គម្រោង បាតុកម្ម របស់ កម្មករ នៅកំពង់ចាម ត្រូវបាន លុបចោល
កម្មកររោងចក្រ មេតថេក ខេមបូឌា (Medtecs Cambodia Co Ltd) ប្រមាណជិត ៣ពាន់នាក់ បន្តធ្វើកូដកម្មទាមទារប្រាក់ខែគោល ១៦០ដុល្លារ នាខេត្តកំពង់ចាម នៅថ្ងៃទី៣ ខែមករា ឆ្នាំ២០១៤។
RFA/Saut Sokprathna
ជាក់ស្តែងកម្មកររោងចក្រនៅខេត្តកំពង់ចាម ដែលមានគម្រោងថា នឹងជួបនៅថ្ងៃ៦ មករា នេះ ក៏ត្រូវបានផ្អាកវិញដែរ ដោយខ្លាចមានការប៉ះទង្គិចណាមួយជាមួយអាជ្ញាធរដែលមានសមត្ថកិច្ច។
អនុប្រធានសម្ព័ន្ធសហជីពនៃរោងចក្រ មេតថេក ខេមបូឌា (Medtecs Cambodia Co., Ltd.) កញ្ញា កឹម ស្រីអូន បានឱ្យដឹងថា កាលពីថ្ងៃ២ មករា តំណាងកម្មករនិងកម្មករជាច្រើនពាន់នាក់សម្រេចថា នឹងមានការជួបគ្នាឡើងវិញនៅថ្ងៃច័ន្ទ ទី៦ មករា ដើម្បីបន្តធ្វើបាតុកម្មទាមទារប្រាក់ខែលគោល ១៦០ដុល្លារ តែគម្រោងនោះត្រូវបានលុបចោលវិញ បន្ទាប់ពីមានព្រឹត្តិការណ៍បង្រ្កាបកម្មករនៅរាជធានីភ្នំពេញ។ កញ្ញាបន្តថា កញ្ញាមិនប្រាដកថា កម្មករទាំងនោះនឹងព្រមចូលធ្វើការនៅថ្ងៃច័ន្ទ នេះ ឬយ៉ាងណានោះទេ ប្រសិនបើពួកគាត់យល់ព្រមចូលធ្វើការជាសិទ្ធិរបស់កម្មករ ហើយខាងសហជីពយល់ស្របទៅតាមកម្មករជាអ្នកសម្រេច។
កញ្ញា កឹម ស្រីអូន៖ «អាហ្នឹងចំពោះពួកខ្ញុំគិតឃើញថា ពួកគាត់ជាកម្មករគិតឃើញថា ពួកគាតចូលធ្វើការវិញក៏ចូលទៅ មិនចូលទេជារឿងរបស់គាត់។ បើថា ពួកខ្ញុំពីថ្នាក់លើមកគឺ ថាលែងជួបជុំគ្នាទៀតហើយ ពីព្រោះពួកខ្ញុំលែងដឹកនាំទៀតហើយណា»។
កញ្ញាបានបន្ថែមទៀតថា បន្ទាប់ពីកញ្ញាបានចេញមុខក្នុងការស្រែកតវ៉ាដើម្បីដំឡើងប្រាក់ខែ និងស្រែកឱ្យលោកនាយករដ្ឋមន្រ្តី ហ៊ុន សែន ចុះចេញពីតំណែងរួចមក មានសកម្មភាពខាងសមត្ថកិច្ចបានទៅរកមុខកញ្ញាដល់ផ្ទះតែម្តង។ កញ្ញាបានលើកឡើងថា កញ្ញាមិនមានការព្រួយបារម្ភចំពោះការរកមុខពីសំណាក់សមត្ថកិច្ចនោះឡើយ ក៏ប៉ុន្តែអ្នកដែលបារម្ភខ្លាំងគឺក្រុមគ្រួសារកញ្ញាវិញនោះទេ។
