| Village life in Prey Veng (Photo: Internet) |
ពលរដ្ឋ នៅព្រៃវែង ចោទក្រុមហ៊ុន នាំពលករ ទៅធ្វើការ នៅថៃ ថា, បោកប្រាស់លុយ
RFA | 14 Jan. 2014
មន្ត្រី របស់ ក្រុមហ៊ុន អះអាងថា, ខ្លួន គ្មានចេតនា បោកប្រជាពលរដ្ឋ នោះទេ។ ប៉ុន្តែ ការយឺតយ៉ាវ មិនបញ្ជូនពលករ ទៅធ្វើការ តាមពេលកំណត់ ដោយសារ មានបញ្ហា មួយចំនួន នៅប្រទេសថៃ។
ក្រុមប្រជាពលរដ្ឋរៀបរាប់បញ្ជាក់ថា ក្រុមហ៊ុន ទូច ម៉ាណាក់ បានសន្យាជាមួយពួកគាត់នៅពេលបង់ប្រាក់ឲ្យក្រុមហ៊ុននាំទៅធ្វើការ នៅប្រទេសថៃ ដោយក្រុមហ៊ុនបញ្ជាក់ថា នឹងនាំប្រជាពលករចេញទៅធ្វើការយ៉ាងយូរពី ៣ ទៅ ៥ខែ បន្ទាប់ពីបានបង់ប្រាក់ និងធ្វើកិច្ចសន្យាជាមួយក្រុមហ៊ុនរួចរាល់។ ប៉ុន្តែមកទល់ពេលនេះ ប្រជាពលករនៅតែមិនទាន់បានចេញទៅនៅឡើយទេ។
ប្រជាពលករម្នាក់ឈ្មោះ លោក សោម យ៉ាន រស់នៅភូមិប្រហ៊ា នៃឃុំជ្រៃ ស្រុកស្វាយអន្ទរ ថ្លែងបញ្ជាក់នៅថ្ងៃទី១៤ មករា ថា ទាំងរូបលោក និងប្រជាពលករផ្សេងទៀត ដែលបានបង់ប្រាក់ទៅឲ្យក្រុមហ៊ុនរាប់រយនាក់ កំពុងរងទុក្ខលំបាកជំពាក់បំណុលធនាគារ ដោយសារខ្ចីបុលប្រាក់យកទៅបង់ឲ្យក្រុមហ៊ុន ដើម្បីនាំពួកគាត់ចេញទៅធ្វើការនៅប្រទេសថៃ។ លោកបន្តថា នៅពេលដែលប្រជាពលករបានបង់ទៅឲ្យក្រុមហ៊ុនអស់ទៅហើយ បែរជាក្រុមហ៊ុនធ្វើព្រងើយឆ្លើយដោះសារយករួចខ្លួន ដោយពុំបានគិតគូរនាំប្រជាពលករទៅធ្វើការនៅប្រទេសថៃ ទៅវិញ៖ «ខ្លះ ក៏បង់មួយលាន ខ្លះក៏បង់ ១៥០ដុល្លារ ហើយថ្លៃបង់លុយទៅបាត់ហើយ សងជំពាក់គេឲ្យរង់ចាំរហូត។ ខែហ្នឹងគេថាឲ្យរង់ចាំខែក្រោយៗ ដូច្នេះ ការរង់ចាំដូចថា វាអស់សង្ឃឹមមិនដឹង ដូចថាមិនដឹងទៅឯណាមកណីទេ ដល់អ៊ីចឹង។ រង់ចាំៗ ដល់ឥឡូវមិនដឹងគិតថាម៉េច ឥឡូវថាអស់សង្ឃឹមមិនដឹងថាយ៉ាងម៉េចទៀត។»
ស្រដៀងគ្នានេះដែរ ប្រជាពលរដ្ឋមកពីឃុំក្រាំងតាយ៉ង នៃស្រុកពាមជរ ម្នាក់ទៀត អ្នកស្រី ភន ស្រីយ៉េន ថ្លែងបញ្ជាក់ថា អ្នកស្រីបានទៅខ្ចីប្រាក់ពីអ្នកភូមិរៀងរាល់ខែ ដើម្បីយកទៅបង់ថ្លៃការប្រាក់ដែលជំពាក់បំណុល ខណៈខ្ចីយកទៅបង់ឲ្យក្រុមហ៊ុននាំទៅធ្វើការនៅប្រទេសថៃ។ អ្នកស្រីថ្លែងបន្តដោយក្ដីកង្វល់មិនដឹងជាទៅរកប្រាក់ពីណា ដើម្បីយកសងបំណុលគេបាន ហើយប្រាក់ដែលជំពាក់គេពីមួយថ្ងៃទៅមួយថ្ងៃ ប្រាក់ក៏កាន់តែដុះកន្ទុយកើនឡើងជាបន្តបន្ទាប់៖ «អាសាទេ សួរក្រុមហ៊ុនដែរ ប៉ុន្តែក្រុមហ៊ុនគេនៅតែគិតថាបញ្ជូនឈ្មោះឡើងទៅស្រាវជ្រាវឈ្មោះ អីអ៊ីចឹង ស្រាវជ្រាវពួកខ្ញុំធ្វើហ្នឹងឡើងទៅ។ ប៉ុន្តែវាមិនចេះនឹងឃើញទេ ហៅឡើងទៅសោះចាំមើលៗអត់ហ៊ានទៅណាទេបង។ នៅតែផ្ទះ ចាំមើលតែឈ្មោះឡើងទៅហ្នឹង ការងារអីក៏មិនបានឡើងទៅធ្វើចាំតែឈ្មោះហ្នឹង ហើយទៅធ្វើនៅឯណាក៏ហ៊ានទៅដែរ ខ្លាចគេហៅឈ្មោះ តែឥឡូវចាំៗឡើងមួយឆ្នាំហើយ។»
ប្រជាពលរដ្ឋបង់ប្រាក់ទៅក្រុមហ៊ុននាំពលករទៅធ្វើការនៅប្រទេសថៃ ពី ១៥០ ទៅ ២៥០ដុល្លារក្នុងម្នាក់។ ដោយកំណត់នាំពលករចេញទៅធ្វើការក្នុងរយៈពេលពី ៣ ទៅ ៥ខែ។ រហូតមកទល់ពេលនេះ ប្រជាពលរដ្ឋបានបង់ទៅឲ្យក្រុមហ៊ុនជាងមួយឆ្នាំទៅហើយ។ ប៉ុន្តែនៅពុំទាន់មានប្រជាពលករណាម្នាក់បានចេញទៅធ្វើការតាមរយៈ ក្រុមហ៊ុនមួយនេះ តាមកំណត់នៃកិច្ចសន្យានៅឡើយទេ។
ឆ្លើយតបនឹងបញ្ហានេះ អនុប្រធានក្រុមហ៊ុននាំពលករទៅធ្វើការនៅប្រទេសថៃ លោក ស្វាយ ចិនារ៉ូ មានប្រសាសន៍បញ្ជាក់ថា ក្រុមហ៊ុនគ្មានចេតនាបោកប្រាស់ប្រជាពលករនោះទេ។ ប៉ុន្តែការយឺតយ៉ាវពេលវេលា មិនបានបញ្ជូនពលករទៅធ្វើការនៅប្រទេសថៃ តាមកាលកំណត់ដែលបានសន្យាជាមួយប្រជាពលរដ្ឋនោះ ដោយសារមានបញ្ហាមួយចំនួនពាក់ព័ន្ធការដំឡើងប្រាក់ខែរបស់កម្មករទៅ ប្រទេសថៃ ដែលនាំឲ្យមានការកកស្ទះដល់ការនាំពលករខ្មែរទៅធ្វើការនៅប្រទេស ថៃ៖ «ដល់អ៊ីចឹងទៅ វាស្ទះរោងចក្រមួយៗវាធ្វើក៏មានការកកស្ទះដល់ក្រុមហ៊ុនយើងដែរ។ ណាមួយបញ្ហាខាងហ្នឹងដែរ គាត់មានបញ្ហាចុះឡើងៗ ខាងក្រសួងគាត់នៅខាងណោះហ្នឹង គាត់អត់ស៊ីញេឯកសារផ្សេងៗ។ ជួនកាលពេលខ្លះគេរៀបចំរោងចក្រហើយៗ ប៉ុន្តែគេអត់ទាន់ឲ្យយើងចូលរោងចក្រមួយៗ ព្រោះគាត់និយាយថា រឿងឆបោកអត់មានទេថតប៉ាសស្ព័រមានប៉ាសស្ព័រទាំងអស់ ចាំតែថ្ងៃរៀបចំរោងចក្រឲ្យពួកគាត់ ឲ្យពួកគាត់ចូលទេ មិនមែនយកលុយពួកគាត់មកហើយយកមកទុកទាំងអស់ទេ។»
តែយ៉ាងណា ក្រុមប្រជាពលករបង្ហើបឲ្យដឹងថា ពួកគាត់បានព្យាយាមទាក់ទងទៅខាងភាគីក្រុមហ៊ុន ដើម្បីសាកសួរពីបញ្ហាយឺតយ៉ាវនេះជាច្រើនដងរួចមកហើយ ប៉ុន្តែក្រុមហ៊ុនបែរជាបិទទូរស័ព្ទមិនបានពន្យល់ណែនាំអំពីបញ្ហា របស់ខ្លួនដែលយឺតយ៉ាវដល់ប្រជាពលរដ្ឋឡើយ៕
No comments:
Post a Comment