លោក វន់ ពៅ និងមនុស្សមួយចំនួនទៀត ត្រូវបានចាប់ខ្លួន
អ្នកនាំពាក្យ កងរាជអាវុធហត្ថ លើផ្ទៃប្រទេស លោក ខេង ទីតូ ឲ្យដឹង នៅថ្ងៃទី២ មករា ថា កងអន្តរាគមន៍ពិសេស ឆត្រយោងលេខ៩១១ បានចាប់ខ្លួន ក្រុមបាតុករ ១៥នាក់ ក្នុងនោះមានព្រះសង្ឃ ៥អង្គ កំពុងឃុំឃាំង នៅបន្ទាយកងឆត្រយោង លេខ៩១១ ដើម្បីសួរចម្លើយ និងរៀបចំ ឯកសារ ដើម្បី បញ្ជូន ទៅតុលាការ។
ដោយ វោហារ ជាតិ / វិទ្យុអាស៊ីសេរី | ០២ មករា ២០១៤
លោកថា ក្នុងចំណោមអ្នកដែលត្រូវគេចាប់ខ្លួននោះ គឺប្រធានសេដ្ឋកិច្ចក្រៅប្រព័ន្ធ លោក វន់ ពៅ និងអ្នកសម្របសម្រួលសម្ព័ន្ធសមាគមកសិករកម្ពុជា លោក ថេង សាវឿន។ ចំណែកការចាប់ខ្លួននេះ លោកថា គឺដោយសារក្រុមបាតុករទាំងនោះទៅអុកឡុកកម្មកររោងចក្រមួយចំនួន នៅភូមិតាសេក សង្កាត់កំបូល ខណ្ឌពោធិ៍សែនជ័យ កាលពីព្រឹកថ្ងៃទី២ មករា។
លោក ខេង ទីតូ៖
«ខ្ញុំយល់ឃើញថា ការប្រព្រឹត្ត និងការទាមទារខ្លះរបស់ក្រុមកម្មករ ឬអ្នកដឹកនាំក្រុមកម្មករ មានការជ្រុលហួសច្បាប់ហួសព្រំដែនរបស់ខ្លួន ឈានដល់ការរំលោភច្បាប់ អ៊ីចឹង គឺខាងសមត្ថកិច្ច គឺត្រូវតែអនុវត្តច្បាប់ការពារផលប្រយោជន៍សាធារណៈ»។
ថ្ងៃទី២ មករា ឆ្នាំ២០១៤ ជាថ្ងៃចូលឆ្នាំថ្មី ដែលជាថ្ងៃកម្មករភាគច្រើនបានសន្យាកន្លងមកថា ជាថ្ងៃចាប់ផ្ដើមបន្តធ្វើបាតុកម្មដើម្បីទាមទារប្រាក់ខែគោល ១៦០ដុល្លារបន្តទៀតក្នុងឆ្នាំថ្មី បន្ទាប់ពីបានសម្រាកឆ្លងបុណ្យឆ្នាំថ្មីមួយថ្ងៃ កាលពីថ្ងៃទី១ មករា។ ក្រុមបាតុករ បានបាតុកម្មបិទផ្លូវជាតិលេខ២ ម្ដុំចាក់អង្រែ ផ្លូវជាតិលេខ៥ ខណ្ឌឫស្សីកែវ ស្របពេលដែលកងកម្លាំងយោធា និងប៉េអិម ទាំងឡានៗ ត្រូវបានបញ្ជូនទៅទប់ស្កាត់កម្មករធ្វើបាតុកម្មនៅតាមរោងចក្រនានា ទាំងនៅក្នុង និងជាយរាជធានីភ្នំពេញ នៅថ្ងៃដដែលនេះ។
ក្រុមមន្ត្រីសិទ្ធិមនុស្សជាតិ និងអង្គការសហប្រជាជាតិ ដែលតាមឃ្លាំមើលការរំលោភសិទ្ធិមនុស្សយ៉ាងយកចិត្តទុកដាក់នៅកន្លែងកើតហេតុ បានអះអាងថា មកទល់រសៀលថ្ងៃដដែល ក្រុមបាតុករដែលនៅសល់ប្រមាណ ២.០០០នាក់ នៅតែប្រឈមជាមួយកងឆត្រយោងលេខ៩១១ ប្រហែល ១០០នាក់ ប្រដាប់ដោយខែល និងដំបងឆក់ ដែលស្ថានភាពតានតឹងនេះនឹងឈានអាចទៅដល់ផ្ទុះអំពើហិង្សាជាថ្មីម្ដងទៀតបានជាយថាហេតុ។
មន្ត្រីស៊ើបអង្កេតជាន់ខ្ពស់នៃអង្គការសិទ្ធិមនុស្សលីកាដូ (LICADHO) លោក អំ សំអាត បានសម្ដែងការសោកស្ដាយចំពោះការបង្ក្រាបរបស់កងឆត្រយោងលេខ៩១១ ដោយវាយដំប្រើហិង្សាលើក្រុមបាតុករ ថាជាការរំលោភសិទ្ធិមនុស្សយ៉ាងធ្ងន់ធ្ងរនៅដើមឆ្នាំ២០១៤ នេះ៖ «ខ្ញុំគិតថា នេះជាស្ថានភាពរំលោភសិទ្ធិមនុស្សយ៉ាងធ្ងន់ធ្ងរ ព្រោះថា ទាហានមានសិទ្ធិការពារទឹកដី ជួយសង្គ្រោះប្រជាជនពីគ្រោះទឹកជំនន់ ជួយការពារប្រជាជន ជួយប្រជាជនពីគ្រោះមហន្តរាយ»។
លោកបញ្ជាក់ថា កងឆត្រយោងលេខ៩១១ គឺទាហានដែលជាអ្នកអនុវត្តបទបញ្ជា មិនមែនជាអ្នកអនុវត្តច្បាប់ដូចជាកងប៉ូលិស និងប៉េអិម ទេ ព្រោះថា កាលណាទាហានអនុវត្តបទបញ្ជាពេលណា គឺត្រូវតែប្រើអំពើហិង្សានៅពេលបង្ក្រាបម្ដងៗ ខុសពីកងប៉ូលិស ឬប៉េអិម ដែលមានតួនាទីអនុវត្តច្បាប់ មិនអនុញ្ញាតឲ្យប្រើអំពើហិង្សា។
សូមរង់ចាំស្ដាប់ និងអានព័ត៌មាននេះពិស្ដារ...
No comments:
Post a Comment