លោក ម៉ម សូណង់ដូ នឹងធ្វើបាតុកម្ម តាមការ គ្រោងទុក ទោះបី សាលារាជធានីភ្នំពេញ មិនអនុញ្ញាត ក៏ដោយ
ដោយ៖ ណាត សុភាព | ថ្ងៃសុក្រ ទី24 ខែមករា ឆ្នាំ2014
ប្រធានវិទ្យុសម្បុកឃ្មុំ លោក ម៉ម សូណង់ដូ ថ្លែងក្នុងសន្និសីទសារព័ត៌មាន នៅព្រឹកថ្ងៃសុក្រនេះថា លោកនឹងធ្វើបាតុកម្ម នៅថ្ងៃទី២៧ ខែមករានេះ នៅខាងមុខក្រសួងព័ត៌មាន តាមការគ្រោងទុក ទោះក្នុងករណីសាលារាជធានីភ្នំពេញមិនអនុញ្ញាតក៏ដោយ។
កាលពីថ្ងៃព្រហស្បតិ៍ម្សិលមិញ លោកបានជួបអគ្គនាយកនៃអគ្គនាយកដ្ឋានព័ត៌មាន និងសោធទស្សន៍នៃក្រសួងព័ត៌មាន លោក ប៊ុត បូវុត ដើម្បីជជែកពីការសុំបង្កើតហ្វ្រេកង់ទូរទស្សន៍ និងដំឡើងកម្លាំងផ្សាយវិទ្យុសម្បុកឃ្មុំបន្តទៅតាមខេត្ត ក៏ប៉ុន្តែក្រសួងព័ត៌មាន មិនអនុញាតតាមការស្នើសុំនោះទេ។
លោក ម៉ម សូណង់ដូ បន្ថែមថា លោកនឹងទៅជួបមន្ត្រីសាលារាជធានីភ្នំពេញ នៅរសៀលថ្ងៃសុក្រនេះ ដើម្បីពិភាក្សាពីគម្រោងបាតុកម្ម។ លោកបន្តថា ទោះបីកិច្ចពិភាក្សានេះមានផលវិជ្ជមាន ឬអវិជ្ជមានក្តី ក៏លោកនៅតែធ្វើបាតុកម្មតាមការគ្រោងទុក «ប្រសិនជាសាលាក្រុង មិនអនុញ្ញាតឲ្យខ្ញុំធ្វើបាតុកម្ម ទុកឲ្យសាលាក្រុងនិងក្រសួងព័ត៌មានដោះស្រាយជាមួយប្រជាពលរដ្ឋ រាប់លាននាក់ទៅ ជាជាងដោះស្រាយជាមួយលោក ម៉ម សូណង់ដូ តែម្នាក់ឯង។ ប៉ុន្តែខ្ញុំក៏គាំទ្រលើការធ្វើបាតុកម្មនោះដែរ ក្នុងនាមខ្ញុំជាប្រជាពលរដ្ឋខ្មែរ ខ្ញុំគោរពច្បាប់ ខ្ញុំគោរពរដ្ឋធម្មនុញ្ញ»។
លោក ស្បៃ វែង ដែលជាពលរដ្ឋម្នាក់ចូលរួមសន្និសីទសារព័ត៌មានរបស់លោក ម៉ម សូណង់ដូ មានប្រសាសន៍ថា បើលោក ម៉ម សូណង់ដូ ធ្វើបាតុកម្មនៅថ្ងៃទី២៧ ខែមករា ពិតមែននោះ ប្រជាពលរដ្ឋជាច្រើននាក់ នឹងមកពីបណ្តាខេត្តចូលរួមគាំទ្របាតុកម្មនោះដែរ «ប្រសិនជាយើងមិនធ្វើ ដេកឲ្យសង្គមនេះនៅតែអញ្ចឹង គឺថាគ្មានពេលណាដែលទឹកភ្នែកខ្មែរស្រាកស្រានទេ។ បើថាដាក់គុកៗ ទាំងអស់គ្នាទៅ ឥឡូវនេះខ្ញុំគិតថាអ្នកដែលស្ម័គ្រចូលគុកនេះ ច្រើនណាស់ មានខ្ញុំ ស្បៃ វែង នេះហើយស្ម័គ្រចូលគុក។ ហើយប្រសិនជាគេត្រូវការកាប់សម្លាប់ ក៏វាទៅតាមនោះដែរធម្មជាតិនោះទៅ»។
