ដោយ៖ ពេជ្រ សុធារី / វិទ្យុ វីអូឌី | ថ្ងៃព្រហស្បតិ៍ ទី23 ខែមករា ឆ្នាំ2014
លោកកឹម សុខា អនុប្រធានគណបក្សសង្គ្រោះជាតិ ក្នុងការដង្ហែក្បួន នាពេលកន្លងមក (រូបថត ណាត សុភាព)
លោក កឹម សុខា នឹងចុះជួប អ្នកគាំទ្រ ជាថ្មី នៅខេត្តចំនួន៣ បន្ទាប់ ពីបាន ផ្អាកជួបអ្នកគាំទ្រ នៅខេត្តកណ្តាល
អនុប្រធានគណបក្សសង្គ្រោះជាតិ នឹងបន្តចុះជួបសំណេះសំណាលជាថ្មីទៀត ជាមួយប្រជាពលរដ្ឋ និងអ្នកគាំទ្រនៅខេត្តចំនួនបី នៅចុងសប្តាហ៍នេះ បន្ទាប់ពីបានប្រកាសផ្អាកពិធីសំណេះសំណាលជាមួយអ្នកគាំទ្រនៅខេត្តកណ្តាល កាលពីថ្ងៃទី២១ខែមករា កន្លងទៅនេះ ដោយសារបារម្ភខ្លាចក្រុមបាតដៃទីបីបង្កចលាចល។
នៅក្នុងសេចក្តីជូនដំណឹងរបស់គណបក្សសង្គ្រោះជាតិ នៅថ្ងៃទី២៣ខែមករានេះ ឲ្យដឹងថា លោក កឹម សុខា អនុប្រធានគណបក្សសង្គ្រោះជាតិ នឹងចុះជួបប្រជាពលរដ្ឋ សមាជិកសមាជិកានៅមូលដ្ឋានរបស់ខ្លួន នៅខេត្តចំនួនបី គឺខេត្តព្រៃវែង កំពង់ចាម និងកំពង់ធំ ចាប់ពីថ្ងៃទី២៥ ដល់ថ្ងៃទី២៧ ខែមករានេះ ដើម្បីថ្លែងសារនយោបាយទៅកាន់អ្នកគាំទ្រ។
កាលពីថ្ងៃទី២១ ខែមករា គណបក្សសង្គ្រោះជាតិ បានប្រកាសលុបចោលភ្លាមៗ ចំពោះគម្រោងជួបសំណេះសំណាលជាមួយពលរដ្ឋ ស្ថិតនៅឃុំត្រើយស្លា ស្រុកស្អាង ខេត្តកណ្តាល ដោយថ្នាក់ដឹកនាំគណបក្សនេះ បារម្ភខ្លាចមានក្រុមបាតដៃទី៣ បង្កចលាចលដល់អ្នកគាំទ្រនិងស្របពេលសមត្ថកិច្ចរាប់រយនាក់ ត្រៀមដាក់រារាំង ការជួបសំណេះសំណាលនោះ។
ចំណែក លោក សម រង្ស៊ី ប្រធានគណបក្សសង្គ្រោះជាតិ នឹងចាកចេញពីប្រទេសកម្ពុជា នៅម៉ោង ៧:៣០នាទីល្ងាចនេះ ទៅកាន់ប្រទេសស្វីស ដើម្បីចូលរួមកិច្ចប្រជុំក្រុមប្រឹក្សាសិទ្ធិមនុស្សរបស់អង្គការសហប្រជាជាតិ និងស្តាប់របាយការណ៍ស្តីពីសិទ្ធិមនុស្សនៅកម្ពុជា បន្ទាប់មកលោកនឹងបន្តទៅប្រទេសអាល្លឺម៉ង់ និងបារាំង ដើម្បីជួបជាមួយបណ្តាមន្ត្រីជាន់ខ្ពស់ ដែលមានរយៈពេលមួយសប្តាហ៍។ នេះបើតាមប្រសាសន៍របស់បេក្ខជនជាប់ឆ្នោតគណបក្សសង្គ្រោះជាតិមណ្ឌលភ្នំពេញ លោកស្រី ជូឡុង សូម៉ូរ៉ា៕
No comments:
Post a Comment