កម្មករ ប្រមាណ ១០០០នាក់ មកពី ១០រោងចក្រ តវ៉ា បិទកំណាត់ផ្លូវជាតិលេខ២
ដោយ៖ សុទ្ធ គឹមសឿន / វិទ្យុ វីអូឌី | ថ្ងៃព្រហស្បតិ៍ ទី2 ខែមករា ឆ្នាំ2014
កម្មករប្រមាណ ១០០០នាក់ មកពី១០រោងចក្រ នៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ បានបិទកំណាត់ផ្លូវជាតិលេខ២ ដើម្បីទាមទារឲ្យថៅកែ និងរដ្ឋាភិបាលដំឡើងប្រាក់ឈ្នួល ១៦០ដុល្លារក្នុងមួយខែ។
កម្មការិនីរោងចក្រផាកវ៉េ ឈ្មោះ ស្រីម៉ៅ បានឲ្យដឹងថា នៅម៉ោងប្រមាណជាង ៩ព្រឹកថ្ងៃទី០២ ខែមករានេះ កម្មករប្រមាណ ១០០០នាក់ មកពីប្រមាណ១០រោងចក្រ បាននាំបិទកំណាត់ផ្លូវជាតិលេខពីរ ត្រង់ចំណុចមុខសាកលវិទ្យាល័យអាយអាយស៊ី ដើម្បីទាមទារឲ្យថៅកែរោងចក្រ និងរដ្ឋាភិបាលដំឡើងប្រាក់ឈ្នួលដល់កម្មករចំនួន ១៦០ដុល្លារក្នុងមួយខែ។ បើតាមកម្មការិនី ស្រីម៉ៅ រហូតមកដល់ម៉ោង ១០ព្រឹកនេះ នៅមិនទាន់មានមន្ត្រីពាក់ព័ន្ធ ចេញមុខទៅដោះស្រាយនៅឡើយទេ ហើយកម្មករនៅបន្តបិទផ្លូវនៅឡើយ។
ភាគីតំណាងកម្មករ ក្រសួងការងារ និងតំណាងសមាគមរោងចក្រកាត់ដេរកម្ពុជា បានជួបគ្នាជាញឹកញាប់ ពិភាក្សាពីការដំឡើងប្រាក់ឈ្នូល ដោយតំណាងកម្មករទាមទារឲ្យឡើងដល់១៦០ដុល្លារ តែខាងតំណាងរោងចក្រយល់ព្រមដំឡើងឲ្យតែ ៩៥ដុល្លារ ទើបនាំឲ្យមានការផ្ទុះការតវ៉ាឡើង។ កាលពីថ្ងៃដើមសប្តាហ៍នេះ រដ្ឋាភិបាលបានប្រកាសបន្ថែមប្រាក់ឈ្នួល ៥ដុល្លារទៀត ដែលមានន័យថា កម្មករនឹងទទួលបានប្រាក់ឈ្នួល១០០ដុល្លារ ចាប់ពីខែកុម្ភៈ ឆ្នាំ២០១៤។ រាជរដ្ឋាភិបាល មានយន្តការដំឡើងប្រាក់ឈ្នួលចំនួន១៥ដុល្លារ នៅឆ្នាំ២០១៥ នៅឆ្នាំ២០១៦ ត្រូវដំឡើងចំនួន១៦ដុល្លារ ឆ្នាំ២០១៧ ត្រូវដំឡើងចំនួន១៧ដុល្លារ និងឆ្នាំ២០១៨ ត្រូវដំឡើង១៧ដុល្លារ៕
No comments:
Post a Comment