លោក​កឹម សុខា​៖ មេធាវី​​ អន្តរជាតិ កំពុង​បន្ត​ ស៊ើបអង្កេត និង​ស្រាវ​ជ្រាវ​ ករណី​ហិង្សា ​នៅ​ផ្លូវ​វ៉េងស្រេង​​

ដោយ៖​ កាន់ វិច្ឆិកា​ | ថ្ងៃចន្ទ ទី20 ខែមករា ឆ្នាំ2014 

លោក កឹម សុខា អនុប្រធានគណបក្សសង្គ្រោះជាតិ ក្នុងសន្និសីទ នាពេល​កន្លង​មក (រូបថត តាំង វីដា)

​ថ្នាក់ដឹកនាំ​គណបក្ស​សង្គ្រោះ​ជាតិ ឲ្យដឹងថា ការស៊ើបអង្កេត និង​ស្រាវជ្រាវ​ទៅលើ​បទឧក្រិដ្ឋ​សាធារណៈ ដែល​ប្រព្រឹត្ត​ដោយ​កងកម្លាំងប្រដាប់អាវុធ ទៅលើ​ក្រុម​កម្មករ​នៅមុខ​សួន​ឧស្សាហកម្ម​កាណាឌីយ៉ា កាលពី​ពេល​ថ្មីៗ​នេះ នៅ​មិន​ទាន់​បញ្ចប់​នៅឡើយ​ទេ​។

​អនុប្រធាន​គណបក្ស​សង្គ្រោះ​ជាតិ លោក កឹម សុខា មានប្រសាសន៍​នៅ​ព្រឹក​ថ្ងៃ​ចន្ទ​នេះ​ថា  ការស៊ើបអង្កេត និង​ស្រាវជ្រាវ​ទៅ​លើ​ករណី​ហិង្សា ដែល​ប្រព្រឹត្ត​ដោយ​កងកម្លាំងប្រដាប់អាវុធ ទៅលើ​ក្រុម​កម្មករ​នៅមុខ​សួន​ឧស្សាហកម្ម​កាណាឌីយ៉ា កាលពី​ថ្ងៃ​ទី​២​និង​ទី​៣​ខែ​មករា​នេះ នៅ​មិន​ទាន់​បញ្ចប់​នៅឡើយ​ទេ ដោយ​មេធាវី​អន្តរជាតិ ដឹក​នាំ​​ដោយ លោក Richard J Rogers ដែល​​​មាន​ជំនាញ​ផ្នែក​ច្បាប់​ឧក្រិដ្ឋកម្ម​អន្តរ​ជាតិ និង​សិទ្ធិមនុស្ស កំពុងតែ​ស្វែង​រក​ភស្តុតាង ក៏​ដូច​ជា​ឯកសារ​នានា ដែល​ពាក់ព័ន្ធ​ទៅនឹង​បទឧក្រិដ្ឋ​នេះ​។

​លោក​កឹម សុខា បន្តថា បន្ទាប់​ពី​មេធាវី​អន្តរជាតិ ប្រមូល​បាន​ភស្តុតាង​គ្រប់គ្រាន់​ហើយ ហើយ​រកឃើញថា មាន​ជាប់​ពាក់ព័ន្ធ​នឹង​បទឧក្រិដ្ឋ​នោះ គណបក្ស​សង្គ្រោះ​ជាតិ នឹង​បញ្ជូន​ពាក្យបណ្តឹង​ទៅ​តុលាការ​ឧក្រិដ្ឋកម្ម​អន្តរជាតិ (ICC) នៅ​ទីក្រុង​ឡាអេ ប្រទេស​ហូ​ឡង់​។​

កាលពី​ថ្ងៃ​ទី​២​និង​ទី​៣​ខែ​មករា មាន​ការប៉ះទង្គិច​ដោយ​ហិង្សា​មួយ​រវាង​ក្រុម​កម្មករ​ដែល​មកពី​រោងចក្រ​នានា ក្នុង​រាជធានី​ភ្នំពេញ និង​កងកម្លាំងប្រដាប់​អាវុធ នៅមុខ​សួន​ឧស្សាហកម្ម​កាណាឌីយ៉ា ផ្លូវវេង​ស្រេង ខណ្ឌ​ពោធិ​សែន​ជ័យ រាជធានី​ភ្នំពេញ ខណៈ​ដែល​កម្មករ​តវ៉ា​ទាមទារ​ដំឡើង​ប្រាក់​ឈ្នួល​គោល​​១៦០​ដុល្លារ បណ្តាលឲ្យ​កម្មករ ៥​នាក់​ស្លាប់ ជិត​៤០​នាក់​រងរបួស និង​កម្មករ​១៣​នាក់​ទៀត ត្រូវបាន​ចាប់ខ្លួន​។​

​តំណាងរាស្ត្រ​គណបក្ស​ប្រជាជន​កម្ពុជា មណ្ឌល​ខេត្ត​បាត់ដំបង លោក ឈាង វុន ក៏​ធ្លាប់បាន​ព្រមាន​តប​វិញ​ដែរ​ថា រាជរដ្ឋាភិបាល ក៏​មាន​ភស្តុតាង ជា​ឯកសារ រូបភាព និង​វីដេអូ​គ្រប់គ្រាន់ ដើម្បី​បញ្ជាក់​ថា ថ្នាក់ដឹកនាំ​គណបក្ស​សង្គ្រោះ​ជាតិ​វិញ​ទេ ដែលជា​អ្នក​បង្កចលាចល និង​ញុះញង់​ឲ្យមាន​ហិង្សា និង​ឧក្រិដ្ឋកម្ម​កើតឡើង​។​

​សូមជម្រាបថា កម្ពុជា​បាន​ចុះ​សច្ចាប័ន​ក្រុង​រ៉ូម ប្រទេស​អ៊ីតាលី នៅ​ដើមឆ្នាំ​២០០០ ដែល​កាលណោះ​ប្រធានរដ្ឋសភា ដឹកនាំ​ដោយ​សម្តេច​ក្រុមព្រះ​នរោត្តមរ​ណ​ឬ​ទ្ធិ បាន​ធ្វើឲ្យ​កម្ពុជា​ក្លាយ​ជា​សមាជិក​មួយ នៃ​ប្រទេស​សន្ធិសញ្ញា​ក្រុង​រ៉ូម​នេះ ដោយ​សន្យា​ពង្រឹង និង​អនុវត្ត​ច្បាប់​អន្តរជាតិ​មួយ​នេះ ដើម្បី​ប្រឆាំង​ការរំលោភ​សិទ្ធិ​មនុស្ស​ដ៏​ធ្ងន់ធ្ងរ តាមរយៈ​តុលាការឧក្រិដ្ឋកម្មអន្តរជាតិ ​(Internatinal Criminal Court) ​នៃ​អង្គការ​សហប្រជាជាតិ នៅ​ក្រុង​ឡាអេ ប្រទេស​ហូ​ឡង់​៕