VOD មិនអាចសុំអត្ថាធិប្បាយពីអភិបាលរាជធានីភ្នំពេញ លោក ប៉ា សុជាតិវង្ស និងអ្នកនាំពាក្យសាលារាជធានី លោក ឡុង ឌីម៉ង់ បានទេ។
កាលពីថ្ងៃទី១៤ ខែមករានេះ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានផ្ញើលិខិតជូនប្រធានស្តីទីវិទ្យុសំបុកឃ្មុំ លោកស្រី ឌិន ផាណា ឲ្យដឹងថា ក្រសួងមិនអាចផ្តល់ការបង្កើតហ្វ្រេកង់ទូរទស្សន៍ និងដំឡើងកម្លាំងផ្សាយវិទ្យុទៅតាមសំណើរបស់លោកស្រីបានទេ ព្រោះតែហ្វ្រេកង់ពុំមាននៅសល់។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យ៉ង់ គឹមអេង យល់ថា មូលហេតុដែលរដ្ឋមន្ត្រីក្រសួងព័ត៌មានមិនព្រមអនុញ្ញាត ទំនងជាព្រួយបារម្ភខ្លាចថា នៅកម្ពុជាមានស្ថាប័នប្រព័ន្ធផ្សព្វផ្សាយព័ត៌មានឯករាជ្យ និយាយប៉ះពាល់ដល់រាជរដ្ឋាភិបាល «ប្រសិនជាយើងចង់ឲ្យមាននីតិរដ្ឋ យើងចង់ឲ្យមានតម្លាភាពនៅក្នុងសង្គម យើងចង់មន្ត្រីនោះជាមន្ត្រីដែលល្អ ដែលស្អាតស្អំ បម្រើប្រជាពលរដ្ឋដោយស្មោះ ហើយរដ្ឋាភិបាលក៏មិនសូវមានការពិបាកចិត្តនៅក្នុងគ្រប់គ្រង មន្ត្រីអស់នោះ ប្រហែលជាឲ្យមានសារព័ត៌មានឯករាជ្យទៅ ដូចជាវិទ្យុរបស់លោក ម៉ម សូណង់ដូ ជាដើមនោះ ប្រហែលជាជួយច្រើន»។
កាលពីឆ្នាំ២០០៥ និង២០០៦ ប្រធានវិទ្យុសម្បុកឃ្មុំ FM ១០៥ MHz លោក ម៉មសូណង់ដូ បានសរសេរលិខិតផ្ញើទៅក្រសួងព័ត៌មាន ស្នើសុំដំទ្បើងកម្លាំងផ្សាយវិទ្យុបន្តនៅតាមខេត្តនានា ដូចជា ខេត្តពោធិ៍សាត់ បាត់ដំបង សៀមរាប កំពង់ចាម កំពង់ឆ្នាំង និងខេត្តក្រចេះ។
ទាក់ទងករណីនេះដែរ កាលពីចុងឆ្នាំ២០១៣ លោក ម៉ម សូណង់ដូ ក៏បានប្រកាសធ្វើបាតុកម្មម្តងហើយ ដើម្បីទាមទារឲ្យក្រសួងព័ត៌មានផ្តល់ជូនហ្វ្រេកង់ សម្រាប់បង្កើតទូរទស្សន៍៕
អត្ថបទទាក់ទង៖
- ក្រសួងព័ត៌មាន កោះអញ្ជើញលោក ម៉ម សូណង់ដូ ពិភាក្សាពីរឿងរីឡេ និងហ្វ្រេកង់ តែលោកសុំលើកពេល
No comments:
Post a Comment