ថ្ងៃទី 22 មករា 2014 | ដោយ: លី សិលា / CEN
ភ្នំពេញ: ក្រុមសមាគម និងអង្គការសង្គមស៊ីវិលជាតិ-អន្តរជាតិ សរុបចំនួន ១៨១ ស្ថាប័ន បានរួមគ្នា ធ្វើញត្តិ ហើយគ្រោងនឹងយកទៅដាក់ តាមស្ថានទូតបរទេសនានា ចាប់ពីថ្ងៃទី២៣ ដល់ថ្ងៃទី២៤ ខែមករា ឆ្នាំ២០១៤។ ញត្តិទៅកាន់ស្ថានទូតនោះ ដើម្បីសុំអន្តរាគមន៍ ឲ្យរដ្ឋាភិបាល បញ្ឈប់អំពើហិង្សា អំពាវនាវឲ្យមានការដោះលែង ការស៊ើបអង្កេត និងផ្តល់សំណង ដល់ជនរងគ្រោះ ក្នុងអំពើបង្ក្រាបបាតុកម្ម កម្មករកាត់ដេរ កាលពីថ្ងៃទី២ និងថ្ងៃទី៣ មករា។
សេចក្តីប្រកាសព័ត៌មាន បានលើកឡើងថា ញត្តិដូចគ្នានេះ ត្រូវបានសហគមន៍ដីធ្លី និងសហគមន៍សិទ្ធិមនុស្ស នាំយកទៅដាក់ នៅស្ថានទូតអាមេរិក បារាំង និងស្ថានទូតអង់គ្លេស កាលពីព្រឹកថ្ងៃទី២១ មករា ហើយមានការឃាត់ខ្លួន មួយរយៈខ្លី នូវមនុស្សចំនួន ១១ នាក់។
ក្រុមសង្គមស៊ីវិល ក៏បានប្រកាសថា យុទ្ធនាការដាក់ញត្តិដដែលនេះ នឹងធ្វើឡើងម្តងទៀត ទៅកាន់ដៃគូអភិវឌ្ឍន៍ ឬម្ចាស់ជំនួយ នៅថ្ងៃទី២៣ មករា ថ្ងៃទី២៤ មករា និងថ្ងៃទី២៧ ព្រមទាំងថ្ងៃទី២៨ មករា។ ក្នុងនោះ នៅថ្ងៃទី២៣ មករា គឺចាប់ផ្តើមដាក់ញត្តិ នៅព្រឹកម៉ោង ៨ និង ៣០ នាទី នៅស្ថានទូតអាល្លឺម៉ង់ បន្ទាប់មកទៅទូតកូរ៉េខាងត្បូង ទូតអូស្ត្រាលី ទូតថៃ និងទូតភូមា៕
No comments:
Post a Comment