ពលរដ្ឋ និងកម្មករ នៅម្ដុំផ្លូវវេងស្រេង ជំរុញ ឲ្យរដ្ឋាភិបាល និងអង្គការ សង្គមស៊ីវិល ស៊ើបអង្កេត ការបាញ់កម្មករ
ដោយ៖ សុទ្ធ គឹមសឿន និង ពេជ្រ សុធារី / វិទ្យុ វីអូឌី | ថ្ងៃចន្ទ ទី6 ខែមករា ឆ្នាំ2014
ទិដ្ឋភាពនៅការប៉ះទង្គិចគ្នារវាងកម្មករ និងកងសមត្ថកិច្ចនៅផ្លូវវេងស្រេង កាលពីថ្ងៃទី៣ មករា ឆ្នាំ២០១៣ (រូបភាពដោយ តាត ឧត្តម)
ប្រជាពលរដ្ឋ និងកម្មករមួយចំនួន ដែលរស់នៅ និងធ្វើការនៅរោងចក្រ ក្នុងសួន ឧស្សាហកម្មកាណាឌីយ៉ា ផ្លូវវេងស្រេង ជំរុញឲ្យរដ្ឋាភិបាល និងអង្គការសង្គមស៊ីវិល ស៊ើបអង្កេតរកយុត្តិធម៌ដល់ជនរងគ្រោះ ដោយការប៉ះទង្គិចរវាងក្រុមសមត្ថកិច្ច និងក្រុមកម្មករ ខណៈពេលពួកគេធ្វើបាតុកម្មទាមទារដំឡើងប្រាក់ខែ ១៦០ដុល្លារ។
ប្រជាពលរដ្ឋមួយចំនួន ដែលរស់នៅម្ដុំផ្លូវវេងស្រេង និងកម្មករធ្វើការនៅរោងចក្រក្នុងសួនឧស្សាហកម្មកាណាឌីយ៉ា បានអះអាងស្រដៀងគ្នាថា កាលពីរសៀលថ្ងៃទី០២ ខែមករា ក្រុមកម្មករបាននាំគ្នាចាក់ធុងបាស់រាំលេង នៅមុខសួនឧស្សាហកម្មកាណាឌីយ៉ា ដែលជាការតវ៉ាទាមទារដំឡើងប្រាក់ឈ្នួលគោល ១៦០ដុល្លារ ប៉ុន្តែត្រូវបានសមត្ថកិច្ចជាច្រើនរយនាក់ ចុះមកវាយដោយដំបងឆក់ និងប្រើហិង្សាទៅលើក្រុមកម្មករ ហើយឈានទៅដល់ផ្ទុះហិង្សាខ្លាំង នៅថ្ងៃបន្ទាប់។ ពួកគេបន្តថា កម្លាំងសមត្ថកិច្ចមិនគួរប្រើប្រាស់អាវុធបាញ់បង្ក្រាបលើកម្មករដែលគ្រាន់តែតវ៉ាទាមទារប្រាក់ឈ្នួលសមរម្យនោះទេ។ ពួកគេបានអំពាវនាវឲ្យរាជរដ្ឋាភិបាល និងអង្គការជាតិនិងអន្ដរជាតិ ជួយស៊ើបអង្កេត និងរកយុតិ្តធម៌ ជូនជនរងគ្រោះឲ្យបានឆាប់ <<ដោយសារអយុត្តិធម៌ ទើបគាត់ធ្វើអំពើបិទផ្លូវ។ អង្គការប្រទេសក្រៅៗ ដែលជួយខ្មែរយើង ឲ្យជួយជាបន្ទាន់បន្តិចទៅ ព្រោះជនរងគ្រោះនោះក៏ច្រើន អ្នកស្លាប់នោះក៏ច្រើន។ ប្រសិនជាគាត់តាំងចិត្តជានាយករដ្ឋមន្ត្រី មើលការខុសត្រូវប្រជាជនមែន ចង់ឲ្យគាត់ជួយស្រាវជ្រាវរឿងនេះកុំឲ្យ កម្មករស្លាប់ទៅ ដោយអយុត្តិធម៌ពេក>>។
វីអូឌី មិនអាចសុំការឆ្លើយតប ជុំវិញការស្នើឲ្យមានការស៊ើបអង្កេតករណីបាញ់កម្មករ នៅមុខសួនឧស្សាហកម្មកាណាឌីយ៉ា ពីលោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស និងលោក គាត ច័ន្ទថារិទ្ធិ អ្នកនាំពាក្យអគ្គស្នងការដ្ឋាននគរបាលជាតិបានទេ ដោយទូរស័ព្ទចូលពុំមានអ្នកទទួល។
ប្រធានផ្នែកបច្ចេកទេសស៊ើបអង្កេតនៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា រាជរដ្ឋាភិបាល គួរបង្កើតគណៈកម្មការឯករាជ្យមួយ ដើម្បីស៊ើបអង្កេតលើករណីបាញ់សម្លាប់កម្មករនៅមុខសួនឧស្សាហកម្មកាណាឌីយ៉ានេះ ដើម្បីលុបបំបាត់នូវអំពើនិទន្ឌភាពនៅកម្ពុជា <<រដ្ឋាភិបាលត្រូវតែមានការទទួលខុសត្រូវ ហើយនឹងមានបង្កើននូវគណៈកម្មការ ឯករាជ្យ ក្នុងការធ្វើការស៊ើបអង្កេត ឲ្យបានដិតដល់ទៅលើរឿងនេះ ដើម្បីរកឲ្យឃើញឫសគល់ ក៏ដូចជាអ្នកដែលបង្កឲ្យមានមនុស្សស្លាប់ និងរងរបួស យកទៅផ្តន្ទាទោសទៅតាមផ្លូវច្បាប់>>។
កាលពីថ្ងៃទី០៣ខែមករា មានការប៉ះទង្គិចដោយហិង្សាមួយរវាងក្រុមកម្មករដែលមកពីរោងចក្រនានាក្នុងរាជធានីភ្នំពេញ និងកងកម្លាំងប្រដាប់អាវុធ នៅមុខសួនឧស្សាហកម្មកាណាឌីយ៉ា ផ្លូវវេងស្រេង ខណ្ឌពោធិសែនជ័យ រាជធានីភ្នំពេញ បណ្តាលឲ្យកម្មករ ៥នាក់ស្លាប់ និង ជិត៤០នាក់រងរបួស និងកម្មករ១៣នាក់ទៀតត្រូវបានចាប់ខ្លួន៕
No comments:
Post a Comment