បទយកការណ៍៖ សន្ទុះ នៃការតវ៉ា សមាជិក IDEA របស់ លោក វន់ ពៅ កើនឡើងទ្វេ
ដោយ៖ ពៅ មេត្ដា / វិទ្យុ វីអូឌី | ថ្ងៃព្រហស្បតិ៍ ទី9 ខែមករា ឆ្នាំ2014
លោក វន់ ពៅ(កាន់ម៉ៃក្រូហ្វូន) ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ(រូបភាពដោយ បូ សាវី)
សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ(IDEA)បង្កើតឡើងនៅឆ្នាំ២០០៥ ដែលមានលោក វន់ ពៅ ជាប្រធាន។ សមាគមនេះ តែងបើកវគ្គបណ្តុះបណ្តាលដល់អ្នករត់ម៉ូតូឌុប អ្នកបើកម៉ូតូកង់បី និងអ្នកដែលប្រកបរបរតាមចិញ្ចើមថ្នល់ លើវិជ្ជាជីវៈប្រកបមុខរបររបស់ពួកគេ។ ក្រៅពីការបណ្តុះ បណ្តាលមុខរបរ លោក វន់ ពៅ លេចមុខជាញឹកញឹកចូលរួមតវ៉ាជាមួយក្រុម ដែលទន់ខ្សោយទាមទារសិទ្ធិសេរីភាពពីអ្នកមានប្រាក់ និងអ្នកមានអំណាច។
សកម្មភាពតវ៉ាស្ទើរគ្រប់កន្លែងមិនចេះហត់នឿយរបស់លោក វន់ ពៅ ត្រូវបានផ្អាកដោយមិនបានត្រៀមទុក គឺនៅពេលដែលសមត្ថកិច្ចចាប់រូបលោក។ ក្នុងហេតុការណ៍យោធាបង្គ្រាបលើកម្មករកាលពីថ្ងៃទី២ ខែមករាដែលនាំឲ្យសហគមន៍ជាតិ និងអន្តរជាតិចាប់អារម្មណ៍នោះ លោក វន់ ពៅ ក៏ជាបុគ្គលម្នាក់ក្នុងចំណោមមន្ត្រីសហជីព និងកម្មករ២២ នាក់ ផ្សេងទៀតរងការវាយដំចាប់យកទៅឃុំនៅពន្ធនាគារត្រពាំងថ្លុងក្នុងខេត្តកំពង់ចាម។
ក្រោយការបាញ់បង្ក្រាប និងចាប់ខ្លួនបាតុករ ដែលរួមមានទាំងលោក វន់ ពៅ ដែលនោះគម្រោងបាតុកម្មមួយចំនួនត្រូវបានផ្អាក។
បាតុករផ្អាកធ្វើបាតុកម្មតែមិនមានន័យថា ពួកគេសុខចិត្តឈប់ធ្វើបាតុកម្មទេ ពិសេសគឺសមាជិកនៃសមាគមអ្នកប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធរបស់លោក វន់ ពៅ។
សមាជិកសមាគម IDEA លោក ហា សំអាន អ្នករត់ម៉ូតូកង់បីនៅម្តុំផ្សារ សាមគ្គីក្នុងរាជធានីភ្នំពេញលើកឡើងថា ពេលដែលលោកចូលជាសមាជិកនៃសមាគមលោក បានរៀន សូត្រច្រើនពីច្បាប់ចរាចរណ៍ និងរបៀបនៃការចរចាជាមួយមន្ត្រីនគរបាលចរាចរណ៍ ពេលមានបញ្ហាក្នុងការបើកបរ <<ការបង់ពន្ធផ្លូវទី៣ ដូចជាអាជ្ញាធរចាប់គាបសង្កត់ ដោះស្រាយដោយអត់តាមច្បាប់ ពិន័យផាក ៣០០០៛ គាត់យកដល់ ២០០០០៛ គាត់មានការគំរាមកំហែង ក្រុមពួកខ្ញុំនេះ បានជួយបណ្តុះបណ្តាលសមាជិកឲ្យចេះច្បាប់ចរាចរណ៍ ដើម្បីស្រួលដោះស្រាយជាមួយអាជ្ញាធរ>>។
