លោក សម រង្ស៊ី សន្យា យកករណី ដំឡើងប្រាក់ខែ ទៅចរចា ជាមួយ គណបក្សប្រជាជនកម្ពុជា
ដោយ៖ នួន បូរិន / វិទ្យុ វីអូឌី | ថ្ងៃព្រហស្បតិ៍ ទី2 ខែមករា ឆ្នាំ2014
ប្រធានគណបក្សសង្គ្រោះជាតិ សន្យាថានឹងជួយកម្មករឲ្យបានតាមការទាមទារជាមុនសិន ទើបការចរចារឿងករណីផ្សេងទៀតអាចប្រព្រឹត្តទៅបាន ដោយចាត់ទុកថាជាអាទិភាពនៃការចាប់ផ្ដើមការចរចា។
លោក សម រង្ស៊ី ប្រធានគណបក្សសង្គ្រោះជាតិ បានថ្លែងដូចនេះ នៅចំពោះហ្វូងមនុស្សរាប់ពាន់នាក់ ដែលបានមកស្ដាប់លោកនៅទីលានប្រជាធិបតេយ្យ កាលពីយប់ថ្ងៃទី១ ខែមករា ឆ្នាំ២០១៤។
នៅក្នុងឱកាសនោះ លោក សម រង្ស៊ី បានបញ្ជាក់ថា ក្នុងនាមលោកជាមេដឹកនាំគណបក្សមួយឈ្នះឆ្នោត គឺលោកត្រូវជួយដោះស្រាយករណីប្រាក់ឈ្នួលពលកម្មរបស់កម្មករ ឲ្យបាន១៦០ដុល្លារជាមុនសិន ទើបការចរចាផ្សេងៗទៀតអាចប្រព្រឹត្តទៅបានតាមការគ្រោងទុក។ លោកបន្តថា រឿងកម្មករគឺជារឿងរបស់គណបក្សរបស់លោក ដែលត្រូវចាត់ទុកជាអាទិភាពមួយនាពេលនេះ។
សូមជម្រាបថា បន្ទាប់ពីការតវ៉ារយៈពេលមួយសប្តាហ៍ ចាប់ពីថ្ងៃទី២៥ ខែធ្នូ ឆ្នាំ២០១៣ រដ្ឋាភិបាលបានសម្រេចដំឡើងប្រាក់ឈ្នួល៥ដុល្លារទៀត បន្ថែមលើ៩៥ដុល្លារ ដែលជាហេតុធ្វើឲ្យកម្មករ នឹងទទួលបាន១០០ដុល្លារ សម្រាប់ប្រាក់ឈ្នួល ដែលនឹងត្រូវអនុវត្តចាប់ផ្តើមចាប់ពីដើមខែកុម្ភៈ ឆ្នាំ២០១៤។ ប៉ុន្តែការដំឡើងនេះ ត្រូវបានកម្មករ និងសហជីព ធំៗចំនួន៦ បានបដិសេធ ហើយបានបន្តធ្វើកូដកម្ម បាតុកម្ម នៅថ្ងៃនេះទៀត៕
No comments:
Post a Comment