដៅដំណើរការគ្រប់គ្រងរដ្ឋស្របតាមរដ្ឋធម្មនុញ្ញ រដ្ឋាភិបាល នឹងចាត់រាល់វិធានការ បង្ក្រាបលើរាល់សកម្មភាព ដែលមានលក្ខណៈប្រឆាំងនឹងរដ្ឋធម្មនុញ្ញ។
កាលពីម្សិលមិញអ្នកនាំពាក្យក្រសួងមហាផ្ទៃលោក ខៀវ សុភ័គ មានប្រសាសន៍ថា លោកមិនដឹង ពីការត្រៀមដាក់កម្លាំងសមត្ថកិច្ចរារាំងលោក សម រង្ស៊ី នោះទេ។ លោកបង្វែរសំណួរអ្នកសារព័ត៌មាន ឲ្យទៅសួរអធិការនរគបាលស្រុកស្អាង។ VOD មិនអាចសុំការបំភ្លឺពីអធិការនរគបាលស្រុកស្អាង លោក សេង សុជាតិ បានទេ៕
No comments:
Post a Comment