ពេលសួរដល់ករណីចាប់ខ្លួននិងធ្វើទារុណកម្មលើលោក វន់ ពៅ នោះ លោក ហា សំអាន វ័យ៤៣ឆ្នាំថ្លែងបញ្ជាក់ដោយសំដីច្បាស់ៗថា ការចាប់ខ្លួនលោក វន់ ពៅ ដោយអយុត្តិធម៌ នោះនាំឲ្យកម្លាំងចិត្តនៃការតវ៉ារបស់លោកកាន់តែស្ទុះឡើង <<ខ្ញុំគិតថា ព្រឹត្តិការណ៍ថ្ងៃ២នេះ ខ្ញុំខ្លាច ខ្ញុំនឹងតវ៉ាមួយទ្វេជាពីរ។ ខ្ញុំមិនអាចរាថយទេត្រង់ណាសោះ ដែលតាមសង្កេតមើលទៅ។ ខ្ញុំនៅតែចូលរួមដដែល ហើយខ្ញុំតាំងចិត្តលះបង់ មួយជាពីរថែមទៀត>>។
អង្គុយលើម៉ូតូចាំឌុបភ្ញៀវនៅរង្វង់មូលគល់ស្ពានជ្រោយចង្វារលោក ញឹក សុខថេត សំដែងការសោកស្តាយពេលនិយាយដល់ករណីចាប់ខ្លួនលោក វន់ ពៅ។ បុរសមាឌក្រអាញ សំបុរខ្មៅរូបនេះ ហាក់ដូចជាមិនមានអាមរម្មណ៍ចំលែកណាស់ណាទេ ព្រោះលោកថា ការតវ៉ាទាមទារសិទ្ធិសេរីភាព តែងតែងជួបការបង្ក្រាប ឬការចាប់ខ្លួន ដូច្នេះលោកមិនខ្លាចទេ <<មានការសោកស្តោយទាក់ទងបញ្ហានេះ។ ក៏ប៉ុន្តែយើងដឹងថា បញ្ហានេះវានឹងកើតឡើងចំពោះពួកយើង ពីព្រោះយើងដឹងស្រាប់ហើយថា ការតស៊ូមតិដើម្បីទាមទារ នូវយុត្តិធម៌សង្គម ទាមទារឲ្យមានការដោះស្រាយរាល់បញ្ហារបស់ពួកយើងទាំងប៉ុន្មាន គឹយើងដឹងថា នឹងជួបបញ្ហាទាំងអស់។ ហើយយើងទាំងអស់គ្នា គឺមិនរាថយទេ នៅតែមានការទាមទារ នៅតែមានការតស៊ូ នៅតែមានការចូលរួមដដែល។ ប្រសិនជាម្នាក់ៗ នៅតែមិនចូលរួមដោះស្រាយបញ្ហា ពីព្រោះបញ្ហាទាំងនេះ ជាបញ្ហារបស់យើងទាំងអស់គ្នា ហើយបើយើងមិនរួបរួមគ្នាក្នុងការដោះស្រាយ តើឲ្យអ្នកណាមកដោះស្រាយ?>>។
អ្នកបើកម៉ូតូកង់បីដឹកភ្ញៀវមួយរូបទៀតនៅរង្វង់មូលគល់ស្ពានស្ទឹងជ្រោយចង្វារដែរ លោក សែម សាន ថ្លែងថា លោកនៅតែហានចេញមុខតវ៉ាការពារផលប្រយោជន៍ខ្លួន ស្រប ច្បាប់ព្រោះថាបើមិនតវ៉ាទេនោះការគាបសង្កត់ និងកាន់តែធ្ងន់ធ្ងរឡើង <<ខ្ញុំគិតថា បើសិនឈប់ទាំងអស់គ្នា វាកើតឡើងកាន់តែធ្ងន់ធ្ងរជាងហ្នឹងទៅទៀត ព្រោះថា ពេលហ្នឹងគេគំរាមយើងបាន ពេលក្រោយរឹតតែធ្វើលែងឲ្យយើងហ៊ានកម្រើកអីសោះហ្មង តាមធម្មតា បើយើងមិនចេញមុខ បើយើងមិនហ៊ាន ថ្ងៃក្រោយក៏គេនៅគំរាមកំហែងយើងរហូត ហើយបើយើងហ៊ានជាមួយគេ ក៏គេមិនសូវហ៊ានជាមួយយើងវិញដែរ>>។
សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធរបស់លោក វន់ ពៅ កំពុងធ្វើសកម្មភាពការពារសិទ្ធិ និងបណ្តុះបណ្តាលជំនាញដល់អ្នកប្រកបរបរក្រៅប្រព័ន្ធ នៅរាជធានីភ្នំពេញ ខេត្តសៀមរាប បាត់ដំបង បន្ទាយមានជ័យ កំពត និងខេត្តព្រះសីហនុ។ បច្ចុប្បន្ន សមាគមនេះមានសមាជិកជាង ៥ ០០០នាក់។
