អាដហុក ថ្កោលទោស ចំពោះ ការប៉ងធ្វើឃាត ទៅលើ មន្ត្រី របស់ ខ្លួន ពីក្រុមហ៊ុនឯកជនមួយ នៅខេត្តមណ្ឌលគិរី
ដោយ៖ ថុល ស្រីលក្ខណ៍ / វិទ្យុ វីអូឌី | ថ្ងៃព្រហស្បតិ៍ ទី9 ខែមករា ឆ្នាំ2014
សមាគមការពារសិទ្ធិមនុស្សអាដហុក នៅថ្ងៃព្រហស្បតិ៍នេះ ថ្កោលទោសចំពោះការប៉ុនប៉ងធ្វើឃាតដោយចេតនា ទៅលើមន្ត្រី និងសកម្មជនរបស់ខ្លួន៣នាក់ និងតំណាងសហគមន៍៩នាក់ ពីសំណាក់ក្រុមហ៊ុន វីឡាស៊ូភឺមែន ក្នុងខេត្តមណ្ឌលគិរី កាលពីថ្ងៃទី៨ខែមករា។
សេចក្តីថ្លែងការណ៍របស់ អាដហុក បានឲ្យដឹងថា កាលពីថ្ងៃទី៨ ខែមករា ឆ្នាំ២០១៤ មន្ត្រីសម្របសម្រួលអាដហុក លោក សុក រដ្ឋា និង សហការី២រូប រួមទាំងប្រជាសហគមន៍៩នាក់ទៀត បានចុះស៊ើបអង្កេត ពីករណីឈូសឆាយដីព្រៃឈើ ធ្វើឲ្យប៉ះពាល់ដល់ដីរបស់ប្រជាសហគមន៍ នៅតំបន់ អូចុងចារ ភូមិឡៅការ ឃុំសុខដុម ស្រុកសែនមនោរម្យ ខេត្តមណ្ឌលគិរី។ សេចក្តីថ្លែងការណ៍បន្ថែមថា ពេលចុះទៅដល់ចម្ងាយ ២០០មែត្រ ពីច្រកចូលក្រុមហ៊ុន វីឡាស៊ូភឺមែន មានឡានរបស់ក្រុមហ៊ុន ម៉ាក Tacoma ស្លាកលេខ 2A-5873 មួយគ្រឿងបើកសំដៅមកបុក ក្រុមការងារដែលចុះទៅស៊ើបអង្កេត បណ្តាលឲ្យម៉ូតូមួយគ្រឿងខូចខាត តែមិនមានគ្រោះថ្នាក់ដល់មនុស្សទេ។
សេចក្តីថ្លែងការណ៍បានដកស្រង់សម្តីប្រជាពលរដ្ឋ និងមេការមួយចំនួនមកសរសេរថា ក្រុមហ៊ុននេះមានរូបភាពជាក្រុមហ៊ុនដាំកៅស៊ូ តែនៅក្នុងបរិវេណនៃក្រុមហ៊ុននេះ មានស្តុកឈើប្រណិតគ្រប់គ្រងដោយអភិបាលរងខេត្តមណ្ឌលគិរី លោក យឹម លុច។
ប៉ុន្តែ លោក យឹម លុច បដិសេធការចោទប្រកាន់នេះ។
លោកថា ក្រុមហ៊ុននេះ ជាក្រុមហ៊ុនភរិយារបស់លោក តែមិនមានករណីប៉ុងប៉ងធ្វើឃាត ឬរក្សាឈើខុសច្បាប់ដូចការចោទប្រកាន់នោះទេ ហើយលោកស្នើឲ្យមន្រ្តីអាដហុកជួបផ្ទាល់ជាមួយលោក។ រីឯស្នងការនគរបាលខេត្តមណ្ឌលគិរី លោក ញ៉ែម វ៉ាន់នី មានប្រសាសន៍ថា ក្រុមការងាររបស់លោក កំពុងចុះស៊ើបអង្កេតករណីនេះ តែមិនទាន់អាចសន្និដ្ឋានយ៉ាងណានោះទេ៕
No comments:
Post a Comment