អភិបាលរងខេត្តកំពង់ចាម និងជាប្រធានដោះស្រាយទំនាស់បាតុកម្មនិងកូដកម្ម លោក ជីម លាវ បានមានប្រសាសន៍នៅថ្ងៃ៥ មករា ថា លោកមិនបានដឹងចំពោះរឿងសមត្ថកិច្ចទៅរកមុខតំណាងកម្មករដល់ផ្ទះនោះទេ។ លោកបន្តថា ខាងលោកបានត្រៀមលក្ខណៈសហការជាមួយតំណាងកម្មករជានិច្ចក្នុងពេលធ្វើបាតុកម្មអហិង្សាដោយមិនមានការបិទផ្លូវដែលធ្វើឱ្យប៉ះពាល់ដល់អ្នកដទៃជាដើម ប៉ុន្តែខាងតំណាងកម្មករមិនបានសហការនោះទេ។ ក្រៅពីនេះ កម្មករភាគច្រើនចង់ចូលធ្វើការដូចដើម ក៏ប៉ុន្តែកាតរបស់ពួកគាត់ត្រូវបានតំណាងកម្មករដកយក ទើបធ្វើឱ្យពួកគាត់ពិបាក ដោយឡែកខាងលោកបានទៅសម្រួលជាមួយរោងចក្ររួចហើយ ដោយឱ្យកម្មករចូលធ្វើការដូចធម្មតាវិញ បើទោះជាគ្មានកាតក៏ដោយ។
លោក ជីម លាវ៖ «ពីម្សិលមិញខ្ញុំបានទៅជួបថៅកែរោងចក្រហើយ ថាបើទោះបីជាមានកាតក៏ដោយអត់កាតក៏ដោយ បានឱ្យកម្មករបានប្រាក់ខែខាងមុខហ្នឹង ហើយរោងចក្រគេថាពិបាកបច្ចេកទេសមួយចំនួនកាលណាអត់កាត។ ហើយការអត់កាតហ្នឹង ថាមេសហជីពគាត់ហ្នឹងដកកាតយកអស់ហើយ ហើយនេះខ្ញុំសម្រួលបានថាថ្ងៃច័ន្ទហ្នឹង ចូលធ្វើការធម្មតាមិនបាច់មានកាតទេ។ អ្នកមានកាតក៏មានទៅ អ្នកអត់កាតក៏អាចធ្វើបានដែរ ហើយការបើកប្រាក់ អាហ្នឹងវាពិបាកបន្តិច កាលណាអត់កាត អ៊ីចឹងមិនដឹងថាថ្ងៃពលកម្មកម្មករយើងធ្វើការបានប៉ុន្មានថ្ងៃៗ ពីព្រោះគេមានម៉ាស៊ីនឆូតកាតគេ»។
លោកបន្តថា នៅខេត្តកំពង់ចាម មានកម្មករមួយចំនួនបានចូលធ្វើការជាធម្មតាវិញហើយ ប៉ុន្តែនៅមានមួយចំនួនទៀតមិនទាន់បានចូលធ្វើការវិញនោះទេ។
ការផ្ទុះបាតុកម្មរបស់កម្មករនៅកំពង់ចាម កើតឡើងប្រហាក់ប្រហែលគ្នាទៅនឹងការធ្វើបាតុកម្មរបស់កម្មករជាច្រើនម៉ឺននាក់ នៅទូទាំងប្រទេស បន្ទាប់ពីមានការសម្រេចដំឡើងប្រាក់ខែគោលពី ៨០ដុល្លារ មក ៩៥ដុល្លា របស់ក្រុមការងារនៃក្រសួងការងារនិងបណ្តុះបណ្តាលវិជ្ជាជីវៈ កាលពីខែធ្នូ ឆ្នាំ២០១៣ កន្លងទៅ។ ហើយការទាមទាររបស់កម្មកររោងចក្រនៅតែបន្ត រហូតមានការបង្រ្កាបជាបន្តបន្ទាប់ ដែលធ្វើឱ្យមានមនុស្សយ៉ាងហោចណាស់ ៥នាក់បានស្លាប់ ជាង ៣០នាក់ផ្សេងទៀតរងរបួស និងមនុស្សជាង ១០នាក់ ត្រូវបានឃុំខ្លួន ក្នុងនោះមានលោក វន់ ពៅ ដែលជាប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធផងដែរ៕
គ្រាន់តែផ្អាក់មួយរយពេលបាន តែកុំបញ្ចប់ហើយកុំបំបែកអារម្មណ៍ ជាពិសេសកុំភ្លេចចំពោះប្រាក់ថ្លៃ
ReplyDeleteឈ្នួល១៦០៛ ដែលជាប្រាក់សំរាប់ផ្គត់ផ្គង់ជីវិតប្រចាំថ្ងៃ ជាពិសេសបំប៉ន់សុខមាលភាព ដែលជាជំនួយ
ដល់ថមពលជីវិតតទៅអនាគត។សូមអរគុណ!