អនុប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធលោក សុខ ឈុនអឿង លើកឡើងថា កាលណាមានការឈឺចាប់ដោយសារការគាបសង្គត់ក្នុងសង្គមនោះ នឹងដុតកម្ពៅនៃការតវ៉ាកាន់តែខ្លាំងឡើង។ លោក ឈុន អឿង បន្ថែមថា ក្រោយពេលសមត្ថកិច្ចចាប់ខ្លួនលោក វន់ ពៅ មួយរយៈពេលនេះរូបលោក និងសមាជិកផ្សេងទៀត ហាក់កាន់ តែមានសាមគ្គីគ្នារឹងមាំជាមុនក្នុងតវ៉ាប្រឆាំងនិងការជិះជាន់ <<តាមការវាស់ស្ទុងរបស់យើង ទាំងសមាជិក ទាំងសកម្មជន គឺនៅធ្វើការខ្លាហាន គឺនៅមានកម្រិត ចង់និយាយថា ចង់ខ្លាំងជាងមុនផង ព្រោះដោយសារថា ការវាយតម្លៃថា ភាពអយុត្ដិធម៌នៅក្នុងសង្គមមានការកើនឡើងចឹងធ្វើឲ្យមនុស្សមានការឈឺចាប់កាន់តែខ្លាំង>>។
យោធាបាញ់បង្ក្រាបនៅថ្ងៃទី២ និងទី៣ ខែមករា ពេលកម្មករតវ៉ាទាមទារដំឡើងប្រាក់ឈ្នូល បណ្តាលឲ្យកម្មករយ៉ាងហោចណាស់៥នាក់ស្លាប់ ប្រមាណ៤០នាក់រងរបួស និង២៣នាក់ត្រូវចាប់ខ្លួនយកទៅឃុំនៅពន្ធនាគារត្រពាំងថ្លុងក្នុងខេត្តកំពង់ចាម។ ក្នុងចំណោមអ្នក ដែលជាប់ឃុំនោះរួមទាំងលោក វន់ ពៅ ផង សុទ្ធរងរបួសដោយសារយោធាវាយ។
ពេទ្យអង្គការលីកាដូបានឲ្យដឹងថា របួសនៅលើក្បាលលោក វន់ ពៅ បែក១០ថ្នេរ ហើយមានស្នាមរបួសមួយចំនួនទៀតនៅលើដងខ្លួនផងដែរ។
លោក ថេង សាវឿន អ្នកសម្របសម្រួលនៃសម្ព័ន្ធសហគមន៍កសិករកម្ពុជា ដែលសមត្ថកិច្ចចាប់ទៅជាមួយលោក វន់ ពៅ ដែរនោះ ក៏មានរបួសបែកក្បាល៧ថ្នេរ និងមានរបួសនៅលើខ្លួនមួយចំនួនទៀតដែរ។
ជុំវិញហេតុការណ៍បង្ក្រាបនេះ លោក គៀត ច័ន្ទថារិទ្ធិ អ្នកនាំពាក្យអគ្គស្នងការដ្ឋាននគរបាលជាតិ លើកឡើងថា សមត្ថកិច្ចមិនមានបំណងសម្លាប់ ឬធ្វើឲ្យបាតុករមានរបួសទេ គឺគ្រាន់ចុះទៅសម្របសម្រួល ចំពោះបាតុករហិង្សា ដើម្បីការពារផលប្រយោជន៍សាធារណៈប៉ុណ្ណោះ។
ទោះជាអ្នកនាំពាក្យអគ្គស្នងការដ្ឋាននគរបាលជាតិ បកស្រាយថា មិនមានបំណងបង្ក្រាបក៏ដោយ តែហេតុការណ៍នោះ បានធ្វើឲ្យមានការភ្ញាក់ផ្អើលដល់ប្រជាពលរដ្ឋទូទាំងប្រ ទេសក៏ដូចជា សហគមន៍អន្តរជាតិផងដែរ។
ក្រោយការបង្ក្រាបសហរដ្ឋអាមេរិក បារាំង សហភាពអឺរ៉ុបដែលមានប្រទេស២៨ ជាសមាជិក និងជប៉ុន បានសំដែងការព្រួយបារម្ភ និងខ្លះទៀតថ្កោលទោសចំពោះ ហេតុការណ៍ យោធាបង្ក្រាបលើបាតុករនោះ។
អ្នកស្រាវជ្រាវការអភិវឌ្ឍន៍ និងជាអ្នកវិភាគបញ្ហាសង្គមមួយរូប លោក កែម ឡី លើក ឡើងថា ហេតុការណ៍បង្ក្រាបរបស់រដ្ឋាភិបាលទៅលើបាតុករនោះ គឺមិនអាចបញ្ចប់បញ្ហា បានទេ ព្រោះរដ្ឋាភិបាលមិនបានដល់ដោះស្រាយឲ្យដល់ឫស្សគល់នៃបញ្ហាមិនបានធ្វើឲ្យអ្នកមាន បញ្ហាស្ងប់ចិត្ត ដូច្នេះការតវ៉ានៅតែអាចកើតមានឡើងទៀត៕
No comments:
Post a Comment